Matteyo 19
19
Ittiyenio Yesu Eram ono Apiaha
(Mar 10:1-12)
1Ninyia atuhok Yesu ekenita hunia, odioto nyia inyi ette leten iŋati Yudea otto fohor owore Yordano tole. 2Ijifarai nyia eluluŋi waati arriai inyi, buo diya ette inyi itaŋida aŋuak hosi.
3Ofuonni nyia buo fe omuk Farisei jihonyi. Awahi nyia isi italohuna inyi, ette ifiyo inyi jio, “Aŋatani soho efahita atulo ipiahari iko ŋoruoi honyi to obo eram?”
4 #
Etterita 1:27; 5:2 Itarraŋ nyia Yesu jio, “Hèbiaŋata itai ihenuna to buk Hollum eram onno ojio 'to jio many tetteri oyyeu nyia Layyani aati aliawa iko aŋoruo? 5#Etterita 2:24 Ojio nyia Hollum, ‘Te eram ania, obusaru adi alle monyonyi iko honyonyi ette inosonio iko ŋoruoi honyi, buo isi 'daŋ arrihai ette irahan ahuan abotie,’ 6Ihuania obeŋi isi inyiahi irahan arrihai, arai isi abotie. Tania, Hèlaha obo atulo itapek obo ariŋ enne inosok Hollum.”
7 #
Mat 5:31
Buo Farisei ette ifiyo inyi jiojio, “Nyio nyiati isiarak Mose efahita hunna aŋatana 'to alle oŋida isiarak awaraga ono apiaha jio ŋoruoi honyi, buo ette ifuhara inyi addi?”
8Itarraŋ nyia Yesu isi jiojio, “Aŋatak nyia Mose itai ipiahari iko aŋoruo hatai, nyio, ogoli nyia ossi hatai. Ati obeŋ nyia ara ihuo nyia tetteri. 9#Mat 5:32; 1Kor 7:10-11Eramak ni itai jio, lia ollo opiahai 'to iko ŋoruoi honyi to obo eram buo obiaŋara te eram silara, oroto inyi alla ayemu inyi obo aŋotte hama.”
10Attati lejifak honyi jiaran jihonyi, “Alla ara eram 'le iko aŋotte ihuania, abeŋ fe inyi oyyu iyamari.”
11Ati itarraŋ nyia Yesu isi ojio, “Obeŋ ettiyenio ania ara ta aati 'daŋ. Ati ara inyi to hia hama hulle isio Hollum jihosi. 12Owoni erre gele gele hunno obiaŋarik aati ayamarik. Isiuni omuk ihuo nyia, buo omuk iduoŋi oŋida obeŋi ayamai, buo fe omuk ihari ayama te eram ono Olobie Hollum. Ijiara atulo elle iruk 'to eram ana, ihanio ihuo nyia.”
Imimit Yesu Iŋiayai
(Mar 10:13-16; Luk 18:15-17)
13Iyaŋunie nyia omuk aati iŋiayai jio Yesu, jio oŋida inyi iyabak ahas honyi jihosi buo fe hotomojoi tesi. Ati iŋerejanie nyia lejifak honyi jio aati hia. 14Ati iramak nyia Yesu isi jiojio, “Aŋatana iŋiayai ijiara ofuonni jihoŋ. Hètihoto isi, nyio, ara Olobie ettedou ahono aati ihuo isi.”
15Attati inyi iyabana ahas honyi jihosi, ette leten addi.
Lasamani
(Mar 10:17-31; Luk 18:18-30)
16To obo oloŋ, ottu nyia obo atulo jio Yesu, ette jiaran, “Hettiyanani, ehan 'tadi ni anyio onno oyyu ifuotuniere esu 'tulaŋ?”
17Itarraŋ nyia Yesu inyi ojio, “Nyio ifiyo iyye ani eram hirre hunno oyiji 'to? Owon ayijoni Abotie ijiai. Ogottiere efahita, elle iwak iyye inyurana esu 'tulaŋ.”
18Buo atulo lia ette ifiyo inyi ojio, “Hunani efahita?”
Buo Yesu ette itarraŋ inyi ojio, “Hèttoho, hèhanio erre somon, hèhoholio, hètisiak obo atulo obojiai; 19abaŋa monyohoi iko honyohoi, buo fe itabuara ataji hoi jio onyihari hoi ihuo onno obuarari ataji hoi ahuan hoi.”
20Itarraŋ nyia anyarhaluti lia ojio, “Aniŋio nyia ni efahita hunia 'daŋ, anyio obo anna habeŋ ni ehan?”
21Itarraŋ nyia Yesu inyi ojio, “Elle iwak iyye abisan, ilo itinyiaŋak erre hoi 'daŋ. Isiarak arobiyaa hua jio alociaŋak, ihuo nyia, iwon adi iyye iko esamiti idou. Attati teya, waŋ yo ijifatie nani.”
22Ninyia itaniŋu atulo alia erre hunia, ette inyi ijiriŋa, nyio, asam nyia inyi bebe.
23Attati Yesu jiaran jio lejifak honyi, “Ahode, eramak ni itai, ogol adi bebe jio aati asamak ijiŋaniere Ilobie ettedou. 24Enyiak ni iramana itai jio, inyiak iliaha bebe jio akonnikonni ijiŋari te ettulit libira, agalik jio asamani ijiŋaniere Ilobie Hollum.”
25Ninyia itaniŋuni lejifak erre hunia, illillihai nyia isi bebe, ette ifiyo jiojio, “Ŋai 'tadi ollo oremik 'to italahuno?”
26Oyohojok nyia Yesu jihosi 'tok 'tok, ette jiaran, “Agalik eram ania aati, ati oremik Hollum ihanio erre 'daŋ.”
27Attati Petro ikiana jihonyi jiojio, “Imijie! Ediehuno hohoi erre hohoi 'daŋ ijifatiere iyye. Erumak 'tadi hohoi anyio?”
28Ojio nyia Yesu jihosi, “Ahode, eramak ni itai, alla attu Lonyi Tulo itoŋo ta akuatan iseger ilohittok jio amanya aŋejuk, itoŋoti adi buo fe itai ejifak hoŋ hula 'tomon harrihai isegeri ilohittohori jio awoi Israele huna 'tomon harrihai 29Buo atulo elle idiehuno 'to ahaŋitek honyi, kuyya illarak, kuyya haniyarak, kuyya monyonyi, kuyya honyonyi, kuyya amatta honyi te eram hoŋ, inyiak adi inyi ifuotuna erre enyiahita esiha abotie. Isiori adi buo fe jihonyi esu 'tulaŋ. 30#Mat 20:16; Luk 13:30Ati, aati arriai hulla arai 'to ihuania ecuŋita arai adi isi etterita, buo arriai hia, hulla arai 'to ihuania etterita, arai adi ecuŋita.
Поточний вибір:
Matteyo 19: EA2003
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
© The Bible Society in South Sudan 2003
