Mixtec, Northern Tlaxiaco: Tutu ii - Kaꞌan ia Dios nuu ndiꞌi ñayiu New Testament+

Tutu ii - Kaꞌan ia Dios nuu ndiꞌi ñayiu

Yun te ni ndontakuei ndiꞌi ñayiu ni ka oo nuu junta yun. Te ni ka jinsiaꞌa de Jesús nuu Pilato. Te ni ka jinkondee de ka kaꞌan kuechi de siki ya, te ka jiñaꞌa de:
―Ni ka nukuꞌun san tee yaꞌa ja skaꞌan de ñayiu ñuu san, vi kaꞌan de ja ma vi tniuyaꞌu ka san xuꞌun impuestu ja kiꞌin nuu rey ñuu Roma. Te suni kaꞌan de ja tee ni tetniuu Dios kuu de, vi suu de kuu rey ―ka jiñaꞌa de.
Yun te ni jikan tnoꞌo ña Pilato:
―¿A suu ron kuu rey ñayiu judio? ―jiñaꞌa de.
Te jiñaꞌa Jesús:
―Saa kaꞌan maa ni ―jiñaꞌa ya.
Yun te jiñaꞌa Pilato nuu sutu ka kuu nijaꞌnu vi nuu ndiꞌi ñayiu ni ka ndututu yun:
―Tu saꞌun na kuechi niꞌi san siki tee yaꞌa ―jiñaꞌa de.
Su viꞌi ka ni ka kaꞌan de, te ka jiñaꞌa de:
―Tee yaꞌa, chi skaꞌan de ñayiu ñuu san ja ndontakuei vai siki tee ka netniuu. Te ni kejaꞌa de kaxtnoꞌo de ndee Galilea, te vitna ja ni kenta de ndee Judea yaꞌa ―ka jiñaꞌa de.

Te nuu ni onini Pilato ja siun ni ka kaꞌan de, te ni jikan tnoꞌo de a tee Galilea kuu ya. Te nuu ni ka kaꞌan de ja suu kuu ya, te ni ndasiaꞌa ña de ndaꞌa Herodes, tee tatnuni Galilea, chi Jerusalén ni oo Herodes kiuu saa. Te nuu ni jini ña Herodes jin Jesús, te ni kusii ini de, chi ndee ja oo kiuu ni ondioo ini de ja kuni de ya, chi ja jini de ja ka kaꞌan ñayiu jakuaꞌa ja saꞌa ya, te ni kuini de ja kondiaꞌa de in jakaꞌnu saꞌa ya.
Yun te ni jikan tnoꞌo ña de kuaꞌa tnoꞌo, su ni ja in tnoꞌo tu ni kaꞌan Jesús. Te sutu ka kuu nijaꞌnu vi tee ka kaxtnoꞌo Ley Moisés, chi ka oo de yun ka xtavi niꞌi de ya kuechi. Yun te ni ka skexiko ña Herodes vi soldado de jin Jesús, te ni ka skuiꞌnu ña in saꞌun kani vii ndevaꞌa ja ka niꞌnu rey, ja ni ka jaku ndee ña de, vi ni ka saꞌa neꞌe ni ka saꞌa yichi ña de. Te ni ka ndatetniuu de ya kuanoꞌo tuku ya ndaꞌa Pilato. Te vi kiuu saa ni ka ndumani tnaꞌa Herodes jin Pilato, chi ni ka ojini uꞌu tnaꞌa de ama ka.

