Matiu 8

A katuun te kamei a toba

(Mak 1:40-45, Luk 5:12-16)

1Pöata te koul putama e Iesu turu pokus ba parpara koru a katuun e kukutie nanen. 2Ba töa katuun te kamei a toba e la nama memi hatukunna i matanen me poeiena, “O Tsunono, te ngil mialö, balö te tatei kato hagogose mumoulia.” 3Be Iesu e hasoa nena a limanen ba nonei e sebele nen. Me poeiena, “Alia e ngilegu. Alö go gogoso!” Ema mala pinatöai ba toba i tanen te taiana. 4Be Iesu e poeiena i tanen, “Alö ema antunan hatei korue moi ta töa ta katuun. Kaba lö go la uala tara pris balö tena hatare mien te niga uana a peisamölö. Ba lö te hale moien a kaan haats te ranga uu e Mosis i manasa. Ba u katuun te tatei atei sile riou a toba i tamölö e kapa nitöa.”

E Iesu e kato haniga poutsi a katunun kui tara tsunono turu soldia

(Luk 7:1-10)

5-6Pöata te tataalaia e Iesu iahana taun i Kapenium, ba töa tsunono turu soldia e la uanama i tanen memi ranga hataatagina i tanen me poeiena, “O Tsunono, a katunun kui i tar e opö mena u tuenrei u matekata, na e sagoho koru hasena a kamits pan i peisanen.” 7Be Iesu e poeiena, “Alia e lagou batena kato haniga poutse goien.”

8Kaba a tsunono turu soldia e ranga paliseien me poeiena, “O Tsunono, alia ema katuun a nigagi balö te laua muma i luma i tar. Alö go ranga tuun ba katunun kui i tar te niga pouts nou. 9Taraha, i tar peisa alia e atei silegu alia e ka puta gia tara töa pal tsunono, na töa pal soldia e ka puta has ria i tar. Na tego ranga meia lia ta töa balia te poeiegu, ‘Alö go la,’ ba nonei te la hasina. Na tego ranga meia lia ta tabi balia te poeiegu, ‘Alö go lama,’ ba nonei te la has nama. Na lia go ranga mei a katunun kui i tar, ‘Alö go kato a toukui teka,’ ba nonei te kato hase nen. Na u raranga tuun has i tamölö e ka mena a nitagala.”

10Pöata te hengoeia e Iesu u raranga teka ba nonei e asingoto koruna. Ba nonei e ranga meraiena u katuun ti kukutieien me poeiena, “Alia e ranga hamana koru meragou limiou, alia uma sabie mei ta töa ta mar katuun teka i Israel tega kamei u mar nihamana te kamena a tson teka. 11Na lia e hatei ragou limiou, u katuun u parpara koru e la rima romana tara mamana han. Batemi gum gono mera nou ere Abraham mere Aisak ne Jekop tara kannou iahana a Nipepeito tere Sunahan. 12Kaba limiou u Jiu, u katuun tego kamia nonei tara Nipepeito teka, e Sunahan e tsuga mera noi limiou ielesala turu kuhil. Tena tabe hohomi moua limiou bate kutu hakarkarangake mou a liho milimiou.”

13Be Iesu e poeiena tara tsunono turu soldia, “La tala. A ka ena mar butu has benoi lö turu mar nihamana i tamölö.” Ba nonei tara tsi pöata puku has teka ba katunun kui i tanen e niga poutsuna.

E Iesu e kato haniga poutsi e tsinana a tahol tere Pita

(Mak 1:29-34, Luk 4:38-41)

14Pöata te tasuia e Iesu iahana luma tere Pita ba nonei e tarena e tsinana a tahol tere Pita, te opö menaien u baku kamits. 15Be Iesu e sebeleiena a limanen, ba kamits i bakunen e kapana. Ba nonei e takeina me kato benei e Iesu a tsi kannou.

