Luk 7
7
Jizɔs akos uwan utom una ɔr uwaiku
(Matiyo 8.5-13)
1Mɔ Jizɔs abɛɛn iramen akaa angan kɔ iyɔr amem amban vɛ amgbayi un mɔ, anɔr kɔ Kapanum. 2Utaan uwaiku Rom#7.2 Utaan uwaiku Rom Utaan uwaiku Rom ugune a ɛnɛn uwaiku agenɛv, ɔ ɛn aru iti atan gha iti anyin iti anyin. ugen aru uwan utom ungwen aru un kɔ isima, aru ghi iwen anɔngɔyi uku. 3Mɔ ɔr uwaiku hun amgban urɛ una Jizɔs, atind ataanɛv Ujus na vɛ aza rav Jizɔs hin ava kos uwan utom una. 4Mɔ vɛ za kɔr Jizɔs, vɛ kɔr uzɔ ghu Jizɔs na waas ɔr hun, vɛ akaa na, “Ɔr ungwen akuma ungwen wa un uvogh. 5Ɛchi ghɛshiya un ghu utar aas Izrɛl ama ɔs itumbɛ izwangnɛn Ujus.”
6Ne Jizɔs ayov urɔng ghɛ avo. Mɔ vɛ kpember. Ɔr uwaiku hun atind akar ana na vɛ akaa una, “Uwun, ka yayi ichan uvan kan itumbɛ aam gha, mɛ kuma itughun igin uva kan itumbɛ aam gha. 7Ku mɔ hun ne mɛ va kɔ ghu uwɛ umwe inga gha, kpa kaa imu uwan utom uwam ashiya. 8Itiyo ikaa vɛ nam ihɛr ungwen mɛ ɛnɛn uwaiku agenɛv. Ungwen mɛ kaan na ungwen za aza ungumɔ va ava. Mɛ kaan uwan utom uwam na, ɛr man a ɛr.”
9Mɔ Jizɔs amgban ukwagh ɔɔr una, ka kɔr un iyɔr agɛma kɔ isum iyɔr amban vɛ dondayi un, akaa ghɛ avo na, “Mɛgwe mɛ ɛn utu isima ibɛrɛn ungun han utar Izrɛl gha.” 10Mɔ akar ana ɔr uwaiku hun vɛ hire kɔ itumbɛ mɔ, vɛ ɛn uwan utom hun ashiya.
Jizɔs arɛr uwan ukpon una ukwas ichɔrgur
11Mɔ abɛɛn hɔ Jizɔs ayov kɔ ugeri ungwen vɛ tayi na Nayin, ayɛghɛnɛv anav ghɛ iyɔr tsɛng vɛ donda un. 12Mɔ vɛ kpember uhunza unɔrun kɔ ugeri hun, vɛ ɛn iyɔr agenɛv vɛ teng ikom ina uwan una ukwas ichɔrgur uwan tson una ungɔ. Iyɔr tsɛng amban hɔ ugeri ungumɔ vɛru yovon urɔng ghu un. 13Mɔ Uwun Jizɔs ɛnɛn ukwas hun, ishon ikɔr un shisha. “Akaa ghu un na, ka vangnayi gha.”
14Ne aza kpember hɔ amban vɛ teng ikom hun vɛ atire ne aper utiran hun, akaa na “Uwan nombos, mugh ghi isa.” 15Ne ɔr ukpon hun amugh isa ahir iramen! Ne Jizɔs ana un kɔ ghu ungɔ una.
16Katser iyɔr tsɛng amban vɛru hen shisha, ne vɛ gɛma isighan Aonz. Ukaa na, “Ɔr uramen ɛchi Aonz utaan aduwe kan ghu ɔs. Aonz ava ɔ arǝn iyɔr anav.” 17Iyɔr vɛ mgba urɛ una Jizɔs kɔ Judiya umuwem ghɛ itar ingin inigir Judiya.
