These Scriptures are a new translation into the Naskapi language spoken at Kawawachikamach, Quebec. We the Naskapi people have been eager to have our own translation of the Bible. For many decades we have had to make do with Scriptures that were translated for indigenous languages that are different from our own: most notably Bishop Horden's Moose Cree New Testament and prayer book, and Rev. W. G. Walton's prayer book. The Naskapi Development Corporation has been engaged with this work since the 1990s, facilitated by Wycliffe Bible Translators and the Canadian Bible Society. The Naskapi community grateful acknowledges the help of all who participated with us in producing these Scriptures. Our prayer is that these Words of God will be cherished by our people for generations to come.

ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ The Naskapi text is copyright © Naskapi Development Corporation Naskapi Development Corporation Kawawachikamach, Québec G0G 2Z0 Canada New Testament published by the Canadian Bible Society (CBS) © 2007 Canadian Bible Society 10 Carnforth Road, Toronto Ontario M4A 2S4 Canada

ᒋᓴᒪᓂᑐᐤ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ God's Word in Naskapi

ᐃᔅᐱ ᒋᓴᔅ ᑲᒋ ᐃᓯ ᐊᔭᒥᐊᑦ ᐊᑯ ᒂ ᔅᑐᑕᒡ ᐊᓂᔭ ᐅᒋᔅᒋᓄᐊᒧᐛᑭᓇ ᐊ ᐎᒐᐅᑯᑦ᙮ ᐊᑯ ᒂ ᐊᓱᐅᑕᒡ ᐊᓂᔭ ᓯᐱᓯᔪᐤ ᑭᑦᕈᓐ ᑲ ᐃᓯᓂᐧᑲᑕᔨᒡ᙮ ᒋ ᑎᑯᓂᔪᐤ ᒪᒃ ᐊᓐᑕ ᓂᑕᐅᒋᑕᑭᓐ ᐊᔅᒋᔪᐤ ᐊᑯᑕ ᑲ ᐃᑐᑕᒡ᙮
ᒍᑎᔅ ᒪᒃ ᐊᓐ ᒐ ᐎᔭᓯᐱᔅᑎᓇᑦ ᒋᓴᓴ ᒋ ᒋᔅᒐᔨᑎᒻ ᑕᓐᑕ ᑲ ᑎᑯᓂᔨᒡ ᐊᓂᔭᔪᐤ ᐛᔅ ᒥᒐᑥᐤ ᒋ ᒪᒧᐎᐅᒡ ᐊᓐᑕ ᒋᓴᔅ ᑭᔭ ᐊᓂᔭ ᐅᒋᔅᒋᓄᐊᒧᐛᑭᓇ᙮ ᒍᑎᔅ ᒪᒃ ᒋ ᐃᑐᑕᐤ ᐊᓐᑕ ᓂᑕᐅᒋᑕᑭᓐ ᐊᔅᒋᒡ ᐊ ᐎᒐᐅᑯᑦ ᕈᒻ ᐊᓯᒪᑭᓂᓴ ᑭᔭ ᐊᓂᔭᔪᐛ ᑲᒪᑯᓄᐛᓯᔨᒋ ᐊᓐᑕ ᒋᓴᐊᔭᒥᐊᐅᒋᐛᐱᒡ ᑲ ᐊᑐᔅᒐᔨᒋ᙮ ᐊᓂᔭᔪᐛ ᑲ ᓂᑲᓂᐱᔨᒋ ᐊᔭᒥᐊᐅᒋᒪᐛ ᑭᔭ ᐊᓂᔭ ᐸᕆᓯᐊ ᒋ ᐃᑎᓴᐅᑯᒡ ᒐᒋ ᓇᓂᑐᐛᐱᒪᒡ ᒋᓴᓴ᙮ ᒋ ᐸᒋ ᑕᐧᑯᓇᐅᒡ ᒪᒃ ᐛᔅᑕᓂᐱᒪᑭᓇ ᑭᔭ ᐃᔅᑯᑕᐤ ᐛᔅᑕᓂᐱᒪᑭᓇ ᑭᔭ ᓂᑐᐱᔪᐅ-ᒧᐧᑯᒪᓇ᙮
ᒋ ᒋᔅᒐᔨᑎᒻ ᒪᒃ ᒋᓴᔅ ᒥᓯᐛ ᑕᓐ ᒐ ᐃᔅᐱᔨᑦ ᐊᑯ ᒂ ᐸᒋ ᓂᒥᑕᐛᑲᐳᑦ ᒂ ᐃᑕᑦ, “ᐊᐛᓐ ᑲ ᓇᓂᑐᐛᐱᒪᒄ ?”
