If you would like a copy of this version please contact info@davaraudiobibles.org.

Today&#39;s Mongondow Language © 2016, Indonesian Bible Society – Lembaga Alkitab Indonesia. (Text)
Mongondow Old Testament Audio Bible ℗ 2025, Davar Partners International. (Audio)

Mongondow Old Testament

Alkitab Singog In Mongondow Masa In Tanaa © Indonesian Bible Society, 2016.

TUHAN
Irupdon in torompet, posingogdon in tomponuot in anib
kon tombuḷud in Sion inta motusi, pinogutunan i Allah.
Kourotdon, ei intau in Yohuda!
Sin Singgai i TUHAN in nodiug bo ḷagidon moiangoi.
Singgai tatua in nosindip bo nolamurú,
nopuḻing in topuot inta mobunod.
Tontara in pangkoḷá moroangoi
naonda bo goḷom inta noiborak kon ḻimonik in buḷud.
Inta ná tatua in diápabí kon dodai in onda in nobaḻí
bo diá bidon mobaḻí bui modapot in mononoi.

Naonda bo tuḷú inta momagong bo mokopokak
yompaton monia in bayongan pinomuḷa.
Kon dungkuḷ, butá tatua in naonda bo Eden, taman i TUHAN,
noiduduimai kon tua, naondadon bo rawang in bungaion inta noingkag.
Diádon onu bo onu in ki agatnea,
diá in diá sinubu monia.
Batangan monia in naonda bo kabaḷo;
pororibatuknea in naonda bo kabaḷo kon pinotandingan.
Mosia in ḷumandu-ḷanduk kon tudu in buḷud,
singognea in naonda bo koḷangká mako in kereta in parang
bo naonda bo rosik in tuḷú inta nokaan kon wawa;.
Mosia in nopipid naonda bo tontara inta motorindog,
inta nosadiadon mayá moparang
Kon tungkuḷ in mosia nonubu, bayongan in intau nourot,
bayongan in pogot nobilai nobilo.
Naonda bo pahlawan, mosia in nonubu,
bo noponik kon dinding naonda bo pojuang.
Mosia in nopipid notuḻid ná muna,
bo diábí momurow andeka tumabat kon bayáan.
Mosia in diábí mogogundudan,
mosia in mayábí podudui in daḷannea.
Moyododai in mosia in mondangat kon bayongan poḷoḷukadan,
diábí pomayá mako monia in pipidan in mobontow.
Mosia in nonubu kon bonu in kotá,
bo noribatuk kon tudu in dindingnea.
Mosia in noponik kon bonu in baḷoi mita;
naonda bo mononakow, mosia in sinumuot nongin dodimpayó.

Kon tungkuḷ in mosia minayá butá nogugur,
bo ḷangit in nodandú doman.
Bo nosindipdon in mata in singgai bo buḷan,
bo sindar in tundi mita noinggamádon.
Singog i TUHAN naonda bo gotup, nobogoi in tomponuot,
kon tontaranea inta moparang.
Totuu modamaḷ in tontaranea!
Totuu moropot in tontara inta nopobayá in parenta-Nea!
Totuu mokoondok bo motoyang in Singgai i TUHAN!
Diá tobatúmai in intau in mokotongod kon koangoian in singgai i TUHAN tatua.

Ki TUHAN in noguman, “Táe tanaa mako,
pobuidon mangoi kon i-Nakó takin ḻimbatú in gina,
sindaḷan mopuasa, mogamui bo mongombaḷ.
Bisi-bisídon in ginamu deemanbí ḷambungmu!”
Pobuidon mangoi kon i TUHAN Allahmu.
Sia in totuu kon mosabar bo motabi
mopia in gina bo nopuḻing in tabi.
Mopia in gina-Nea in mongampung bo doí
mopobayá in hukuman.
Dika-dika ki TUHAN Allahmu mobaḷui in gina,
bo mobogoi in barakat mobayong totok kon i monimu.
Dá moiko in motaau moposumba in
kuruban anggur bo gandum kon i TUHAN Allahmu.
Irupdon in torompet kon Sion, buḷud i Allah,
pobaḷúdon singgai popuasaan,
aidaidon in poyodungkuḷan moḷoben.
Sipundon in bayongan in rayat,
pokiposipunai in umat.
Potabádon mangoi in guyanga mita,
mongoadí mita bo adí mita mointok.
Nodapot in inta bagu notonibuḷoi in mustibí doman mamangoi.
Potabádon in mosia monaḷámaidon kon gopot monia.
Potabádon in imang mita inta nogundoi kon i TUHAN,
mongombaḷ kon sigad in mezbah bo dangkuḷonnea kon muna,
sindaḷan moguman, “Kotabipa kaasí in umat-Mu, o TUHAN;
dika pomayá mako in kapunyaan-Mu tongososingkuḻe mako,”
dá bangusa mita ibanea monigid poḷat moguman,
“Kon onda in ki Allah monia?”

