New Testament in Triqui, Copala (MX:trc:Triqui, Copala)

Triqui, Copala

Ga̱a ne̱ caꞌanj nij soꞌ nda̱a níchrej tuꞌva na laguaná yoꞌ, nda̱a rej ya̱nj nij síí “gadareno” a. Dan me se nanij Jesús ga̱ nij síí tucuꞌyón snana̱ soꞌ rque rihoo, ne̱ nu̱ꞌ curiha̱nj ꞌo̱ snóꞌo nu̱u̱ nana̱ chre̱e nimán rque yuꞌuj yuvej rej achinꞌ nii xnangá ta̱j rej yoꞌ, ne̱ cuchiꞌ soꞌ rihaan Jesús a.
Cuꞌyón soꞌ cayáán soꞌ rque yuꞌuj yuvej yoꞌ, ne̱ ne caꞌve̱e nu̱míj nij yuvii̱ ma̱n rej yoꞌ man soꞌ, ne̱ a̱ agaꞌ ne̱ꞌ ne caꞌve̱e nu̱míj nij soꞌ man soꞌ maꞌ. ꞌO̱ se a̱j guun queꞌe̱e̱ ndoꞌo numíj nij yuvii̱ neꞌ do̱ꞌ, agaꞌ ne̱ꞌ do̱ꞌ, man soꞌ, tza̱j ne̱ cuxraꞌ soꞌ agaꞌ ne̱ꞌ, ne̱ caꞌneꞌ soꞌ neꞌ do̱ꞌ, ne̱ a̱ ꞌó yuvii̱ taj quisíj naquiꞌyaj cama̱nj man soꞌ a. Ne̱ niga̱nj me se nuvi̱i niga̱nꞌ cayáán soꞌ rque nij yuꞌuj yuvej do̱ꞌ, va̱j soꞌ tacaan do̱ꞌ, ne̱ caguáj ndoꞌo soꞌ, ne̱ nica̱j soꞌ yahij siha̱a̱ caꞌneꞌ ndoꞌo soꞌ nee̱ man maꞌa̱n soꞌ uún a.
Dan me se ga̱a queneꞌen soꞌ man Jesús se vaa ga̱nꞌ va̱j Jesús, ne̱ cunánj soꞌ nda̱a rej va̱j Jesús, ne̱ quinij ru̱j soꞌ tacóó Jesús, ne̱ nucua̱j ndoꞌo caguáj soꞌ rihaan Jesús, ne̱ cataj soꞌ a:
―A̱j neꞌén ꞌu̱nj se vaa Taꞌni̱j Yaꞌanj Si̱j Uun Chij Doj mé so̱ꞌ, Jesús. Me cheꞌé ꞌnáꞌ so̱ꞌ rej né ꞌu̱nj ga̱. Rqueé ꞌu̱nj man so̱ꞌ niꞌya̱j Yaꞌanj se vaa se̱ quiꞌyáá so̱ꞌ sayuun manj maꞌ ―taj síí nu̱u̱ nana̱ chre̱e nimán a.
Da̱nj caꞌmii soꞌ cheꞌé se a̱j cataj Jesús rihaan soꞌ a:
―Rihaan so̱ꞌ na̱na̱ chre̱e nu̱u̱ nimán síí nihánj aꞌnéꞌ ꞌu̱nj suun se vaa cu̱riha̱nj so̱ꞌ nimán síí nihánj á ―taj Jesús a.
Ga̱a ne̱ xnáꞌanj Jesús man nana̱ chre̱e a:
―Da̱j cuꞌna̱j so̱ꞌ ga̱ ―taj Jesús a.
Ga̱a ne̱ cataj nana̱ chre̱e rihaan Jesús a:
―Xꞌneꞌ noco̱o cuꞌna̱j núj, cheꞌé se queꞌe̱e̱ ndoꞌo núj á ―taj nana̱ chre̱e a.
Ne̱ rquee̱ nij nana̱ chre̱e yoꞌ rihaan Jesús se vaa a̱ doj se̱ caꞌnéé Jesús man nij nana̱ chre̱e nda̱a ꞌó rej yaníj maꞌ.
Dan me se rej tacaan rej nicu̱nꞌ nij soꞌ me se chéé ꞌo̱ xꞌneꞌ noco̱o xcáá, chá nij xoꞌ coj, ga̱a ne̱ rquee̱ nij nana̱ chre̱e man Jesús, cataj nij soꞌ a:
―Caꞌne̱j so̱ꞌ man núj catu̱u̱ núj nimán nij xcáá á ―taj nij nana̱ chre̱e a.
