Matius 3
3
Ponudukan di Yaya Mamamatis#3:1 Mamamatis: Momomonsu
(Mar. 1:1-8; Luk. 3:1-18; Yaya 1:19-28)
1Katalib diri piipirono toun,#3:1 Linaid nopo diri kivaro kama 28 toun. om rinumikot iri iso tulun siri padang do kovotuvan silo Vonuvo Yudia. Ngaran nopo disido nga i Yaya, i mamamatis do tulun. Om papaabar isido do tinangaran di Kinoringan do irad diti, 2“Rumorogo kouno do duso muju do oruaino i Kinoringan monguasa di tongotulunJo,” kadi Yaya. 3Om irino i Yaya komoion di nabi Yasaya, i popolombus di tinangaran do Kinoringan pogulu, ontok di nakatangar irad diti,
“Kivaro nogi dolou do tulun i susuuon do Kinoringan
siri padang do kovotuvan do moou-loou do,
‘Tandaianno laaid ino vajaan do Tuhan,
om loisonno i ralan di vajaanJo,’#3:3 Komoion nopo dino ayat 3 nga irino posiapon mujuno i ginavo muju do rumikot i Tuhan.
kadi tulun moou-loou,” kadi Yasaya.#Antangai Yasaya 40:3.
4Nga sabung nopo di Yaya om vinaal mantad vulu do unta, om kambotjo nopo om vinaal mantad do kulit. Om taakanonjo nopo nga tongil#3:4 tongil: komboruak om paa do dongkot.#3:4 paa do dongkot: paa do potijukon 5Om ontok diri silopo Yaya padang do kovotuvan, oguu dii i tongotulun minongoi siri disido do mantad si Bandar Yorusalim, om mantad si Vonuvo Yudia, om mantad si tongokampung misondipau do Bavang Yurdon. 6Om isaai nopo iri nakapangakun do dusojo, irino binotisan di Yaya siri Bavang do Yurdon.
7Nga koontong nopo dii i Yaya do oguu tulun di kumpulan do Porisi om kumpulan Soduki do rumikot mokibatis disido, om pitangarno dii i Yaya do irad diti, “Ikovuno irad do koturunan do vulanut do araat ino gaagaya muju! Panantaman muju om koidu kou mantad diri karaatan do Kinoringan do rumikot do insan tadau? Tatap do au koidu. 8Nga nong uvang kou koidu misti pointalangon mujuno ino gaagaya muju do aandai, koilaan do rinumorogo kou diri duso muju. 9Om ada kou minsoromo do koidu kou mantad di karaatan do Kinoringan, do kamuju, ‘IIbraim nopo om taki tokou,’ ka, do okonko kivaro guna dino siri gotuvang do Kinoringan. Nga mitangar oku dikovu, insan iti tongovatu diti nga obuli posilion di Kinoringan do tongotangaanak diIbraim,” kadi Yaya. 10Om minaganu i Yaya do iso poiradan do oukuman di Kinoringan i tongotulun taraat, do kadisido, “Poinsodiano maino i kapak silo dalid do panagad tikid-tikid diri tongopuun do kaju diri au monguva do aandai, om sorobon nogi dino. 11Nga ioku nopo diti,” kadi Yaya, “om vaig noopo iti pamatisku#3:11 pamatis: pamaptais dikovu tanda do rinumorogo kou. Nga kivaropo iso tulun i sumusuut dogo, om Isidono iri mamatis#3:11 mamatis: mamaptais dikovu do Tatod Tolidang, om tapui do irino mongolidang dikovu irad do tapui mongolidang do amas. Om Isido nopo i rumikot do sumusuut dogo om kikuasapo mantad dogo do kasutJopo nga au oku kobulun monguut. 12Om popirijang Isido di tulun aandai om tulun taraat irad do iso tulun do poingkuut di rilibu do pangatap kasangkat di parai siri pinongogikan, om pountunon nogi dino siri poijanan do parai. Nga iri nopo dii i parok om tutudan Disido siri tapui di au moilo pisokon,” kadi Yaya.
Binotisan i Yisus
(Mar. 1:9-11; Luk. 3:21-22)
13Om ontok diri mamatis i Yaya di tongotulun siri Bavang Yurdon, om rikotno dii i Yisus mantad si Vonuvo Golilia do mokibatis di Yaya. 14Nga au moo daa i Yaya mamatis Disido do, “Ioku nono botisanNu ko iokupo mamatis Dika,” ka.
15Nga kadi Yisus, “Botisai Okui do iradno diti tokou monuut do kouvangan di Kinoringan,” ka. Om botisai nopo dii di Yaya Isido.
16Nga kobotisai#3:16 kobotisai: koboptoisai nopo dii i Yisus, om tindalno dii Isido mantad siri vaig om tigogi do minukab ilo suruga. Om naantangan dii Disido i Tatod do Kinoringan mindaau mantad tavan#3:16 tavan: langit irad do kungkur tumumpo siri Disido. 17Om kivaro dii dolou do Kinoringan minitangar mantad soi suruga do, “Itino TanakKu do au kojuuanKu, om Isidono kaandaianKu marong,” ka.
Поточний вибір:
Matius 3: LabukPKV
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
© 1995, Wycliffe Bible Translators, Inc. All rights reserved.
