Luke 20
20
1Nhxpnghawt khaw vj 'Boipaw Yesyuq' khrawng Phawlaw kyong duk kj khrawng heq j sitawng pawi heq soqsai theqna a'mji ye. Jn tun nj kyu 'Mhawpaw' canglen heq, uqpade yawcu tiq sarapaw heq, khrawng yx canglen heq 'Boipaw Yesyuq' ka vj hawp lo theqna 2'Boipaw Yesyuq' j "nang khrawng ni baw vj hu-u tha xm me theqna na'thonlok. Nang ngj hu-u na ni baw vj a'cokhawu sawk tiyj an'nghiq. 3'Boipaw Yesyuq' na "nang'hi yj u-nghawt ka'nghiq ai. Nang'hi na khran njn. 4'Yawhen' na 'Betticen' a'pet khrawng ce hu-u tha vj a'poqcai. 'Pxtpaw Phawlaw' tha vj vaw, khrawng tha vj vaw" tiyj a'nghiq. 5Jnkhaw hxvj jn heq na khrawng an'punghaw ko krju ve u-na "a'mhawnmx 'Pxtpaw Phawlaw' tha vj tiyj han'hawu na ce nhi na han'hi yj "jn baw nawk hxce nang'hi na ibahai yj 'Yawhen' khrawng yum yju cuq" tiyj a'nghiq ba vai. 6Khrawng tha vj tiyj han'hawu hxvj kha khrawng heq na 'Yawhen' khrawng 'Parawphek' tiyj an'yum khen cuvj jn heq na han'hi khrawng lung heq j khong na an'tuk kai" tiyj an'hawu ve tong. 7Jnkhennj nhi tiq na 'Yawhen' na 'Betticen' a'pet hai tok a'tha u-ceng ngj kxq a'laq nawk khrawng co u-hx tiyj an'caq. 8Jnkhaw hxyawng 'Boipaw Yesyuq' na "ni heq khrawng hu-u tha xm me theqna ka'lupcak nawk khrawng nang'hi yj sai khoq yju" tiyj a'hawu. 9Jnpjnnj ce 'Boipaw Yesyuq' na khrawng heq j khuicut nawk u-nghawt tj a'hawu khrawng ce "khrawng pjinghawt na 'Capyek' dyaw dyaw-nghawt lin theqna jn dyaw tok lupcak hai nghaw-saw heq a'nghaw cawng na ce a'kyaw kre pawt diu hawn nj a'cet yok. 10'Capyek' theq sik cxn a'khrai na ce dyaw mawqpaw na a'ma pjinghawt khrawng nhi 'Capyek' dyaw pawt tjq theqna nhi na a'laq hai hyawq 'Capyek' theq khrawng a'law ye sawk. A'nghaw-saw heq na kha jn ma khrawng mvaw theqna kut honglak an'tjq ba. 11Jnkhennj dyaw mawqpaw na kha a'tha ma pjinghawt sawp na a'tjq batx. A'nghaw-saw heq na kha ma khrawng niqnawng laq hawn nj mvaw pheng hyawk ke hawn nj poqcai u-na kut honglak an'tjq batx. 12Dyaw mawqpaw na a'thum nawk mapaw a'tjq batx khaw vj kha a'nghaw-saw heq na kha jn lhawn nj kxq khrawng heq baw tjng ngj mvaw theqna an'tjq ba batx. 13Jnkhaw vjyawng dyaw mawqpaw na kha "ke na i-baw ka'poq laq ai. Ke khet nawk khrawng ke caw yawng ka'tjq laq ai nghxq yawng. Nghaw-saw heq na kha ke caw an'mhuq na ce an'kiqken nai bawng nga" tiyj khin ne theqna a'caw nghaw a'tjq batx. 14Sinakha ce nghaw-saw heq na dyaw mawqpaw caw an'mhuq khaw hxvj ni khrawng khrawng nhxp-nghawt nhxp pj ce ni dyaw laq hai tiq yj a'thonne. Nhi khrawng tu theqna nhi laq hai mhe heq kxq-e sin tiyj an'krju ve. 15Jnpjnnj ce nhi tiq na dyaw mawqpaw caw khrawng 'Capyek' dyaw krawng ngj thoq na an'tuk. Ni baw khaw ce dyaw mawqpaw na nhi tiq khrawng i-baw a'poq ai tiyj nan'xt nawk. 16Dyaw mawqpaw khrawng lo theqna nghaw-saw heq a'tuk kyaq ai. A'tuk kyaq cawng hxyawng jn 'Capyek' dyaw khrawng a'kyaw khrawng heq j a'pet tai" tiyj