Matteyo 17

Iloito Omom Yesu onno Olufa

(Mar 9:2-13; Luk 9:28-36)

1Ihalu oŋitek ille iyaru nyia Yesu; Petro, Yakobo iko illanyi Yoane, ette isi ifuatan isi hama ihide doŋe onno ohodo. 2Buo diya ihosiere hosi, iloito nyia omom Yesu onno olufa: ette omom honyi ipipiahi ihuo oloŋ, buo fe aboŋojin honyi ette pipiahi biny biny. 3Attati isi 'daŋ hunihoi igonyuna Mose iko Elija ikianai iko Yesu. 4Attati Petro jiaran jio Yesu, “Lamonye, oyyu jihohoi iwanari dini! Elle iwak iyye, aduhok adi ni aticio hunihoi; abotie jihoi, abotie jio Mose, buo fe abotie jio Elija.”

5 # Mat 3:17; 12:18; Mar 1:11; Luk 3:22; 2Pet 1:17-18 Ninyia hekiana inyi, ofuonni edohuo hunno opipiahi, ette imuluhana isi. Attati ekiana itayiruno totua idohuo onno ojio, “Lonyi hoŋ alia, ollo obuor ataji hoŋ. Amuno ni inyi bebe. Itayiriete jihonyi!”

6Ninyia itaniŋuni lejifak hulia ekiana ania, ette isi irruŋo ta abaŋi. 7Ati olo nyia Yesu jihosi, ette ittir isi, ette jiaran, “Odiototi, hèbaŋata!” 8Ninyia itadeti isi ossi hosi ahide, obeŋi nyia isi igonyuni obo atulo arari Yesu hama.

9Ninyia isuruni isi to doŋe, ihum nyia Yesu iramana isi jio, “Hèramana aleyehino ania jio obo atulo many itubuhunierek Lonyi Tulo toye.”

10Attati lejifak ifiyo inyi jiojio, “Nyioti ojiori ettiyanak ifahita jio oŋida Elija ottu do ahosiere?”

11Itarraŋ nyia inyi isi jiojio, “Ottu adi Elija ahosiere, ihuhumaniere erre 'daŋ. 12#Mat 11:14Ati eramak ni itai jio, lattu nyia luŋa Elija, ati obeŋ nyia tulo inyi iruk. Ihanie nyia isi jihonyi ihuo awahi isi. Ihuo nyia buo fe ittigemie adi isi Lonyi Tulo.”

13Attati lejifak imijana jio ikiana duadi inyi jihosi te eram ono Yoane etifuotoni batisimo.

Itaŋida Yesu Eto ollo Owon 'to iko Aminiaŋati

(Mar 9:14-29; Luk 9:37-43a)

14Ninyia acohunie isi jio eluluŋ waati, ette obo atulo ittuna jio Yesu, ette irigoŋo ihosiere honyi, ette jiaran, 15“Lettok, omehinie jio lonyi hoŋ! Owon inyi iko aahue enne ittigemio 'to inyi bebe. Enyiahita arriai okuahitta inyi itua hima kuyya itua hari. 16Eyaŋuno duo ni inyi jio lejifak hoi, ati ittallihi isi itaŋida inyi.”

17Buo Yesu ette itarraŋ jiojio, “Aii, itai aati hullo obeŋ eruk buo fe ipalata! Etoŋo adi ni ikatai many baya? Many baya adi adik ni itai? Iyaŋuniete leto alia dini!” 18Attati Yesu iŋerejanio jio aminiaŋati ania, buo aminiaŋati ania ette idehina leto alia. Teya teya, ette leto alia iŋidari.

19Attati lejifak ifuanna jio Yesu isi hama, ette ifiyo inyi jiojio, “Nyio duati ettallik hohoi ifuhara aminiaŋati ania addi?”

20 # Mat 21:21; Mar 11:23; 1Kor 13:2 Itarraŋ Yesu isi ojio, “Nyio, omuta eruk hatai. Eramak ni itai, hode hode jio, alla abolo duo eruk hatai ihuo aŋerio cahai, iremehina duo itai jiaran jio adoŋe olo ‘Ilo tene, diya!’ buo inyi ette leten. Obeŋ duo obo ariŋ agalik itai!” [21“Ati, ariŋ anna ara 'to ihuo ana, oremehini ifuhara inyi ta amojo iko ta aferuna ijiai.”]#17:21 Obeŋ ekori ana jio omuk egierita.

Inyiak Yesu Ikiana ta Naye Honyi

(Mar 9:30-32; Luk 9:43b-45)

22Ninyia attubanie lejifak 'daŋ Galilea, ette Yesu jiaran jihosi, “Isiori adi Lonyi Tulo ihas waati. 23Ottohori adi isi inyi, ati iholoŋ etahunihi, itubuhuni adi inyi toye.”

Ijiriŋai nyia lejifak bebe.

Aduma ono Amusuru Huno Aaji Emojit enne Ittokon

24Ninyia afany Yesu iko lejifak honyi Kapernaum, ofuonni nyia eddudduhak musuru hulo Aaji emojit enne ittokon jio Petro, ette ifiyo inyi jio, “Odumatio soho ettiyanani hatai alia amusuru huno Aaji emojit enne ittokon?”

25Itarraŋ nyia Petro ojio, “Aafe.”

Ninyia ajiŋa Petro attua haji, ette Yesu ifiyo inyi jiojio, “Simone, igigilo iyye aŋai? Ŋai oduma amusuru jio hobuok huttono afau ana, aati hullo obuore kuyya aterejok?”

26Itarraŋ nyia Petro inyi ojio, “Aterejok.”

Buo Yesu ette jiaran jihonyi, “Itahutak fe ania jio obeŋi aati hulo obuore ania odumai. 27Ati, ebeŋ hohoi ewak italoŋoj aati hulo. Ihuania ilo ibirok erirehi hoi itua tafar enne ittokon. Iduhu ahami etteri elle irirehu iyye, aŋaa etuk honyi. Irumak adi iyye diya arobiya ollo oremik idumari amusuru hoŋ iko hunohoi. Iyaru inyi isiarak jihosi.”

Поточний вибір:

Matteyo 17: EA2003

Позначайте

Поділитись

Копіювати