Tavaꞌu 9
9
Muloxu Lele'e ne Anu Sosovo sou Vaikala sou Opo Vilesisi Lataua Musakiinu Noxou Noa
1 # Tav 1:28 Xe Lataua muavuti, la mualusi'a Noa ilo'a ta 'olu, la muvikalane'i aloxo 'o, “Ngapalaa mo ta 'ilinge ixali tapiena mo sou ta xasixasinge ilo'a ta 'ilu'ilusungengi ixali tavu'alo sou i'ana'ana no xalexalee tuatuala ukalusi. 2Ta mimii iouiou ane ta temene mo ta vova mo ane'i ane ixalaxala mo ta ngiangiala iouiou ilo'a ta sinana ne, i'umenge. Ia ane'i ixolu no avonge. 3Ngingi ngamasaxai'a lexe nga'i'a, la sou ngave'a sou nga'i'a. Mo kamakamakala iouiou ne, ngainixu sou nga'ou kalumo xo eni emuxaxa'a lexe ngingi la'ilalingenge ane. 4#Liv 7:26-27; 17:10-14; 19:26; Lap 12:16, 23; 15:23Ia, mii vilesisi lexe mamu nga'ou ane, mii xiasi siasialuxu o. Eni emasaxainge lexe mamu nga'ou, xo sialuxu ne mauli a uxoo no anu sio. 5Io, ta mii ane ta temene mo ta vova ivau itema vile usoli, la eni ave'a isoli kalumo. Xe itema ane uvau itema vile usoli, la akalusou maulixu mitema ane ne kalumo. 6#Tav 1:26; Mul 20:13Ta mitema ne, Lataua mukoine'i, la mixali loxo anu Lataua. La sou lexe itema vile uvau menexu vile, la vile une'e ukolinu ane musoli ne sou uvau. 7#Tav 1:28Emasaxa lexe ngapalaane'i ta 'ilinge tapiena, mo sou ta xasixasinge ilo'a ta 'ilu'ilusungengi ixali tavu'alo sou i'ana'analixu xalexalee tuatuala 'o ukalusi.”
8Xe Lataua muavuti la muvikalane'i Noa ilo'a ta 'olu aloxo 'o, 9“Vaimomo 'o eni apala'alixu vaikala sou opo vilesisi eni asakiinu noxinge. Mii ane eni alemolu 'o, uxolu mo umauli noxinge mo noxi'a ta xasixasinge ilo'a ta 'ilu'ilusungengi ane ipaa ili'i 10mo ta mii iouiou latala ane ngongi'a ngelalaa muatu no lasipi 'o. 11Vaikala sou opo vilesisi eni asakiinu noxinge aloxo 'o, eni umomomo sou a'oxo masuane'i mo a'unane'i ta mitema ilo'a ta mimii iouiou 'o mo xalexalee tuatuala la ua. 12Sosovo ane eni amuxaxu 'o sou u'oxo tu'umaxu sou opo vilesisi ane eni esakiinu noxinge ngongi'a ta mimii iouiou e ngongi'a ngaxoxolu vaimomo 'o xe noxi'a ane'i ane ixali ili'i. 13Muloxu lele'e eni e'oxonu muxolu no tamuxala ne anu sosovo sou opo vilesisi eni esakiinu ulai noxi'a ta mitema no xalexalee tuatuala no lialia ukalusi ane. 14Lexe eni asu'asou loxotolo no anu tamuxala xe lele'e muloxu upala'a, 15la eni axavutalanu vaikala sou opo vilesisi eni esakiinu noxinge, lexe mamu la eni a'oxo masuanu mo a'unanu xalexalee tuatuala mo ta mitema ilo'a ta mimii iouiou ane ixoo sou imauli no anu tauu ano 'o, mo ulai avile ili'i. 16Lexe eni amaisou muloxu lele'e uxali no anu tamuxala, la eni axavutalanu vaikala sou opo vilesisi e eni esakiinu noxinge. Vaikala sou opo vilesisi e eni esakiinu ane ne, uxolu aloxo nesi mo kaluxu uasi manina.
17Muloxu lele'e ne, anu sosovo sou vaikala sou opo vilesisi ane eni esakiinu mulai noxinge ngongi'a ta mimii mukalusi e ixoxolu imaumauli no lia 'o.”
18Noa ta 'olu tatalu e ilo'a milalaa muatu no lasipi ano, eiae Semu ilou Amu mo Iapeti (Amu ne, anu Kanani momu). 19Ta mitema ane mimauli no xalexalee tuatuala 'o ne, ta mutu'u ovuxa'a ane Noa ta 'olu tatalu ne.
20Noa ne, anu itema sou xai. Anu itema ane musokou sou mutou ovu uaini tei ane. 21Voxo vile, la anu muiexu uaini se'i la xavutalau ne muxovulaulau, mole ulavu ua. Muavuti la muxexenu lavalavau ia, muai vitanisi no nano no taasou. 22'Olu Amu mu'unalai la mumaisou momu muai loxo nesi, xe muatu la mua'aloi'a ta vimovimou ta tamei 'ole. 23La sou Semu ilou Iapeti mino'u lavalava vile sou mixavulalanu ia mitetelisou ili'i no laxasi'a, io sou ane'i ilou mimuamua'i tumali'a mulai loxo noxou mami'a uai 'ole sou milai misu'asou. Ia ilou ie'i uxiu ulai no tumali'a sou imaisou mami'a uasi. 24Ili'i xe Noa mutulu, la sou tanu tema la mulavu no anu mii e anu 'olu Amu mu'oxonu noxou. 25Xe anu mami'a muavuti la muvikala aloxo 'o,
“Eni elavu lexe Latauasi ulosou Kanani navunavu.
Ili'i la anu uxali itema vile vitanisi no laaxa'a ta vimovimou sou ipalupalusousi.
26Ia nenge ta'iti ualasou IAUE, Lataua noxou Semu.
Kanani ne uxolu no laaxu Semu sou upalupalusou.
27Lataua molu ualusou Iapeti sou ta 'olu ixali tavu'alo
sou ilo'a ta mitema noxou Semu ixolu xoluxoluxa'a vilesisi.
Kanani ne, uxolu no laaxu Iapeti sou upalupalusou.”
28Xe ili'i no anu la'iua toxoxa'a te mu'unane'i ta mitema ilo'a ta mimii iouiou 'o mukalu, la Noa muxolu sou mumaulixu tauu ie itemaxu mavulovexa vile mo itemaxu ta'uve mo mavulovexa ta'uve (350) la. 29Xe tauu iexu mulai muxali loxo itemaxu mavulovexa tami'a mo itemaxu ta'uve mo mavulovexa ta'uve (950) la sou musoli.
Seçili Olanlar:
Tavaꞌu 9: ataNTpo
Vurgu
Paylaş
Kopyala
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
© 2013, Wycliffe Bible Translators, Inc. All rights reserved.