Text: © Alliance biblique de Côte d'Ivoire, 2003 Audio: ℗ 2007 Hosanna

Alladian - 2003 Edition (NT)

Alladian: Ɛmɛẅi ankà ankrànkràn © Alliance Biblique de Cote d'Ivoire, 2003.

Ɛnyanbì ɛsɔrɔ fùtan, wúyɔ hɔ̀n bɩ́ ɛnzhì mán ɛnshi bánbán léyi yɔ wá esùva yɔ hɛ́n nɔn, hɔ́n Zhezü nanmàn-kru wú. Yɔ cɔ́ obù léyi yɛ vrà yɛ sɛ́n ezhe-nanmàn lɔ, hɛ́n ɔhɔnán esùshe ɛnnànmàn muan; yɔ bru ɛnnànmàn mɛ̀n, tɛ́n ye sɩ́ kán Ɛẅɛnwrɔn Zhezü dùwrú lɔ. Yɔ sɩ́ nyri ankà léyi yɔ le tro kɩ wúcɔ̀ anhyrɛ̀ cɔ́ ɛceci wosú srɔ. Ɔmuhi ɛnjansù kɛ ẅɛn yɔ kɩ yɔ sɩ́ sɩ́ ɛzì ɛwú rɔa nɔn, wúcɔ̀ hɔ̀n lɔ kɛ dɔ́ yɔ le: “Cɛci kruhú kɛ nye jí owú-bɔ̀ mɛ̀n, ɔwrɔn léyi dú ɔkɔrɛ-bɔ̀ mɛ̀n nɛ́n?
Nɛ̀n sɩ̀ dù ɛnu lɔ; nɛ̀n dú owúemɛ̀n nɛ̀n frɔ́. Ke bru nyɛ̀n, ankà léyi nɛ̀n dɔ́ nyɛ̀n ɛnvra léyi nɛ̀n vru nɛ̀n dú Galile nɔn: ‘Ke ji le ye bɩ́ ɔwrɔnẅì Ẅì yɛ tán ɛgbàn-hán-bɔ̀, yɛ gɔ́n nɛ̀n brɛ́ ɛgbàn-hán-tɛ̀ tɔ̀n domɛ̀n, nɛ̀n dú owúemɛ̀n nɛ̀n frɔ́ ɛbi-anhɔnmɛ̀n-bì lɔ.’ ”
Zɛtɛn Zhezü ankà lɔ dɔ̀ nɔn bru yɔ. Yɔ cɔhɔ́ ezhe-nanmàn tɛsɛ̀n kɩ yɔ hɔ́n dɔ́ n'ɛsɛnkɛn-bɔ̀ ɛvà-ɔtɔ̀n lɔ mán anwrɔn ndɔ hɔ̀n. Yɔ de yɔ dú Mari Magdala nyɔnwrɔn, Zhanɛ̀n mán Mari, Zhakɛ̀n nɛ́n muan. Wúyɔ̀ nyàntɛn hɔ̀n léyi yɔ mɛhi yɔ dù nɔn, dɔ́ Zhezü kɔ̀hɔ̀n-wá-bɔ̀ lɔ ankà zri lɔ. Tɛ́n Zhezü kɔhɔ̀n-wá-bɔ̀ lɔ ke tro le ankà léyi wúyɔ̀ hɔ̀n lɔ kɛ dɔ̀ nɔn kè sɩ̀ ẅɛ̀n nkru, kɩ yɔ sɩ̀ bù tàn ankàẅì. Zɛtɛn Piɛrɛ̀n tɔhú kɩ srɛ́ hɔ́n ɛnnanmàn-kru wú; nɛ̀n sɩ́ ɛnkru ɛnhi kɩ nɛ̀n kán ɛcàsa wɔ́ léyi ye bɩ yɛ kɔra Zhezü nɔn. Zɛtɛn Piɛrɛ̀n vru ɛmɛẅi hɔ́n ɛbemɛ̀n kɩ eci léyi nɛ́n kàn nɔn, kɛ frɛ́n nɛ̀n anvɛmɛ̀n.