ᒋ ᐃᑕᐅᒡ, “ᒋᓴᔅ ᓇᓴᕆᑎᒡ ᑲ ᐅᒋᑦ ᓂ ᓇᓂᑐᐛᐱᒪᓇᓐ᙮” “ᐊᐅᒄ ᓂᔾ,” ᒂ ᐃᑕᑦ ᒋᓴᔅ᙮ ᒍᑎᔅ ᒪᒃ, ᐊᓐ ᒐ ᐎᔭᓯᐱᔅᑎᓇᑦ ᒋᓴᓴ ᐊᑯᑕ ᑲ ᓂᐳᐅᑦ ᐊ ᐎᒋᑲᐳᔅᑐᐛᑦ ᐊᓂᔭᔪᐛ ᑲ ᐸᒋ ᐎᒐᐅᑯᔨᒋ᙮ ᐃᔅᐱ ᒪᒃ ᒋᓴᓴ ᑲ ᐃᑎᑯᒡ, “ᐊᐅᒄ ᓂᔾ,” ᒋ ᐊᓴᑲᐳᐅᒡ ᒂ ᐊᑎ ᐸᒋᓯᒡ ᐊᓐᑕ ᐃᔅ ᐊᔅᒋᒡ᙮
ᒋᓴᔅ ᒥᓐ ᒂ ᑯᒂᒋᒪᑦ, “ᐊᐛᓐ ᑲ ᓇᓂᑐᐛᔨᒪᒄ ?” “ᒋᓴᔅ, ᓇᓴᕆᑎᒡ ᑲ ᐅᒋᑦ,” ᒋ ᐃᑕᐅᒡ᙮
ᒋᓴᔅ ᒂ ᐃᑕᑦ, “ᓴᔅ ᔅᒋ ᐎᑎᒪᑎᓇᐛᐤ ᐊᐅᒄ ᐊᓐ ᓂᔾ᙮ ᓂᔾ ᓂᔭᓂᑐᐛᐱᒧᐛᒂ ᐱᔅᑎᓇᐧᑯᒡ ᐅᒡ ᑯᑎᑭᒡ᙮” ᐊᐅᒄ ᐅᔭ ᑲ ᐃᔅᒋᔄᑦ ᒐᒋ ᑎᐱᐱᔨᒡ ᐊᓂᔭ ᓴᔅ ᐊᓐᑕ ᑲ ᐃᔅᒋᔄᑯᐱᓇ, “ᓄᑕ, ᓇᒪ ᓂ ᐅᒋ ᐅᓇᐊᐅᒡ ᐛᒋ ᐸᐃᒄ ᐊᓐᒡ ᑲ ᐸᒋ ᒥᔨᓐ᙮”
ᓴᐃᒥᓐ ᐱᑕᕐ ᒪᒃ ᒋ ᑯᐃᑯᓂᒻ ᐅᓂᑐᐱᔪᐅ-ᒧᐧᑯᒪᓐ ᑲ ᒥᓂᓯᒺᑦ ᐅᒥᔪᐅᓂᒡ ᐎᑐᑲᔪᐤ ᐊᓂᔭᔪᐛ ᐸᐃᒄ ᒋᓴᐊᔭᒥᐊᐅᒋᒪᐛ ᐅᑦ ᐊᐱᒋᐊᑭᓂᔪᐛ, ᒪᓪᑲᔅ ᑲ ᐃᓯᓂᐧᑲᓱᔨᒋ᙮
ᐊᑯ ᒋᓴᔅ ᒂ ᐃᑕᑦ ᐊᓂᔭᔪᐛ ᐱᑕᕋ, “ᓇᐅᔅᑕ ᐊᓐ ᒋᓂᑐᐱᔪᐅ-ᒧᐧᑯᒪᓐ ! ᒋᑦ ᐃᑕᔨᑕᓐ ᐊ ᒐ ᐊᑲ ᐅᒋ ᓴᐳᔅᑭᒪᓐ ᐅ ᐎᓯᒐᔨᑕᒧᐅᓐ ᓄᑕᐎᔾ ᑲ ᐸᒋ ᒥᔨᑦ ?”

