Awˬ hkuiˉ puiˍ ve li‸ 6
6
Miˬguiˬ chaw yaˇ haiˬ jaˇ ve
1Miˬguiˬ chi hkʼoˆ chaw yaˇ maˇ la leh, awˬ hkiˇ awˬ naˬ da‸ ve yaˇ miˇ haˉ teˇ hpaˍ cawˬ maˇ la ve pa taw, 2gʼuiˬsha teˇ hpaˍ ve yaˇ paˍ teˇ hpaˍ, yaˇ miˇ haˉ chi ve teˇ hpaˍ hta‸ ca heuˆ la ve yoˬ. 3Oˇ htaˇ Gʼuiˬsha lehˬ, Chaw yaˇ chi teˇ hpaˍ hta‸ ngaˬ co co taiˍ taiˍ te‸ chehˇ tcuh piˇ maˇ hpeh‸. Awˬ lawn kʼo, yawˇ hui lehˬ suh puiˉ ve yoˬ. Ya‸ nyi hkʼaw‸ nawˉ kʼo, yawˇ hui lehˬ teˇ ha nyiˇ chi hkʼaw‸ ceh tiˉ a sha‸ gʼa te‸ chehˇ tuˬ yoˬ, teh‸ kʼoˆ ve yoˬ. 4Awˬ yanˇ oˇ ve awˬ hkʼaw lo, yaˇ miˇ teˇ hpaˍ geh paw la ve uiˍ jaˇ mvuh jaˇ ve chaw lonˉ teˇ hpaˍ cawˬ ve yoˬ. Yawˇ hui lehˬ, ha‸ hanˉ leh awˬ meh bvuhˬ ve chaw teˇ hpaˍ hpeh‸ ve yoˬ.
5Miˬguiˬ hkʼoˆ chehˇ ve chaw yaˇ chi teˇ hpaˍ ve dawˇ hkʼaˇ te hkʼaˇ teˇ hpaˍ cha‸ chiˆ jaˇ ve hta‸ Gʼuiˬsha gʼa mawˬ ve teˇ yanˇ, 6Yawˇ chaw yaˇ hta‸ te hpanˍ taˍ ve lehˬ ya‸ jaˇ ve law teh‸ shiˍ leh dawˇ haˍ ve yoˬ. Hkʼe te leh Yawˇ kʼoˆ ve, 7Ngaˬ te hpanˍ taˍ ve chaw yaˇ chi hkʼa peu-eˬ, to nuˇ to shaˆ hkʼa peu-eˬ leh ngaˆ hkʼa peu-eˬ ve hta‸ ngaˬ te luˬ te sheˆ piˇ tuˬ yoˬ. Awˬ lawn kʼo, chi teˇ hpaˍ hta‸ ngaˬ te hpanˍ taˍ ve lehˬ ya‸ jaˇ ve law, teh‸ kʼoˆ ve yoˬ. 8Ya‸ hkʼaˇ, Noˉa‸ hta‸ lehˬ Gʼuiˬsha nyi ma cawˇ ve yoˬ.
Noˉa‸ awˬ lawn
9Chi ve lehˬ, Noˉa‸ ve awˬ lawn hpeh‸ ve yoˬ. Noˉa‸ lehˬ Gʼuiˬsha hta‸ awˬ chawˇ te ve chaw, hteˇ ve cawˇ ve chaw leh venˇbaˆ taˍ kuiˬ maˇ cawˬ ve chaw hpeh‸ ve yoˬ. 10Yawˇ lehˬ Sheˍmaˆ, Haˍmaˆ, Yaˍhpehˆ teh‸ kʼoˆ ve yaˇ paˍ shehˆ gʼaˇ cawˬ ve yoˬ. 11Ya‸ hkʼaˇ, awˬ kaˍ awˬ nu chaw hkʼa peu-eˬ haiˬ jaˇ ve yoˬ. 12Gʼuiˬsha lehˬ miˬguiˬ hta‸ nyi leh cha‸ chiˆ jaˇ peuˬ ve hta‸ gʼa mawˬ ve yoˬ. Awˬ lawn kʼo, chaw yaˇ hkʼa peu-eˬ haiˬ jaˇ ve yoˬ.