Ɛnbì zri lɔ, Zhezü sɛnkɛn-bɔ̀ anhyrɛ̀ kɛ hɔ́n anmàn tɔ̀n léyi ye bi Emahüsɛ̀n, hɩ dú Zherüzalɛmɛ̀n tɛsɛ̀n anhɛ́-kɔrɛ̀ tɛ̀brukru ɔbɔ̀ɛn sùnan mɛ̀n. Yɔ dɔ́ ankà hɔ̀n lɔ fɛn léyi vácì nɔn, yi ankà. Ɛnvra léyi ye dú ankà dɔ́ mɛ̀n, hɩ yɔ wrɔ́n ecüì nɔn, Zhezü dùku sɔnba yɔ ɛtɛsɛ̀n, kɩ yɔ nán esù hɔ́n ɛyri zri. Yɔ kán nɛ̀n, tɛ́n eci tɔ̀n kɛ sɩ́ tán yɔ ɛkɔrɛ̀-levri yá nyri nɛ̀n nɔn. Zhezü ke yrɛ yɔ le: “Ecüìwrɔn-ankà tán de nyɛ dɔ́ esùnánmɛ̀n nɛ́n?” Kɩ yɔ sannyɔn ɛnhyòbɔ̀ cɔ́ yɔ. Ɔwrɔn tɔ̀n dú yɔ ɛmɛ̀n ye bi Kleopasɛ̀n, kɛ dɔ́ nɛ̀n le: “E dú Zherüzalɛmɛ̀n-wrɔn zri léyi kɛ vá yá ɛci hɔ̀n léyi wɔɛ̀n ɛnbì ndɔ hɔ̀n lɔ mɛ̀n nɛ́n?” Zhezü ke yrɛ yɔ le: “Ɛcitan hɔ̀n hán?” Kɩ yɔ mrɛ́n nɛ̀n ɔmùan le: “Eci léyi wɔɛ́n Nazàrɛtɛ̀n-wrɔn Zhezü nɔn! Nɛ̀n dú Ɔwɔ-mùanwú-ankà-dɔ́-wrɔn léyi ɛkɔrɛ̀ srɔn nɔn. Nɛ̀n yé n'eci-hán mɛ̀n mán n'ankà-dɔ́ mɛ̀n, Ɔwɔ zìwú mán fɛcüè lɔ fɛn zìwú n'ɛkɔrɛ̀srɔn lɔ. B'Ɔwɔ-cice-bɔ̀ cüìcüì mán anmàn-cüìcüì-bɔ̀ ẅɛn nɛ̀n tán yɔ, yɔ dí nɛ̀n owúemɛ̀n, kɩ yɔ gɔ́n nɛ̀n brɛ́ ɛgbàn-hán-tɛ̀ tɔ̀n domɛ̀n. Bɔ̀ ẅɛn esɛ́ le, nɛ̀n dú ɔwrɔn léyi ke le bɩ́ Izraɛlɛ̀n kè die nɔn. Tɛ́n ankà hɔ̀n lɔ fɛn léyi yɛ dɔ̀ nɔn, ɛnyɔncì lɔ de dú n'ɛbi-anhɔ̀n-bì ɛnvra léyi ɛci hɔ̀n lɔ wɔɛ̀n nɔn. Wúyɔ̀ janbɔ̀ léyi dú b'ɔkpɔsɔ lɔ mɛ̀n nɔn, hán bɔ̀ anvɛmɛ̀n-frɛ́n-ci annànwɔrɛ mɛ̀n. Yɔ hɔ́n n'ɛnnànmàn-kru wú ɛsɔrɔ futàn, tɛ́n yɔ sɩ̀ cɔ̀ n'edùwrú lɔ. Yɛ vru ɛmɛẅi yɔ vá dɔ́ bɔ̀ le Ɔwɔ-kùyüre-bɔ̀ srɔ dɔ́ yɔ le nɛ̀n