New Testament in Triqui, Copala (MX:trc:Triqui, Copala)

Triqui, Copala

Na̱nj vaa guun cheꞌe̱ nana̱ sa̱ꞌ cheꞌé Jesús Si̱j Caꞌnéé Yaꞌanj Ti̱nanii man Yuvii̱ rihaan Sayuun, Taꞌníí maꞌa̱n Yaꞌanj a.
Dan me se síí cuꞌna̱j Isaías síí nataꞌ snana̱ Yaꞌanj ga̱a naá roꞌ, cachrón soꞌ nana̱ nihánj rihaan yanj a:
Ni̱ꞌyaj soj á.
Vaa síí caꞌanj suun cheꞌé ꞌu̱nj,
ne̱ caꞌne̱j ꞌu̱nj man soꞌ quita̱j ya̱a̱n soꞌ rihaan so̱ꞌ,
ne̱ nuchra̱nꞌ nimán yuvii̱ veꞌé caꞌmi̱i̱ nij yuvii̱ ga̱ so̱ꞌ, quiꞌya̱j soꞌ a.
Nucua̱j ndoꞌo caꞌmi̱i̱ natáj ꞌo̱ soꞌ rej tacaan,
ne̱ cata̱j soꞌ a:
“Naquiꞌya̱j sa̱ꞌ soj chrej
cheꞌé se caꞌna̱ꞌ Síí ꞌNi̱j Raꞌa man níꞌ á.
Naquiꞌya̱j nica̱ soj chrej anica̱j cache̱n soꞌ á.”
Dan me nana̱ cachrón Isaías rihaan yanj ga̱a naá nana̱ taj xnaꞌanj cheꞌé Juan a.
Dan me se cavii síí cuꞌna̱j Juan Síí Cutaꞌ Ne man yuvii̱, ne̱ va̱j soꞌ rej tacaan a. Ne̱ caꞌmii natáj soꞌ rihaan nij yuvii̱, cataj soꞌ se vaa cata̱ꞌ ne nij yuvii̱ cheꞌé yan ti̱haa̱n nij soꞌ se vaa ya̱ nuchranꞌ nimán nij soꞌ ne̱ tanáj nij soꞌ chrej chiꞌi̱i̱, ne̱ caꞌve̱e tinavi̱j Yaꞌanj cacunꞌ tumé nij soꞌ, taj Juan ado̱nj. Ne̱ dan me se curiha̱nj uxrá ya̱ nij yuvii̱ ma̱n estadó Judea do̱ꞌ, ma̱n maꞌa̱n chumanꞌ Jerusalén do̱ꞌ, caꞌnaꞌ nij yuvii̱ rihaan Juan, ne̱ nataꞌ ya̱ nij yuvii̱ cheꞌé cacunꞌ tumé nij yuvii̱, ga̱a ne̱ cataꞌ ne nij yuvii̱ rá chráá cuꞌna̱j Jordán, quiꞌyaj Juan ado̱nj.
Dan me se Juan roꞌ, nu̱u̱ soꞌ yatzéj cutziin xcuu camelló, ne̱ ꞌni̱j catuu̱n soꞌ ꞌo̱ nuj, ne̱ na̱nj chá soꞌ rquíí chá soꞌ catziꞌ xtaan ma̱n quij chá soꞌ a. Ne̱ caꞌmii natáj soꞌ cataj soꞌ a:
―Vaa ꞌó síí caꞌna̱ꞌ, ne̱ si̱j nucua̱j doj me soꞌ rihanj, ne̱ ꞌu̱nj nihánj me se a̱j ne nó xcúnj na̱chej nuj correá ꞌni̱j tacanj soꞌ maꞌ. Síí utaꞌ ne na u̱u̱n man soj mej, tza̱j ne̱ caꞌna̱ꞌ soꞌ, ne̱ cuta̱ꞌ ne soꞌ nimán soj ga̱ maꞌa̱n Nimán Yaꞌanj ado̱nj ―taj Juan a.

Ne̱ güii yoꞌ ta̱ꞌ asuun me se cavii Jesús chumanꞌ Nazaret chumanꞌ na̱j estadó Galilea caꞌanj soꞌ rej caꞌmii natáj Juan, ne̱ cataꞌ ne soꞌ rá chráá Jordán, quiꞌyaj Juan a. Nu̱ꞌ curiha̱nj uún Jesús rque na, ne̱ nu̱ꞌ queneꞌen soꞌ se vaa naxraꞌ rej xta̱ꞌ, ne̱ queneꞌen soꞌ se vaa nanij Nimán Yaꞌanj xráá maꞌa̱n soꞌ, ne̱ ase vaa chaꞌaa̱n roꞌ, vaa Nimán Yaꞌanj, curuviꞌ soꞌ a. Ga̱a ne̱ rej xta̱ꞌ caꞌmii Yaꞌanj ga̱ Jesús ne̱ cataj soꞌ a:
―Taꞌníí ꞌu̱nj síí ꞌe̱e̱ ndoꞌo raj man mé so̱ꞌ, ne̱ aranꞌ ndoꞌo raj niꞌya̱j ꞌu̱nj mán so̱ꞌ ado̱nj ―taj nana̱ cavii rej xta̱ꞌ a.