ᐊᓐᒡ ᒪᒃ ᐊᓯᒪᑭᓂᓯᒡ ᑭᔭ ᐊᓂᔭ ᐅᒋᒪᒧᐛᐛ ᑭᔭ ᐊᓐᒡ ᒍᐤ ᑲ ᐃᑎᔅᑲᓇᓯᒡ ᑲᒪᑯᓄᐛᓯᒡ ᒋᓴᐊᔭᒥᐊᐅᒋᐛᐱᒡ, ᒋ ᒪᑯᓇᐅᒡ ᐊᓂᔭᔪᐛ ᒋᓴᓴ ᑭᔭ ᒋ ᒪᑯᐱᑕᐅᒡ᙮ ᐊᓐᑕ ᓂᔅᑎᒻ ᐊᓇᓴ ᐊ ᑕᔨᒋ ᒋ ᐃᑐᑕᐊᐅᒡ, ᑲᔭᐸᔅ ᒪᒃ ᐅᔭ ᐅᓴ᙮ ᐅ ᑲᔭᐸᔅ ᐎᔾ ᒋ ᒋᓴᐊᔭᒥᐊᐅᒋᒪᐅᐤ ᐊᓂᔭ ᑲ ᐱᐳᓂᔨᒡ᙮ ᐊᐅᒄ ᑲᔭᐸᔅ ᑲ ᐃᑕᑯᐱᓇ ᐊᓂᔭᔪᐛ ᒍᐤ ᐃᔪᐛ ᐃᐛᒃ ᒋᐸ ᒥᔪᐱᔨᐧᑯᐱᓇ ᐸᐃᒄ ᓇᐸᐤ ᒐᒋ ᓂᐱᔅᑎᒧᐛᑦ ᒥᓯᐛ ᐊᐛᔪᐛ᙮


ᓴᐃᒥᓐ ᐱᑕᕐ ᑭᔭ ᒥᓐ ᑯᑎᒃ ᒋᔅᒋᓄᐊᒧᐛᑭᓐ ᒋ ᓇᓴᐛᐅᒡ ᒋᓴᓴ᙮ ᐊᓐ ᒪᒃ ᑯᑎᒃ ᒋᔅᒋᓄᐊᒧᐛᑭᓐ ᓇᔅᒡ ᒋ ᒥᔪ ᒋᔅᒐᔨᒥᑯᐤ ᒋᓴᐊᔭᒥᐊᐅᒋᒪᐛ᙮ ᐊᑯ ᒂ ᐎᒐᐛᑦ ᒋᓴᓴ ᐊᓐᑕ ᐊᓂᔭ ᒋᓴᐊᔭᒥᐊᐅᒋᒪᐛ ᐎᒋᔨᒡ ᐊ ᐱᒐᔨᒋ᙮ ᐱᑕᕐ ᒪᒃ ᐎᐎᑎᒥᒡ ᐊᓐᑕ ᐎᔾ ᒋ ᑕᐤ᙮ ᐊᑯ ᐊᓐ ᑯᑎᒃ ᒋᔅᒋᓄᐊᒧᐛᑭᓐ ᐊᓐ ᑲ ᒥᔪ ᒋᔅᒐᔨᒥᑯᑦ ᐊᓂᔭ ᒋᓴᐊᔭᒥᐊᐅᒋᒪᐛ ᑲᐤ ᒋ ᐎᐎᔪᐤ, ᑲ ᐃᔨᒪᐊᑦ ᐊᓂᔭ ᐃᔎᓴ ᐊᓐᑕ ᒋᐱᔎᒡ ᑲ ᑕᔨᒋ ᒂ ᑯᒂᒋᒪᑦ ᒐᒋ ᐱᒐᔨᒋ ᐱᑕᕋ᙮ ᐊᑯ ᑲ ᐱᑎᑲᐊᑦ ᐊᓂᔭ ᐱᑕᕋ᙮
