Luke 16

16
1'Boipaw Yesyuq' na a'tabeq heq j sawp na a'hawu khrawng ce krawn-nghawt khaw vj boipaw pjinghawt ceng ngj nhi boiqma heq phehye pet tiq khrawng pjinghawt a'mji. Nhi na khrawng a'boipaw boiqma heq a'lx baw vj a'poq khrawng a'kyaw khrawng heq na boipaw vj an'sai. 2Jnkhaw vj boipaw na phehye tiq khrawng sawu theqna nang sitawng ke na ka'yawk laq khrawng i baw na'khin. Nang na na'mhawt khrawng tawngkaw carawng caya heq ke yj dawn na. Nang kha phehye tiq dxn nj sawp na taw khoq tiyju tiyj a'hawu. 3Jnkhaw hxyawng nhi na 'ke khrawng i-baw ka'thon laq ai. Boipaw na ke khrawng ka'thonlok nawk kj kxq a'thoq pjn. Ke khrawng thathiq nawk a'lup lup hai kha ka'tha mji yju, tong nge hai kha ka'hyawk ke. 4Ni thonlok nawk kj kxq a'thoq khawm laq na kha nhi khepui heq im mj ke lx ve hawn nj i-baw ka'thonlok laq ai nawk khrawng ka'cok pjn tiyj a'khin ne. 5Jnpjnnj jn boipaw ceng ngj an'le mji tiq heq sawu theqna a'cxk nawk pjinghawt tj 'ke boipaw ceng ngj na'le i hyawk a'mji' tiyj a'nghiq. 6Jn khrawng na kha 'Tenglvawng' situi galeng khra-sat'c ka'pet hai a'mji tiyj a'hawu ba. Phehye tiq na kha 'carawng cawlep a'yawng ngj lju ve na galeng khra-palhi tina yo ba va' tiyj a'hawu. 7A'tha pjinghawt tj kha 'nang ce na'le i hyawq a'mji' tiyj a'nghiq khaw vj nhi na 'tuncawng a'tong khra-nghawt' tiyj a'hawu khennj phehye tiq na kha 'carawng cawlep pj khra-sat tina yo ba va' tiyj a'hawu. 8Jnkhaw vj boipaw na a'lung krun yaq tiq jn khrawng na a'poqcai khrawng heq a'tjuqkauq ve nawk. Ibahai yj nawk hxvj ce ni somdek kj kxq khrawng heq na a'punghaw tok an'lupcak ke hxvj 'Pxtpaw Phawlaw' caw-nawu heq thawk kj a'bji hai baw vj an'poqcai ye theq khennj a'thon. 9Nang'hi yj ke na hawu hai ka'lx khrawng ce tala yaq tiq j kxq ljt yaq tiq ni somdek kj kxq boiqma heq sum me na nan'khepui heq sui yjn. Jn somdek boiqma heq a'pji na ce nang'hi khrawng hawn sawktakhon im mj nan'mji laq ai. 10A'dikkhit tiq heq j cetcaw mji tiq heq khrawng len tiq heq j an'cetcaw mji yai. A'dikkhit tiq heq j kolak naw tiq ce len tiq heq j kha an'kolak nawk kai. 11Nang'hi khrawng somdek kj mji tiq boiq heq dj soisen ne na yum hai xm me hai bji yju cuq nawk hxce, mhawnkawn tiq boiq heq hu-u na nang'hi yj a'awp vawp pai. 12Jn baw vj nang'hi khrawng, a'kyaw khrawng heq dj soisen ne tiq boiqma heq pawngsum ngj cetcaw mji yju cuq khaw vj ce hu-u na nang'hi yj boiqma heq a'pjng sawk kai. 13U-bawng ma na kha a'boipaw pjinhiq ceng ngj ma a'khawm mj laq yju. Boipaw pjinghawt khrawng a'mhudawm hxvj a'tha pjinghawt tj ce mitta a'tawk kai. Jn baw siyaqna kha boipaw pjinghawt khrawng a'xm me, a'leca hxvj a'tha pjinghawt ce kiqken hai siyju. Jn baw tjng ngj nang'hi kha 'Pxtpaw Phawlaw' na tawngkaw phjisa ceng ngj mhoknghawt pjttj ma a'khawm mj laq yj. 14Jnkhaw vjyawng phjisa naw tiq 'Phariqsye' heq na jn kheukhaw an'yawk khaw hxvj 'Boipaw Yesyuq' khrawng an'nuiqkheu nawk. 15Jn hxvj 'Boipaw Yesyuq' na jn heq j 'nang'hi na khrawng, khrawng heq mhawimhaw vj ce nan'punghaw ko nan'punghaw pawi tiq baw vj nan kheu theq. Sinakha 'Pxtpaw Phawlaw' na nang'hi lungbong khrawng a'cok, a'mhuq pjn. Khrawng heq na nawye naw na a'phu an'tawk khrawng somdek boiq heq khrawng 'Pxtpaw Phawlaw' mhuq j ce a'taqsi. 