Kut 31
31
1Mbwenu Yakobo akahurira ngu batabani ba Labaani nibagira bati: Yakobo atwaire byona ebyabaire biri ebya tataitwe, haza nibyo aihiremu eitungo eryo ryona. 2Kandi Yakobo yaareeba ku Labaani atakimukunda nk'okubanza. 3Mpaho Mukama yaagambira Yakobo, ati: Garuka omu nsi ya baashwenkuru, n'omuri beene waanyu, haza ndyaguma naiwe. 4Yakobo atyo atuma, ayeta Rakeeli na Leeya kumushanga omu ishwa, ei amasyo ge gaabaire gari. 5Reero abagira ati: Nindeeba shoimwe ku atakinkunda nk'oku yaabaire ankunda. Kwonka Ruhanga wa tata agumire naanye. 6Nimumanya ku nkoreire shoimwe n'amaani gangye goona, 7haza akangobeza, kandi akahindaguturana ebihembo byangye emirundi ikumi; kwonka Ruhanga taramwikiriize kunkora kubi. 8Manya ku yaabaire agira ati: Ez'obugondo nizo ziriba ebihembo byawe, reero obusyo bwona buzaara ez'obugondo, kandi akigira ati: Ez'ebigabo nizo ziraabe ebihembo byawe; obusyo bwona buzaara ez'ebigabo. 9Okwo nikwo Ruhanga yaayakire shoimwe amatungo, akagampa. 10Manya omu bunaku obu obusyo bwemeramu nkaimutsya amaisho nindoota, naareeba empaya z'embuzi ezaabaire nizeemya obusyo ziri ez'ebigabo n'ez'obugondo n'ez'ebitanga. 11Bwanyima maraika wa Ruhanga yangambirira omuri ekyo kirooto ati: Yakobo! Naanye nyetaba nti: Ndi aha! 12Nawe agira ati: Imutsya amaisho gaawe oreebe ku embuzi empaya zoona ezirikwemya obusyo ziri ez'ebigabo n'ez'obugondo n'ez'ebitanga; ahabw'okuba ndeebire ebi Labaani arikukwitsa. 13Niinye Ruhanga owaakubonekyeire Beteli, ei waasiigiire enyomyo amajuta, okahiga nondahira. Mbwenu imuka orugye omuri egi nsi, ogarukye omu nsi ei waazaariirwemu.
14Bwanyima Rakeeli na Leeya baamugarukamu bati: Mbwenu shi hariho omugabo nari eby'okuhungura ebi batutsigiire omu ka ya tataitwe? 15Tarikututwaza nk'abanyamahanga? Manya akatujugisa, kandi yaamariraho kimwe empiiha zi baatujugire. 16Hati eitungo ryona eri Ruhanga yaayakire tataitwe n'eryaitu n'abaana baitu. Mbwenu Ruhanga eki akugambiire, okikore.
17Atyo Yakobo yaimuka, yaata abatabani n'abakazi be aha ngamira. 18Yaafunya amatungo n'amasyo ge goona agu yaabaire atungire; nigo ago agu yaatungiire omuri Padanarama, kuza omu nsi ya Kanaani owa Isaaka ishe. 19Obwo omuri ebyo biro, Labaani ku yaabaire agiire kushara entaama ebyoya, Rakeeli yaiba emandwa z'omu ka ya ishe. 20Yakobo nawe yaagobeza atyo Labaani Omuaramu, ahabw'okutamugambira ku arikwenda kucwa. 21Yaahunga n'ebi yaabaire aine byona; yaimutsya yaayambuka Eufuraati, agyemire ogurikuza omu nsi y'ebibungo bya Gileadi.
22Aha kiro kya kashatu baagambira Labaani ku Yakobo acwire. 23Nawe yaatwara beene ishe yaamuza omu kirari okumara ebiro mushanju; yaarugaho yaamuhambiza omu nsi y'ebibungo bya Gileadi. 24Kwonka nyekiro omu kirooto Ruhanga yaija ahari Labaani Omuaramu, yaamugira ati: Oyerinde otagira eki waagambira Yakobo, yaaba kirungi nari kibi.
Labaani okutonganisa Yakobo
25Labaani akahambya Yakobo. Obwo Yakobo akaba ateire eihema rye omu nsi y'ebibungo; Labaani na beene ishe nabo baasiisira omu nsi y'ebibungo bya Gileadi. 26Reero Labaani yaagira Yakobo ati: Ahabw'enki ongobeize kandi okatwara bahara bangye nk'abu banyagire omu rugamba? 27Mbwenu ohungiire ki bwesherekye okangobeza, haza otangambire nkabona kukuraga tushemereirwe nitweshongora nituteera enshandaazo n'enanga? 28Kandi ahabw'enki otarandekire nkanywegyera baijukuru bangye na bahara bangye kubaraga? Mbwenu eki okozire n'eky'obushema! 29Nkaabaasize kukukora kubi, kwonka Ruhanga wa sho angambiire eki kiro yaagira ati: Oyerinde otakaagira eki waagambira Yakobo, yaaba kirungi nari kibi. 30Mbwenu ocwire ahabw'okuba ogiriire eka ya sho orushusho, kwonka shi oibiire ki emandwa zangye? 31Yakobo agarukamu Labaani ati: Manya nkatiina, naateekateeka ngu noija kuunyaka bahara baawe. 32Mbwenu weena ou oraashangye aine emandwa zaawe, atatsigaza amagara. Tukiri aha omu maisho ga beene waitu, caaka ekyawe kyona eki nyine, okitware. Haza obwo Yakobo akaba atamanyire ku Rakeeli yaaziibire.
