Ejagham - 1996 Edition (NT)

Ejagham New Testament © Bible Society of Nigeria and Bible Society of Cameroon, 1996.

Jisos a sî eték í Jeriko a kí chiŋ. Nne nyúp yót a ri áfo nnyo á kamá se Sakiyus. Sakiyus a ri ntûfâm abhə́bhá-ntí-echî yót.
Nji Jisos á chiŋa, nne-ndûm nnyó a kí nok se yê a yén yê, kən noŋ a ri ekîm í nne, ekam é gbʉ́i yê. Nji a noghê á ka yén, a bhéne a jak mbá-ochî a jî gyʉ̂t étí fîk etat a kúmi se yê a yén Jisos, ka tîk a chîŋ mbá ányi.
Nji Jisos a síi ka eji étí njí, a yûŋ amə̂t a kêp ósô, a bhîŋ se, “Sakiyus, bhət bhák wát wát. Égyé n di n ka ka njû eya.”
Sakiyus fə́ne a bhə̂t babhap a kô Jisos a jak ka njû eye na ekpatə́m ogyebhá-ḿbə́ŋé. Chénchén ane mba á yéne ejûm njí á róghe egəmə́m sê, “Nne nnyó a jî ojéné ka njû nyima-obhí.”
Nji á rî ka njû, Sakiyus a rúi ngyím a sə́re Ńtâ Jisos se, “Ńsé, yûk! N kí kirí iyîm ibhámé fép ka ngûm ébháe, n káre eji jə́t mbâ akpák. Ájoé ḿ moe kpe nne, tîk m fê yê ejûm ejê ntə̂m-ntə̂m énî.”
Nji nne nnyó a chorê áno, Jisos a sə́re yê se, “Yûk! Njû eya égyé a sêm, ka we eróŋ a ri eyábhé-mmon Abraham. Echî é rî sê Mmon-i-ntem-nne a bháe owóm ane mba á táne otán, a yim ábho á sém.”


Nji ane á yúgha achot mma á kpik, Jisos a tûp egan a káre ábho. Ka ebhú njí a kpíri Jerusarem, ane mbá á kí kere sê otúi Obhasi ó kə́ bha oróghé. A túbhi egan ejê se, “Ofú bhə́t, nne-ndûm etat ka ndə́p-i-njû otúi a mághe a jak eték eyúp mbá a râp, á jí yîm yê ntûfâm. Kən a bhá ji, a bhîŋ ágbán abhê ófó a káre kpe nnyón ntí etûm í nnyam-ósô ésá. A sə́re ábho se á mə́ŋe ekpak nji á kí yim na ntí mmí, á fôn orʉrí kən yê a bhá.
“Ane eték í nne-ndûm nnyó á bháne yê. Nji a yəbhê a kí ji, á tûm ane á jí sə́ré ane eték áji sê ábho á ká wom yê a joé ntûfâm ábho. Kən á nôk chichi. Nne-ndûm nnyó a jak, ane eték eyúp áji á yîm yê ntûfâm, a chə́bhe njəm. Nji a chəbhê njəm, a bhîŋ ágbán abhê se á bhá tóŋé yê ekpak nji á yími na ntí mmi a karê ábho. Nnyo ndaŋa-mbá a bhâ sə́re yê se, ‘Ńsé, ntí mmi o karê ə̂m, ń yim ḿmə́ne ḿ fon orʉrí ntə̂m ófó.’ Ntûfâm nnyó a sə́re yê se, ‘Ó yim nono, we a ri nnyen i ḿgbán. Ka eji o tóŋe se we kə́n o mə́ŋe ofi mmon ejûm, mfá-mfá n kí yim wâ ntûfâm nnyo nték ófó.’ Enyeré a bhâ sə́re yê se, ‘Ń yim ntí mmi o karê ə̂m ḿ fon orʉrí ntə̂m érôn.’ Ntûfâm a sə́re ḿgbán nnyó se, ‘We tîk o fôn nték eyúp érôn.’
“Kən ḿgbán etat a bhâ sə́re yê se, ‘Ńsé, yên ntí imâ mmi o karê ə̂m. M bə́re ḿmə́ne ka ebhat éfô. M bée bəre n kâ yîm kpe ejûm na ḿmə́ne, ka we a ri nne nnyo ó chubhá ochubhí, kpe ejûm é rô joé ejâ, o kí tabhé, o bhóŋá nji o rô bhe.’ Ntûfâm nnyó a sə́re yê se, ‘We a ri mfoné-mfoné nne mbí. Eyum í nnyo ejâ é yui wâ. Ó məŋe se mme ń chubhá ochubhí, ń tabhá nji cháŋ ejámé, m bóŋá nji ń ka bhe. Jen mân ó ka kak ntí imámé ka njû-ntí nji kə́n n kí fon orʉrí noŋ m báe nná?’ A sə́re mân ane mba á gyím áfo se á tábhe ntí ámi mbâ eye, á káre mbâ nne nnyo a yimá ntí imê ḿ fôn orʉrí ntə̂m ófó. Kən á bhə̂p yê sê, ‘Ńsé, nne nnyo a yimî ntí imê a fôn orʉrí ntə̂m ta ófó, á kí kpo kpe yê a?’ Ntûfâm nnyó se, ‘Deê ń sə́ré ên bəre kpe bhaghé énê nnyo a fonê ofon á kí kpe yê, kən yê nnyo á ka fon, kpe mkpât nnyi a fonê áno, á kí tabhé. Ane-ebhan abhámé mân mba á ká wom nná sê ń jóe ntûfâm, kó ên ábho bhá yúí, mme n yéná.’ ”


