Luke 22
22
1Jnpjnnj ce 'Pataqkha' pji tiyj an'hawu khrawng 'hen' pui yaq tiq mung pji a'hyju lo. 2Kyu 'Mhawpaw' canglen heq uqpade yawcu tiq sarapaw heq na 'Boipaw Yesyuq' a'yup caw vj tuk hai lawm an'sui. Ibahai yj nawk hxce nhi tiq na khrawng heq an'kiq khennj thonne. 3Jnpjnnj ce Tavawkaq pji kalainhiq duk kj kxq 'Yuqdaqsyakaruk' ceng ngj nawtsi caten vawng na a'koppe. 4'Yuqdaq' khrawng Kyu 'Mhawpaw' canglen heq na Phawlaw kyong cong tiq heq ceng tjq a'cet. Pjnnj ce 'Boipaw Yesyuq' i-baw mawn laq ai nawk khrawng nhi tiq dj an'krju ve nawk. 5Nhi tiq khrawng an'lung lhju theqna phjisa kan'pet tai tiyj an'lx nawk. 6'Yuqdaq' na kha nhi tiq dj an'krju ve nawk khrawng baw vj khrawng heq an'hiu cxn nj 'Boipaw Yesyuq' khrawng nhi tiq kut duk kj a'awp hai lawm ningkham me na a'mji. 7Jnpjnnj 'hen' pui yaq tiq mung pji yj pataqkha pji ltok to dikcaw khrawng an'pawq laq hai nhxp a'khrai lo. 8Jnkhaw hxyawng 'Boipaw Yesyuq' na "'Petaruq' na 'Yawhen' yj "han'hi na a'mxlawm mj han'e-ok hai tok pataqkha pji yj cet theqna poqcai ye yjn" tiyj hawu theqna nhi hji a'tjq. 9Jn hji na kha "'Boipaw' vj i-khjk dxn nj poqcai sawk hai na'lx" tiyj a'hiq nghiq. 10'Boipaw Yesyuq' na "luq duk kj na'hiq vawng na ce tuimeng ba lo tiq khrawng pjinghawt na'hiq khom me yai. Nhi nhu yun na nhi vawng nawk im mj vawng bjiq hiq. 11Pjnnj ce immawq paw vj "ke'hiq sarapaw na a'tabeq heq dj pataqkha pji a'mx buq a'e nawk hai dxn i-khjk dxn nj a'mji tiyj nang ngj a'nghi lo sawk" tiyj a'hawu. 12Jn immawq paw na nang'hiq khrawng a'hawn thawp tjq pan ne na a'pawi caw vj cxmsya na an'tawk khrawng khin heq an'khin nawk khrawng im a'hawn thawp a'dawn nai. Jn khai yj pji han'e-ok nawk hai poqcai bjiq hiq" tiyj a'hawu. 13Jnpjnnj ce 'Petaruq' na 'Yawhen' khrawng cet theq hji na 'Boipaw Yesyuq' na a'hawu baw tjng ngj a'hiq khom me khennj pataqkha pji tok a'hiq poqcai. 14E-cxn khrai lo na ce 'Boipaw Yesyuq' khrawng 'Tavawkaq' heq dj e-ok pji yj a'ngvaw. 15Jnpjnnj ce 'Boipaw Yesyuq' na nhi tiq j "ke na niqnawng heq ka'khawm laq lhawn nj ni pataqkha pji yj nang'hi dj e-nghaq hai a'lhji yj ka'lx mji. 16Nang'hi yj ke na hawu hai ka'lx khrawng ce pataqkha pji khrawng 'Pxtpaw Phawlaw' neng-ngeng yj a'kxmyom yaq lhawn tjq ni baw pataqkha pji yj a'tha krawn-nghawt e-ti hai sihx tiyj a'hawu. 17Jnpjnnj ce 'Boipaw Yesyuq' na 'Capyek' hawng khok lju theqna 'Pxtpaw Phawlaw' a'tjuqkauq ve cawng na ce "ni khok lju lo na nan'punghaw ko phe ye na o-vjn. 18Nang'hi yj ke na hawu hai ka'lx khrawng ce 'Pxtpaw Phawlaw' neng-ngeng a'pjudawng lo hawm yaq tjq ke na i-hxvj kha 'Capyek' hawng o-ti hai sihx" tiyj a'hawu. 19'Boipaw Yesyuq' na mung kha lju batx theqna 'Pxtpaw Phawlaw' a'tjuqkauq ve nawk. Pjnnj ce mung khrawng pit na a'tabeq heq j phe na "ni mung khrawng nang'hi tok ke na ka'pet khrawng ke pumyo vj thonne. Ke nan'khin ne nawk hai tok kj e-o vjn" tiyj a'hawu. 20Jn baw tjng ngj an'e-ok cawng na ce 'Boipaw Yesyuq' na khok kha lju theqna ni khok khrawng nang'hi yj ka'lji khrawng ke thithawng dj a'lju ve. Ke thithawng khrawng 'Pxtpaw Phawlaw' na khrawng heq kra vj pumyo tha, lungbong tha vj mji ba khoq hai tok ke thi sawksi yj a'thonne. 