Yun te ni ndaxtutu Pilato tee ka kuu nijaꞌnu nuu sutu, vi tee ka netniuu, vi ñayiu ñuu, te jiñaꞌa de:
―Yaꞌa oo tee ni ka kisiaꞌa maa ni nuu san, ja ka xtavi kuechi ni de, ja skaꞌan de ñayiu ñuu ja vi ndakoi siki tee ka netniuu. Su vi jin nuu ndiꞌi maa ni ni xndichi san de, te tu ni nukuꞌun san ni in jakueꞌe ja ka xtavi maa ni de. Te vini Herodes, tu na kuechi ni jinkuꞌun de, yun guaa ni ndasiaꞌa tuku de tee yaꞌa ndaꞌa san. Te ja ka jini maa ni ja tu na jakueꞌe ni saꞌa tee yaꞌa ja kokuu de. Te yun guaa na tatnuni san ja na vi kani ña jin de, te siaa san de ―jiñaꞌa Pilato.
Te nini kuu ja vi siaa de in tee yiꞌi vekaa in in viko pascua. Te vi ndiꞌi ñayiu ni ka kana jaa, te ka jiñaꞌi:
―¡Kaꞌni ni tee jian, te siaa ni Barrabás! ―ka jiñaꞌi.
Te Barrabás, chi yiꞌi de vekaa siki ja ni jaꞌni de ndiyi, vi ja ni ndakoo de siki tee ka netniuu Jerusalén. Su Pilato, chi ni kuini de ja siaa de Jesús, te ni kaꞌan tuku de jin ñayiu. Su vi saa viꞌi ka ni ka kana jaa ñayiu, te ka jiñaꞌi:
―¡Katakaa ni de! ¡Katakaa ni de yika cruz! ―ka jiñaꞌi.
Te ni kaꞌan tuku Pilato jichi kuu uni, te jiñaꞌa de:
―¿Su na jakueꞌe ni saꞌa tee yaꞌa? Tu na kuechi niꞌi san siki de ja kokuu de. Te na tatnuni san vi kani ña jin de, te siaa san de ―jiñaꞌa Pilato.
Su vi viꞌi ka ni ka kana ñayiu ka jikain ja na kuitakaa ya, te jin tnoꞌo ni ka kana ñayiu yun vi tee ka kuu nijaꞌnu nuu sutu, ni ka niꞌi ja ka kuini. Yun te ni jino ini Pilato ja saꞌa de nagua ka jikan ñayiu yun. Te ni siaa de tee jaꞌni ndiyi vi ndakoo siki tee ka netniuu. Te ni siaꞌa de Jesús ndaꞌa soldado ja vi saꞌa tee yun nagua ka kuini maa ñayiu.

Te nuu ni ka jaka soldado Jesús ja vi katakaa de ya yika cruz, ni ka junkuntnaꞌa de jin in tee ñuu Cirene nani Simón. Mandii tee yun ja ni jaꞌan de yuku, te ni ka tenini ña de ja ni jiso tee yun cruz, te ndikin de Jesús kuaꞌan de. Te kuaꞌa ndevaꞌa ñayiu ka ndikin kuaꞌankuei, te ka ndaꞌi ka kana ñayiu siꞌi kuaꞌankuei ña ja ka kuu suchi ini ña ja jaꞌa Jesús. Su ni jionenuu ya nuu kuaꞌankuei ña, te jiñaꞌa ya:
―Maa ni ñaꞌa Jerusalén, ma vi kuaku ni ja jaꞌa sein, chi vi kuaku ni ja jaꞌa maa ni vi ja jaꞌa seꞌe ni. Chi kii in kiuu koo tnundoꞌo, te vi kachi ñayiu: “Na taꞌu na ndetu ñaꞌa tu ni jinkuꞌun lulu, vi na taꞌu na ndetu ñaꞌa tu ni jini ja skaxin ña lulu” vi kachi ñayiu. Yun te vi jinkondee ñayiu vi kanai jin yuku, te vi kuñaꞌi: “Kanakau siki rin” te nuu tinduu: “Chisaꞌu ña”. Chi nuu ja siun ka saꞌa ña jin yutnu kuii, te viꞌi ka kokuu jin yutnu yichi ―jiñaꞌa Jesús.
Suni ni ka jaka de uu tee kueꞌe ndevaꞌa ja vi katakaa in ni de jin Jesús. Te nuu ni jinokuei de nuu nani yiki xini ndiyi, te ni ka jatakaa de Jesús jin nduu tee kueꞌe yun nuu in in cruz, in de ichi ndaꞌa kuaꞌa ya, te inka ichi satni ya. Te nuu ni ka jatakaa de ya, te jiñaꞌa ya:
―Tata, konekaꞌnu ini ni jin ñayiu yaꞌa, chi tu ka jini nagua ka saꞌi ―jiñaꞌa ya.
Yun te ni ka jitotnuni soldado, kondioꞌni ndee saꞌun ya kuu ja vi kendoo jin in in de. Te ka oo kuaꞌa ñayiu ka ndiaꞌi, te vi ndee tee ka netniuu ka kaꞌan kuasun ña jin ya, te ka ndatnoꞌo de:
―Ni skaku niꞌnu de inka ñayiu. Te vitna na skaku niꞌnu de maa de, nuu ja ja ndaa ndija ja tee ni kaji Dios ja ni tetniuu ya kuu de ―ka ndatnoꞌo de.
Te saa ni tee ka kuu soldado, chi suni ka saꞌa kuasun ña de. Ni ka jintnaꞌa yatni ña de, te ka jiñaꞌa de vinu iaa ja koꞌo ya. Te ka jiñaꞌa de nuu ya:
―Nuu ja rey ñayiu judio kuu ron, te skaku niꞌnu maa ron ―ka jiñaꞌa de.
Te ichi xini ya ni ka tetuu de in tnoꞌo ja yoso jin saꞌan griego, latín vi hebreo, te kaꞌan suaꞌa: “Tee yaꞌa kuu rey ñayiu judio”, kachi tnoꞌo yun.
Yun te vi ndee in tee kueꞌe ka intakaa jin ya kaꞌan kuasun ña de, te jiñaꞌa de:
―Nuu ja tee ni tetniuu Dios kuu ron, te skaku niꞌnu maa ron nagua ja skaku niꞌnu ña ron jin ruꞌun ―jiñaꞌa de.
Yun te ni kuxeen inka tee ka intakaa jin de, te jiñaꞌa de:
―¿A vini tu yuꞌu ron ia Dios ja kaꞌan ron siun? Te in ni tnundoꞌo ka tnaꞌo jin tee yaꞌa ja vi kuo. Yoon, chi ja ndaa ja ka tnaꞌa mao tnundoꞌo, chi ka tniuyaꞌuo jin jakueꞌe ni ka saꞌo. Su tee yaꞌa, chi tu saꞌun na jakueꞌe ni saꞌa de ―jiñaꞌa de.
Yun te jiñaꞌa de:
―Jesús, ndakaꞌan ña ni jin san kiuu na jinkondee ni ja tatnuni ni ―jiñaꞌa de.
Te jiñaꞌa Jesús:
―Kaꞌan ndaa san ja vi vitna kuu ja koo ni jin san andivi in nuu vii ndevaꞌa ―jiñaꞌa ya.

