Luke 19
19
1Jnpjnnj ce 'Boipaw Yesyuq' khrawng 'Yeriqkhaw' luq ljt theqna a'cet. 2Jn luq j khrawng 'Cekke' ming naw tiq khrawng pjinghawt a'mji. Nhi khrawng a'phukok tiq pjinghawt tj thonne na boima tiq pjinghawt tj kha a'thonne. 3Nhi na 'Boipaw Yesyuq' hu-u nawk khrawng mhuq laq hawn nj thathxn na kha a'dxng toi khennj mhu laq yju. 4Jnkhennj nhi na 'Boipaw Yesyuq' a'mhuq laq hai tok kj 'Boipaw Yesyuq' a'lo nawk hai lawm baw vj con theqna thabeq thing hawn nj kawi theqna a'cong nge. 5'Boipaw Yesyuq' khrawng jn dxn tjq a'khrai lo na ce hawn tjuq na "'Cekke', a'yawng ngj komlo. Tuq nhxp nang im mj ke ka'om mai" tiyj a'hawu. 6'Cekke' kha thing hawn nj kxq a'yawng ngj komlo na 'Boipaw Yesyuq' khrawng a'ye nawk. 7Jn heq mhu tiq khrawng heq na 'Boipaw Yesyuq' khrawng a'kret a'sisaw poqcai tiq im mj cet na nhi dj a'e-o ye yai tiyj setsui na an'hawu. 8Jnkhaw vjyawng 'Cekke' khrawng tung theqna 'Boipaw Yesyuq' j "ke boiqma heq vawk nghawt khrawng cek ke ti heq j ka'pet. Khrawng heq ceng ngj kxq a'lhjilhap ka'tong khrawng phjisa heq kha saq palhi tawn yju ka'pet ba vai" tiyj a'hawu. 9'Boipaw Yesyuq' na 'Cekke' yj "nang kha 'Abrengheng' yx vj kxq na'thonne khennj tuq nhxp pj thoq nang na nang imlong pui heq khrawng 'Pxtpaw Phawlaw' na a'ljulawk ke pjn. 10Ibahai yj nawk hxce 'Ceqcaw' khrawng khrxk tiq heq sui theqna ljulawk ke hai khrai lo tiq j a'thonne khennj" tiyj a'hawu. 11'Yeruqsalawng' luq tjq an'khrai lo khaw hxvj 'Pxtpaw Phawlaw' neng-ngeng khrawng tuq kung ngj a'pjudawng lo vai nghxq tiyj khrawng heq na an'xt nawk khennj khrawng heq lunglai yj thawp na 'Boipaw Yesyuq' na khuicut nawk u-nghawt a'hawu. 12'Boipaw Yesyuq' na hjmmj kre kre-nghawt tj "Mawnglen caw pjinghawt khrawng mawnglen nj thonne theqna a'lo ba hai tok kj lhawm tiq kre yj a'cet. 13Khari a'cet lhawn nj a'ma pjingha sawu theqna pjinghawt tjq phjisa pikta-nghawti ci a'pet pjnnj ke ka'lo ba vai tjq ni phjisa vj kun poqcai naw bjiq cuq tiyj a'sin nghxt. 14Sinakha jn kre-saw heq na ce jn mawnglen caw khrawng mawnglen nj thonne sawk do yju uq khennj cipaw heq tjq na 'ni khrawng khrawng mawnglen nj thonne hai ke'hi na lx-u hx' tiyj mawnglen ceng ngj an'hyawk ke sawk. 15Jn pjnnj ce jn mawnglen caw khrawng mawnglen nj thonne theqna a'lo ba. Jnpjnnj ce phjisa kxq-e nghxt tiq a'mapaw heq khrawng kun poqcai theqna i-hyawq bawng heq an'boima lo nghxq tiyj co hai a'lx khen cuvj nhi tiq a'sawu. 16Cxkcxk a'mapaw pjinghawt khrawng lo theqna nang phjisa pikta-nghawt tj a'mrawt phjisa pikta-nghaq ka'laq tiyj a'hawu. 17'Mawnglen caw'na kha a'bji. Nang khrawng na'poqcai hai meqcaw kung ngj kha na'cetcaw mji khen cuvj luq len luq-nghaq om ma tiyj a'hawu. 18A'nhiq nawk a'mapaw na kha nang phjisa pikta-nghawt tj a'mrawt phjisa pikta-panghaw ka'laq tiyj a'hawu. 19Mawnglen caw' na 'nang ce luq, luq panghaw om bjiq' tiyj a'hawu. 20A'tha a'mapaw pjinghawt na ce nang phjisa pikta-nghawt khrawng suisawk kj lhom na ka'tawk. Ni yj so va. 21Nang khrawng na'punghaw na na'pjng yaq kaw vj cxm me theqna na'punghaw na na'lin yaq kaw yan theq tiq lunglen tiq j na'thonne khennj ke na kiq theqna ni baw ka'poqcai laq" tiyj a'hyawk. 