33Labaani atyo ataaha omu ihema rya Yakobo, n'omu rya Leeya n'omu ry'abazaana bombi, kwonka tazishangamu. Atyo aruga omu ihema erya Leeya ataaha omu rya Rakeeli. 34Mbwenu obwo Rakeeli akaba yaatwaire ezo mandwa z'eka, yaazitaire omu itandiiko ry'engamira, yaazishutamiire. Labaani yaacaaka eby'omu ihema byona, kwonka tiyaazibona. 35Rakeeli yaagira ishe ati: Mukama wangye otangwerwa kubi ahabw'okutabaasa kukwimukira, ahabw'okuba ndi omu kwezi. Atyo Labaani acaaka, kwonka ezo mandwa tazibona.
36Yakobo nikwo kuguubwa kubi, akateekurana Labaani, naamugira ati: Mbwenu nshobize ki? Ncumwire ki waaza kunkurata oine ekiniga? 37Ku waacaaka ebintu byangye byona, ni bintu ki eby'omu ka yaawe ebi waashangamu? Bireete aha omu maisho ga beene tata na beene sho baturamure. 38Egyo myaka makumi abiri ei mmazire naiwe, ebuguma zaawe entaama n'embuzi tizikatoroogaga; kandi tinkaryaga mpaya z'omu masyo gaawe g'entaama. 39Zoona ezaabaire zigaashuurwa enyamaishwa tindazikureeteire, niinye zaabaire zifeera, kandi ezaabaire ziibwa nyomushana nari nyekiro okaba ozindihisa. 40Mbwenu oku nikwo naabaire; nyomushana nkaba nyitwa ekibiga, nyekiro nyitwa embeho, reero mbura oturo. 41Omuri egyo myaka makumi abiri ei mmazire omu ka yaawe nkakukorera emyaka ikumi n'ena ahabwa bahara baawe bombi; n'endi mukaaga ahabw'obusyo bwawe, haza wahindaguturana ebihembo byangye emirundi ikumi. 42Kuri Ruhanga wa tata ou Aburahamu na Isaaka baabaire baramya atarankwatiireho, buzimazima hati okaanyohereize engaro nsha. Mbwenu Ruhanga ku areebire okubonabona kwangye, n'oku naakoreise munonga emikono yangye, nikwo kukuteisa omuri eki kiro kyasheesha.
Yakobo okukora endagaano na Labaani
43Bwanyima Labaani yaagarukamu Yakobo, ati: Aba baishiki ni bahara bangye, n'aba baana n'abaana bangye, n'aga masyo n'amasyo gangye, na byona ebi orikureeba n'ebyangye. Kwonka mbwenu eri izooba ngire nta aba baishiki bangye, nari abaana baabo abu bazaire? 44Mbwenu nu ija tukore endagaano, iwe naanye, ebe omujurizi ahagati yangye naiwe. 45Yakobo atyo akwata eibaare aribyara kuba ekiijutsyo, kandi agira beene ishe, ati: 46Murundaane amabaare. Nabo bakwata amabaare bagarunda ekirundo; haza bariira aha rubaju rwakyo. 47Labaani yaakyeeta Yegari-Sahaduta, kwonka Yakobo yaakyeeta Galeedi. 48Labaani yaagira ati: Eki kirundo nikyo mujurizi wangye naiwe eri izooba. N'onu nikwo kukyeeta Galeedi. 49Kandi enyomyo yaagyeeta Mizipa, ahabw'okuba akagira ati: Mukama abe niwe yaaba kareebi waawe naanye, ku turaabe twataagurukaine. 50Ku oriita kubi bahara bangye nari waabatungikirira abandi bakazi, nobu hariba hatariho ondi muntu orikutureeba, Ruhanga niwe ariba mushinja waawe naanye.
51Bwanyima Labaani yaagira Yakobo ati: Reeba eki kirundo n'egi nyomyo ebi naata ahagati yangye naiwe. 52Eki kirundo nibwo buhamya, n'egi nyomyo nayo n'obuhamya, ku ntarihingura eki kirundo n'egi nyomyo kukukora kubi, 53Ruhanga wa Aburahamu kandi Ruhanga wa Nahori, Ruhanga wa ishebo abe niwe yaaturamura. Yakobo nawe yaarahira Ruhanga ou Isaaka ishe yaabaire aramya. 54Kandi Yakobo yaatambira ekitambo ahari orwo rushozi; yaayeta beene ishe kurya egyo migaati, nabo baagirya, baaraara ekyo kiro ahari orwo rushozi.
55Ku bwabaire nibutaagurikana, Labaani yaimuka yaanywegyera abaijukuru na bahara be; yaabashabira omugisha. Bwanyima yaimutsya yaagarukayo owaabo.
Yakobo okweteekateeka kubugana Esau
Поточний вибір:
Kut 31: RKK2008
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
The Bible with Apocrypha in Runyankore-Rukiga, new revised joint translation © The Bible Society of Uganda, 2008.