ᐊᓐ ᒪᒃ ᐃᔎᔅ ᐊᓐᑕ ᒋᐱᔎᒡ ᑲ ᑕᑦ ᒋ ᐃᑕᐤ ᐊᓂᔭ ᐱᑕᕋ, “ᓇᒪᔭᐤ ᐊ ᒋᔾ ᐸᐃᒄ ᒋᓴᔅ ᐅᒋᔅᒋᓄᐊᒧᐛᑭᓇ ?” ᐱᑕᕐ ᒪᒃ ᒂ ᐃᑕᑦ᙮ “ᓇᒪ᙮ ᓇᒪᔭᐤ ᓂᔾ᙮”
ᒋ ᑕᐧᑲᔭᔪᐤ ᒪᒃ᙮ ᐊᑯ ᐊᓐᒡ ᐊᐱᒋᐊᑭᓐᒡ ᐊᔪᐤ ᑲᒪᑯᓄᐛᓯᒡ ᒂ ᑯᑐᐛᒡ ᐊᑯ ᑲ ᐛᔅᑲᑲᐳᔅᑕᒡ ᐊᓂᔭ ᐃᔅᑯᑕᔪᐤ ᐊᓐᑕ ᐊ ᐅᒋ ᑎᐅᓱᒡ᙮ ᐱᑕᕐ ᒪᒃ ᑭᔭ ᐎᔾ ᒋ ᐸᒋ ᐎᒋᑲᐳᔅᑐᐛᐤ ᐊ ᐸᒋ ᑎᐅᓱᑦ᙮


ᐊᑯ ᐊᓐ ᒋᓴᐊᔭᒥᐊᐅᒋᒪᐤ ᓂᓇᐧᑯᐤ ᑲ ᐃᓯ ᑯᒂᒋᒪᑦ ᒋᓴᓴ ᐊ ᐎ ᓂᑐ ᒋᔅᒐᔨᒪᑦ ᐊᓂᔭ ᐅᒋᔅᒋᓄᐊᒧᐛᑭᓂᔪᐛ ᑭᔭ ᑕᓐ ᓇᐊᐤ ᐊ ᐃᓯ ᒋᔅᑯᑎᒪᒐᔨᒋ ᒋᓴᓴ᙮
ᐊᑯ ᒋᓴᔅ ᒂ ᐃᑕᑦ, “ᒥᓯᐛ ᑕᓐ ᑲ ᐃᔅᒋᔄᔭᓐ ᒋ ᐸᑎᒧᒡ ᐊᐛᓐᒋ᙮ ᐊᓐ ᒪᒃ ᑕᓐ ᑲ ᐃᓯ ᒋᔅᑯᑎᒪᒐᔭᓐ ᐊᓐᑕ ᐊᔭᒥᐊᐅᒋᐛᐱᒡ ᑭᔭ ᒋᓴᐊᔭᒥᐊᐅᒋᐛᐱᒡ ᐊᓐᑕ ᒥᓯᐛ ᒍᐤ ᐃᔪᒡ ᑲᒋ ᐸᒋ ᒪᒧᐎᒡ, ᓇᒪ ᓂᑕ ᓂ ᐅᒋ ᑲᑕᓐ ᒐᒂᓐ ᐊ ᐃᔅᒋᔄᔭᓐ᙮ ᒐᒂᓐ ᒪᒃ ᐛᒡ ᐸᒋ ᑯᒂᒋᒥᔨᓐ ? ᑯᒂᒋᒥᒡ ᒪ ᐊᓐᒡ ᐃᔪᒡ ᑲᒋ ᐸᑐᐅᒡ᙮ ᑯᒂᒋᒥᒡ ᑕᓐ ᑲ ᐃᑎᒂᐤ, ᐛᔅ ᒋᔅᒐᔨᑎᒧᒡ ᑕᓐ ᑲ ᐃᔅᒋᔄᐅᒡ᙮”