Jon ɔr minden iyɔr kɔ ijɔr atind ayɛghɛnɛv anav kɔ Jizɔs
(Matiyo 11.2-19)
18Ayɛghɛnɛv anav Jon ɔr minden iyɔr kɔ ijɔr vɛ ɔɔr Jon akaa angan Jizɔs a ɛr. Jon atah iyɔr ayɛghɛnɛv anav ahar. 19Ne atind avo kɔ Uwun Jizɔs na apine una, “Uwɛ ne ungwe ɔr ungwen ava hini ghi kɛghɛyi ɔr ugene?”
20Ayɛghɛnɛv anav Jon ahar vɛ aza akaa Jizɔs na, “Jon ɔr minden iyɔr kɔ ijɔr atind ɔs na ghi ipine na, ‘Uwɛ ne ungwe ɔr ungwen uva hini ghi kɛgh ɔr ugene?’ ”
21Ukpɛ ungumɔ, Jizɔs akos iyɔr tsɛng amban vɛru awanɛv, amban vɛru ghu mɛyion, ghɛ amban aru ajingɛjing abev, ghɛ amban vɛ pir ase. 22Jizɔs akaa ayɛghɛnɛv anav Jon, “Hiren itiyo za ɔɔrun Jon akaa angan ɔ ɛnɛn ghɛ angan umgban. Upir ase amban ghi ɛnɛn, amban vɛ guzugh vɛ amba ghi izenden, imandɛv vɛ shiya, ukunda atogh amba ghi ingban, vɛ kponɛv vɛ rɛr, mɛ tsogh urɛhɛ usɛ kɔ ghɛ achanɛv. 23Ibɛrɛn Aonz iru kɔ amban ukwagh ashi avo ghi isima ghu amwe gha.”
24Mɔ ayɛghɛnɛv anav Jon vɛ yov, Jizɔs akɔr ghi ɔɔrun ukwagh Jon kɔ iweng iyɔro amban vɛru hen mɔ na. “Mɔ uzan kɔ ghu Jon kɔ vɛ tim gha, kine ɔro urun na ɔ ɛnɛn? Ɔr ɛn ku utoho ungun ahɛmbe anga hurene? 25Ɔ ɛn aru mɔ gha, kine ɔro urun na ɔ ɛnɛnɛ? Ɔr ungwen awan akond utorovo? Inga, iyɔr awanɛv akond utorov, amba run kɔ atumbɛ utoro. 26Ɔɔrum kine uzan ghi ɛnɛnɛ? Ɔr uramen ɛchi Aonzo? Ukɔng, mɛ ɔɔrun, ɔr uhɛmban ɔr uramen ɛchi Aonz. 27Jon ku ɔr ungwen vɛ angɛr ukwagh una kɔ uka Aonz na,
“ ‘Mɛ tind ɔr utom uwam kɔ ishi ikow,
ungwen ava tɔr ihang tete sɛ uva.’
28Mɛ ɔɔrun, amban akasɛv vɛ amar avo atsɛ amem mɔ uvo umɔm ahɛmba Jon gha. Kpa ɔr umase itiyo kɔ utorov unav Aonz ahɛmba Jon!”
29Mɔ iyɔr amem ghɛ vɛ ɔzunɛv ukpanɛv vɛ amgban ukwagh ɔɔrun una, vɛ arumun na Aonz angwe jing, ɛchi vɛru amban Jon aminde avo kɔ ijɔr. 30Kpa Ufarasi ghɛ afɔn mɛnna Mosis shisha vɛ venda awa isima una Aonz ɛchi uvo, itiyo ikaa avo Jon aminde kɔ ijɔr gha.
31Jizɔs apine, “Kine mɛbe mɛ kaa na iyɔr amban han utar ungun hanagen amba? Amba nana? 32Amba ɛn myem amban vɛ tɛma kɔ utemb ukasuwa. Itan arend na,
“ ‘Ghi kuwa acham ghi ɔz,
kpa uvinen gha,
ne ghi itom acham ukuu,
kpa uvangnɛn gha.’
