If you have would like a copy of this version please contact info@davaraudiobibles.org

The Dawro Bible, CC-BY-SA-4.0, The Word for the World International and The Word for the World Ethiopia (Text). Dawro Audio Bible, CC-BY-SA-4.0, Davar Partners International, 2018. (Audio).

ጌሻ ማጻፋ

ሄዋፐ ጉየ፥ የሱስ ጋሊላን ያ ሃ ዩዬዳ፤ አይሁዳቱ አ ዎናዉ ኮይያ ድራዉ፥ ይሁዳን ዩያና ኮይቤና። አይሁዳቱ ቦንችያ ዳስያ ባላይ ጋክ ኡቴዳ። ሄዋ ድራዉ፥ የሱሳ እሻቱ አ፥ “ኔና ካልያዋንቱ ኔን ኦያዋ በአና ማላ፥ ሀዋፐ ደንዳደ ይሁዳ ጋድያ ባ። አያዉ ጎፐ፥ ባረዉ ኤረታናዉ ኮይያ አሳይ ኦንነ ባረ ኦሱዋ ገንና። ኔን ሀዋንታ ኦና፥ ነባ አላምያ ኡባይ ኤሮ!” ያጌድኖ። አያዉ ጎፐ፥ ሀራይ አቶ አ እሻቱካ አ አማንበይክኖ።
የሱስ ኡንቱንታ፥ “ታዉ እንጀትያ ዎዲ ጋክቤና፤ ሽን ህንተንቶ አይ ዎደካ እንጀቴ። አላሚ ህንተንታ እጻናዉ ዳንዳየና፤ ሽን ታን ሳኣ ኪታይ ኢታ ግድያዋ ማርካትያ ድራዉ፥ ታና እጼዳ። ባላ ቦንችያሳ ህንተንቱ ቢተ፤ ታዉ እንጀትያ ዎዲ ጋክቤና ድራዉ፥ ታን ባላ ቦንችያሳ ባናዌ ብራ” ያጌዳ። እ ሀዋ ጊደ፥ ጋሊላን አቴዳ።

ሽን አ እሻቱ ባላ ጋላሳ ቦንችያሳ ቤዳዋፐ ጉይያን፥ እካ አሳይ በኤናን ጌማን ያ ቤዳ። አይሁዳቱ ባላ ጋላሳ ቦንችያሳን አ ኮዪኖነ፥ “እ ሀቃን ደኢ?” ያጊደ፥ አ ላቢኖ።
አሳ ግዱዋን ዳሮ ዙዙንይ ደንዴዳ። አማሬዳ አሳይ፥ “እ ሎኦ አሳ” ያጌ፤ ሀራቱ ቃይ፥ “አ፥ እ አሳ ባለ” ያጊኖ። ሽን አይሁዳቱ ያዬዳ ድራዉ፥ ኦንነ አባ ቆንጭያን ሃሳየና።
ባላ ቦንችያ ጋላሳ ባጋን፥ የሱስ ጌሻ ጎልያ ቢደ፥ ታማርሱዋ ዶሜዳ። አይሁዳቱ ማላለቲደ፥ “ሀ ብታኒ አይነ ታማረናን ሀዋ ኬና ዋን ኤሬዴ?” ያጌድኖ።
ሄዋ ድራዉ፥ የሱስ ዛሪደ፥ “ታና ታማርስያዌ ታና ኪቴዳ ጾሳ ማታፐ ይያዋፐ አትን፥ ታዋ ግደና። ጾሳ ሸንያ ኦናዉ ዶስያ ኦንነ ሀ ታን ታማርስያዌ ጾሳ ማታፐ ይንቶ ዎይ ቃይ ታን ታፐ ሃሳያይታንቶ ኤራና። ባረዋ ሃሳይያ ኡራይ ባረ ሁጲያዉ ቦንቹዋ ኮዬ፤ ሽን ባረና ኪቴዳዌ ቦንቼታና ማላ ኮይያ ኡራይ ቱማንቻ፤ አን ዎርዶባይ ባዋ። ሙሴ ህንተንቶ ህግያ እምቤኔ? ሽን ህንተፐ እቱነ ህግያ ናገና። ታና አያዉ ዎናዉ ኮዪቴ?” ያጌዳ።
አሳይ ዛሪደ፥ “ኔናን ጻላሂ ደኤ፤ ኔና ዎናዉ ኦኔ ኮዬዳዌ?” ያጌዳ።
የሱስ፥ “ታን እት ዎልቃማባ ኦና፥ ህንተንቱ ኡባይ ማላለቴድታ። ህንተንቱ ናና ህንተንቱ ዶካላና ማላ፥ ሙሴ ህንተንታ አዛዜዳ። ሽን ዶካሉሳይ ህንተንቱ አዎቱዋና ዬዳዋፐ አትን፥ ሙሴና ይቤና፤ ሄዎ ህንተንቱ ሳምባታን አቱማ ናና ዶካሊታ። ሙሴ ህጊ አዛዜዳ ድራዉ፥ ህንተንቱ ሳምባታን ዶካልያዋ ግዶፐ፥ ያትና ታን እት አሳዉ ኩመን ቦላ ፓዳ ድራዉ፥ ታና አያዉ ሀንቀቲቴ? ቱሙ ፕርዳ ፕርድተፐ አትን፥ አሳ ዴሙዋ ጼሊደ ፕርዶፕተ” ያጌዳ።