22Jnkhaw vjyawng 'mawnglen caw' na kha "taqsi tiq ma vj, nang na na'hawu baw tjng ngj ke na nang khrawng a'kret ka'phansa vai. Ke khrawng ka'punghaw na ka'pjng yaq khrawng cxm me hx na, ka'punghaw na ka'lin yaq khrawng yan theq tiq, lunglen tiq tiyj a'mhawnmx na'cok hxvj ce 23Ke pet khrawng phjisa heq khrawng ibahai yj phjisa tawngkaw punyhiq tiq heq ceng ngj awp yju tiq. Jn baw na'awp hxvj ce ke ka'lo ba khaw vj phjisa batnghawt tj a'thonne yai tyaw siyju vaw" tiyj a'hawu. 24Jnpjnnj a'ka vj tung nge tiq heq j jn phjisa pikta-nghawt khrawng nhi ceng ngj kxq lju theqna phjisa pikta-nghaq taw ye tiq j pe ye yjn tiyj a'hawu. 25Jn heq na kha ''mawnglen caw' vj mawnglen nj nhi ceng ngj phjisa pikta-nghaq a'mji pjn' tiyj an'hyawk ba na ce 26'Mawnglen caw' na "nang'hi yj ke ka'hawu vai. U-nghawt e-nghawt taw ye na kong lo hawn nj poqcai khoq tiq j ni tawn yaq ka'pet tai. Sinakha kong hawn nj poqcai yaq tiq ceng ngj kxq ce nhi ceng ngj mji tiq heq tomti ka'cxm me kyaq ai. 27Jn thawk tawn yaq ke mawnglen nj thonne theqna ke om khrawng lx ye yaq tiq ke sunpui heq khrawng ni dxn tjq lo pui naw theqna ke mhawi mhuq j tu kyaq jn tina a'hawu' tiyj a'hawu. 28'Boipaw Yesyuq' na jn baw a'soqsai cawng na ce 'Yeruqsalawng' luq pawt a'tabeq heq maw vj sawp na a'cet. 29'Tenglvawng' ming naw tiq tong ka vj 'Bekphage' nam na 'Betaqniq' nam tjq an'khrai khaw vj a'tabeq pjinhiq khrawng a'maw vj a'yawng ngj tjq theqna 30Boipaw Yesyuq' na nang'hiq mhawimhaw vj mji tiq nam pawt cet ta'hiq. Nam duk na'hiq vawng na ce u-na kha an'cum me phu yaq khrawng 'Mre' caw jlu-nghawt khun ne khrawng na'hiq mhuq ai. Jn 'Mre' khrawng yoi sut theqna ke ceng ngj luq bjiq hiq. 31Pjinghawt-nghawt na ibahai yj ni 'Mre' caw yoi na'hiq sut pet' tiyj a'nghiq na ce. "'Boipaw Yesyuq' na a'sum me hai a'lx mji khennj' tiyj hawu ba bjiq hiq' tiyj a'hawu. 32Jn a'tabeq pjinhiq kha nam duk tjq a'hiq khrai na ce 'Boipaw Yesyuq' na a'hawu baw tjng ngj 'Mre' caw khrawng a'hiq khom. 33Nhi hji na 'Mre' caw yoi a'hiq sut tun nj 'Mre' mawqpaw heq na "ibahai yj 'Mre' caw yoi na'hiq sut" tiyj an'hiq. 34A'tabeq hji na kha 'Boipaw Yesyuq' na a'sum me hai a'lx mji khennj tiyj a'hiq hawu ba. 35Jnpjnnj ce nhi hji na 'Mre' khrawng 'Boipaw Yesyuq' ceng tjq a'hiq lo pui nawk. Jn 'Mre' caw yung khrung ngj nhi tiq suisawk phvawq theqna jn