33Jon ɔr minden kɔ ijɔr ava ayayi ukwagh uyan ɛn iyɔr agenɛv gha, amayi masɔrum gha, ukaan na, ‘Ajingɛjing ube angwe kɔ ghɛ ana.’ 34Uwan Ɔro, ava angwe ghi iyan uman masɔrum, ukaan ghu un na, ‘Angwe ɔr uya-ya ghɛ ɔr uman masɔrum, ukwar vɛ ɔzunɛv ukpanɛv ghɛ iyɔr akaa abe!’ 35Kpa ukwagh ufɔn Aonz angwe jing kɔ ase myem anav.”
Ukwas ube ahaa Jizɔs makurem avor
36Ufarasi ugen arav Jizɔs ukwagh uyan ayɛkighɛ kɔ itumbɛ ina, Ne Jizɔs aza kɔ itumbɛ ina atɛma iyan ukwagh uyan. 37Ukwas ɛrɛn akaa abe ugen aru hɔ ugeri ungumɔ amgba na Jizɔs angwe iyan ukwagh uyan hɔ itumbɛ ina Ufarasi, ne ava ghɛ ukpom uturari ungun vɛ ɛr ghɛ angon atarin ise. 38Angure anu inya hɔ ijime ikpar avoro ana Jizɔs, ivangnɛn. Mariam anav maha Jizɔs kɔ ikpar avoro, ne ukwas hun a os aa ghɛ ichiye ina. Asuse avor ana Jizɔs ne ahaa un turari kɔ ikpar avor.
39Mɔ Ufarasi ungwen arav un ukwagh uyan a ɛnɛn mɔ, akaa kɔ isima na, “Ɔr ungwen ade iru ɔr uramen ɛchi Aonz, hin afɔ na ukwas ungwen aperen un mɔ ku ukwas ɔ ɛrɛn akaa abe!”
40Jizɔs arumun un na, “Samon,” “Mɛgwe ukwagh ɔɔrun uwɛ.”
Samon akaa na, “Za ishi, ɔr utɛsɛn.”
41Ne Jizɔs akaa ghu una, “Ɔr unan injɔ ana iyɔr ahar injɔ. Apɔr ɔr umɔm inarigh inkin amba kimbin ɔr utom inyom ghɛ iwɔɔr itsindar, ne apɔr ugen ungumɔ inarigh ikin amba kimbin ɔr utom ahɔ iti ahar ghu puwɛ. 42Kpa avo amem abe ikɔrun gha, ne aguwe avo amem. Kɔ avo ahar kɛ ana ahɛmba ghɛshiya un ghu ɔr unan injɔ hunu?”
43Samon arumun na, “Mɛ ɛn na ɔr ungwen injɔ ina ihɛmba run tsɛng mɔ.”
Jizɔs akaa un. “Ungwe jing.” 44Ne agɛma kɔ ukwas ungumɔ ne akaa Samon na, “Ɛn sɛ ukwas ungwen angure han man. Mɔ mɛ nɔr han itumbɛ iyow, unam ijɔr ɛn mɛ kire ihind kan ikpar avoro gha, kpa ukwas ungwen akirem ikpar avoro ghɛ mariam manam ne a os ikpar avoro aam ghɛ ichiye ina. 45Uwɛ ɔ ɔzum ɔr ujin ususenɛm uhɛnghɛ gha, kpa ukwas ungwen, tra mɔ mɛ nɔr han, angwe ade ususenɛm ikpar avoro gha. 46Uham makurem itogh gha, kpa ukwas ungwen aham makurem uturari kan ikpar avoro.
47“Mɛ kaa un, mɔ akaa abe ana anga tsɛng mɛ guwe un amem, ɛn mɔ ghɛshiya un ghu umwe tsɛng. Kpa amban mɛ guwe akaa abe avo keb avo ne ghɛshiya avo keb.” 48Ne Jizɔs akaa ukwas hun na, “Mɛ guwe akaa abe a ow.”
49Iyɔr agenɛv amban vɛ tɛma iyan ukwagh uyan ghu un vɛ pineyi arend, “Kɛ ana angwe ɔr ungwen sɛ a guwen akaa abe?”
50Ne Jizɔs akaa ukwas hun na, “Isima ibɛrɛn iyow ar uwɛ; yov ɔ makun.”
Поточний вибір:
Luk 7: UTA
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
©️2024 Luke Initiative for Scripture Translation
