मत्ती 17
17
येशूओ रुप फेरीस्च
(मर्कूस ९:२-१३; लुका ९:२८-३६)
1छ याक न्हुइङ येशूये पत्रुस, याकुब र होच्यो भाइ युहन्नाकी लाहा खाटा लार मेखुरीक मट्टै घाङ्च डाँडाङ नुङा। 2होला टाछ पछी चेलाकुङ म्याहासाङ येशूओ रुप फेरीसा। होसकुङ मीटाहा नाखान लेखा न चम्कडीसा र होसकुङ बढीन फोक्सा बोच छाना। 3अनी होडीक न बेला होला होखुरीकै येशूखाटा मोशा र एलीया ङाक्ङ ङुच डाङा। 4याङ्च डाङार पत्रुसै येशूकी डेया, “ए प्रभु, काल्हाकी इला लेच च सेम्ह छाना। नाको मीमन जाट्ले डेनाङ ङा इला सोम बास ङुच ठाउँ खास्ले, काट नाकुङ लागी, काट मोशौ लागी र काट एलीयौ लागी।”
5पत्रुसै ङाक्नाङ-ङाक्नाङ न फोक्सा बोच डेबु राहार होच्यो छायै होखुरीककी हुपा। डेबु भीत्रीलकीङ काट सोर राहा, “इसे ङौ जाक्च मीजा हो, इसे खाटा ङा सार्है मार्हाङ्ङने, इच्यो कुरा सेनी।” 6जब चेलाकै इसे सेया, टब होखुरीक साप्फी बीर्हीयार झाङ खुखुप छाना। 7टर येशू राहार होखुरीककी मीहुटै छुवार डेया, “सोनी, नाखुरीक माबीर्हीनी।” 8जब होखुरीकै ढेम्लाक ङोसा, होखुरीकै होला येशू बाहेक अरु सुकीर माडाङा।
9होखुरीक डाँडालकीङ म्हाका झाल्चै जाट्नाङ येशूये होखुरीककी आज्ञा जाटा, “भर्मीयो मीजा जबसम्म सीच लकीङ जीवाम मासोले, टबसम्म नाखुरीकै इसे डाङ्च कुरा सुकीर माडेकी।”
10चेलाकै येशूकी इट डेयार गीना, “होटडेनाङ हीजै धर्मगुरुकै मुक्ति याछ ख्रीष्ट डेनाङ पहीला एलीया राखी पर्ले डेले ट?” 11येशूये होखुरीककी जवाफ याहा, “हो, एलीया साँच्ची न राल्हे र होचे पट्ट न कुरा तयार खास्ले। 12टर ङा नाखुरीककी डेले, एलीया अघी न राम्ह भ्यामने। टर होसकी भर्मीकै माचीन्डीया, र होखुरीककी होसकी ही जाट्की मीमन सेया होटन जाटा। होटजाट्न न भर्मीयो मीजै र होखुरीकुङ मीहुटीङ कष्ट भोग्डीकी पर्ले।” 13टब येशूये बप्तिस्मा याछ युहन्नौ बारेयाङ डेच हो डेयार चेलाकै वार्हा।
भूत लग्डीस्च लेन्जा जजा गेप्च
(मर्कूस ९:१४-२९; लुका ९:३७-४३)
14जब येशू मेखोलौ सोम जना चेलाकोखाटा भर्मीकुङ भीड लेच ठावाङ टाराहा, टब काट जना भर्मीये होसकुङ म्याहासाङ राहार घुँडा टुसा 15र डेया, “ए प्रभु, ङौ लेन्जा मीजाकी दया जाट्नी, हीजैडेनाङ होसकी छार्यारोग लग्डीस्ने, र होचे बाड्को कष्ट भोग्डीमन ले। होसे घरी म्हेयाङ पर्ले, घरी डीयाङ पर्ले। 16ङै होसकी नाकुङ चेलाको लेठाङ राका, टर होखुरीकै च गेपाक्की माय्होका।” 17येशूये डेया, “ए विश्वास मालेचको र बीगारीस्च पुस्ता, सेनसम्म ङा नाखुरीक खाटा ङुले? ङै नाखुरीककी सेनसम्म सहडीकी? होसकी इला ङा लेठाङ राक्नी।” 18येशूये भूतकी हक्कारीया र भूतआत्मा होसेलकीङ ख्योव्हार नुङा। होटै तुरुन्तै होसे लेन्जा जजा गेप्की क्योटा।
