Mataayo 5

Ɨmanyizyo zya Yeesu hwi‑igamba

(Luuka 6:20-23)

1Ɨshi, ʉYeesu lwa wazilola ɨmpʉga ziila ɨzya bhantu, ahazʉbha hwi‑igamba, ahakhala. Ɨpo abhasundwe bhaakwe bhahabhala hwa mwene. 2Ahanda hubhamanyizye ahaga,

3“Bhasayiiwe bha bhahwilola bhapɨɨna mu mwoyo,#5:3 Abhapɨɨna mu mwoyo hwa huje abhantu ɨbho bhamɨɨnye huje bhahumʼmwanza ʉNgʉlʉbhɨ mu wʉʉmi waabho.

pɨpo ʉwumwɨnɨ ʉwa hu mwanya waabho.

4Bhasayiiwe bha bhali nʉ zugumizu,

pɨpo ʉNgʉlʉbhɨ ahayihubhajinjizya.

5Bhasayiiwe bha bhali bholoolo,

pɨpo ʉNgʉlʉbhɨ ahayihubhapeela ʉgaali ʉwɨ nsi.

6Bhasayiiwe bha bhali nɨ nzala nɨ nyoota ɨyɨ golosu,#5:6 Ɨnzala nɨ nyoota ɨyɨ golosu hwa huje ahwanze ʉgolosu ʉwa Ngʉlʉbhɨ hwi‑ikhone lyonti mu nsi.

pɨpo bhahayingutiziwa.

7Bhasayiiwe bha bhahubhalolela ɨnkʉmbʉ abhanjɨ,

pɨpo bhope bhahayilolelwa ɨnkʉmbʉ nʉ Ngʉlʉbhɨ.

8Bhasayiiwe bha bhali nʉ mwoyo ʉnʼzelu,

pɨpo bhahayihunʼnola ʉNgʉlʉbhɨ.

9Bhasayiiwe bha bhakʉndanya,

pɨpo ʉNgʉlʉbhɨ ahayihubhakwizya bhaana bhaakwe.

10Bhasayiiwe bha bhalabha hu nongwa ya‑aje

bhabhomba zya zihwanziwa pitagaalila lya Ngʉlʉbhɨ,

pɨpo ʉwumwɨnɨ ʉwa hu mwanya waabho.

11Musayiiwe amwɨ abhantu lwa bhahubhaliga, bhahubhalavya na hubhayanje shibhiibhi hu minji agi‑ilenga hu nongwa yaanɨ. 12Ɨsho sha shɨɨsho sha bhahabhalavyaga abhakuwi bha Ngʉlʉbhɨ ɨbho bhahabhatagaliiye amwɨ. Seshelaji na hwanje, hu nongwa ya‑aje ʉNgʉlʉbhɨ abhabhɨshɨɨye ɨmpeesya ɨngoosi hu mwanya.”

Abhasundwe bha Yeesu bhali nanshi ibheeya nʉ lukhozyo

(Maalʉko 9:50; Luuka 14:34-35)

13ɄYeesu ahonjela ayanje ahaga, “Amwɨ muli nanshi ibheeya hwa bhantu abha mu nsi. Leelo ibheeya nkashele linanjiishe ʉwinza waakwe, ʉgalʉnga hantu heenu huje likhole nantele? Saga libhajiiye abhe linza nantele hu hantu hohonti, leelo libha lya‑ataagwe hwʉnzɨ na‑akhanyangwe na bhantu.

14Amwɨ muli nanshi ʉlukhozyo hwa bhantu abha mu nsi. Ibooma lya lizengwilwe pa mwanya pi‑igamba, saga libhajiiye ahwifise. 15Nantele, abhantu saga bhakhozya ɨkolobooyi na huyikwinshile nɨ nsonta, lyoli bhabhɨɨha pa mwanya pa mbeeje huje ɨbhakhozezyaje bhonti ɨbho bhali mu nyumba. 16Ɨsho shɨ‑ɨhwanziwa, huje ɨhozyo zyenyu zibhakhozezyaje abhantu aje bhalolaje ɨmbombo zyenyu ɨnyinza na humʼmwamishe ʉDaada weetu wa‑ali hu mwanya.”