dú ɔkɔrɛ mɛ̀n. Bɔ́ nyran hɔ̀n lɔ mɛ̀n, ɛnjanbɔ̀ hɔ́n ɛnnànmàn-kru wú kɩ cɔ́ ɛci lɔ fɛn hán ɔmu le wúyɔ̀ hɔ̀n lɔ dɔ̀ nɔn, tɛ́n nɛ tɛn, yɔ sɩ̀ kán nɛ̀n.” Zɛtɛn Zhezü kɛ dɔ́ yɔ le: “Ɛkruemɛ̀n-woro-bɔ̀, ny'ankaẅɩ̀-bùtan sùnàn kɛ moɛ́n Ɔwɔ-mùanwú-ankà-dɔ́-bɔ̀ tɛsɛ̀n! Kè sɩ̀ zrɔ̀ tàn le ebɩ̀die-wrɔn kɛ̀ kán ɛgbàn ɔmu lɔ yakɛ ke bru n'eci-zrɔ lɔ mɛ̀n hàn?” Zɛtɛn nɛ dɔ́ yɔ ankà hɔ̀n léyi Owrú Prɔnprɔn dɔ́ n'ɛwú, bukru Mohizì wrú hɔ̀n lɔ mɛ̀n hàn kɩ cɔ́ Ɔwɔ-mùanwú-ankà-dɔ́-bɔ̀ wrú hɔ̀n léyi merɛ́n nɔn.
Ɛnvra léyi yɔ cɔ́ anmàn tɛsɛ̀n, ɛyri léyi yɔ hɔ̀n nɔn, Zhezü hán eci, yé le ne ji nɛ̀n hɔ́n ezì esù she. Tɛ́n yɔ ẅɛn nɛ̀n yɔ hɛ́n kɩ yɔ dɔ̀ le: “Ɛ̀ cɔ́ bɔ̀ bɔ̀ yɛ́, ɛnvra mán trɔa, ɛnnyran kɛ vá ɛgɔ́n yri. Nɛ̀n bru ɛbemɛ̀n ô nɛ̀n cɔ́ yɔ mɛhi yɔ yɛ́.” Nɛ̀n cɔ́ yɔ mɛhi yɔ yɛ́ tɛbrɛ̀ wú, Zhezü bɩ́ abùtùkumɛ́n kɩ nɛ̀n tán Ɔwɔ ɔkuɛ̀n, zɛtɛn nɛ̀n voyan abùtùkumɛ́n lɔ kɩ nɛ̀n tán yɔ. Zɛtɛn anvɛ̀ gbá yɔ, yɔ nyri nɛ̀n; tɛ́n nɛ̀n zrɛ́n yɔ anvɛmɛ̀n. Yɔ dɔ́ y'edomɛ̀n le: “Ke sɩ́ hán le, ɛnhyà tɔ̀n de dú bɔ̀ ɛmɛ̀n ke wrù ɛnvra léyi ɛnlevri wanzi lɔ, nɛ dɔ́ bɔ̀ Ɛwrú Prɔnprɔn ankà nɛ́n?”
Ɛnvra zri lɔ yɔ tɔhú, yɔ vru ɛmɛẅi yɔ hɔ́n Zherüzalɛmɛ̀n. Yɔ cɔ́ Zhezü sɛnkɛn-bɔ̀ ɛvà-ɔtɔ̀n lɔ bɔrɛkru yɔ mán yɔ nyrán hɔ̀n mɛhi, yɔ dɔ̀ le: “Ɛẅɛnwrɔn dú owúemɛ̀n frɔ́ annànwɔrɛ mɛ̀n! Simɔn kán nɛ̀n!” Kɩ yɔ dùku mán yɔ dɔ́ eci léyi wɔɛn ɛnlevri wanzi mán ɔmu le yɔ hán yɔ nyri Zhezü ɛnvra léyi nɛ̀n voyan abùtùkumɛ́n lɔ nɔn.