E Iesu e kato hanigeir u katuun u parpara

16Ba tara lahibong ba nori ena piou raria u katuun u para ti kamei u liliahanei, tere Iesu. Ba nonei e ranga tununa me tsuga baraiena u liliahanei u omi i taren. Ba nonei e kato haniga pouts has rena u katuun hoboto ti kamei a siki. 17A ka teka e butu sil tega kato hamana menaien u raranga te ranga sila naia e Sunahan tere propet Aisaia i manasa.

“Nonei peisa tega luban a mamana mar siki i tarara,

na nonei has tega söateien.”

U katuun ti katsin kukuti e Iesu

(Luk 9:57-62)

18Be Iesu e tara rena u katuun u parpara koru ti gono hahiseien, ba nonei e ranga meraiena u katunun tsitsilo tanen, “Aragi la u i hapalana ramun.” 19Ba töa tson hihatutsuna tara Lo e la uanama i tanen me poeiena, “Tson Hihatuts, alia e la gono megou lö tara mamana han te la uamou lö.” 20Be Iesu poeiena i tanen, “U muki u hie e kamer a man kiou i taren, na u apenar iasa e kamer a man suhana i taren. Kaba lia tu butun Katunuma, ema kamegi ta makumun soho i tar.” 21Ba tana katunun tsitsilo e poeiena i tanen, “O Tsunono, alö go haniga balia tena kaho bunaguma e tamar, balia te töan lagono megou lö.” 22Be Iesu e poeiena i tanen, “Alö go la gono memou lia. Hakabar u mate gi kaho peisar u mate i taren.”

E Iesu e haselohi a lomolomo pan

(Mak 4:35-41, Luk 8:22-25)

23Pöata te osaia e Iesu tara tolaala, ba u katunun tsitsilo i tanen e osa gono meren. 24Ba lomolomo pan e songots butuna, ba u ramun e posa hongo beiena a tolaala. Kaba e Iesu e soho. 25Ba u katunun tsitsilo ena gulie ren me poeier, “O Tsunono, alö go taguhu ramou lam! Ara e katsin ruku hamanasa talara!” 26Ba nonei e poeiena i taren, “U nihamana i tamilimiou e tetenei koruna! Aha te matout memilimiou?” Ba nonei e takeina me abis hatagalena a lomolomo ba ramun e selohona. Ba lomolomo e hanöana, ba ramun e maraha poutsuna. 27Nori i asingoto koru me poeier, “A saha a mar katuun koru teka? A lomolomo na u ramun e hengo korueren!”

E Iesu e tsuga bar u liliahanei u omi tara huol a katuun

(Mak 5:1-20, Luk 8:26-39)

28Pöata te butuien i hapalana Ramun i Galili tara makumun tsiktsikina i Gadara. Ba huol a katuun i kamei a liliahanei e buturima turu kahokaho ti roron kaien, me hitupali mer e Iesu. A huol a katuun teka i hie homi koru batema ron ngileri ta katuun ega silaia tara maroro teka. 29Ba huol e ku hohomi korur me poeier, “A Pien Tson tere Sunahan, alö emi hamia i tamulam? Alö goma hakamits mam railam, a pöatan hahuna i tamulam e kanoana!”

30Na töa pannen a heis poum i nou, kaba ima ka halehana bala nai ti kaien. 31Ba u liliahanei u omi e ranga hataatagi ria tere Iesu me poeier, “Te tsuga ramoa lö alam, ba lö te tsuga mera moi lam tara heis poum.” 32Ba nonei e poeiena turu liliahanei u omi, “Alimiou go la iam.” Ba nori e koul ba ner a huol a katuun teka, mena sei ria tara heis poum. Ba heis poum hoboto teka e hiapipiata gala hoboto uar turu uarahana, me kurapa uar iahana a ramun be rukur me mater.

33Ba u katunun taratarakap turu poum e busur. Ba nori ena butu ria tara taun me habulungana ner a ka te butuia tara huol a katuun ti kamei u liliahanei u omi na mamanaka hoboto te butu. 34Ba mamana katununa tara taun teka emi sakeier e Iesu. Ba pöata ti tareien e Iesu ba nori e ranga merien tego la ba menaien a han i taren.

Seçili Olanlar:

Matiu 8: HLA 2020

Vurgu

Paylaş

Kopyala