ሄዋ ድራዉ፥ የሩሳላመ አሳፐ እቱ እቱ፥ “ኡንቱንቱ ዎናዉ ኮይያ ብታኒ ሀዋ ግደኔ? በእተ፥ ቆንጭያን እ ሃሳዬ፤ ኡንቱንቱ አ አይነ ጊክኖ። ሀዌ ክርስቶሳ ግድያዋ ኑ ካፓቱ ቱሙ ኤሪኖሻ? ሽን ኑን አ ሀቃፐ ዬደንቶ ኤሮይተ፤ ክርስቶስ ይያ ዎደ፥ እ ሀቃፐ ይንቶነ ኦንነ ኤረና” ያጌድኖ።
ሄዋፐ ጉይያን፥ የሱስ ጌሻ ጎልያን ታማርሲደ፥ ባረ ቃላ ቁ ኦደ፥ “ህንተንቱ ታና ኤሪታ፤ ቃይ ታን ሀቃፐ ዬደንቶካ ኤሪታ። ታን ታ ሸንያን ያበይከ፤ ሽን ታና ኪቴዳዌ ቱማንቻ፤ ህንተንቱ አ ኤርክታ። ሽን ታን አ ኤራይ፤ አያዉ ጎፐ፥ እ ታና ኪትና፥ ታን አ ማታፐ ያድ” ያጌዳ።
ሄዋ ድራዉ፥ ኡንቱንቱ አ ኦይቃናዉ ኮዬድኖ፤ ሽን አ ዎዲ ብሮ ጋክቤና ድራዉ፥ ኦንነ አ ቦላ ኩሽያ ዎቤና። ሽን ዳሮ አሳይ የሱሳ አማኒደ፥ “ክርስቶስ ይያ ዎደ፥ ሀ ብታኒ ኦዳ ማላታፐ ዳርያዋ ኦኔዬ?” ያጌድኖ።

ፓርሳዋቱ ዳሮ አሳይ የሱሳባ ዙዙምያዋ ስሴድኖ፤ ቄሳቱዋ ካፓቱነ ፓርሳዋቱ አ ኦይቂ ቃሽሳናዉ አማሬዳ ዎታዳራቱዋ ኪቴድኖ።
የሱስ፥ “ታን ህንተናና ላፋ ጋምአና፤ ሄዋፐ ጉይያን፥ ታና ኪቴዳዋኮ ባና። ህንተንቱ ታና ኮያና፤ ሽን ደምክታ፤ አያዉ ጎፐ፥ ታን ደእያ ሳኣ ህንተንቱ ባናዉ ዳንዳይክታ” ያጌዳ።
አይሁዳቱ እቱ እቱዋና፥ “ሀዌ ኑን አ ደመናሳ ሀቃ ባና ሀኒ? አይሁዳቱ ደእያ ግሪከ ካታማ ቢደ፥ ግሪከ አሳቱዋ ታማርሳና ሀኒ? እ፥ ‘ህንተ ታና ኮያና፤ ሽን ደምክታ’ ቃይ፥ ‘ታን ደኢያሳ ህንተንቱ ባናዉ ዳንዳይክታ’ ያጌ፤ ሄዋ ግያዌ ዋግያዌ?” ያጌድኖ።