Yɔ vru yɔ dú ankà dɔ́ mɛ̀n, kɩ Zhezü srɔ yɔ anwanzi kɩ kɛ dɔ́ yɔ le: “Anwɔwɔ kè dú nyɛ tɛn!” Ɛnjansù mán ɛnkrɛta ẅɛn yɔ nmù, ɔmuhi yɔ tro le ɛci de kɛ wrɔ́ yɔ nɔn. Tɛ́n Zhezü kɛ dɔ́ yɔ le: “Cɛci kruhú kɛ nyɛ hán gbɔgbɔ̀a? Cɛci kruhú kɛ nyɛ ẅɛn ankà-tro anhyrɛ̀ ny'ɛnbɔrɛ lɔ mɛ̀n hàn? Nyɛ́n nyan m'ankɔrɛ̀ mán m'annan, mɛ̀n de mɛ̀n nyɔn nɔn! Nyɛ́n tɛ́ mɛ̀n ɛkɔrɛ̀ ô nyɛ́n kàn, ɔmuhì ɛnhɛ́n kè sɩ̀ dì anẅia mán ɛẅi kɛ̀ hàn mɛ̀n léyi mɛ̀n nyɔn nɔn, hán ɔmu le nyɛ kàn nɔn.” Nɛ dɔ́ ankà ndɔ hɔ̀n lɔ kɩ ne yé yɔ n'ankɔrɛ̀ mán n'annan. Ɔmuhi yɔ sɩ́ cɔ́ n'ankàẅì-butan-ẅɛn yri, kɩ pɔpüɛ̀ mán anvɛmɛ̀n-frɛ́n wá yɔ nmù nɔn, zɛtɛn Zhezü kɛ yrɛ yɔ le: “Ɛnu lɔ nyɛ́n ẅɛn ɛci-zî-ciɛ?” Yɔ tán nɛ̀n ɛcàn wɔ́n buri. Nɛ̀n bɩ́ ɛcàn lɔ nɛ̀n rá y'ezìwú. Zɛtɛn nɛ dɔ́ yɔ le: “Nyàn ankà léyi mɛ̀n dɔ́ nyɛ̀n ɛnvra léyi nyɛ́n mɛhi bɔ́ dù nɔn: eci hɔ̀n léyi ye merɛ́n m'ɛwú, Mohizì nyanmàn lɔ mɛ̀n, Ɔwɔ-mùanwú-ankà-dɔ́-bɔ̀ wrú hɔ̀n lɔ mɛ̀n, mán Ɔwɔ-mrɛ́n wrú lɔ mɛ̀n nɔn, ke ji le kɛ̀ sá nmù.” Zɛtɛn nɛ̀n vuru yɔ ɛnkruemɛ̀n, ô yɔ yá Ɛwrú Prɔnprɔn mɛ̀n ankà, kɩ nɛ dɔ́ yɔ le: “Nyàn eci léyi ye merɛ́n nɔn: Ebɩ̀die-wrɔn kɛ lɛ kán ɛgbàn, ne le dú owúemɛ̀n nɛ̀n frɔ́ ɛbi-anhɔnmɛ̀n-bì lɔ, kɩ ke ji le yɛ dɔ́ n'ankà ɛnhi wù anmàn lɔ fɛn zìwú, yɔ bukru Zherüzalɛmɛ̀n, ye bi anwrɔn kɛ̀ crɔn ɛnkru, ô kɛ̀ cɔ́ ɛgbàn-bɩ-ce. Nyɛ́n dú ankà ndɔ lɔ nɛ́n dalɛfuɛ-di-bɔ̀. Kɩ mɛ́n dùku me le yüre nyɛ̀n eci léyi Dade wá ɔmùan nɔn. Tɛ́n ke ji le nyɛ́n yɛ́ anmàn, hàn kɩ kɛ cɔ́ ɛnvra léyi anhobɩ́ kɔrɛ̀srɔn lɔ kɛ lɛ kàkɛ nyɛ̀n ɛwú nɔn.”


Zɛtɛn, Zhezü bɩ́ yɔ hɔ́n anmàn mɛẅi, Betani tɛsɛ̀n, kɩ nanvrɛn lɔ, nɛ̀n sɩ́ ankɔrɛ̀ ɛwú, nɛ̀n fú yɔ ɛnshi. Ɛnvra léyi nɛ́n dù ne fú yɔ ɛnshi nɔn, nɛ̀n cɔhɔ́ y'ɛtɛsɛ̀n, kɩ ye bɩ́ nɛ̀n yɔ hɔ́n anhobɩ́. Yɔ tɛn, yɔ cüe nɛ̀n ankɔrɛ̀ ezìwúɛ, kɩ ye vru ɛmɛẅi yɔ hɔ́n Zherüzalɛmɛ̀n pɔpüɛ̀-brà-vriemɛ̀n. Yɔ dú ɛnvra lɔ fɛn Ɔwɔ-cice-wɔn lɔ mɛ̀n kɩ yɔ mrɛ́n Ɔwɔ.

سنیں Lükɛ̀n 24