19टब चेलाकै येशूखाटा सुर मालेच बेलाङ राहार गीना, “कानै चहीँ होसे भूतकी हीजै डोन्की माय्होक्च?” 20अनी होसकै डेया, “नाखुरीक खाटा चेक्जा र विश्वास मालेचबाटै हो। साँच्ची न ङा नाखुरीककी डेले, नाखुरीक खाटा काट राइगानौ डाना टडीक बाड्को मट्टै विश्वास छाना डेनाङ र इसे डाँडाकी ‘इटै हटडीसो’ डेया डेनाङ होसे हटडीसार नुङ्ले। र नाखुरीकुङ लागी छान्की माय्होक्च कुरा हीर माछान्ले। 21[टर होसे खालुङ भूत चहीँ प्रार्थना जाटार र उपवास ङुवार मट्टै डोन्की य्होक्ले।”]#१७:२१ इसे बाड्को कोस्ट भीट्री लेच सब्डको चहीँ कोइ-कोइ सोरोट बाइबलाङ माले।
लाहा सीकी पर्च बारेयाङ येशूओ दोस्रो भविष्यवाणी
(मर्कूस ९:३०-३२; लुका ९:४३-४५)
22चेलाकोखाटा गालीलाङ भेला छान्नाङ येशूये होखुरीककी डेया, “अब भर्मीयो मीजाकी भर्मीकुङ मीहुटाङ जीम्मा याल्हे। 23अनी होखुरीकै होसकोकी साट्ले, टर सोम याकाङ होसको जीवार सोले।” इसे कुरा सेयार चेलाको सार्है डुखी छाना।
येशूये मन्दिरौ कर याछ
24येशू र होसकुङ चेलाको कफर्नहुमाङ राहा, अनी मन्दिरौ कर सोट्चको पत्रुस लेठाङ राहार डेया, “ही नाखुरीकुङ गुरुये परमेश्वरौ मन्दिरौ कर माटेरीले?”#१७:२४ यहूदीकुङ पट्ट न लेन्जा भर्मीकै बर्सै पीछे यरुशलेमुङ परमेश्वरौ मन्दिर मर्मट जाट्कीयो लागी कर टेरीकी पर्च लेया। 25होचे डेया, “हजुर टेरीले।”
अनी पत्रुस इम भीत्री पर्रखीङ येशूये न होसकी डेया, “ए सीमोन, नुओ विचार ही ले? पृथ्वीयुङ राजाकै कर सुलकीङ सोट्ले? होखुरीकुङ राज्याङ लहो जहानलकीङ की अरुकोलकीङ?” 26पत्रुसै जवाफ याहा, “अरुकोलकीङ न सोट्ले” येशूये होसकी डेया, “होट डेनाङ जहानकै च टेरीकी मापर्च लेसा। 27टर काल्हालकीङ होखुरीकुङ चीट्ट माबीक्ख्यो डेम, नाको टालाङ नुङार बल्छी ङाप्नी। र पहीला पर्च डीस्यौ मेङेर खोल्न्हाङ नाकै काट चाँडीयो सीक्का डुप्ले, होसे आल्हार नाकुङ र ङौ लागी कर टेरीनी।”
Поточний вибір:
मत्ती 17: EMGP
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
© 2024 (Active), Wycliffe Bible Translators, Inc. All rights reserved.