21Sinakha sunpui heq kut tj ke awp hai tiq kha ni e-ok pji yj ke dj a'mji nghaq. 22'Ceqcaw' khrawng 'Pxtpaw Phawlaw' na a'lx mji baw tjng ngj a'bjt khawm hai yj a'cet laq ai. Sinakha sunpui heq kut tj 'Ceqcaw' awp tiq ce bjikhji yju tiyj a'hawu. 23A'tabeq heq na kha han'hi duk kj u-bawng na jn baw a'poqcai yai tiyj an'nghi ye tong. 24Jnpjnnj ce a'tabeq heq na an'punghaw duk kj u-bawng a'mrawt dj tiyj an'ca ye tong nawk. 25'Boipaw Yesyuq' na "a'kyaw kre yj kxq mawnglen heq na an'kresaw nghaw heq khrawng tha kung tha vj an'om. Jn baw na kha nhi tiq j an'mawlawm pawi dawn tiq tiyj xt naw sawk dang an'ti. 26Sinakha nang'hi ce jn heq baw vj mji kawq cuq. Nang'hi duk kj a'mrawt dj vj thonne tiq khrawng cum me dj tiq khrawng baw vj mji theqna, lawm dawn tiq j thonne tiq khrawng an'ma baw vj thonne laq ai. 27E-ok pji yj ngvaw tiq khrawng na pan naw tiq khrawng ngj hu-u a'mrawt. E-ok pji yj ngvaw tiq khrawng yawng a'mrawt siyju vaw. Sinakha ke khrawng nang'hi pan naw pet tiq ma khawm laq tiq baw vj ka'thonne. 28Ke na a'sisaw heq ka'khom hxvj nang'hi na ke dj jn a'sisaw heq nan'khawm nghaq. 29Ke paw na neng-ngeng om hai ke yj a'awp baw vj ke na kha nang'hi yj neng-ngeng om hai ka'awp pai. 30Jnkhennj nang'hi khrawng ke neng-ngeng ke e-pji yj nan'e-o laq ai. Jn thawk tawn yaq ke ngvawq nawk pailawng ngj ngvaw theqna 'Icare' khrawng yx yx-kalainhiq tok tala nan'khranhya laq ai. 31"'Syiqmung', 'Syiqmung' nge ya lai mawqpaw na cang khrawng cawng hum na cang sengkhaya vj a'tin baw vj nang'hi khrawng nawtsi caten na tin hai yj tong nge na a'mji. 32Sinakha nang yum me khrawng heq krak yaq hawn nj nang tok suq ka'tong pet pjn. Na'cok khrawng heq a'kxmyom lo ba hxvj nang ta-nawu heq j thonne tiq a'kyaw khrawng heq na an'yum me khrawng krak yaq hawn nj poqcai pet bjiq' tiyj a'hawu. 33Jnkhaw hxyawng 'Petaruq' na "'Boipaw Yesyuq' j ke kha nang dj thong duk kj kha siyj seq, bjt nawk laq hai dxn nj kha siyj seq nang kon ka'yun lo vai' tiyj a'hawu. 34'Boipaw Yesyuq' na "'Petaruq' j tuq nhxp 'A' a'khong lhawn nj nang na ke khrawng co hx tiyj krawn thum tiqtiq na'caqtit tai" tiyj a'hawu. 35Jnpjnnj ce 'Boipaw Yesyuq' na a'tabeq heq j "ke na nang'hi yj phjisa ik, jikhi na khopatawp heq ciq-e sawk yaq kaw ka'tjq hxvj nang'hi na u-nghawt e-nghawt nan'lx khrawng heq a'mji nghxt taw" tiyj a'nghiq khaw hxvj a'tabeq heq na "mji nghxt yju" tiyj an'hyawk ba. 36Jnkhaw hxvj 'Boipaw Yesyuq' na "tuq j ce phjisa ik taw ye tiq na ce lu ve yjn. Jikhi taw ye tiq na kha lu ve yjn. Nang'hi ceng ngj cimcoi mji yaq hxvj ce suisawk ye theqna cimcoi lhe yjn. 37Nang'hi yj ke na ka'hawu vai. 