Ga̱a ne̱ caꞌvej rá Jesús quiꞌya̱j nij soꞌ da̱nj, ga̱a ne̱ curiha̱nj nij soꞌ nimán snóꞌo yoꞌ ne̱ catúj nij soꞌ nimán nij xcáá a. Ne̱ ruva̱a̱ uxrá tacaan nicu̱nꞌ tuꞌva na laguaná rej va̱j nij xcáá yoꞌ, ne̱ ga̱a catúj nij nana̱ chre̱e yoꞌ nimán nij xcáá yoꞌ, ga̱a ne̱ cunánj ndoꞌo nij xoꞌ, ne̱ quinij nij xoꞌ rque na, ne̱ canó xráá nij xoꞌ na̱nj ado̱nj. Ne̱ vi̱j míj xcáá caviꞌ ta̱ꞌ asuun a.
Ne̱ nij síí tumé nij xcáá roꞌ, cunánj nij soꞌ nataꞌ nij soꞌ rihaan nij yuvii̱ ma̱n chumanꞌ do̱ꞌ, rihaan nij yuvii̱ ma̱n tacaan do̱ꞌ a. Dan me se caꞌnaꞌ ni̱ꞌyaj nij yuvii̱ se vaa guun, ne̱ caꞌnaꞌ nij soꞌ rihaan Jesús, ne̱ queneꞌen nij soꞌ man síí curiha̱nj nana̱ chre̱e nimán a. A̱j nanuû soꞌ saga̱nꞌ soꞌ, ne̱ dínj ne soꞌ rihaan Jesús a. Ne̱ a̱j tiꞌinj se snúú soꞌ, ne̱ nuu sa̱ꞌ soꞌ a. Ga̱a ne̱ cuchuꞌviꞌ ndoꞌo nij yuvii̱ a. Ga̱a ne̱ nataꞌ nij síí queneꞌen yoꞌ rihaan ꞌó nij yuvii̱ da̱j quiꞌyaj Jesús cheꞌé síí cunuû nana̱ chre̱e nimán do̱ꞌ, da̱j quiranꞌ nij xcáá do̱ꞌ, ga̱a ne̱ guun cheꞌe̱ nij yuvii̱ rquee̱ nij yuvii̱ man Jesús se vaa cu̱riha̱nj soꞌ rej ya̱nj nij soꞌ caꞌa̱nj soꞌ rej yaníj a.
Cheꞌé dan cavii Jesús rque rihoo chéé rihaan na, ga̱a ne̱ rquee̱ síí curiha̱nj nana̱ chre̱e nimán man Jesús se vaa caꞌve̱j rá Jesús caꞌa̱nj soꞌ ga̱ Jesús a. Tza̱j ne̱ ne caꞌve̱j rá Jesús caꞌa̱nj soꞌ ga̱ Jesús maꞌ. Tana̱nj cataj Jesús rihaan soꞌ a:
―Cavi̱i̱ so̱ꞌ nánꞌ so̱ꞌ veꞌ tucuá so̱ꞌ rej ya̱nj nij tuvíꞌ so̱ꞌ, ne̱ cata̱j xnaꞌanj so̱ꞌ rihaan nij soꞌ nu̱ꞌ rasu̱u̱n noco̱o quiꞌyaj Yaꞌanj Si̱j ꞌNi̱j Raꞌa man níꞌ cheꞌé so̱ꞌ, ne̱ da̱j vaa cunuu ꞌe̱e̱ rá Yaꞌanj niꞌya̱j Yaꞌanj mán so̱ꞌ á ―taj Jesús a.
Ga̱a ne̱ caꞌanj síí curiha̱nj nana̱ chre̱e nimán, ne̱ guun cheꞌe̱ soꞌ caꞌmii natáj soꞌ rihaan nij yuvii̱ ma̱n rej cuꞌna̱j Chi̱ꞌ Chumanꞌ, ne̱ cataj xnaꞌanj soꞌ nu̱ꞌ rasu̱u̱n noco̱o quiꞌyaj Jesús cheꞌé soꞌ a. Ne̱ caꞌanj ndoꞌo rá cunuda̱nj nij yuvii̱ cuno snana̱ soꞌ a.