a'thon. Jn baw 'Boipaw Yesyuq' na a'soqsai khrawng heq khrawng heq na an'yawk hxvj jn bawng bong heq i-khaw vj kha thon lo yaq bji seq tiyj an'hawu. 17'Boipaw Yesyuq' na nhi tiq khrawng tjuq ve theqna "kyeng cawuk duk kj yo ve tiq tekim saw tiq heq na phen na an'tok khrawng lung heq khrawng a'lx krji nawk im kiu lhuiq nawk lung ngj a'thonne lo laq" nawk khrawng hi-i a'hawu ljk. 18Jn lung khrung ngj pjinghawt nghawt a'kraw hxvj kha a'bun kyaq ai. Jn lung khrawng pjinghawt nghawt khrung ngj a'kraw hxvj kha a'mhxn thxu kyaq ai. 19Kyu 'Mhawpaw' canglen heq, uqpade yawcu tiq sarapaw heq na khrawng 'Boipaw Yesyuq' na nhi tiq j khin na ni khuicut nawk a'hawu nawk khrawng an'cok ke. Jnkhennj nhi tiq na khrawng mhoknghawt pjttj 'Boipaw Yesyuq' mawn hai lx u-na kha khrawng heq an'kiq khen cuvj mawn vawp yju uq. 20Jnkhennj nhi tiq na 'Boipaw Yesyuq' khrawng ningkham me na an'mji. A'kheukhaw vj a'kret sui u-na mawnglen kut tj mawn na awp njn hai tok krundiu tiq baw vj mji theqna ningkham me theq tiq heq khrawng 'Boipaw Yesyuq' mji nawk tjq an'tjq. 21Jn a'yup caw vj cet tiq heq na 'Boipaw Yesyuq' j "sara, sara na khrawng mhawn dj tiq heq na'cokhawu theq. U-mhawi kha lui yaq kaw vj 'Pxtpaw Phawlaw' tala tawmthong khrawng mhawn dj tiq tala tawmthong baw yawng na'cokhawu nawk khrawng ke'hi na kan'cok. 22Jnkhennj 'Rawmaq' Ikarek 'Sica' mawnglen nj a'phukhawq kan'pet laq khrawng 'Pxtpaw Phawlaw' tala dj a'loime ye yaw loime ye yju vaw tiyj an'nghiq. 23'Boipaw Yesyuq' na nhi tiq na ke kret sui hai an'lx khen cuvj ni baw an'nghiq nawk khrawng a'cok ke khennj 24nhi tiq j "'Denari' phjisa khaiq krep-nghawt dawn njn jn nj khrawng hu-u lup na, hu-u ming a'pui" tiyj a'nghiq. Jn heq na kha 'Rawmaq' Ikarek 'Sica' mawnglen ming na a'lup a'pui tiyj an'hawu ba. 25Jnkhaw hxyawng 'Boipaw Yesyuq' na 'Sica' mawnglen dj soisen ne tiq ce 'Rawmaq' Ikarek 'Sica'mawnglen nj pe ba vjn. 'Pxtpaw Phawlaw' dj soisen ne tiq ce 'Pxtpaw Phawlaw' vj pe yjn" tiyj a'hawu. 26Jn khrawng heq na, khrawng heq mhawimhaw vj 'Boipaw Yesyuq' kheukhaw vj kxq a'kret an'sui yj laq yaq kaw vj a'hawu ba khrawng a'kheukhaw heq yawng mhawnkau u-na an'hiudik kyaq. 27Jn pjnnj a'kyaw 'Cedduqke'k heq kha 'Boipaw Yesyuq' ceng ngj an'khrai lo. Jn 'Cedduqke' heq na khrawng khrawng an'bjt nawk kj kxq an'heng lo ba khrawng yum yju uq. 28Nhi tiq na 'Boipaw Yesyuq' j "sara vj 'Mawsye' yok nghxt khrawng kyeng cawuk duk kj peha mawq putaw pjinghawt khrawng caw caw-naw yaq kaw vj a'bjt hxvj a'nawu vj thonne tiq na jn bjt tiq a'ta peha a'nawk ba laq ai. A'ta yx khrxk yaq hawn nj a'poqcai laq ai tiyj a'yok ke. 29Krawn nghawt hxvj ta-nawu pjiseq an'mji nawk duk kj a'ta cangcaw khrawng mhutaw pjinghawt dj imthong-e theqna a'caw pjinghawt kha mji yaq kaw vj a'bjt tawk. 30A'nhiq nawk pjinghawt na mji nghxt tiq mhe'nu khrawng naw ba na kha a'caw-nawu mji nghxt yaq kaw vj