Matayo 4

Yesu áerekibwa na Wamusimu

(Mar 1:12-13; Luk 4:1-13)

1Era nyuma se'bi, eMuchima Mubuya-buya era kwêka Yesu mwa buyeye* chasiya Wamusimu àmuereke. 2Yesu era kumala suku mane, ebutufu ne'mushi, busira kulya. Chasinda, ebusinya bwera kumusimba.

3Mwo'lu, Wamusimu era kuika kumuereka. Era kumubura mbu: «Akaba unáli Muala wa Ongo, bùraa mano makoi mahúbe mikati.» 4Yesu era kumwǎkula mbu: «Si byǎnjikirwe mwa Maanjiko Mabuya-buya mbu: ‹Bya mundu álya, byeine atá bi bìngatuma ába muuma-uma. Si énde ába muuma-uma mwa kukulikira chira chinwa cha chátenga mwa bunu bwa Ongo.›#4:4 Somaa Bukengere 8:3. »

5Chasinda, Wamusimu era kwêka Yesu mwa musi mubuya-buya we'Yerusalemu. Era kumwemanza kwa ngangamo se'Luhu lwa Ongo*, na ámubura mbu: 6«Akaba unáli Mwana wa Ongo, uchiúmaa ala'shi, bushi byǎnjikirwe mbu:

‹Ongo angábura ebamalaika* bai bàkwǎngirire,

ekuulu kwao kungesha kuchihuta kwe'koi.›»#4:6 Somaa Saburi 91:11-12.

7Yesu nai mbu: «Si byǎnjikirwe kanji mbu: ‹Uténdaa wáereka Enawenyu Ongo.›#4:7 Somaa Bukengere 6:16. »

8Wamusimu, era kumwěrusisa ku butala-tala bwa ndulungu nguma irerere. Era kumulosa emami moshi me'butala, ne'buare bwa'mo. 9Era kumubura mbu: «Akaba ùngafukama era muhondo sanyi wányera, ebi byoshi uséne'ko, nyingákweresa'bi.» 10Yesu nai mbu: «Eu Musimu! Tèngaa mwa meho manyi. Bushi byǎnjikirwe mbu: ‹Úndaa wêra Enawenyu Ongo, na kunde wámukorera yeine oshâo.›#4:10 Somaa Bukengere 6:13. »

11Chasinjire, Wamusimu era kwire ámureka. Ebamalaika* bera kuika kumuasa.

Yesu átangirisa emulimo wai eKalilaya

(Mar 1:14-15; Luk 4:14-15)

12Mango Yesu ômvaa emwasi kwa Yowani bàmuumire mwa buroko, era kutenga aola, na áya eKalilaya. 13Era kutenga eNasareti, áya kwekala mwa musi we'Kaperinaumu. Oyu musi, atúla kwa musike se'nyanja ye'Kalilaya, kwa lunda lwe'chio cha Sabuloni ne'cha Nafutali. 14Byábaa bacha chasiya cha chinwa chibérere, cha chábaa chátechirwe mira kurengera murebi* Isaya mbu:

15«Echio cha Sabuloni, ne'cha Nafutali,

kukulikira enjira yèrekere kwa nyanja,

kwa lunda lwe'lwishi lwe'Yorotani,

mwa chio che'Kalilaya.

Eyera, yi'ebandu be'sinji mbaa batúla.

16Ebandu ba bábaa bàli mwa musimya,

balólire ku bulangare bunene.

Ba bábaa bàli mwa chio che'musimya munene we'lufu nabo,

baíkirirwe ne'bulangare.»#4:15-16 Somaa Isaya 9:1-2.

17Kutengera amu mango, Yesu era kutangirisa kunde áhubanganyisa ebandu mbu: «Murékaa ebibi byenyu, bushi eBwami bo'kwa nguba bwera bùli ofu.»

Yesu álondola ebanafunzi babere-bere

(Mar 1:16-20; Luk 5:1-11)

18Lusuku luuma mango Yesu ábaa árenga kwa musike se'nyanja ye'Kalilaya, era kulola ku bafubi babiri ba bula buuma: Simoni ola béndee bérika mbu i'Petero na Andereya. Abu babiri, bábaa bêna etusira mwa nyanja. 19Yesu era kubabura mbu: «Munyíkulikiraa, nyingábaira kuba bafubi ba bandu.» 20Unao-unao, bera kureka etusira twabo, na bámukulikira.

21Mango Yesu ábaa era àchifundaa era muhondo hicha, era kulola ku banji bafubi babiri ba bula buuma: Yakobo na Yowani. Abu babiri, bábaa bàli mwa bwato ala'uma ne'she wabo Sebetayo, bákunganya etusira twabo. Nabo, Yesu era kubamaala. 22Unao-unao, bera kureka obu bwato, bánareka ne'she wabo, na bákukulikira Yesu.

Yesu ákangirisa ebandu álamya ne'balwala

(Luk 6:17-19)

23Yesu ábaa énjire ásungula mwa chio choshi che'Kalilaya. Mwe'chi chio, era kunde êngirira mwa mashenge me'Bayuta. Mwe'si nyuhu, era kunde áhubanganyisa ebandu eMwasi Mubuya-buya we'Bwami bo'kwa nguba. Era kunde álamya ne'bandu ba bábaa beté chira bulwala ne'ba bábaa bàremere.

24Engulu yai, yera kuhandabana busese mwa chio choshi che'Suriya. Bushi no'ku, ebandu bera kunde bámureteranga ebalwala boshi ba bábaa bálibukire na chira bulwala, ne'bihwasi, ne'luungu, na ba bábaa bàremere. Abu boshi, Yesu era kunde ánabalamya. 25Echera chera kutuma bandu banene busese kunde bámukulikira. Abu bandu, bábaa bátengera mwa chio che'Kalilaya, ne'che Tekapoli, no'mwa musi we'Yerusalemu, no'mwa chio che'Yuteya, no'kwa mushirirya we'lwishi lwe'Yorotani.

Поточний вибір:

Matayo 4: tbt

Позначайте

Поділитись

Копіювати