Ɨmanyizyo zya Yeesu hu nongwa yɨ ndajizyo zya Moose

17ɄYeesu ahajendeelela amanyizye ahaga, “Mugandi asɨɨbhe huje ɨnɨnzɨle hu nongwa ya hwefwe ɨndajizyo zya Moose#5:17 Moose Bhaazya izwi Moose hu Ngalulanyo ɨyɨ Mazwi aMajenu hu malishilo wɨ shitaabu ɨshi. awe ɨmanyizyo zya bhakuwi bha Ngʉlʉbhɨ. Leelo ɨnɨnzɨle huzilʉnjɨshe. 18Lyoli ɨhubhabhʉʉzya huje afishe mu habhaazyo ɨho ɨmwanya nɨ nsi lwa vyahayishila, nahamo ahasimbo nka heeka ahɨ ndajizyo zya Moose ha habhajiiye ahwepe, afishe ɨpo gonti gabhombeshe. 19Ɨshi, wowonti wa‑asyonshela ɨndajizyo nkamba yeeka ya musɨɨbha aje ndoodo ashile zyonti, na hubhamanyizye abhanjɨ huje bhope bhabhombaje shɨɨsho, ʉyo ahayibha nʼdoodo mu wumwɨnɨ ʉwa hu mwanya. Leelo wowonti wa‑ahuzitiniha na hubhamanyizye abhanjɨ, ʉyo ahayibha nʼgoosi mu wumwɨnɨ ʉwa hu mwanya. 20Lyoli ɨhubhabhʉʉzya huje nkashele ʉwinza weenyu saga wushila ʉwinza ʉwa Bhafalisaayo nʉ wa bhamanyizyi abhɨ ndajizyo zya Moose, saga mwahayitʉʉha dumu mu wumwɨnɨ ʉwa hu mwanya.”

Ɨmanyizyo hu nongwa yi‑ilyoyo

(Luuka 12:57-59)

21“Mwʉmvwɨzye huje abhamaama bheenyu bhahabhʉzɨɨwe ɨndajizyo ɨyo ɨyiga, ‘Ʉgandi agoje,’#Bhaazya Afume 20:13. ʉmuntu wowonti ʉyo ahunʼgoga ʉwamwabho, ahwanziwa alongwe. 22Leelo anɨ ɨhubhabhʉʉzya huje, ʉmuntu wowonti ʉyo ahumʼviitilwa ʉholo waakwe, ahwanziwa alongwe. Nantele, wowonti wa‑ahunʼniga ʉholo waakwe huje mʼfwasu, ahwanziwa alongwe mwi‑ikoloti.#5:22 mwi‑ikoloti Bhaazya izwi Ikoloti hu Ngalulanyo ɨyɨ Mazwi aMajenu hu malishilo wɨ shitaabu ɨshi. Nantele, wowonti wa‑ahunʼniga ʉholo huje nʼkwesu, ahwanziwa ataagwe mu malabha agɨ mwoto gwa saga guzima nka lumo!

23Ɨshi, nkashele ʉli afumye ɨnsangu#5:23 ɨnsangu Bhaazya izwi Nsangu hu Ngalulanyo ɨyɨ Mazwi aMajenu hu malishilo wɨ shitaabu ɨshi. pa shipuuto, leelo wiizuha huje ʉvisɨɨnye nʉ holo waaho, 24ʉyileshe ɨnsangu ɨyo pitagaalila pa shipuuto, ʉbhale ʉyɨtɨɨhane nasʉʉti nʉ holo waaho. Ɨpo ʉweele, ʉfumye ɨnsangu yaaho ɨyo.

25Nantele, nkashele ʉmʼmiibhi waaho ali mwi‑idala hutwale hwa nʼnonzi, shinza aje ʉnʼkʉndɨɨlɨzye lubhilo lwa muli mwi‑idala abhale hwa nʼnonzi. Nkashele saga ʉbhomba ɨsho, anza hutwale hwa nʼnonzi. Wope ʉnʼnonzi anza hutwale hwa bhalwi huje aʼkʉnje mu hoobhe. 26Lyoli ɨhubhʉʉzya huje saga wahayifuma ʉmwo mu hoobhe afishe lwa wasomba ɨvyo vyonti vyʉ‑ʉhwanziwa asombe!”

