Ge’ez - 2021 - BSE (NT) Non Drama

Ge’ez - 2021 - BSE (NT) Drama

ወበእሑድ ሰንበት መጽአት ማርያም መግደላዊት በጽባሕ ኀበ መቃብር እንዘ ዓዲሁ ጽልመት ወረከበት እብነ እቱተ እምአፈ መቃብር። ወሮጸት ወበጽሐት ኀበ ስምዖን ጴጥሮስ ወኀበ ዝኩ ካልእ ረድእ ዘያፈቅሮ እግዚእ ኢየሱስ ወትቤሎሙ ነሥእዎ ለእግዚእየ እምውስተ መቃብር ወኢየአምር ኀበ ወሰድዎ። ወወፅኡ ጴጥሮስ ወዝኩ ካልእ ረድእ ወሖሩ ኀበ መቃብር። ወእንዘ ይረውጹ ክልኤሆሙ ኅቡረ በደሮ ለጴጥሮስ ዝኩ ካልእ ረድእ በጺሐ ኀበ መቃብር። ወሶበ ሐወጸ ርእየ መዋጥሐ ንቡረ ወኢቦአ ባሕቱ። ወተለዎ ስምዖን ጴጥሮስ ወበጽሐ ወቦአ ውስተ መቃብር ወረከበ መዋጥሐ ንቡረ ውስተ አሐዱ ገጽ። ወሰበነኒ ዘዲበ ርእሱ እንተ ባሕቲቱ ጥብሉለ ወአኮ ምስለ መዋጥሕ። ወእምዝ ቦአ ዝኩኒ ካልእ ረድእ ዘበደሮ በጺሐ ኀበ መቃብር ወርእዩ ወአምኑ። እስመ ዓዲሁ ኢያእመሩ ዘውስተ መጻሕፍት ከመ ሀለዎ ይትነሣእ እምነ ምዉታን። ወእምዝ ሖሩ ክልኤሆሙ አርዳኢሁ ወአተዉ ቤቶሙ።

ወማርያምሰ ቆመት ኀበ መቃብር አፍኣ ወትበኪ ወእንዘ ትበኪ ሐወጸት ውስተ መቃብር። ወርእየት ክልኤተ መላእክተ በጸዓድው አልባስ ወይነብሩ አሐዱ ትርአሰ ወአሐዱ ትርጋፀ ኀበ ነበረ ሥጋሁ ለእግዚእ ኢየሱስ። ወይቤልዋ እሙንቱ መላእክት ምንት ያበክየኪ ኦ ብእሲቶ ወመነ ተኀሥሢ ወትቤሎሙ ነሥእዎ ለእግዚእየ እምውስተ መቃብር ወኢየአምር ኀበ ወሰድዎ። ወዘንተ ብሂላ ተመይጠት ድኅሬሃ ወርእየቶ ለእግዚእ ኢየሱስ እንዘ ይቀውም ወኢያመረት ከመ እግዚእ ኢየሱስ ውእቱ። ወይቤላ እግዚእ ኢየሱስ ብእሲቶ ምንት ያበክየኪ ወመነ ተኀሥሢ ወመሰላ ላቲሰ ዐቃቤ ገነት ውእቱ ወትቤሎ እግዚእየ እመኒ አንተ ነሣእኮ ንግረኒ ኀበ ወሰድኮ ከመ እሑር አነ ወእንሥኦ ኀቤየ ወእቅብዖ ዕፍረተ። ወይቤላ እግዚእ ኢየሱስ ማርያም ወተመይጠት ወትቤሎ በነገረ ዕብራይስጥ ረቡኒ ዘበትርጓሜሁ ሊቅ ብሂል። ወይቤላ እግዚእ ኢየሱስ ኢትልክፍኒ እስመ ዓዲ ኢዐረጉ ኀበ አቡየ ወሑሪ ባሕቱ ኀበ አኀውየ ወበሊዮሙ አዐርግአ ኀበ አቡየ ወአቡክሙ ኀበ አምላኪየ ወአምላክክሙ። ወሖረት ማርያም መግደላዊት ወአብሠረቶሙ ለአርዳኢሁ ወትቤሎሙ ርኢክዎ ለእግዚእነ ወነገረቶሙ ዘንተ ዘከመ ይቤላ።

ወመስዮ በይእቲ ዕለት ዘውእቱ እሑድ ሰንበት እንዘ ዕጽው ኆኅት ኀበ ሀለዉ አርዳኢሁ ጉቡኣን በእንተ ፍርሀቶሙ ለአይሁድ መጽአ እግዚእ ኢየሱስ ወቆመ ማእከሎሙ ወይቤሎሙ ሰላም ለክሙ። ወዘንተ ብሂሎ አርአዮሙ እደዊሁ ወእገሪሁ ወገቦሁ ወተፈሥሑ አርዳኢሁ ሶበ ርእይዎ ለእግዚእነ። ወይቤሎሙ ካዕበ እግዚእ ኢየሱስ ሰላም ለክሙ ወበከመ ፈነወኒ አብ ከማሁ አነሂ እፌንወክሙ። ወዘንተ ብሂሎ ነፍኀ ላዕሌሆሙ ወይቤሎሙ ንሥኡ መንፈሰ ቅዱሰ። ለእለ ኀደግሙ ኀጢአት ይትኀደግ ሎሙ ወለእለሰ ኢኀደግሙ ኢይትኀደግ ሎሙ።

ወቶማስ አሐዱ እምዐሠርቱ ወአሐዱ አርዳኢሁ ዘይብልዎ ዲዲሞስ ኢሀሎ ምስሌሆሙ ሶበ መጽአ እግዚእ ኢየሱስ። ወይቤልዎ ካልኣኒሁ አርዳእ ርኢናሁ ለእግዚእነ ወይቤሎሙ እመ ኢርኢኩ እደዊሁ ወእገሪሁ ኀበ ቀነውዎ ወእመ ኢወደይኩ አጽባዕትየ ውስተ ቅንዋቲሁ ወእመ ኢያባእኩ እዴየ ውስተ ገቦሁ ኢየአምን። ወእምድኅረ ሰሙን መዋዕል እንዘ ሀለዉ ካዕበ አርዳኢሁ ውስጠ ወቶማስኒ ሀሎ ምስሌሆሙ እንዘ ዕጽው ኆኅት መጽአ እግዚእ ኢየሱስ ወቆመ ማእከሎሙ ወይቤሎሙ ሰላም ለክሙ። ወእምዝ ይቤሎ ለቶማስ አምጽእ አጽባዕተከ ዝየ ወርኢ እደውየ ወእገርየ ወሀብ እዴከ ወአብእ ውስተ ገቦየ ወኢትኩን ናፋቄ አላ እመን። ወአውሥአ ቶማስ ወይቤሎ እግዚእየ ወአምላኪየ። ወይቤሎ እግዚእ ኢየሱስ እስመ ርኢከኒሁ አመንከኒ ብፁዓንሰ እለ እንዘ ኢይሬእዩኒ የአምኑኒ። ወብዙኃተ ካልኣተ ተኣምራተ ገብረ እግዚእ ኢየሱስ በቅድመ አርዳኢሁ ዘኢተጽሕፈ ውስተ ዝንቱ መጽሐፍ። ወዝንቱሰ ተጽሕፈ እምኔሆን ከመ ትእመኑ አንትሙ ከመ እግዚእ ኢየሱስ ውእቱ ክርስቶስ ወልደ እግዚአብሔር ወአሚነክሙ ሕይወተ ዘለዓለም ትርከቡ በስመ ዚኣሁ።

سنیں ወንጌል ዘዮሐንስ 20