'Nhi khrawng a'kret poqcai tiq ming carawng duk kj a'mhawt te khrawng a'khawm laq ai tiyj kyengcaw pek kj yo ve tiq baw vj ke ceng ngj a'thon lo vai. Ibahai yj nawk hxvj ce kyengcaw vj mji tiq ke dj soisen ne tiq heq khrawng a'thonne lo khen cuvj" tiyj a'hawu. 38Jnkhaw hxyawng a'tabeq heq na kha "'Boipaw Yesyuq' j cimcoi lawk-nhiq a'mji" tiyj an'hawu hxvj 'Boipaw Yesyuq' na "a'lok pjn" tiyj a'hawu. 39Jnpjnnj ce 'Boipaw Yesyuq' khrawng khin heq an'khin nawk khrawng im a'hawn thawp pj kxq thok theqna a'poqcai soi baw tjng ngj 'Tenglvawng' tong ngj a'cet hxvj a'tabeq heq na kha nhi nhu an'yun ne. 40Jn dxn tjq an'khrai na ce 'Boipaw Yesyuq' na a'tabeq heq j "lhaq-e nawk khrawng khawm laq yaq hai tok 'Pxtpaw Phawlaw' ceng ngj suqtong bjiq cuq" tiyj a'hawu. 41Pjnnj ce 'Boipaw Yesyuq' khrawng a'tabeq heq dj lung khong nghawt cawk a'lhawm nawk dxn nj khukdyawq caw vj ngvaw theqna 42"J paw'u vj, paw'u vj ni sisaw heq ke na khawm laq yaq kaw a'laq hxvj ce phen pet maw va. Sinakha ce ke lx baw vj siyaq kaw vj 'Pxtpaw Phawlaw' lx baw yawng thonne lo bjiq seq" tiyj suq a'tong. 43Jnkhaw hxyawng hawn luq j kxq hawn cipaw pa-nghawt khrai lo na 'Boipaw Yesyuq' j tha a'pet. 44'Boipaw Yesyuq' khrawng a'lhji yj a'niq-e khrawng khawm pheng thathxn theqna suq a'tong khennj a'pum mj kxq a'khrawnkhri heq khrawng a'thi dep tiq baw vj dek khrung ngj a'kraw. 45'Boipaw Yesyuq' na jn baw suq a'tong cawng na a'tabeq heq ceng ngj a'lo ba khaw hxvj a'tabeq heq khrawng an'lung oi theqna an'tha heq khaw khennj an'ip khri khrawng a'khom me. 46Jn hxvj 'Boipaw Yesyuq' na a'tabeq heq j "ibahai yj nan'ip khri. An'lhaq-e nawk khrawng khawm laq yaq hawn nj thju theqna suqtong ngjn" tiyj a'hawu. 47'Boipaw Yesyuq' na jn baw a'hawu tun nj khrawng bong-nghawt an'khrai lo. A'tabeq pji kalainhiq j kxq pjinghawt tj thon tiq 'Yuqdaqsyakaruk' na jn khrawng bong-nghawt a'lo pui nawk. Nhi na 'Boipaw Yesyuq' nhawm theqna bek ke hai tok kj a'ka vj a'hawp lo. 48'Boipaw Yesyuq' na nhi yj "nang na 'Ceqcaw' khrawng nhawm na cetcaw na'phjk kaw" tiyj a'nghiq. 49A'tabeq pjinghawt na jn bawng heq a'mhuq na "'Boipaw Yesyuq' j ke'hi na jn khrawng heq cimcoi yj kan'sawq laq ai yaw" tiyj a'nghiq. 50Jn a'tabeq heq duk kj kxq pjinghawt na Kyu 'Mhawpaw' canglen mapaw pjinghawt a'sawq hxvj jn a'mapaw khet lawm a'nhawgu a'kjkcju. 51Sinakha 'Boipaw Yesyuq' na "cai tiq kawq" tiyj nga ye theqna kjkcju tiq a'nhawgu khrawng a'kut tj lhem theqna a'khoq ba khaw hxvj a'caq hxvj kxq baw tjng ngj a'mji ba. 52Jnpjnnj ce 'Boipaw Yesyuq' na a'punghaw mawn hai khrai lo ti heq Kyu 'Mhawpaw' canglen heq, Phawlaw kyong cong tiq seksaw heq na Kyu khrawng yx mawdong dawn tiq heq j "nang'hi khrawng, khrawng tu sawt tiq mawn hai baw vj ke ceng ngj ibahai yj tuk, cimcoi bin na nan'lo laq. 53Ke nhxp mhji Phawlaw kyong ngj ka'mji hxvj nang'hi na ibahai yj ke mawn yju cuq. Sinakha tuq j khrawng pawi yaq tiq na a'pjng cxn nj a'thonne khennj nang'hi na nan'lx baw vj nan'poqcai khoq" tiyj a'hawu. 54Jnpjnnj ce nhi tiq na 'Boipaw Yesyuq' mawn na len dj tiq 'Mhawpaw' canglen im mj an'ciq khaw hxvj 'Petaruq' na a'lhawm caw vj thoq a'yun ne. 55A'kyaw khrawng heq khrawng yung vawng rang duk kj mi om na an'mji. 