16'Betticen' sara 'Yawhen' pjudawng lo hawm yaq tjq 'Mawsye' petnyet kyeng khrawng uqpade kyeng na 'Parawphek' heq na an'yok nghxt khrawng kyeng heq na khrawng heq j an'dawn. Sinakha 'Yawhen' a'pjudawng lo hxvj thoq 'Pxtpaw Phawlaw' neng-ngeng dj soisen ne tiq sitawng pawi heq khrawng an'soqsai yok lo. Khrawng heq kha jn neng-ngeng tjq thathxn na an'vawng. 17Sinakha petnyettaw duk kj kxq a'dikcaw dj valung lungnghawt a'khrxk hai thawk kj hawnnhi na somdek a'khrxk hai khrawng jn tawn yaq a'loi.d 18Punghaw immawq nu dj ka na a'kyaw mhutaw pjinghawt om-naw ba tiq khrawng imthong malang tiq j thonne jn baw vj immawq paw na a'ka tawk khrawng mhutaw om-naw ba tiq kha imthong malang tiq j thonne. 19Mhoknghawt khaw vj salai boipaw pjinghawt a'mji. Nhi khrawng a'phulen tiq ngawng-pa rong thyawdok tiq suisawk khoq-e theqna a'boiq heq j nhxp mhji a'lung lhju na a'mji ye. 20Jn salai boipaw im kjt ka vj a'pumyo cu pha tiq 'Lacaqruq' tiyj an'hawu khrawng cek ke tiq khrawng pjinghawt a'mji. Nhi khrawng 21Salai boipaw buqawn e-nawk khrung ngj kxq kraw tiq e-ok e-dang tina a'hjng nge. Nhi pumyo vj kxq a'pha heq kha ui heq na an'lek ke. 22Nhxpnghawt khaw vj ce 'Lacaqruq' bjt khennj hawn cipaw heq na nhi khrawng a'syaw 'Abrengheng' ceng pawt an'ciq pet. Salai boipaw kha bjt theqna an'mhyaq khrawng a'khawm laq. 23Salai boipaw khrawng ngalai kre eyj niqnawng heq a'lhji yj a'khawm laq khennj hawn a'sot khaw hxvj 'Abrengheng' o-duk kj 'Lacaqruq' a'mji khrawng a'lhawm mj thoq a'mhuq laq. 24Jnkhaw hxyawng salai boipaw na paw 'Abrengheng' yj ke manne pet maw va. Ke khrawng ni mi duk kj a'lhji yj niqnawng heq ka'khawm laq. Jnkhennj 'Lacaqruq' kut pang tui hyawu na ke lebong a'ya hai tok nhi khrawng tjq lo pet maw va tiyj kap pheng a'khawq-e. 25Sinakha 'Abrengheng' na ke caw vj nang na'sawk heng hxvj pawi dj tiq heq laq nghxt theqna 'Lacaqruq' na ce pawi yaq ti heq yawng a'laq nghxt khrawng khin ne ba maw va. Jnkhennj 'Lacaqruq' khrawng ni dxn nj yadik dawmdak mji laq theqna nang na ce a'sisaw heq na'khawm laq. 26Jn tawn yaq nang na ke'hi kra vj thukhum tiq loi nu u-nghawt na a'khra khennj ni dxn nj thoq nang'hi tjq lo hai lx na kha u-kha lo khoq yju. Jn dxn nj kxq ke'hi ceng tjq lo hai na'lx hxvj kha u-kha kawt lo njn yju" tiyj a'hawu ba. 27Salai boipaw na kha paw 'Abrengheng' vj Jnkhaw vj ce 'Lacaqruq' khrawng ke paw im pawt tjq pet maw va. 28Ibahai yj nawk hxce ke na nawu'u pjipanghaw ka'tawk ke. Ni baw a'lhji yj niqnawng heq an'khawm laq nawk dxn nj nhi tiq khrai lo laq yaq hawn nj 'Lacaqruq' khrawng nhi tiq ceng tjq cet sawk theqna tatiq pe sawk hai ka'lx tiyj khawqhyawq-e pheng a'hawu. 29'Abrengheng' na kha nang'hi nawu'u pjipanghaw ceng ngj 'Mawsye', 'Parawphek' heq na yo na an'tawk nghxt khrawng petnyet kyengcaw heq a'mji. Jn kyengcaw heq cokhawu khrawng baw vj nhi tiq mji bjiq seq uq. 30Salai boipaw na paw 'Abrengheng' vj jn baw hawu pet kawq a. Bjt pjn tiq khrawng heq duk kj kxq pjinghawt bawng na nhi tiq ceng ngj a'hawu ve khaw vjyawng nhi tiq na khrawng an'lung an'suisaw ye ba khok kai' tiyj a'hawu ba. 31'Abrengheng' na kha 'nhi tiq khrawng 'Mawsye' na 'Parawphek' heq hawu khrawng an’nge yaq hxvj ce bjt nawk kj kxq heng ba tiq heq kha nhi tiq na yum hai siyju uq tina a'hawu ba" tiyj a'hawu.

Seçili Olanlar:

Luke 16: ctpv-rv

Vurgu

Paylaş

Kopyala

None

Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın