San Mateo 3
3
Udixiuleꞌe Juan Bautista Stichiaꞌ Diose lubee bene
(Mr. 1:1-8; Lc. 3:1-9, 15-17; Jn. 1:19-28)
1Tiembu zeꞌe uyanzee Juan Bautista lu dañi achi lu iliu Judea udixiuleꞌella Stichiaꞌ Diose lubee bene. 2Nu unilla:
―Utsanaꞌ arquiꞌhua stulahua xne nzeꞌta riñala nú rnibiyaꞌ Diose.
3Equie cuendaꞌ Juan Bautista quieꞌ, uquieꞌe profeta Isaías chenu unilla:
Uyene chi tucu enu juerte rixiali lu dañi achi elu la nucuaꞌa bee bene nú rni:
“Utsu tsiñahua arquiꞌhua xne nzeꞌtala liꞌinu enu neca Dioseꞌahua,
utsanaꞌ arquiꞌhua stulahua para nú yucu arquiꞌhua stichiaꞌnu.”
4Xucu Juan necacheꞌe ichia tsuꞌ camello, nu sinchiu nú riuꞌu xlaꞌculla necacheꞌ iti, nu elubacu nú udaculla neca xeꞌchiu cuna lliña dañi. 5Nu bee bene Jerusalén cuna ye bee bene lu iliu Judea nu cuna bee bene enu nucuaꞌa axu reꞌcu Jordán uchiuꞌu beella, uya beella ubeneꞌ beella nú rni Juan. 6Chequie chenu uxucuꞌ dula beella stula beella, urinza Juan liꞌibeella reꞌcu Jordán.
7Pero chenu ulañiꞌ Juan nú huaxi bee fariseo cuna saduceo uriña lulla para nú rinzalla beei, che unilla lubeei:
―¡Liꞌisihua netsiñahua xi netsiña bee beꞌla! ¿Ti udixiuleꞌe luhua nú tsilaꞌahua lu castiya juerte nú axula nzu zeca bee bene? 8Uhuañi nzeꞌcahua para nú aca chee nú neli utsanaꞌ arquiꞌhua stulahua, 9nula aca nelliñahua nú rnihua: “Liꞌiru nzelaru lu familiaꞌ tuxie Abraham”, xne liꞌá nia luhua nú hasta bee quiee quieꞌ nuꞌ modo nú riꞌi Diose nú aca bee familiaꞌ tuxie Abraham. 10Nu bee bene enu la zucuꞌ Stichiaꞌ Diose tucu nú rialane, liꞌinu riꞌinu lubeella tucu nú rriꞌinu bee bene aca nú la ayuaꞌ ndixilu, xiecuꞌ benene para nú chiquine. 11Liꞌá, rniaa luhua nú liꞌá rrinzahua cuna inza xineca tucu seña nú utsanaꞌ arquiꞌlahua stulahua, pero enu nzeꞌta lulá liꞌinu rinzanu liꞌihua cuna Espíritu Santo nu cuna quii. Liꞌinu maselá rluꞌcunu poder luquela liꞌá, enzeꞌe niꞌ nú hua lucunu la yala xne masela neca equienu luquela liꞌá. 12Nu tucu nú rcuii bene trigo scua riꞌinu Diose bee bene. Nu bee bene enu sanaꞌ arquiꞌ stula huañi bee nzeꞌe elurnibiyaꞌ Diose, nu bee bene enu la tsanaꞌ arquiꞌ stula necala nú cha beei lu quii nú leca xunga yala.
Urinza Juan Bautista Jesuse
(Mr. 1:9-11; Lc. 3:21-22)
13Che uchiuꞌu Jesuse Galilea para nú nzanu lu Juán reꞌcu Jordán, para nú rinzalla liꞌinu. 14Pero chenu uriñanu lu Juan lá zela Juan arinza liꞌinu, nu unilla lunu:
―Liꞌilu riala rinzalu liꞌá, ¿nu liꞌá la yala rinza liꞌilu?
15Chequie uni Jesuse lulla:
―Uzela nú acane scua, xne mase neca nzeꞌca nú riaꞌa ye tucu nú rnibiyaꞌ Diose.
Chee uzela Juan urinza liꞌinu. 16Chenu ulaxu nú urinzalla Jesuse, nu uchiuꞌunu lu inza, tuꞌnatsia uyaꞌla liñibe, nu ulañiꞌnu nú nzeꞌta laca Espíritu Santoꞌ Diose xi naa tucu paloma equienu. 17Nu ubene tucu chii enu uni hasta liñibe:
―Liꞌinu necanu lliꞌñia enu chiquiꞌ seꞌcaa, nu ñia nzu arquia lu.
Seçili Olanlar:
San Mateo 3: zpl
Vurgu
Paylaş
Kopyala
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
© 2010, Wycliffe Bible Translators, Inc. All rights reserved.