'Petaruq' kha nhi tiq kra vj vawng na a'ngvaw ye. 56Jn baw 'Petaruq' mipxm ka vj a'ngvaw ye khrawng ma'nu pjinghawt na a'mhuq hxvj nhi khrawng a'pawi caw vj so theqna "ni khrawng ce 'Boipaw Yesyuq' nhu yun tiq" tiyj a'hawu. 57Sinakha 'Petaruq' na "mhutaw vj ke na jn khrawng co hx" tiyj a'caqtit. 58Tanaw na ce khrawng pjinghawt na 'Petaruq' a'mhuq na "nang khrawng nhi tiq duk kj kxq pjinghawt siyju vaw" tiyj a'hawu. Sinakha 'Petaruq' na khepui yj ke khrawng jn heq duk kj kxq sihx tiyj a'caqtit batx. 59A'tha nari nghawt bawng na ce a'kyaw khrawng pjinghawt na "ni khrawng, khrawng 'Yesyuq' dj mji nghxt nghaq tiq 'Galiqle' kresaw a'si kung" tiyj a'hawu. 60Sinakha 'Petaruq' na khepui yj "nang na i na'hawu ljk nawk khrawng ke na co hx" tiyj a'caqtit batx. Jn baw a'hawu tun nj yawng 'A' a'khong lo. 61Jnkhaw vjyawng 'Boipaw Yesyuq' na ten ne na 'Petaruq' a'tjuq ve. 'Petaruq' na "tuq nhxp 'A' khong lhawn nj nang na ke co hx tiyj krawn-thum tiqtiq na'caqtit tai tiyj 'Boipaw Yesyuq' na a'hawu nghxt khrawng kheukhaw a'tokpju". 62Jnkhennj krawng pawt thok na nghxnghx nghawknghawk kung a'kap pe. 63'Boipaw Yesyuq' cong tiq heq na 'Boipaw Yesyuq' khrawng nuiqkheu naw na an'mvaw tvaw. 64A'mhawidxm khrawng suisawk kj lhom xp theqna "nang hu-u na a'mvawq nawk khrawng hawu cawm" tiyj 'Boipaw Yesyuq' j an'nghiq. 65Jn tawn yaq a'kyaw bji yaq tiq kheukhaw heq j kha hyju naw na an'hawu. 66Kho va na ce Kyu 'Mhawpaw' canglen heq, uqpade yawcu tiq sarapaw heq na Kyu khrawng yx mawdong dawn tiq heq cuq-e lo theqna 'Boipaw Yesyuq' khrawng nhi tiq tala sa nawk dxn pawt an'ceq pui nawk. Nhi tiq na 'Boipaw Yesyuq' j 67"Nang khrawng ljulawk ke tiq 'Mesyiyaq' na'si yaw, siyju tiq aw nawk khrawng ke'hi yj hawu va" tiyj an'nghiq. Sinakha 'Boipaw Yesyuq' na "nang'hi yj ke na sai hx na kha yum yju cuq. 68Nang'hi yj ke na nghi hx na kha khran ba hai siyju cuq. 69Sinakha tuq j ka'thoq cat na 'Ceqcaw' khrawng phun pawi, sitawng pawi yj kxmyom tiq 'Pxtpaw Phawlaw' khet lawm mj ngvaw na om theqna a'mji yai" tiyj a'hawu. 70Jnkhaw hxyawng jn heq na "jn baw nawk hxce nang khrawng 'Pxtpaw Phawlaw' caw vaw" tiyj an'nghiq. 'Boipaw Yesyuq' na kha "nang'hi hawu khrawng a'mhawn" tiyj a'hawu ba. 71Jn heq na kha "nhi na ni baw a'hawu khrawng han'hi kung na han'yawk laq pjn khaw vj ce a'kyaw sawksi lx law tiyju" tiyj an'hawu.
Seçili Olanlar:
Luke 22: ctpv-rv
Vurgu
Paylaş
Kopyala
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
This translation of the Chin-Laitu Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
