If you have would like a copy of this version please contact info@davarpartners.org

Kulvi New Testament, CC-BY-SA-4.0, The Love Fellowship (Text) Kulvi New Testament Audio Bible, CC-BY-SA-4.0, Davar Partners International, 2022 (Audio)

Kulvi New Testament

This work is licensed under Creative Commons Attribution-ShareAlike 4.0 License.

अब्राहम राज़ा दाऊदा रा बुज़ुर्ग ती, राज़ा दाऊदा, यीशु मसीह रा बुज़ुर्ग ती, होर ऐ सा यीशु मसीह रा खानदान।
अब्राहम इसहाका रा बापू ती,
इसहाक याकूबा रा बापू ती,
होर याकूब यहूदा होर तेइरै भाई रा बापू ती।
यहूदा पेरेस होर जेरह रा बापू ती;
होर हेस्रोन पेरेसा रा बापू ती,
होर तामार तिन्हरी आमा ती।
एराम अम्मीनादाबा रा बापू ती,
अम्मीनादाब नहशोना रा बापू ती,
नहशोन सलमोना रा बापू ती। (रूत 4:19-20)
सलमोन बोअज़ा रा बापू ती राहाब तेइरी आमा ती,
बोअज़ ओबैदा रा बापू ती होर रूत तेइरी आमा ती,
ओबैद यिशै रा बापू ती,
होर यिशै दाऊद राज़ा रा बापू ती,
होर दाऊद राज़ा सुलैमाना रा बापू ती, ज़ो पैहलै ऊरिय्याह री लाड़ी ती।
होर सुलैमान रहबामा रा बापू ती,
रहबाम अबिय्याह रा बापू ती;
अबिय्याह आसरा बापू ती,
आसा यहोशफाता रा बापू ती,
यहोशफात योरामा रा बापू ती,
होर योराम उज्जियाह रा बापू ती,
उज्जियाह योतामा रा बापू ती,
होर योताम आहाजा रा बापू ती,
होर आहाज हिजकिय्याहा रा बापू ती,
होर हिजकिय्याह मनश्शिह रा बापू ती,
मनश्शिह आमोना रा बापू ती,
होर आमोन योशिय्याह रा बापू ती।
फिरी इस्राएली बै गुलाम बणाईया बैबीलोन ज़ाणै न पैहलै योशिय्याह यकुन्याह, होर तेइरै भाई रा दादा ती।
बन्दी होईया बैबीलोन पुजणै न बाद
यकुन्याह शालतियेला रा बापू ती,
होर शालतियेल जरूब्बाबिला रा बापू ती,
जरूब्बाबिल अबीहूदा रा बापू ती,
हो अबीहूद इलयाकीमा रा बापू ती,
होर इलयाकीम अज़ोरा रा बापू ती,
अज़ोर सदोका रा बापू ती,
सदोक अखीमा रा बापू ती,
होर अखीम इलीहूदा रा बापू ती,
होर इलीहूद एलीआज़ारा रा बापू ती,
होर एलीआज़ार मत्ताना रा बापू ती;
मत्तान याकूबा रा बापू ती।
याकूब यूसुफा रा बापू ती, ज़ो मरियमा रा लाड़ा ती, मरियमै यीशु पैदा केरु ज़ो मसीह कहलाइया सा।
अब्राहमा न लेइया दाऊदा तैंईंयैं सैभ चौदह पीढ़ी हुई होर दाऊद न बैबीलोना बै बन्दी होईया पजाइणै तैंईंयैं चौदह पीढ़ी हुई, होर बंदी होईया बाबैला बै पजेरने रै बौगता न लेइया मसीह तैंईंयैं चौदह पीढ़ी हुई।

यीशु मसीह रै पैदा होंणै न पैहलै ऐ हुआ ती, कि ज़ैबै तेइरी आमा मरियमै री बौरनी यूसुफा सैंघै हुई, ऐथा न पैहलै कि ते लाड़ा लाड़ी बणिया सैंघै रौंहदै, सौ हाज़ी कुँआरी ती, पवित्र आत्मा सैंघै सुज़दी रौही। तैबै तेसरै मंगेतरै यूसुफै ज़ो धर्मी ती होर तेसा बै लोका रै सामनै बदनाम नी ती केरना च़ाँहदा, तेसा बै च़ुप-चाप छ़ौड़नै रा विच़ार केरू।
ज़ैबै सौ इन्हां गैलै रै बारै न सोच़दा लागा ती ता प्रभु रा स्वर्गदूत तेइबै सुपने न हेरुइया बोलदा लागा, “ओ यूसुफ! दाऊद राज़ै रै खानदान, तू आपणी लाड़ी मरियमा बै आपणै औखै आंणनै बै मत डौरदा, किबैकि ज़ो तेसरै पेटा न सा, सौ पवित्र आत्मै री धिरै न सा। तेसा बेटा ज़ोंणना होर तू तेइरा नाँ यीशु रखेई, किबैकि तेई आपणै लोका रा तिन्हरै पापा न उद्धार केरना।”
ऐ सैभ किछ़ एथै री तैंईंयैं हुआ कि ज़ो वचन प्रभुऐ यशायाह भविष्यवक्तै रै द्वारा बोलू सा, सौ पूरा लोड़ी हुआ। “हेरा, कुँआरी सुज़दी रौहणा होर एक बेटा ज़ोंणना, होर तेइरा नाँ इम्मानुएल रखिणा” (ज़ौसरा मतलब सा “परमेश्वर आसा सैंघै सा”)।
यूसुफै नींज़ा न उठिया, प्रभु रै स्वर्गदूतै रै हुक्मा रै मुताबक मरियमा बै आपणी लाड़ी होंणै री तैंईंयैं आपणै घौरा बै आंणी। होर ज़ाँ ढौई तेसै बेटै बै जन्म नी धिना सौ तेसा सैंघै नी सुता होर ज़ैबै तेसै बेटै बै जन्म धिना ता यूसुफै तेई शोहरू रा न यीशु रखू।

سنیں मत्ती 1