Ne̱ dan me se nu̱ꞌ caꞌanj Jesús rej tacaan, quiꞌyaj Nimán Yaꞌanj a. Ne̱ vi̱j chiha̱a̱ ya̱ güii cunuû soꞌ rej tacaan, ne̱ nanoꞌ ndoꞌo Síí Chre̱e da̱j quiꞌya̱j soꞌ quini̱j Jesús rihaan cacunꞌ, tza̱j ne̱ ne quiꞌya̱j canaán Síí Chre̱e maꞌ. Ne̱ cunuû Jesús rej ma̱n xcuu yuva̱a̱, ne̱ tumé nij se‑mo̱zó Yaꞌanj man soꞌ a.

Dan me se ga̱a quisíj caxríj nij tanuu tagaꞌ man síí cuꞌna̱j Juan, ne̱ caꞌanj Jesús estadó cuꞌna̱j Galilea, ne̱ caꞌmii natáj soꞌ snana̱ Yaꞌanj nana̱ sa̱ꞌ, ne̱ cataj soꞌ a:
―A̱j quisíj güii, ne̱ a̱j nichrunꞌ se vaa gu̱un chij Yaꞌanj ado̱nj. Cheꞌé dan nuchra̱nꞌ nimán soj, ne̱ cuchuma̱n rá soj cuno̱ soj snana̱ Yaꞌanj nana̱ sa̱ꞌ á ―taj Jesús a.

ꞌO̱ güii cachén Jesús tuꞌva na laguaná cuꞌna̱j Galilea, ne̱ queneꞌen soꞌ síí cuꞌna̱j Simón ga̱ tinúú Simón síí cuꞌna̱j Andrés, ne̱ dan me se tiguíj ro̱j soꞌ nanj rque na, cheꞌé se síí rii xcuaj me ro̱j soꞌ a. Ga̱a ne̱ cataj Jesús rihaan ro̱j soꞌ a:
―Canoco̱ꞌ ro̱j so̱j manj á. ꞌO̱ se síí naquiꞌyaj chre̱ꞌ xcuaj me ro̱j so̱j, tza̱j ne̱ rej riha̱a̱n níꞌ me se gu̱un ro̱j so̱j síí naquiꞌyaj chre̱ꞌ yuvii̱, qui̱ꞌyáj, ne̱ canoco̱ꞌ nij yuvii̱ manj a ―taj Jesús a.
Ne̱ nu̱ꞌ tanáj ro̱j soꞌ xnánj ro̱j soꞌ, ne̱ canocoꞌ ro̱j soꞌ man Jesús, caꞌanj ro̱j soꞌ na̱nj ado̱nj.
Veé dan, ne̱ cachéé nij soꞌ doj, ga̱a ne̱ queneꞌen Jesús man síí cuꞌna̱j Jacobo taꞌníí síí cuꞌna̱j Zebedeo do̱ꞌ, man tinúú Jacobo síí cuꞌna̱j Juan do̱ꞌ a. Dan me se nu̱u̱ ro̱j soꞌ rque rihoo chéé rihaan na, ne̱ naquiꞌyaj sa̱ꞌ ro̱j soꞌ nanj rii xcuaj, ne̱ canacúún Jesús man ro̱j tinu̱j ro̱j soꞌ canoco̱ꞌ ro̱j soꞌ man Jesús a. Veé dan, ne̱ tanáj ro̱j soꞌ man rej ro̱j soꞌ Zebedeo rá rihoo ga̱ nij se‑mo̱zó soꞌ, ga̱a ne̱ canocoꞌ ro̱j soꞌ man Jesús, caꞌanj ro̱j soꞌ na̱nj ado̱nj.