Te nuu ni jino ka uxi uu nduu, te ni kunee ninii ñuyiu, te vi ndee nuu ka uni jañini, te saa ni nduu ndijin. Ni kunee nuu nikandii, te ni teꞌnde sagua saꞌun kaꞌnu ja ndesi nuu ii, ini veñuꞌu kaꞌnu Jerusalén. Te yun ni kana jaa Jesús, te jiñaꞌa ya:
―Tata, ndiundaꞌa maa ni anu san ―jiñaꞌa ya.
Te nuu ni ndiꞌi ni kaꞌan ya tnoꞌo yun, te ni kana anu ya.
Te nuu ni jini tee kuu capitán ja siun ni kuu nuu ni jiꞌi Jesús, te ni chiñuꞌu de ia Dios, te jiñaꞌa de:
―Ja ndaa ndija ja tu na kuechi tee yaꞌa ni oo ―ni kachi de.
Te ndiꞌi ñayiu ni ka oo ja ni ka jini tnundoꞌo yun, ni ka ndajiokuiin ka katui ndikai ja ka tnaꞌu ndevaꞌa ini. Su ndiꞌi ñayiu ka jini tnaꞌa jin Jesús vi ñaꞌa ka ndikin ña jin ya, vajikuei ña ndee Galilea, chi jika ni ni ka kendoi ka ndiaꞌi ja siun ni kuu.

Ni oo in tee guaꞌa, in tee ndaa ñuu Arimatea nani José, in ñuu ja tnii Judea, te suni ni yinduu de nuu tee judio ja ka saꞌa junta kaꞌnu ka. Su tu ni jintnaꞌa ini de tnoꞌo ni ka ndatnoꞌo tee yun nuu junta yun siki Jesús, chi ni kandija de ja koo in kiuu te tatnuni maa ia Dios. Te yun guaa ni jaꞌan de ni kaꞌan de jin Pilato ja ni ndakan de yiki kuñu Jesús, te ni jandetu tee yun. Te ni nuneꞌe de yiki kuñu ya nuu cruz, te ni tniutuu de jin in saꞌun kuijin vii ndevaꞌa, te ni tayuꞌu ña de in yau nuu ni kaan de in yiki kava nuu chiaꞌan ka saꞌun na ndiyi kiyuꞌu. Te kiuu saa kuu ja ka saꞌa tuaꞌa ñayiu, chi ja oo yatni ja ndakiꞌin kiuu ndatatu. Te ñasiꞌi ja ka ndikin ña jin Jesús ja vajikuei ña ndee Galilea, ni jaꞌankuei ña, te ni ka jini ña yau ñaña yun, vi ni ka jini ña naxa ni ka jakintuu de yiki kuñu ya. Yun te ni ka ndajiokuiin ña veꞌe ña, te ni ka saꞌa tuaꞌa ña tatna xiko asin ja vi koso ña nuu yiki kuñu Jesús. Su ni ka jaan ii ña kiuu ndatatu, nagua tatnuni nuu Ley Moisés.

سنیں San Lucas 23