13Oˇ htaˇ, Gʼuiˬsha Noˉa‸ hta‸ chi hkʼe kʼoˆ piˇ ve yoˬ. Chaw yaˇ chi teˇ hpaˍ haiˬ jaˇ ve pa taw, miˬguiˬ chi ve cha‸ chiˆ jaˇ peuˬ. Chi hta‸ pa taw, chaw yaˇ hkʼa peu-eˬ ve hta‸ te luˬ te sheˆ piˇ tuˬ, ngaˬ dawˇ cheˆ taˍ peuˬ. 14Da‸ jaˇ ve suhˆ hta‸ ca leh haw lo‸ kʼoˍ lonˉ teˇ maˬ te-o. Oˇ ve awˬ hkʼaw lo awˬ bawehˇ teˇ hpaˍ te keu leh, awˬ hkʼaw hpawˇ leh awˬ baˬ hpawˇ lo suhˆ tcuhˇ hkʼa deh‸ shehˆ taˍ-o‸. 15Haw lo‸ kʼoˍ te tuˬ ve awˬ hkʼaˇ lehˬ chi hkʼe yoˬ. Haw lo‸ kʼoˍ chi zuhˬ hpawˇ 300 jaˆ, kʼehˬ hpawˇ 50 jaˆ leh mvuh hpawˇ 30 jaˆ gʼa cawˬ piˇ ve yoˬ. 16Haw lo‸ kʼoˍ chi ve hta‸ hkʼa deh‸ gʼa beh leh, teˇ jaˆ hkʼe gʼa beh zuhˬ piˇ ve yoˬ. Chi hkʼoˆ ka‸, haw lo‸ kʼoˍ lonˉ chi ve hta‸ shehˆ htai‸ gʼa te leh yehˬ miˉ lonˉ htawˇ teˇ maˬ gʼa te keu ve yoˬ. 17Miˬguiˬ hkʼoˆ a sha‸ hkʼa te‸ chehˇ ve awˬ ceuˬ hkʼa peu-eˬ ve hta‸ te luˬ te sheˆ piˇ tuˬ, miˬguiˬ chi ve awˬ hkʼoˆ lo ngaˬ iˉ kaˆ uiˍ taˆ la piˇ tuˬ yoˬ. Miˬguiˬ hkʼoˆ cawˬ ve awˬ ceuˬ hkʼa peu-eˬ suh-e tuˬ yoˬ. 18Ya‸ hkʼaˇ, ngaˬ nawˬ hta‸ ka ti‸ shaˉ caˆ chi hkʼe te laˇ ve yoˬ. Nawˬ awˬ to leh nawˬ ve yaˇ teˇ hpaˍ, nawˬ ve awˬ miˇ ma leh nawˬ ve awˬ hkuiˇ ma teˇ hpaˍ, haw lo‸ kʼoˍ oˇ ve awˬ hkʼaw lo gʼa lo‸-e tuˬ yoˬ. 19Miˬguiˬ hkʼoˆ lo a sha‸ hkʼa te‸ chehˇ ve to nuˇ to shaˆ teˇ ceuˬ le le ve awˬ paˍ awˬ ma teˇ ceh, 20ngaˆ teˇ ceuˬ le le ve awˬ paˍ awˬ ma teˇ ceh, nawˬ geh teˇ geh haw lo‸ kʼoˍ hkʼaw gʼa yuˬ keu ve yoˬ. 21Nawˬ awˬ to leh nawˬ ve miˇ yaˇ hkʼa peu-eˬ awˬ pon caˇ tuˬ maˇ kʼoˆ, to nuˇ to shaˆ teˇ ceuˬ le le awˬ pon caˇ tuˬ maˇ kʼoˆ, nawˬ gʼa gu taˍ ve yoˬ, teh‸ Noˉa‸ hta‸ kʼoˆ piˇ ve yoˬ. 22Gʼuiˬsha yawˇ hta‸ hkʼa kʼoˆ piˇ taˍ ve hkʼa peu-eˬ hta‸ Noˉa‸ na yuˬ leh te ve yoˬ.
Seçili Olanlar:
Awˬ hkuiˉ puiˍ ve li‸ 6: LHBE
Vurgu
Paylaş
Kopyala
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
Lahu Bible Edited © Thailand Bible Society and Bible Society of Myanmar, 2010, 2020.