متّا 16
16
1فرئسئلر‌له صادوقئلر یاخینلاشیب، عئسانی ائمتاحان اتمک اوچون اوندان ائسته‌دئلر کی، اونلارا گؤیدن بئر علامت گؤرسدسئن. 2آمّا عئسا اونلارا جاواب ورئب ددی: «آخشام اولاندا دیئرسئنئز کی، ”هاوا ائستی اولاجاق، چونکی گؤی قیزاریبدیر.“ 3سحر واختی دا دیئرسئنئز: ”بو گون کولک اولاجاق، چونکی گؤی قیزارمیش و توتقوندور.“ گؤیون حالینی سچه بئلئرسئنئز، لاکئن زامانین علامتلرئنی سچه بئلمئرسئنئز؟ 4پئس و زئناکار نسئل بئر علامت آختاریر؛ لاکئن اونا یونوس پیغمبرئن علامتئندن باشقا بئر علامت ورئلمه‌یه‌جک.» و اونلاری بوراخیب گتدی.
فرئسئلرئن و صادوقئلرئن خمئرمایاسی
(مرقوس 8:14-21)
5شاگئردلر گؤلون او تایینا کچنده، چؤرک گؤتورمه‌یی یاددان چیخارتمیشدیلار. 6عئسا اونلارا ددی: «دئقّتلی اولون! فرئسئلر و صادوقئلرئن خمئرمایاسیندان اؤزونوزو اوزاق ساخلایین.» 7شاگئردلر آرالاریندا موباحئثه ادئب دیئردئلر: «چؤرک گؤتورمه‌دئیئمئزه گؤره بله دیئر.»
8عئسا بونو باشا دوشوب اونلارا ددی: «ای آز ائمانلی‌لار! نه اوچون چؤرک گؤتورمه‌دئیئنئز حاقدا آرانیزدا موباحئثه ادئرسئنئز؟ 9حله آنلامیرسینیز؟ بش مئن آدام اوچون بش چؤره‌یی و نچه سبد ییغدیغینیزی خاطیرلامیرسینیز؟ 10دؤرد مئن آدام اوچون یدّی چؤره‌یی و نچه زنبئل ییغدیغینیزی دا خاطیرلامیرسینیز؟ 11نجه آنلامیرسینیز کی، من سئزه فرئسئلرئن و صادوقئلرئن خمئرمایاسیندان اؤزونوزو اوزاق ساخلایین دئینده، چؤره‌یی نظرده توتمامیشدیم؟»
12او زامان شاگئردلر آنلادیلار کی، چؤرک مایاسیندان یوخ، فرئسئلرئن و صادوقئلرئن تعلئمئندن اوزاق قالماقلارینی نظرده توتموشدو.
پطروسون مسئحی تانیماسی
(مرقوس 8:27-30، لوقا 9:18-21)
13عئسا فئلئپ قیصرئیّه‌سی طرفلرئنه گلدئیی زامان، اؤز شاگئردلرئندن سوروشدو: «خالق ائنسان اوغلونون کئم اولدوغونو دیئر؟»
14اونلار جاواب وردئلر: «بعضئلری تعمئد ورن یحیا، بعضئلری ائلیا، بعضئلری ده اِرِمیا و یا پیغمبرلردن بئرئسی دیئرلر.»
15عئسا اونلارا ددی: «سئز منئم کئم اولدوغومو دیئرسئنئز؟»
16شمعون پطروس جاواب ورئب ددی: «سن دئری تارینین اوغلو مسئحسن.»
17عئسا اونا ددی: «خوش سنئن حالینا، ای یونا اوغلو شمعون! چونکی بونو سنه بئلدئرن جئسم و قان#16:17 جئسم و قاندان مقصد ائنساندیر. یوخ، گؤیلرده اولان آتامدیر. 18من ده سنه دیئرم کی، سن پطروس‌سان#16:18 پِطروس یعنی ”داش“ و من کئلئسامی بو داش اوستونده بئنا اِده‌جه‌یم و اؤلولر دئیارینین قاپیلاری اونا قالئب گله بئلمه‌یه‌جکلر. 19گؤیلرئن پادشاهلیغینین آچارلارینی سنه وره‌جه‌یم؛ یر اوزونده باغلادیغین هر شی، گؤیلرده باغلانمیش اولور و یر اوزونده آچاجاغین هر شی، گؤیلرده آچیلمیش اولور.» 20او واخت عئسا شاگئردلرئنه جئدّی تاپشیردی کی، اونون مسئح اولدوغونو هچ کسه دمه‌سئنلر.
عئسانین اؤلوب دئرئلمه‌سئنئن خبری
(مرقوس 8:31-9:1، لوقا 9:22-27)
21بو زاماندان عئسا باشلاییب شاگئردلرئنه خبر وردی کی، اونون اورشلئمه گتمه‌سی، آغساقّاللار، باش کاهئنلر، و دئن عالئملرئنئن الئندن چوخ عذاب چکمه‌سی، اؤلدورولمه‌سی، و اوچونجو گونده دئرئلمه‌سی لازیمدیر. 22پطروس اونو بئر یانا چکدی و اعتئراض ادئب ددی: «حاشا آغا! سنئن باشینا بله بئر شی اصلا گلمز!»
23آمّا عئسا دؤنوب پطروسا ددی: «مندن ردّ اول شیطان! سن منی بودره‌دن داشسان، چونکی سنئن فئکئرلرئن تارینین فئکئرلری دیئل، ائنسانین فئکئرلری‌دئر.»
24او زامان عئسا شاگئردلرئنه ددی: «کئم ائسته‌یئر منئم دالیمجا گلسئن، گرک اؤزونو ائنکار اتسئن و چارمیخینی گؤتوروب دالیمجا گلسئن. 25چونکی کئم جانینی خئلاص اتمک ائسته‌سه، اونو ائتئره‌جک؛ لاکئن کئم جانینی منئم یولومدا ائتئرسه، اونو قازاناجاقدیر. 26آداما نه فایداسی وار کی، بوتون دونیایا صاحئب اولسون، آمّا جانینی ائتئرسئن. و یا ائنسان اؤز جانی عوضئنه نه وره بئلر؟ 27چونکی ائنسان اوغلو آتاسینین شؤوکتئنده اؤز ملکلری ائله گله‌جک و او زامان هر کسه اؤز عملئنه گؤره عوض وره‌جک. 28دوغروسونو سئزه دیئرم: بورادا دورانلاردان بعضئسی وار کی، ائنسان اوغلونون اؤز پادشاهلیغیندا گلمه‌سئنی گؤرمه‌دن اؤلومو دادمایاجاق.»
موجودہ انتخاب:
متّا 16: موقدس کتاب
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
© Elam Ministries 2013. All rights reserved.
