Genesi 17 سے مشہور بائبلی آیات

شئیر

Abrama a diri ni livbandre na mama magumi ni livbandre na mina (99) myaga nya guvelegwe gwaye, PFHUMU Nungungulu a di dzi wonegisa gwaye a gu mu embela, khuye: “Eni kheni Nungungulu nya Tshivba Yatshavbo. Gimbila mbeli gwangu nu lulamide.

Gukhugela olu khu na ranwa gambe pwani Abrama, aholu va na pwani Abrahama, kholu nyi na gu gira nyapandre nya mahundzu nyambana tengo.

Nyi na hunga gidzumeledzwano nago ni situgulwana sago gambe khu mimela ni mimelana; wu na khala pwanano kala gupindruga; khu tshivba nya pwanano wowu, Eni nyi na khala Nungungulu wago ni Nungungulu wa situgulwana sago.

“Pwanano nyi girago nago khoyu: U na khala babe nya mahundzu nyambana tengo.

Aholu, Nungungulu a di mu hakha, khuye: “Khu lisine, mwangadzi wago Sara a na gu ninga gyanana nya gikhwathana; u na gi riya lina nya gupwani khu Isaki. Nyi na tiyisa naye gidzumeledzwano gyangu, gi khala gidzumeledzwano nya gupindruge, nyi na khala Nungungulu waye ni melego waye, hwane gwaye.

Nyi na gu ninga uwe ni situgulwana sago litigo leli u vbanyago umo olu kha nga muwuyi; litigo latshavbo la Khanani li na khala thomba yago kala gupindruga, Eni nyi na khala Nungungulu wawe.”

Abrahama a di noga a dzi thesa vbavbatshi a hega, kholu a di gu ganela khu monyoni gwaye, khuye: “Ina mwama nya lizana (100) myaga a ngari ni tshivba nya gu dzi kodze guvelega gyanana, gani? Ahati Sara a gu na ni livbandre na mana magumi (90) myaga a na velega gyanana, gani?”

Nungungulu a di embela Abrahama, khuye: “Gukhugela olu khu na rana gambe mwangadzi wago khuwe khu Sarayi, aholu, u na mu rana khu lina nya gupwani Sara.

Mu na pilani misutu kha nga giwonegiso nya pwanano wangu nanu.

Aholu gidzumeledzwano gyangu nyi na hunga ni Isaki a na velegwago khu Sara mwaga wutago, khu matshigu nya nga aya.”

Mu na hanisa wugwera sanana sanu satshavbo nya sikhwathana avbo si tshanganisago livbandre na mararu matshigu nya guvelegwe gwawe. Mu na girani kharato vama vatshavbo va na velegwago vbakari gwanu, avo va na velegwago ndrangani, ambari ni valombo gambe mu na gu va rengago khu tengo nya dzitsapawu na siri va lifumbu lanu. Gu vbwetega a hana wugwera oyu a velegwago ndrangani ni oyu nya gurengwe khu dzitsapawu dzago. Kharato, gidzumeledzwano gyangu gi na lowa milini gwanu kha nga gidzumeledzwano nya gupindruge.