Dan me se nu̱u̱ Jesús rque rihoo chéé rihaan na, ne̱ caꞌanj uún soꞌ nda̱a níchrej tuꞌva na laguaná, ga̱a ne̱ cunuu chre̱ꞌ ri̱i̱ uxrá yuvii̱ rihaan soꞌ, ne̱ va̱j soꞌ tuꞌva na laguaná a. Ga̱a ne̱ caꞌnaꞌ ꞌo̱ nij síí ꞌni̱j raꞌa veꞌ tucuꞌyón nij yuvii̱ israelitá stucua̱nj Moisés, ne̱ Jairo cuꞌna̱j soꞌ a. Dan me se queneꞌen soꞌ man Jesús, ga̱a ne̱ quinij ru̱j soꞌ tacóó Jesús, ga̱a ne̱ rquee̱ uxrá soꞌ man Jesús, ne̱ dan me se cataj soꞌ a:
―Taꞌníj chala̱ cunii roꞌ, ranꞌ ndoꞌo noꞌ, ne̱ da̱j doj cavi̱ꞌ noꞌ, ne̱ me rá ꞌu̱nj cuchi̱ꞌ so̱ꞌ veꞌ tucuaj, ne̱ cuta̱ꞌ so̱ꞌ raꞌá so̱ꞌ raa̱ noꞌ cheꞌé yan nahu̱un sa̱ꞌ noꞌ, ne̱ se̱ caviꞌ noꞌ, qui̱ꞌyáá so̱ꞌ maꞌ ―taj Jairo rihaan Jesús a.
Ga̱a ne̱ caꞌanj Jesús ga̱ soꞌ, ne̱ canocoꞌ ri̱i̱ uxrá yuvii̱ man ro̱j soꞌ, ne̱ nda̱a xraan maꞌa̱n chrej va̱j yuvii̱ ga̱ soꞌ a.
Dan me se scaꞌnúj nij soꞌ va̱j ꞌo̱ chana̱ ranꞌ ndoꞌo, ne̱ quisíj chuvi̱j ya̱ yoꞌ xraꞌ ton man noꞌ a. Ne̱ a̱j quiranꞌ ndoꞌo noꞌ sayuun, quiꞌyaj queꞌe̱e̱ nij doctor naquiꞌyaj conoꞌó man yuvii̱, ne̱ a̱j cutunꞌ noꞌ cunuda̱nj saꞌanj vaa rihaan noꞌ, tza̱j ne̱ taj se quiꞌyáꞌ a̱ doj nahu̱un sa̱ꞌ noꞌ a̱ maꞌ. Tana̱nj doj a̱ ranꞌ noꞌ na̱nj ado̱nj. Ga̱a ne̱ a̱j cuchiꞌ nana̱ rihaan noꞌ cheꞌé Jesús, ne̱ cheꞌé dan caꞌnaꞌ noꞌ scaꞌnúj nij yuvii̱ rej xco̱ Jesús, ga̱a ne̱ canó raꞌa noꞌ do̱j tuꞌva saga̱nꞌ soꞌ a. ꞌO̱ se guun rá noꞌ a: “Sese cano̱ raꞌa cuánꞌ ꞌu̱nj saga̱nꞌ Jesús, ne̱ nahu̱un sa̱ꞌ ꞌu̱nj na̱nj ado̱nj”, guun rá noꞌ a. Dan me se síj canó raꞌa noꞌ saga̱nꞌ Jesús, ga̱a ne̱ nu̱ꞌ canicunꞌ ton man noꞌ cuaj a. Ne̱ queneꞌen noꞌ se vaa nahuun sa̱ꞌ noꞌ, quiꞌyaj Jesús a. Dan me se nu̱ꞌ canó raꞌa noꞌ saga̱nꞌ Jesús, ne̱ nu̱ꞌ xcaj Jesús cuentá se vaa nahuun sa̱ꞌ yuvii̱ quiꞌyaj snucua̱j soꞌ a. Cheꞌé dan canica̱j soꞌ, ne̱ xnáꞌanj soꞌ a:
―Me síí canó raꞌa saga̱nꞌ ꞌu̱nj ga̱ ―taj soꞌ a.
Ga̱a ne̱ cataj nij síí tucuꞌyón snana̱ Jesús a:
―Neꞌén so̱ꞌ se vaa xraan ndoꞌo va̱j nij yuvii̱ ga̱ so̱ꞌ, ne̱ me cheꞌé xnáꞌanj so̱ꞌ me síí canó raꞌa saga̱nꞌ so̱ꞌ ga̱ ―taj nij soꞌ a.