ᐃᔅᐱ ᒪᒃ ᒋᓴᔅ ᑲ ᐃᔅᒋᔄᑦ ᐅᔭ, ᐸᐃᒄ ᐊᓂᔭ ᑲᒪᑯᓄᐛᓯᔨᒋ ᒋ ᐅᑕᒥᒂᐅᑯᐤ ᐊ ᐃᑎᑯᑦ, “ᓇᒪᐎᔾ ᐊ ᒋᑭ ᒋ ᐃᓯ ᐃᔨᒪᐊᐤ ᒋᓴᐊᔭᒥᐊᐅᒋᒪᐤ ?”
ᐊᑯ ᒋᓴᔅ ᒂ ᐃᑕᑦ, “ᐊᑲ ᒧᔭᒻ ᐛᒋ ᐃᔅᒋᔄᐛᓇ ᒐᒂᓐ, ᐎᑎᒧᒡ ᒥᓯᐛ ᐊᐛᓐᒋ ᐅᑕ ᑲ ᑕᒡ᙮ ᒥᒄ ᒪᒃ ᑲ ᑕᑈᐛᓇ ᒥᓯᐛ ᑲ ᐃᔅᒋᔄᔭᓐ, ᒐᒂᓐ ᐛᒋ ᐸᒋ ᐅᑕᒥᐅᔨᓐ ?”
ᐊᑯ ᐊᓇᔅ ᒂ ᐃᑎᓴᐛᑦ ᐊᓂᔭᔪᐛ ᒋᓴᓴ ᐊᓐᑕ ᑲᔭᐸᔅ ᒋᓴᐊᔭᒥᐊᐅᒋᒪᐤ ᐊ ᑕᔨᒋ ᐊᔅᒄ ᐊ ᒪᑯᐱᓱᔨᒋ᙮


ᓴᐃᒥᓐ ᐱᑕᕐ ᒪᒃ ᐊᔅᒄ ᒪᒂᒡ ᒋ ᓂᐳᐅᐤ ᐊᓐᑕ ᐊ ᑎᐅᓱᑦ ᐊᑯ ᒂ ᐃᑎᑯᑦ ᐊᓂᔭ ᐊᓐᑕ ᑲ ᑕᔨᒋ, “ᓇᒪᔭᐤ ᐊ ᒋᔾ ᐸᐃᒄ ᐊᓂᔭ ᐅᒋᔅᒋᓄᐊᒧᐛᑭᓇ ᐊᓐ ᓇᐸᐤ ?” ᐱᑕᕐ ᒪᒃ ᒋ ᑭᑭᒋᔭᐤ, “ᓇᒪ᙮ ᓇᒪᔭᐤ ᓂᔾ,” ᒋ ᐃᑕᐤ᙮
ᐸᐃᒄ ᒪᒃ ᐊᓂᔭ ᒋᓴᐊᔭᒥᐊᐅᒋᒪᐤ ᐅᑦ ᐊᐱᒋᐊᑭᓇ ᒋ ᐎᐧᑲᓂᓯᔨᑯᐱᓐ ᐊᓂᔭᔪᐛ ᓇᐸᐛ ᐱᑕᕋ ᑲ ᒋᒥᑐᑭᔭᔄᔨᒋ᙮ ᒋ ᐃᑕᐤ ᒪᒃ ᐊᓂᔭ ᐱᑕᕋ, “ᓇᒪᐎᔾ ᐊ ᒋ ᐅᒋ ᐛᐱᒥᑎᓐ ᑭᔭ ᒋᔾ ᐊᓐᑕ ᓂᑕᐅᒋᑕᑭᓐ ᐊᔅᒋᒡ ᐊ ᐸᐸᐎᒐᐅᑦ ᒋᓴᔅ ?”
ᒥᓐ ᒪᒃ ᐃᔭᐱᒡ ᐱᑕᕐ ᒋ ᑭᑭᒋᔭᐤ, “ᓇᒪᔭᐤ ᓂᔾ,” ᒋ ᐃᑕᐤ᙮ ᑎᐛᒡ ᒂ ᐅᒋ ᐸᑕᑯᓯᔨᒋ ᓇᐸ ᐱᑲᒂᓇ᙮


ᐎᐱᒡ ᐊᓂᔭ ᑲ ᒐᒋᓴᐸᔭᔨᒡ ᐊᓐᑕ ᑲᔭᐸᓴ ᐊ ᑕᔨᒋ ᒋ ᐅᒋ ᔅᑐᑕᐊᑭᓄᐤ ᒋᓴᔅ, ᐊᓐᑕ ᒋᓴᐅᒋᒪᐅᑯᐸᓇᐛ ᐎᒋᔨᒡ ᒂ ᐃᑐᑕᐊᑭᓄᐅᑦ᙮ ᑈᓚᑦ ᒋ ᐃᓯᓂᐧᑲᓱᐤ ᐊᓐ ᒋᓴᐅᒋᒪᐅᑯᐸᓇᐤ᙮ ᐊᓐᒡ ᒪᒃ ᒍᐤ ᐃᔪᒡ ᓇᒪ ᐅᒋ ᐎ ᐱᒐᐅᒡ ᐎᔨᐛᐤ ᐊᓐᑕ ᐛᔅ ᒋ ᐃᑎᔅᑕᔪᐤ ᒍᐤ ᐅᐎᓱᐛᐅᓄᐛᒡ ᒐ ᐊᑲ ᒋ ᐱᒐᒡ ᐎᒋᔨᒡ ᐊᐛᔪᐛ ᐊᑲ ᒍᐤ ᐃᑎᔅᑲᓇᓯᔨᒋ᙮ ᑭᔭ ᓇᒪ ᒋᐸ ᐅᒋ ᒥᒍᐅᒡ ᐎᒪᔅᑲᒐᐅ-ᒥᑯᓴᓂᔪᐤ ᒋ ᐱᒐᐅᐛᐅᒂ ᐊᓐᑕ ᒋᓴᐅᒋᒪᐅᑯᐸᓇᐛ ᐎᒋᔨᒡ᙮ ᐊᐅᒄ ᒪᒃ ᐅᔭ ᐛᒋ ᐎᐎᑦ ᑈᓚᑦ, ᒂ ᓂᑐᐛᐱᒪᑦ ᐊᑯ ᒂ ᑯᒂᒋᒪᑦ, “ᑕᓐ ᐊ ᐃᓯ ᐊᑕᒪᔨᑕᑯᓯᑦ ᐅ ᓇᐸᐤ ?”
ᒂ ᐃᓯ ᐎᑎᒪᑯᑦ ᐊ ᐃᑎᑯᑦ, “ᓇᒪ ᓂᐸ ᐅᒋ ᐸᓱᐛᓇᓐ ᐅᑕ ᐊ ᑕᔨᓐ ᐊᑲ ᐅᒋ ᒥᒋᑐᑎᒧᑯᐱᓇ᙮”
ᐊᑯ ᑈᓚᑦ ᑲ ᐃᑕᑦ, “ᒋᔨᐛᐤ ᐅᑎᓇᐧᒄ ᐅ ᓇᐸᐤ ᒋᔨᐛᐤ ᒋᐎᓱᐛᐅᓄᐛᐤ ᒐ ᐊᐱᒋᑕᔭᒄ ᐊ ᑎᐸᔅᑯᓇᒄ᙮” ᐊᑯ ᐊᓐᒡ ᒍᐤ ᐃᔪᒡ ᒂ ᐃᔅᒋᔄᒡ, “ᓇᒪ ᓂ ᐱᔅᑎᓂᑯᓇᓐ ᓂᐎᓱᐛᐅᓇᓇ ᒐᒋ ᐃᔅᒋᔄᔭᒡ ᒐᒋ ᓂᐸᐊᑭᓄᐅᑦ ᐊᐛᓐ᙮” ᐊᐅᒄ ᒪᒃ ᐅ ᐛᒋ ᐃᔅᐱᔨᒡ ᐅ ᒐᒋ ᑎᐱᐱᔨᒡ ᑕᓐ ᐊᓐ ᑲ ᐃᓯ ᓂᑲᓐ ᐎᑕᐧᒃ ᒋᓴᔅ ᒐ ᐃᓯ ᓂᐱᑦ᙮

ᒥᓐ ᑲᐤ ᒂ ᐱᒐᑦ ᑈᓚᑦ ᐊᓂᔭ ᒋᓴᐅᒋᒪᐅᒋᐛᐱᔪᐤ ᐊ ᐎᓴᒪᑦ ᒋᓴᓴ, ᐊᑯ ᒂ ᑯᒂᒋᒪᑦ, “ᐊᐛ ᒋᔾ ᒍᐤ ᐃᔪᒡ ᐅᒋᓴᐅᒋᒪᒧᐛᐛ ?”
ᒋᓴᔅ ᒂ ᐎᑎᒧᐛᑦ ᐊ ᐃᑕᑦ, “ᔅᒋ ᐎᑎᒪᑯᒡ ᐊ ᐊᐛᓐᒋ ᓂᔾ ᐊᐅᒄ ᐅᒋᓴᐅᒋᒪᒧᐛᐛ ᒍᐤ ᐃᔪᒡ᙮ ᑭᔭ ᒪᒃ ᒋᔾ ᐅ ᒋᑦ ᐃᑕᔨᑎᒧᐅᓐ ᑲ ᐃᔅᒋᔄᔨᓐ ?”
ᐊᑯ ᑈᓚᑦ ᒂ ᐃᑕᑦ, “ᒍᐤ ᐃᔪᐤ ᐊ ᓂᔾ ᒋᑦ ᐃᑕᔨᒥᓐ ? ᒋᔾ ᑎᐱᔨᐛ ᒋᑦ ᐃᔨᒥᒡ ᑭᔭ ᐊᓐᒡ ᑲ ᓂᑲᓂᐱᒡ ᐊᔭᒥᐊᐅᒋᒪᐅᒡ ᔅᒋ ᐸᒋ ᐃᑎᓴᐅᑯᒡ᙮ ᑕᓐ ᒪᒃ ᑲ ᐃᓯ ᐅᓂᑐᑎᒥᓐ ?”
ᐊᑯ ᒋᓴᔅ ᒂ ᐃᔅᒋᔄᑦ, “ᓇᒪ ᐅᑕ ᐊᔅᒋᒡ ᐅᒋᐱᔪᐤ ᓄᒋᒪᐅᐎᓐ᙮ ᐅᑕ ᒋ ᐅᒋᒥᑭᓂᑯᐱᓇ ᓄᒋᒪᐅᓐ ᐊᓐᒡ ᓂᑦ ᐊᐱᒋᐊᑭᓐᒡ ᓱᒃ ᒋᐸ ᒪᓯᒐᐅᒡ ᒐ ᐊᑲ ᒋ ᐱᔅᑎᓂᑯᐅᔭᓐ ᐊᓐᑕ ᒍᐤ ᐃᔪᒡ ᐊ ᑕᒡ᙮ ᓇᒪ ᐅᑕ ᐊᔅᒋᒡ ᐅᒋᐱᔪᐤ ᓄᒋᒪᐅᐎᓐ᙮”
ᐊᑯ ᑈᓚᑦ ᒂ ᐃᑕᑦ, “ᑕᑈ ᑭᑈ ᒋᒋᓴᐅᒋᒪᐅᓇᒐ᙮” ᒋᓴᔅ ᒪᒃ ᒋ ᐃᑕᐤ, “ᒋᑦ ᐃᔅᒋᔄᓐ ᐊ ᒋᓴᐅᒋᒪᐎᔭᓐ᙮ ᐊᐅᒄ ᐛᒋ ᐱᒪᑎᓯᔭᓐ ᑭᔭ ᐊᐅᒄ ᐛᒋ ᐸᒋ ᑎᑯᓯᓂᔭᓐ ᐅᑕ ᐊᔅᒋᒡ ᒐᒋ ᑎᐸᑐᑎᒪᓐ ᐊᓐ ᑕᑈᐅᓐ ᒋᓴᒪᓂᑐᐤ ᐊ ᑕᑦ ᑲ ᐅᒋᐱᔨᒡ᙮ ᑕᑐᐤ ᐊᐛᓐ ᑕᑈᐅᓂᒡ ᑲ ᑕᑦ ᐊᐅᒄ ᐊᓐ ᐱᔭᒋ ᓂᑐᑐᐅᑦ᙮”
ᑈᓚᑦ ᑲ ᑯᒂᒋᒪᑦ ᐊ ᐃᑕᑦ, “ᒐᒂᓐ ᐊᓐ ᑕᑈᐅᓐ ?”


ᐊᑯ ᒥᓐ ᑲᐤ ᒂ ᐎᐎᑦ ᒂ ᐃᑕᑦ ᐊᓂᔭᔪᐛ ᒍᐤ ᐃᔪᐛ, “ᓇᒪ ᓂ ᒋᔅᒐᔨᑎᒺᓐ ᒐᒂᔪᐤ ᑲ ᐅᓂᑐᑎᒧᒂ ᐊᓐᑕ ᒐᒋ ᐅᒋ ᑎᐸᔅᑯᓇᑭᓄᐅᑦ᙮ ᑎᑯᓐ ᒪᒃ ᒍᐤ ᐃᑐᐅᓐ ᐸᐃᒄ ᐊᐛᓐ ᒐᒋ ᐱᔅᑎᓂᒪᑯᔭᒄ ᒪᒂᒡ ᐊ ᐎᒪᔅᑲᒐᐅ-ᒥᑯᓴᓄᐅᒡ᙮ ᒋ ᓂᑐᐛᔨᒪᐛᐤ ᐊ ᒐᒋ ᐱᔅᑎᓂᒪᑯᔭᒄ ᐅ ᒍᐤ ᐃᔪᒡ ᐅᒋᓴᐅᒋᒪᒧᐛᐤ ?”
ᐊᑯ ᒂ ᑕᑈᒡ ᐊ ᐃᔅᒋᔄᒡ, “ᓇᒪ ᐎ ᐊᓐ᙮ ᐸᕋᐸᔅ ᐊᐅᒄ ᓇᑐᐛᔨᒥᒋᒡ ᒐᒋ ᐱᔅᑎᓂᒪᑯᐅᔭᒡ᙮” ᐅ ᒪᒃ ᐸᕋᐸᔅ ᒋ ᒋᒧᑎᐃᔪᐤ᙮

سنیں ᒠᓐ 18