khrung ngj 'Boipaw Yesyuq' an'cum sawk. 36Jn 'Mre' caw vj cum na 'Yeruqsalawng' pawt ceq nawk lawm mj khrawng heq batnghawt na 'Boipaw Yesyuq' mhawimhaw vj nhi tiq suisawk heq phvawq na an'tawk pet. 37'Tenglvawng' tong hawn nj kxq an'kom nawk dxn tjq an'khrai khaw hxvj nhi nhu yun tiq khrawng heq batnghawt na a'tabeq heq na 'Boipaw Yesyuq' poqcai nghxt khrawng heq an'mhawnkau laq khrawng i-tomti tok an'lung lhju na 'Pxtpaw Phawlaw' phun khrawng an'tjuqkauq ve nawk. Jn khrawng heq na 38"'Pxtpaw Phawlaw' khunkhji yj khrai lo tiq 'mawnglen' khrawng a'bjikhji. Hawn luq j khrawng yadik theqna 'Pxtpaw Phawlaw' phun khrawng daw bjiq seq tiyj" an'pang. 39Jnkaw hxyawng khrawng-up duk kj kxq 'Phariqsye' meqcaw na 'Boipaw Yesyuq' j "sarapaw vj sarapaw tabeq heq ni baw an'pang khrawng cokhawu pet maw va" tiyj an'hyawk. 40'Boipaw Yesyuq' na kha "nang'hi yj ke ka'hawu vai. A'mhawnmx yawng khrawng heq pang yaq hai ka'hawu na ce lung krjng heq thju na an'pang ngai" tiyj a'hawu ba. 41Jn pjnnj ce 'Boipaw Yesyuq' khrawng 'Yeruqsalawng' luqka tjq khrai na luq a'mhuq khaw vj jn luq tok kap pheng a'mikkhri kraw na 42"luq j nang yadik dawmdak mji hawn nj poqcai pet tiq heq khrawng tuq nhxp pj nang na na'cokmhuq nghxt hxvj ce na'bjikhji. Sinakha tuq j ce jn heq khrawng nang mik mhuq j thuq-e khrawng a'khawm me laq. 43Nang sunpui heq khrawng nang ka vj nang vondya theqna nang an'sunkawp lo hai cxn a'khrai lo vai. 44Nang na nang caw-nawu heq khrawng dek khrung ngj an'netkrut kyaq ai. Nang luq j kxq imlen yopawi tomti khrak hok u-na na'caw-nawu heq kha an'tuk kyaq ai. Ibahai yj nawk hxce nang na khrawng 'Pxtpaw Phawlaw' na a'kret phansa hai nhxp co yju tiq mhawt te yju tiq khennj a'thon' tiyj a'hawu. 45Jn pjnnj ce 'Boipaw Yesyuq' khrawng Phawlaw kyong duk kj vawng theqna Phawlaw kyong duk kj ci ye ti heq tomti sjtlok theqna 46Kyengcaw duk kj "ke im khrawng 'Pxtpaw Phawlaw' tjuqkauq suqtong nawk hai dxn yawng tiyj yo ve na kha tuq j ce nang'hi na Phawlaw kyong khrawng mo ve tiq ma ye tiq heq be nawk dxn nj thonne hawn nj nan'poq sxtx" tiyj a'hawu. 47Jnpjnnj 'Boipaw Yesyuq' na Phawlaw kyong duk kj nhxp mhji nhxp mhji soqsai ye pheng a'mji. Sinakha 'Boipaw Yesyuq' khrawng Kyu 'Mhawpaw' canglen dj tiq heq, uqpade yawcu tiq sarapaw heq, khrawng lencang heq na tuk hai nyen naw pheng an'mji. 48Sinakha khrawng heq batnghawt na 'Boipaw Yesyuq' soqsai khrawng heq tomti a'ka vj mji theqna nhi kheukhaw ljt yaq ling ngj an'nge khen cuvj nhi tiq na Phawlaw khrawng nyi naw na tuk hai lawm khom khoq yju uq.
Seçili Olanlar:
Luke 19: ctpv-rv
Vurgu
Paylaş
Kopyala

Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
This translation of the Chin-Laitu Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.