Ɨmanyizyo hu nongwa yɨ bhembusu

27“Mwʉmvwɨzye ɨndajizyo ɨyo ɨyiga, ‘Ʉgandi abhembushe.’#Bhaazya Afume 20:14. 28Leelo anɨ ɨhubhabhʉʉzya huje, ʉmuntu wowonti ʉyo ahumʼmwenya ʉnʼshɨ hwi‑idala ɨlyɨ nsʉngwo, abha abhembuushe nawo mu mwoyo gwakwe. 29Ɨshi, iliiso lyaho ɨlya hu lɨɨlo nkashele lihuhwalanganya abhombe ɨmbiibhi, ʉlifyonkole na hulitaaje hutali. Hwashi ayazye ɨshipelwa sheeka ɨshɨ mʼbɨlɨ gwaho, ashile huje ʉmʼbɨlɨ gwaho gwonti gwahataagwe hu mwoto gwa saga guzima nka lumo. 30Nantele, ʉnʼkhono gwaho ʉgwa hu lɨɨlo nkashele guhuhwalanganya abhombe ɨmbiibhi, ʉgudumule na hugutaaje hutali. Hwashi ayazye ɨshipelwa sheeka ɨshɨ mʼbɨlɨ gwaho, ashile huje ʉmʼbɨlɨ gwaho gwonti gwahataagwe hu mwoto gwa saga guzima nka lumo.”

Ɨnsundo ɨzya hunʼneshe ʉnʼshɨ

(Mataayo 19:9; Maalʉko 10:11-12; Luuka 16:18)

31“Nantele, mwʉmvwɨzye ɨndajizyo ɨyo ɨyiga, ‘Ʉnʼnume wowonti wa‑ahunʼneha ʉnʼshɨ waakwe, anʼsimbilaje ɨkalaata ɨya hunʼneshe.’#Bhaazya ɨNyiizuho 24:1. 32Leelo anɨ ɨhubhabhʉʉzya huje, ʉmuntu wowonti wa‑ahunʼneha ʉnʼshɨ waakwe sinta humʼmwaje lwa‑ali mu weegu, ahumʼmɨɨha ʉnʼshɨ waakwe abhe mwegu. Nantele, wowonti wa‑ahumʼmwega ʉnʼshɨ ʉyo ʉnʼnume waakwe anʼneshile, wope abhomba weegu.”

Ɨmanyizyo hu nongwa ya‑alape

33“Mwʉmvwɨzye huje abhamaama bhahabhʉzɨɨwe ɨndajizyo ɨyo ɨyiga, ‘Ʉsahaalape hwi‑ilenga pitagaalila lya Mwɨnɨ ʉNgʉlʉbhɨ. Leelo bhombaga gonti ɨgo gʉ‑ʉlapa.’#Bhaazya ɨMbombo ɨzya Bhalaawi 19:12; ɨNyiizuho 23:21. 34Leelo anɨ ɨhubhabhʉʉzya huje mugandi alape lwonti hwi‑itaawa lya hu mwanya, pɨpo ɨlyo litengo lyɨ wumwɨnɨ ʉwa Ngʉlʉbhɨ, 35hwope mugandi alape hwa‑atashe itaawa lyɨ nsi,#5:34-35 Mugandi alape lwonti hwi‑itaawa lya hu mwanya ... hwa‑atashe itaawa lyɨ nsi hwa huje ʉNgʉlʉbhɨ yʉ Mwɨnɨ hu mwanya, nantele ya yʉʉyo ya‑alongozya ɨnsi. Ɨshi alape hu mwanya awe hu nsi hwa huje ʉlapa hwa Ngʉlʉbhɨ. pɨpo ɨnsi litengo ɨlyo ʉNgʉlʉbhɨ abhɨɨha amanama gaakwe. Nantele mugandi alape huliyanje ibooma ɨlyɨ Yelusaleemu, pɨpo ɨlyo libooma lya Mwɨnɨ ʉnʼgoosi, ʉNgʉlʉbhɨ. 36Nantele mugandi alape hu matwe geenyu, pɨpo saga mubhajiiye agalulanye nka hasisi nka heeka abhe hazelu awe hiilu. 37Ɨshi, nkashele muhwɨtɨha, ɨtɨhaji. Awe nkashele mukhaana, khaanaji, pɨpo gonti ɨgo gahwonjela mwɨ‑ɨgo, gafuma hwa Mʼmiibhi ʉla ʉSeetano.”