ሄ ባላ ጋላሳ ቦንችያ ጋላሳፐ ዋናትያ ዉርሰ ጋላሳን የሱስ ደንድ ኤቂደ፥ ባረ ቃላ ቁ ኦደ፥ “ሳመቴዳ ኡራይ ኦንነ ታኮ ዪደ ኡሾ። ታናን አማንያዎ፥ ጾሳ ማጻፋይ ግያዋዳን፥ አ ኡሉዋፐ ደኡዋ እምያ ሃ ፑልቱ ጎጋናዋ” ያጌዳ። እ ሄዋ አ አማኔዳዋንቱ አካና ጌሻ አያናባ ሃሳዬዳ። የሱስ ብሮ ባረ ቦንቹዋኮ ከስቤና ድራዉ፥ ሄ ዎደ ጌሻ አያናይ ኡንቱንቶ እመትቤና።

ሄ አሳፐ ዳርያ ባጋይ እ ግያዋ ስሲደ፥ “ቱሙ ሀዌ ናገትያ ናብያ” ያጌድኖ።
ሀራንቱ፥ “ሀዌ ክርስቶሳ” ያጌድኖ።
ሽን ሀራንቱ ቃይ፥ “ክርስቶስ ጋሊላፐ ዬና። ጾሳ ማጻፋይ፥ ‘ክርስቶስ ዳዊተ ዛርያፐ፥ ዳዊተ ደኤዳ ቤተሌመ ካታማፐ ያና’ ጌነዬ?” ያጌድኖ። የሱሳ ጋሱዋን አሳይ ባረ ግዱዋን ሻከቴዳ። ሄ አሳፐ እቱ እቱ አ ኦይቃናዉ ኮዬድኖ፤ ሽን ኩሽያንነ አ ቦችበይክኖ።
ጌሻ ጎልያ ናግያዋንቱ ቄሳቱዋ ካፓቱዋኮነ ፓርሳዋቱዋኮ ስም ዬዳ ዎደ ኡንቱንቱ ናግያዋንታ፥ “አያዉ አ አህበይክቴ?” ያጊደ ኦቼድኖ።
ጌሻ ጎልያ ናግያዋንቱ ኡንቱንቶ፥ “ሀ ብታኒ ሃሳዬዳዋዳን፥ ኡባካ ኦንነ ሃሳይቤና!” ያጊደ ዛሬድኖ።
ፓርሳዋቱ ዛሪደ፥ “እ ህንተናካ ባለዋ? ካፓቱዋፐ ዎይ ፓርሳዋቱዋፐ አ አማኔዳ አሳይ ደኢ? ሽን ህግያ ኤረና ሀ አሳይ ሸቀቴዳዋ” ያጌድኖ።
ኡንቱንቱፐ እቱ ካሰና የሱሳኮ ቤዳ ንቆድሞስ ኡንቱንታ፥ “እት ኡራይ ግያባ ስሰናን ዎይ እ አያ ኦደንቶ ኤረናን ደኢደ፥ ካሰቲደ አ ቦላ ፕርድያዌ ኑ ህግያን ደኢ?” ያጌዳ።
ኡንቱንቱ ዛሪደ አ፥ “ኔንካ ቃይ ጋሊላ ጋድያ አሴ? ጋሊላ ጋድያፐ ናቢ ቤተናዋ ጾሳ ማጻፋቱዋ ብዳደ ኤራ” ያጌድኖ።

አሳይ ኡባይ አጊደ፥ ባረ ሶይ ባረ ሶይ ቤዳ።

سنیں ዮሃንሳ ምሽራቹዋ 7