لوقا 17
17
آرتیق تعلئملر
(متّا 18:6-7، مرقوس 9:42)
1عئسا شاگئردلرئنه ددی: «مومکون دیئل کی، ائنسانلاری بودره‌دن شیلر گلمه‌سئن. آمّا وای او آدامین حالینا کی، بونلار اونون واسئطه‌سی‌ائله گلئر. 2بو کئچئکلردن بئرئنی بودره‌دن آدام اوچون داها یاخشی او اولاردی کی، بوینونا بئر دیئرمان داشی آسیلیب، دهنزه آتیلسین. 3دئقّتلی اولون. اگر قارداشین سنئن حاقّیندا گوناه اتسه، اونو مزمّت ات و اگر تؤوبه اتسه، اونو باغیشلا. 4و اگر گونده یدّی دفه سنه گوناه اتسه و گونده یدّی دفه قاییدیب سنه ”تؤوبه ادئرم“ دسه، اونو باغیشلامالی‌سان.»
5حوارئلر ربّه ددئلر: «ائمانیمیزی آرتیر.»
6رب ددی: «اگر سئزده بئر خاردال توخومو قدر ائمان اولسایدی، بو توت آغاجینا دئیردئنئز: ”بورادان چیخ و دهنزده اکئل!“ و او، سئزدن ائطاعت اِدَردی. 7سئزلردن کئم جوت سورن و یا چوبانلیق ادن بئر قولونا، زمئدن قاییدان زامان دئیر: ”تز اول، گل سوفره باشیندا اوتور؟“ 8مگر اونا دمز کی، ”منه یمک حاضیرلا و بلئنی باغلاییب منه خئدمت ات کی، ییئب ائچئم. و سونرا سن ییئب ائچرسن؟“ 9اونون امرلرئنی یرئنه یتئردئیی اوچون آیا او، قولدان تشکّور ادر؟ ائنانمیرام. 10ائندی سئز ده، سئزه امر اولونان هر شیی یرئنه یتئرندن سونرا دیئن: ”بئز دَیَرسئز قوللاریق، چونکی او ائشلری اتمئشئک کی، اتمکلری بئزه واجئبدئر.“»
اون جوذاملینین شفاسی
11اورشلئمه گدنده عئسا سامئره ائله جلئلئن آراسینداکی سرحددن کچئردی. 12بئر کنده گئرن زامان اون‌نفر جوذاملی کئشی اونون قاباغینا چیخیب، اوزاقدا دوردولار. 13و اوجا سسله ددئلر: «عئسا، آغا! بئزه یازیغین گلسئن.»
14عئسا اونلاری گؤرَ‌نده ددی: «گدئن، اؤزونوزو کاهئنلره گؤرسدئن.» و یولدا ائکن جوذامدان تمئزله‌ندئلر. 15اونلاردان بئری صاغالدیغینی گؤرنده اوجا سسله تارییا حمد اده-اده قاییتدی 16و اوزو-اوسته عئسانین آیاقلارینا دوشوب، اوندان تشکّور اتدی؛ بو آدام سامئره‌لی ائدی.
17عئسا بونو گؤروب سوروشدو: «مگر جوذامدان تمئز اولانلار اون‌نفر دیئلدئلر؟ بس قالان دوقّوز نفر هارادادیر؟! 18آیا بو قرئبدن باشقا هچ بئری تاپیلمادی کی، قاییدیب تارییا حمد اتسئن؟» 19و او آداما ددی: «دور گت؛ ائمانین سنی خئلاص اتدی.»
تارینین پادشاهلیغینین گلمه‌سی
(متّا 24:23-28، 37-41)
20او زامان کی، فرئسئلر تارینین پادشاهلیغینین نه زامان گله‌جه‌یی باره‌ده سوروشدولار، عئسا اونلارا جاواب ورئب ددی: «تارینین پادشاهلیغی اله بئر شکئلده گلمز کی، گؤزله گؤروله بئلسئن. 21و آداملار دا دمه‌یه‌جکلر کی، ”باخ، بورادادیر“ و یا ”اورادادیر.“ چونکی تارینین پادشاهلیغی سئزئن آرانیزدادیر.»
22و شاگئردلره ددی: «اله گونلر گله‌جک کی، ائنسان اوغلونون گونلرئندن بئرئنی گؤرمک ائستیه‌جکسئنئز، آمّا گؤرمه‌یه‌جکسئنئز. 23و سئزه دئیه‌جکلر ”باخ، بورادادیر“ و یا ”اورادادیر.“ اونلارلا گتمه‌یئن و اونلارین داللارینا دا دوشمه‌یئن! 24چونکی شئمشک گؤیون بئر طرفئندن چاخیب او بئری طرفئنه قدر نجه شاخیر، ائنسان اوغلو دا اؤز گونونده اله اولاجاق. 25آمّا اوّلجه گرکدئر کی، او، چوخ عذاب چکسئن و بو نسئل طرفئندن ردّ اولونسون. 26نوحون گونلرئنده نجه اولدو، ائنسان اوغلونون گونلرئنده ده اله اولاجاق. 27نوحون گمئیه گئردئیی گونه قدر، ائنسانلار ییئردئلر، ائچئردئلر، آرواد آلیردیلار، اره گدئردئلر. سونرا او بؤیوک سل گلئب، هامیسینی محو اتدی. 28لوطون گونلرئنده ده بله اولدو؛ ائنسانلار ییئردئلر، ائچئردئلر، آلیردیلار، ساتیردیلار، اَکئردئلر، تئکئردئلر. 29لاکئن لوطون سودومدان چیخدیغی گون، گؤیدن اود و گوگورد یاغدی و هامیسینی محو اتدی. 30ائنسان اوغلونون ظوهور اده‌جه‌یی گونده ده بله اولاجاق. 31او گونده، اؤزو دامدا، لاکئن اَشیاسی اِوئن ائچئنده اولان آدام اونلاری گؤتورمک اوچون آشاغی انمه‌سئن. اِله‌جه ده زمئده اولان گری دؤنمه‌سئن. 32لوطون آروادینی خاطیرلایین. 33هر کس جانینی حئفظ اتمه‌یه چالیشسا، اونو ائتئره‌جک. و هر کئم جانینی ائتئرسه، اونو حئفظ اده‌جک. 34سئزه دیئرم: او گجه بئر یاتاقدا ائکی نفر اولاجاق؛ بئری گؤتوروله‌جک، و بئرئسی قالاجاق. 35اَل دیئرمانی چکن ائکی آرواد اولاجاق؛ بئری گؤتوروله‌جک و بئرئسی قالاجاق. 36زمئده ائکی نفر اولاجاق؛ بئری گؤتوروله‌جک و بئرئسی قالاجاق.»
37شاگئردلر عئسایا جاواب ورئب ددئلر: «هارادا اولاجاق، یارب؟»
عئسا اونلارا ددی: «لش هارادا اولسا، کرکسلر ده اورایا ییغیلارلار.»
موجودہ انتخاب:
لوقا 17: موقدس کتاب
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
© Elam Ministries 2013. All rights reserved.