a'bjt tawk batx. 31A'thum nawk pjinghawt kha jn baw tjng ngj a'thonne. Ta-nawu pjiseq tomti ni mhe'nu dj imthong-e na caw-nawu pjinghawt kha mji yaq kaw vj an'bjt kyaq. 32Nhulawm mj ce jn mhe'nu kha a'bjt. 33Jn baw nawk hxce ni mhutaw khrawng ta-nawu pjiseq tomti dj a'laq-e nghxt khennj 'Pxtpaw Phawlaw' na bjt pjn tiq heq khrawng a'sawk heng ba sawk khaw hxvj ni mhutaw khrawng u-bawng immawq nu vj a'thonne yai" tiyj an'nghiq. 34Jn hxyawng 'Boipaw Yesyuq' na "ni somdek kj kxq khrawng heq yawng an'omnaw-ye tong tiyj a'mji. 35Sinakha mawlawm mj ce a'sawk heng ba laq hai tawn ne tiq heq tok ce omnaw-ye tong nawk khrawng mji ti hai siyju. 36Nhi tiq khrawng bjt khrawng ngj kxq ljt na hawn cipaw heq j an'thonne yai. Nhi tiq khrawng a'sawk heng lo ba laq tiq heq j an'thonne khen cuvj kha 'Pxtpaw Phawlaw' caw-nawu vj an'thonne. 37Mi yj o tiq khrum tu duk dj soisen ne theqna yo ve tiq ce 'Mawsye' na 'Pxtpaw Phawlaw' vj "'Abrengheng' na a'phawlaw, 'Iqcek' na a'phawlaw, 'Yakuk' na a'phawlaw, tiyj a'hawu. Jn baw an'hawu khrawng ce bjt pjn tiq heq an'heng lo ba pjn tiyj an'dawn khrawng dj a'lju ve. 38Jnkhennj 'Pxtpaw Phawlaw' khrawng bjt ti heq Phawlaw siyju an'sawk heng tiq heq 'Phawlaw' vjyawng a'thonne. A'hawu ljk khrawng ce jn khrawng heq khrawng 'Pxtpaw Phawlaw' mhawi mhuq j a'sawk heng tiq heq j an'thonne" tiyj a'hawu. 39Jnkhaw vjyawng a'kyaw uqpade yawcu tiq sarapaw heq na "nang na na'khran khrawng piqkawp pe na a'bji" tiyj an'hawu ba. 40Jnkhaw vj ka'thoq nhi tiq na 'Boipaw Yesyuq' j i-bawng kheukhaw kha nghi vawm tiyju uq. 41Jnpjnnj ce 'Boipaw Yesyuq' na khrawng heq j "'Mesyiyaq' khrawng mawnglen 'Davik' caw tiyj ibahai yj nan'hawu. 42'Saleng' kyengcaw duk kj 'Davik' mawnglen a'punghaw kung na "'Pxtpaw Phawlaw' na ke boipaw vj 43'ke khet lawm mj ngvaw ve maw va. Nang sunpui heq khrawng nang kho tawng nawk hai khrung ngj thonne hawn nj ka'poqcai pet tai" tiyj a'hawu. 44Jnkhennj 'Davik' mawnglen na 'Mesyiyaq' j 'Boipaw' vj tiyj a'pan ne hxvj ce 'Mesyiyaq' khrawng ibahai yj 'Davik' caw vj a'thonne yai" tiyj a'hawu. 45Khrawng heq na nhi soqsai khrawng heq an'nge tun nj 'Boipaw Yesyuq' na a'tabeq heq j 46"Uqpade yawcu tiq sarapaw heq khrawng i-baw an'mji nawk khrawng ningkham me bjiq cuq. Nhi tiq khrawng suisawk sawupaw khoq-e na tawi yok hai an'lx. Ci duk kj kha khrawng heq na mhawilhe ye na an'bek ke khrawng an'lx ve. Damarung ngj kha a'bji dj nawk dxn, pjipe heq j kha bji dj tiq e-nawk khrung ngj yawng an'ngvaw do. 47Mhe'nu heq im khrawng tha vj an'hutte vawp. A'sawupaw vj suqtong theq u-na phawlaw talaw yum tiq baw vj an'thonne. Jn khrawng heq na a'lhji yj len tiq a'kret heq an'khawm laq ai tiyj a'hawu.
Seçili Olanlar:
Luke 20: ctpv-rv
Vurgu
Paylaş
Kopyala
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
This translation of the Chin-Laitu Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