Nji a sə́re ábho egan njí, a râŋ mbá a kí ji ka eték í Jerusarem. Nji a síi ka Egui Orif ka eték í Befagi na Betani, a tûm ágbán abhê ábháe na otîp se, “Choŋ ên ka mmon eték nnyo a ri áno mbá-ochî. Ebhú ó si ên ágo, tîk o yên ên ekpak í mfoŋ-anyanyâ etat nnyi eguŋi. Á bhóbhe ńnyə́ne ka étí kən nne á ka nok obhéné. Kpât ên kó bhák. Ebhú nne á bhəp ên se jen é yími kən o kí kpat ên, sə́re ên yê sê ntûfâm a kí wom ńnyə́ne.”
Ágbán mbá á yə̂p á jak á jî yên chénchén iyîm ka ekpak nji Jisos a tíbhi ábho. Ebhú á kí kpat mfoŋ nnyí, afoné á bhə̂p ábho se, “Ó kpará ên mfoŋ ányi jen?”
Á táme sê, “Ńsé owəré a kí wom ńnyə́ne.” Á kô ńnyə́ne á bhak mbâ Jisos. Á kô ḿfô ábho, á sóbhe ńnyə́ne. Á kâk Jisos obhô, a gyʉ̂t, a kúmi, a róghe ejeném a jak. Ane á tûp ḿfô ábho ka mbá nnyi á jená nná.
Nji á kí si Jerusarem, ka eji mbá ń yáre ḿ bə̂t ń jak ebhát Egui Orif, ekpatə́m ekam ane mba á tóbha yê, á róghe Obhasi ekúbhúm, á kugha. Á kûp yê ka chénchén ekpatə́m iyîm mbi ábho á yen. Á kúgha sê,
“Deê enare Ńtâ Obhasi é jóe na Ntûfâm
nnyo a kə́ bha ka mbiŋ eye.
Deê ekone é jóe ka ósô,
ejík é jóe é káre wâ.”
Nji ane mbá á yíma nná iyîm mbí, etʉ̂ ane echəme Farasi mba á rî áfo á sə́re Jisos sê, “Ńsé, sə́re ane abhâ mbá á mághe ejok.”
Kən Jisos a táme ábho se, “Deê ń sə́ré ên bəre ebhú ábho á maghé ejok, arə́m-atáé ka nsi á kí yim.”

Á jên á kə́ bha osí Jerusarem. Ebhú Jisos a yéne eték, nsôn a yîm yê kpe-eji, obhə́bhe ó súi amə̂t. A chôt se, “Á kô sê égyé njí o məŋê nná nne nnyo á kará enare Obhasi eê! Kən a ri nne ebhə̂t mbâ eya. A ri ofú ó kə́ bha mbi ane-ebhan abhâ á kí faré wâ á kâk, á gbê ébhághé-njû á gbʉ́i wâ, kpe mbá á bhó karé. Tîk á bhíbhi wâ á yúi ane chénchén ka eték. Kpe ntáé mfá á bhó kət ngyím, ka ó ka kí echî ó mə́ŋe ebhú nji Obhasi a bháe se yê a bhá yim wâ ó sém.”


Jisos a jî gyê ókʉ́rí achot Obhasi a róghe ebhímím ajená-ogəm. A fámá ábho se, “Á séŋe se Obhasi se njû eye a ri eji á góra yê. Kən ên, ó kpighi ńnyə́ne a chə́bhe njû anyághá-ajʉ̂.” Kpe bhaghé ofú Jisos a ri ka ókʉ́rí mbí a kpík achot Obhasi. Ane-echî akará-agore Obhasi na atóŋá-ebhín na ane-echî ane eték í Jerusarem á noghá mbá nnyi á kí yui yê, kən á ká yen, ka ane chénchén kpe nnyón á woma sê yê a yúk okpígha-ejûm obhê kpe jə́t é kâ chîŋ yê.

سنیں Luk, echî 19