Ga̱a ne̱ canica̱j Jesús, me rá soꞌ queneꞌe̱n soꞌ me síí canó raꞌa tuꞌva saga̱nꞌ soꞌ a. Ne̱ dan me se cuchuꞌviꞌ ndoꞌo noꞌ ne̱ nda̱a riꞌíj man noꞌ, ne̱ a̱j neꞌen noꞌ se vaa nahuun sa̱ꞌ noꞌ a. Ga̱a ne̱ caꞌanj noꞌ, ne̱ quinij ru̱j noꞌ tacóó Jesús, ne̱ cataj ya̱ noꞌ rihaan Jesús nu̱ꞌ se vaa quiꞌyaj noꞌ a. Ga̱a ne̱ cataj Jesús rihaan noꞌ a:
―Nahuún so̱ꞌ cheꞌé se amán rá so̱ꞌ niꞌya̱j so̱ꞌ manj, nocoj. Veꞌé caꞌa̱nj so̱ꞌ, ne̱ dínj ga̱a̱ nimán so̱ꞌ á. Ga̱a̱ nu̱cuáá so̱ꞌ, cheꞌé se a̱j xꞌnéj nu̱ꞌ chiꞌii̱ yoꞌ xráá so̱ꞌ na̱nj á ―taj Jesús a.
Ataa navi̱j caꞌmii Jesús, ne̱ caꞌnaꞌ ꞌo̱ síí cavii tucuá Jairo, ne̱ cataj soꞌ rihaan Jairo a:
―A̱j caviꞌ taꞌnij cha̱na̱ so̱ꞌ, ne̱ taj cheꞌé cara̱a̱ chrúú so̱ꞌ rihaan maestró a̱ maꞌ ―taj síí caꞌnaꞌ yoꞌ a.
Dan me se cuno Jesús nana̱ caꞌmii síí caꞌnaꞌ, ga̱a ne̱ cataj soꞌ rihaan Jairo a:
―Se̱ cuchuꞌvíꞌ so̱ꞌ maꞌ. Ma̱an se cuchuma̱n ya̱ rá so̱ꞌ ni̱ꞌyaj so̱ꞌ manj á ―taj Jesús a.
Dan me se ne caꞌve̱j rá Jesús canoco̱ꞌ a̱ doj nij yuvii̱ man soꞌ, ne̱ ma̱an Pedró do̱ꞌ, Jacobo do̱ꞌ, Juan tinúú Jacobo do̱ꞌ, caꞌvej soꞌ canoco̱ꞌ man soꞌ a. Ga̱a ne̱ cuchiꞌ soꞌ rihaan veꞌ tucuá Jairo, ne̱ queneꞌen Jesús se vaa taꞌvee aguáj nij yuvii̱ ma̱n rá veꞌ a. Ga̱a ne̱ catúj Jesús rá veꞌ, ne̱ cataj soꞌ rihaan nij yuvii̱ a:
―Me cheꞌé taꞌvee aguáj nij soj ga̱. Ne cavi̱ꞌ chala̱ cunii nihánj maꞌ. Ma̱an se otoj u̱u̱n noꞌ na̱nj á ―taj Jesús a.
Ga̱a ne̱ caꞌngaꞌ naco̱o̱ nij yuvii̱ niꞌya̱j nij yuvii̱ man Jesús a. Tza̱j ne̱ quirii Jesús man cunuda̱nj nij yuvii̱ xeꞌ, ga̱a ne̱ nica̱j soꞌ man ro̱j rej chala̱ cunii do̱ꞌ, man vaꞌnu̱j nij síí caꞌnaꞌ ga̱ soꞌ do̱ꞌ, ne̱ catúj soꞌ rá cuartó na̱j chala̱ cunii yoꞌ a.
Ga̱a ne̱ taꞌaa Jesús raꞌa chala̱ cunii, ne̱ cataj soꞌ rihaan noꞌ a:
―Talita, cumi ―taj soꞌ rihaan noꞌ xnaꞌánj aꞌmii maꞌa̱n soꞌ a. Ne̱ nana̱ yoꞌ me raj cata̱a a: Na̱xaga̱a̱ so̱ꞌ, chala̱ cunii, taj nana̱ caꞌmii Jesús rihaan noꞌ a.
Nu̱ꞌ caꞌmii Jesús nana̱ vaa da̱nj, ne̱ nu̱ꞌ naxaga̱a̱ chala̱ cunii yoꞌ, chéé noꞌ cuaj a.
Ne̱ chuvi̱j yoꞌ va̱j noꞌ a.
Ne̱ nij síí queneꞌen roꞌ, caꞌanj ndoꞌo rá nij soꞌ a. Ga̱a ne̱ caꞌneꞌ uxrá Jesús suun rihaan nij soꞌ a:
―A̱ ꞌó yuvii̱ se̱ cataj xnaꞌanj nij soj rihaan da̱j quiꞌyáj cheꞌé chala̱ cunii maꞌ ―taj Jesús a.
Ne̱ cataj soꞌ se vaa rque̱ nii se chá cha̱ noꞌ a.

سنیں San Marcos 5