Dan me se catúj nij soꞌ chumanꞌ Capernaum, ne̱ da̱j a̱ cueta̱nꞌ güii naránj rá nij yuvii̱ israelitá caꞌanj Jesús veꞌ tucuꞌyón nij soꞌ stucua̱nj Moisés, ne̱ tucuꞌyón soꞌ snana̱ Yaꞌanj man nij yuvii̱ a. Ne̱ caráyaꞌa̱nj nij yuvii̱ cheꞌé stucua̱nj soꞌ, cheꞌé se cu̱u doj tucuꞌyón soꞌ rihaan nij síí naquiꞌyaj cu̱u stucua̱nj Moisés a. ꞌO̱ se ase vaa aꞌmii ꞌo̱ síí uun chij ndoꞌo roꞌ, da̱nj caꞌmii soꞌ a.
Ne̱ dan me se ꞌo̱ güii naránj rá yáán ꞌo̱ síí nu̱u̱ nana̱ chre̱e nimán rá veꞌ yoꞌ, ne̱ caguáj soꞌ a:
―Jesús si̱j cavii Nazaret, me cheꞌé raꞌyunj so̱ꞌ man núj ga̱. ꞌNáꞌ so̱ꞌ ti̱ríꞌ so̱ꞌ man núj naꞌ. Neꞌenj mán so̱ꞌ se vaa Síí Sa̱ꞌ Ina̱nj cavii rihaan Yaꞌanj mé so̱ꞌ ado̱nj ―taj soꞌ quiꞌyaj nana̱ chre̱e nu̱u̱ nimán soꞌ a.
Ga̱a ne̱ caxríj yuva̱a̱ Jesús man nana̱ chre̱e nu̱u̱ nimán snóꞌo yoꞌ, cataj soꞌ a:
―Dínj tuꞌvá so̱ꞌ, cu̱riha̱nj so̱ꞌ cuaj nimán síí nihánj á ―taj Jesús a.
Nda̱a quisnúú maꞌa̱n snóꞌo yoꞌ, quiꞌyaj nana̱ chre̱e, ne̱ nucua̱j ndoꞌo caguáj nana̱ chre̱e, ne̱ curiha̱nj nana̱ chre̱e nimán snóꞌo yoꞌ a. Ga̱a ne̱ caꞌanj uxrá rá nij yuvii̱, ne̱ xnáꞌanj nij yuvii̱ man tuviꞌ nij yuvii̱, cataj nij yuvii̱ a:
―Asa̱ꞌ caꞌvee quiꞌyaj soꞌ da̱nj ga̱. Tucuáán naca̱ me nihánj chugua̱nj. ꞌO̱ se guun chij ndoꞌo síí nihánj, ne̱ nda̱a rihaan nij nana̱ chre̱e aꞌneꞌ síí nihánj suun da̱j quiꞌya̱j nij soꞌ, ne̱ uno nij nana̱ chre̱e yoꞌ rihaan soꞌ asânj ―taj nij yuvii̱ rihaan tuviꞌ nij yuvii̱ a.
Ga̱a ne̱ cuaj chaꞌnuu̱ nana̱ rihaan cunuda̱nj nij yuvii̱ ma̱n nichru̱nꞌ estadó Galilea yoꞌ cheꞌé da̱j quiꞌyaj Jesús a.

Dan me se curiha̱nj nij tuvi̱ꞌ Jesús rá veꞌ tucuꞌyón nii stucua̱nj Moisés, ga̱a ne̱ catúj ta̱ranꞌ nij soꞌ rá veꞌ tucuá Simón ga̱ Andrés, ne̱ ꞌnaꞌ Juan ga̱ Jacobo ga̱ nij soꞌ a. Dan me se na̱j nii che̱j Simón cheꞌé se ranꞌ noꞌ chiꞌii̱ nacaa yuva̱a̱, ne̱ cataj xnaꞌanj ꞌo̱ nij soꞌ rihaan Jesús se vaa ranꞌ uxrá noꞌ a. Ga̱a ne̱ cuchiꞌ Jesús rej na̱j noꞌ, ne̱ canó soꞌ raꞌa noꞌ, ne̱ naxca̱j soꞌ man noꞌ, ne̱ naxaga̱a̱ noꞌ, ne̱ nu̱ꞌ xꞌnéj chiꞌii̱ nacaa xráá noꞌ, quiꞌyaj Jesús a. Ne̱ veé ma̱an orá dan quiꞌyaj chuvi̱i noꞌ cha̱ nij soꞌ na̱nj ado̱nj.

Dan me se cataꞌ güii, ne̱ tiꞌnuu, ne̱ nica̱j nij yuvii̱ cunuda̱nj tuviꞌ nij yuvii̱ síí ranꞌ do̱ꞌ, síí nu̱u̱ nana̱ chre̱e nimán do̱ꞌ, va̱j nij yuvii̱ rej ya̱nj Jesús a. Ne̱ dan me se queꞌe̱e̱ ndoꞌo nij yuvii̱ ma̱n chumanꞌ Capernaum yoꞌ nuu chre̱ꞌ rihaan taꞌyaa veꞌ ya̱nj Jesús a. Ga̱a ne̱ nahuun sa̱ꞌ queꞌe̱e̱ ndoꞌo nij síí ranꞌ da̱j a̱ chiꞌii̱, quiꞌyaj Jesús, ne̱ quirii ndoꞌo soꞌ nana̱ chre̱e nimán nij yuvii̱, ne̱ caꞌneꞌ soꞌ suun rihaan nij nana̱ chre̱e se vaa se̱ caꞌmii nij nana̱ chre̱e a̱ doj nana̱ cheꞌé se vaa neꞌen nij nana̱ chre̱e me si̱j me Jesús a.

Ga̱a ne̱ rej taxre̱j naxaga̱a̱ Jesús, ne̱ cavii soꞌ chumanꞌ Capernaum, ne̱ caꞌanj soꞌ rej tacaan ne̱ cachíín niꞌya̱j soꞌ rihaan Yaꞌanj a. Ga̱a ne̱ nanoꞌ nij tuvi̱ꞌ Simón man soꞌ, ga̱a ne̱ nariꞌ nij soꞌ man soꞌ, ne̱ cataj nij soꞌ rihaan soꞌ a:
―Cunuda̱nj nij yuvii̱ nanoꞌ mán so̱ꞌ á ―taj nij soꞌ a.
Ga̱a ne̱ cataj Jesús rihaan nij soꞌ a:
―Cavi̱i̱ níꞌ rej nihánj, caꞌa̱nj níꞌ ꞌó nij chumanꞌ na̱j nichru̱nꞌ, ne̱ caꞌmi̱i̱ natáj ꞌu̱nj snana̱ Yaꞌanj rihaan nij yuvii̱ ma̱n ꞌó nij chumanꞌ uún á. ꞌO̱ se cheꞌé dan caꞌnáꞌ ꞌu̱nj ado̱nj ―taj Jesús a.
Ga̱a ne̱ caꞌanj soꞌ nu̱ꞌ nij chumanꞌ na̱j estadó Galilea, ne̱ caꞌmii natáj soꞌ rá veꞌ tucuꞌyón nij síí israelitá ma̱n nij chumanꞌ yoꞌ stucua̱nj Moisés, ne̱ quirii soꞌ man nij nana̱ chre̱e nu̱u̱ nimán yuvii̱ a.

Ga̱a ne̱ caꞌnaꞌ ꞌo̱ síí ranꞌ luj riꞌyuj, ne̱ caꞌanj ca̱yáán ru̱j soꞌ tacóó Jesús, ne̱ cachíín niꞌya̱j soꞌ rihaan Jesús a:
―Sese me rá so̱ꞌ, ne̱ caꞌve̱e naquiꞌya̱j sa̱ꞌ so̱ꞌ manj á ―taj soꞌ a.
Ga̱a ne̱ cunuu ꞌe̱e̱ rá Jesús man soꞌ, ne̱ canó raꞌa Jesús man soꞌ, ne̱ cataj Jesús a:
―Me raj qui̱ꞌyáj da̱nj á. Nahu̱un sa̱ꞌ so̱ꞌ qui̱ꞌyáj ado̱nj ―taj Jesús a.
Nu̱ꞌ cataj Jesús da̱nj, ne̱ nu̱ꞌ navij luj riꞌyuj xráá síí ranꞌ, ne̱ nahuun sa̱ꞌ soꞌ cuaj a.
Ga̱a ne̱ caꞌmii nucua̱j Jesús ga̱ soꞌ, ne̱ quirii Jesús man soꞌ rá veꞌ, ne̱ cataj Jesús rihaan soꞌ a:
―Se̱ guun cata̱j xnaꞌanj so̱ꞌ a̱ doj nana̱ rihaan a̱ ꞌó yuvii̱ maꞌ. Ma̱an se caꞌa̱nj so̱ꞌ rihaan xrej, ne̱ ti̱haán so̱ꞌ mán so̱ꞌ rihaan xrej se vaa nahuún so̱ꞌ, quiꞌyaj Yaꞌanj, ne̱ rque̱ so̱ꞌ rihaan Yaꞌanj nda̱a vaa cataj síí cuꞌna̱j Moisés ga̱a naá nda̱a vaa no̱ xcúún so̱ꞌ rque̱ so̱ꞌ rihaan Yaꞌanj cheꞌé yan nahuún so̱ꞌ ado̱nj. Ga̱a ne̱ xca̱j nii cuentá se vaa nahuun yá yá so̱ꞌ ado̱nj ―taj Jesús a.
Tza̱j ne̱ curiha̱nj síí nahuun yoꞌ, ne̱ guun cheꞌe̱ soꞌ caꞌmii natáj ndoꞌo soꞌ da̱j guun, ga̱a ne̱ chaꞌnuu̱ ndoꞌo nana̱ se vaa nahuun soꞌ quiꞌyaj Jesús a. Ne̱ dan me se a̱ doj ne caꞌve̱e catu̱u̱ ranga̱ꞌ Jesús rque nij chumanꞌ, quiꞌyaj nij nana̱ yoꞌ, ne̱ ina̱nj rej tacaan va̱j soꞌ, ne̱ canó nij yuvii̱ cuchiꞌ rej va̱j soꞌ a.

سنیں San Marcos 1