Bo ki TUHAN in nonaridimaidon kon butá-Nea, bo nonotabi kon umat-Nea.
Sia in notubag kon i monia nanaa,
“Tanaa in moiko komintan in ogoian-Ku:
in gandum, anggur bo ḷana in zaitun sin kaanon,
sinbá moiko komintan in pobotugon.
Diábí pomayá-Ku mako in singkuḻeon in moiko
andeka kosingan in bangusa mita.
Tontara in pangkoḷá nongkon utuan in untunon-Kubí,
tongosilai in buntunon-Ku pobayá in rawang in bungaion.
Bo inta kon pipidan dotá in muna in undudon-Ku pobayá ná Laut Mati,
inta kon pipidan kon tumi in undudon-Ku pobayá in Dagat Toyuak.
Awaknea mita in mobondotdon.
Mosia in putúan-Ku sin nopororigadon kon i monimu.

Dika moondok, ei gobá, posanangdon in ginamu;
toropdon in inta moḷoben inta pinomia i TUHAN kon inimu!
Ei mahaḷuk mita, dikadon moḻia-ḻiaw in gina.
Rawang mita in bonok tanaa in iḷumunowdon.
Pangkoi mita in kayu modatog in bungainea,
bungai mita in anggur bo ara mobarongdon totok.

Ei rayat in Sion, koḷungangadon in gina!
Kosanangdon in gina bo porogiowdon!
popisí in bayongan in inta mopia nongkon i TUHAN Allahmu.
Kon sempo in pononotak inogoiannea in uyan inta tugat kon inimu.
Kon sempo in tumping uyan pinoonag-Nea,
ná doman tua in kon sempo in pononubú ná dungkuḷmai.
Dá gandum in buidon momonu kon tampat pomomugutan;
anggur bo ḷana in zaitun in moiḻimpóbí nongkon pomomugutan.
Toḻiuan-Kubí in bayongan in karugianmu
kon taong mita kon tungkuḷ in bungai in boyómu kinaan in pangkoḷá.
Sin Akuoibí in inta nopotabá mangoi kon paanan in pangkoḷá tatua kon inimu.
Tugatbí in kaanon kon i monimu bo mokorasabí kon mobotug.
Ki TUHAN Allahmu in pomuliaanbí monimu,
sin nobayong in inta mokoherang in inaidan-Nea kon inimu.
Umatku in diá bidon motaau in tososingkuḻe mako!
Dá kotaauandon monimu, Israel, kon Akuoi in kon yua-yuakmubí,
bo Akuoi, ki TUHAN, in ki Allahmu.
Diábí in Allah ibanea, koḻikudbí in Akuoi tontaní.
Umat-Ku in diá bidon pokopooyáanmai bui!”
TUHAN
“Kon singgai moiduduimai bayongan in intau in ogoian-Kudon in roho-Ku.
Dá ki adímu ḷoḷaki bo bobay in mopotaaudon in koyow-Ku mita;
intau mita inta noguyangdon mita kon yuakmu in tumogoindopdon
oontongon in ogoidon kon tayowmobiag bo mongodeaga.
Kon dodai intua roho-Ku in ogoi-Kudon doman
kon mogogundoi mita ḷoḷaki bo bobay.”

Kon ḷangit bo kon butá mobayong in aidan-Mu in inta mokoherang. Moḷoḻimodan, dokot in tuḷú bo kapungan in poyok. Mata in singgai in simindipdon bo buḷan in mobaḻídon mopura naonda bo dugú. Tua komintan in mobaḻí kon dodai in diápa moiangoi in Singgai i TUHAN, singgai inta motoyang bo mokokoningkim! Táe ki ine in mokituḷung kon i TUHAN, in posaḷamatonbí. Ki TUHAN in noguman, “Kon Yerusalem intau mita inta piniḻí-Ku in mosaḷamatbí.”

سنیں YOËL 2