Ɨmanyizyo hu nongwa ya humʼmwezezye ʉmuntu ʉbhiibhi

(Luuka 6:29-30)

38“Mwʉmvwɨzye ɨndajizyo ɨyo ɨyiga, ‘Iliiso hwi‑iliiso, iliino hwi‑iliino.’#Bhaazya Afume 21:24; ɨMbombo ɨzya Bhalaawi 24:20; ɨNyiizuho 19:21. 39Leelo anɨ ɨhubhabhʉʉzya huje mugandi humʼmwezezye ʉmuntu ʉbhiibhi ʉyo abhabhombɨɨye ʉbhiibhi. Nkashele ʉmuntu aʼbavuuye idele ɨlya hu lɨɨlo, ʉnʼgalulizyaje ni‑idele ɨlya hu mongo. 40Nantele, nkashele ʉmuntu aʼtaakile huje aʼfyʉle ishaati lyaho, nʼneshe ayeeje ni‑ikooti.#Bhaazya Afume 22:26-27; ɨNyiizuho 24:12-13. 41Nantele, nkashele ʉmuntu aʼbijiliziizye abhʉʉsye izigo lyakwe afishe hu kilomeeta yeeka, aawe fisya izigo ɨlyo hu kilomeeta zibhɨɨlɨ. 42Nantele, nkashele ʉmuntu aʼlaabhile ahantu, ʉmʼpeelaje. Nantele, nkashele ʉmuntu ahwanza huje aʼkhope, ʉgandi humʼmwime.”

Ɨmanyizyo ɨzya hubhagane abhalʉgʉ

(Luuka 6:27-28, 32-36)

43“Mwʉmvwɨzye ɨndajizyo ɨyo ɨyiga, ‘Ʉnʼganaje ʉmʼpalamani waaho,#Bhaazya ɨMbombo ɨzya Bhalaawi 19:18. leelo ʉmʼvitilwaje ʉnʼnʉgʉ waaho.’ 44Leelo anɨ ɨhubhabhʉʉzya huje, mubhaganaje abhalʉgʉ bheenyu. Nantele, mubhaputilaje hwa Ngʉlʉbhɨ bhonti ɨbho bhahubhalavya. 45Ɨshi, lwa mwabhomba ɨsho, yahayibhoneehana aje lyoli muli bhaana bha Daada weenyu ʉyo ali hu mwanya. Ʉmwene ahubhakhozezya isanya abhantu abhinza na bhabhiibhi, nantele ahubhatoonyezya ɨmvula abhagolosu na bha saga bhagolosu. 46Nkashele muhubhagana bhaala bha bhahubhagana amwɨ, munza hwambɨɨlɨle ʉmʼposheelo gulihu? Wɨlɨ, abhabhiibhi nanshi abhasomvya sonko#5:46 abhasomvya sonko Bhaazya izwi Bhasomvya sonko hu Ngalulanyo ɨyɨ Mazwi aMajenu hu malishilo wɨ shitaabu ɨshi. bhope saga bhabhomba shɨnɨɨsho? 47Nantele, nkashele muhubhalamuha abhaholo bheenyu lwene, mubha mubhomba hantu heenu aha pa mwanya? Enya, bhope bha saga bhahumʼmwɨtɨha ʉNgʉlʉbhɨ bhabhomba shɨnɨɨsho! 48Ɨshi mubhanje bhagolosu nanshi ʉDaada weenyu ʉyo ali hu mwanya sha‑ali nʼgolosu.”

Поточний вибір:

Mataayo 5: SBK

Позначайте

Поділитись

Копіювати