Maliki 4
4
Simwe da munhu yohanda
(Masayo 13:1-9; Luka 8:4-8)
1Yesu kandusa kufundiza kaidi mumgwazogwazo mwa lamba da Galilaya. Lung'husesa lukulu lwa wanhu lumzunguluka mbaka kengila mwiingalawa na kukala umo. Wanhu wose wakala mumgwazogwazo mwa lamba. 2Kawafundiza vinhu vingi kwa masimwe. Muna yamafundizo yake kawalongela,
3“Mnhegeleze, Hakala na munhu yoyohanda kahita kumiza mbeyu. 4Viyakalile komiza, mbeyu zimwenga zilagalila mwiinzila, na ndege weza wazija. 5Zimwenga zilagalila muna uluwe hali na ulongo chidogo. Zota hima hima kwaviya ulongo ukala chidogo. 6Mbali zuwa vidilawile, diisoma minoga, na kwaviya haikalile na mizizi, inyala. 7Zimwenga zilagalila hanhu hana imiwa. Imiwa ikula na kuibananga minoga hata ipotwa kulela. 8Mbali zimwenga zilagalila hanhu hana udongo unogile. Minoga yota, ikula na kulela, zimwenga zilela malongo matatu, zimwenga zilela malongo masita, na zimwenga zilela gana.”
9Maabaho Yesu kalonga, “Munhu yeli na magutwi, yahulike!”
Lungilo da masimwe
(Masayo 13:10-17; Luka 8:9-10)
10Yesu viyakalile yaidumwe, wanahina wake longo dimwe na waidi wamuhitila na kumulongela yawafambulile masimwe yayo. 11Yesu kawedika, “Mweye mwing'higwa kuzimanya mbuli zifisigwe za Ufalume wa Mulungu. Mbali waja weli kunze wozihulika mbuli izo kwa masimwe, 12muladi,
Walole, mbali sekewawone,
wahulike, mbali sekewavimanye,
Kwaviya wahavimanya
wodaha kumbwelela Mulungu,
naye kezadaha kuwasegezela uhasanyi wawo.”
Yesu kofambula simwe da munhu yohanda
(Masayo 13:18-23; Luka 8:11-15)
13Maabaho Yesu kawalongela wanahina wake, “Hamudimanyile simwe dino? Lelo muzamanyaze simwe dimwenga jojose? 14Mbeyu yoihandigwe na muhandi ni mbuli ya Mulungu. 15Wanhu wamwenga walinga mbeyu zilagalile mnzila. Vawahulika mbuli, Lufyende kokwiza na kusola mbuli ihandigwe mgati mmwawo. 16Wamwenga walinga fana mbeyu zihandigwe muna yamabwe. Wahahulika mbuli, bahobaho woihokela kwa deng'ho. 17Mbali kwaviya wabule mizizi mgati mmwawo, wokala chipindi chidogo. Wahapata magayo hebu manhesa kwa chimu cha mbuli, bahobaho wabwela kuchisogo. 18Wanhu wamwenga walinga mbeyu zihandigwe muna imiwa. Wohulika mbuli, 19mbali begete da ugima uno, uvwizi wa vinhu, na kulonda mbuli zimwenga, voyibebenyeka mbuli mbaka ipotwe kulela. 20Mbali wanhu wamwenga walinga fana mbeyu ihandigwe muna udongo unogile. Wohulika mbuli, woitogola na wolela, wamwenga malongo matatu, wamwenga malongo masita, na wamwenga gana dimwe.”
Wenge digubikigwe
(Luka 8:16-18)
21Yesu kagendelela kulonga, “Vino munhu kodaha kwingiza chitasa mnyumba maabaho kudigubika na mhishi hebu kudika muuvungu wa dikomwa? Haidahika hata chidogo. Mbali munhu kokwika chitasa hana ichingolobweda, muladi chimwemwese kose. 22Kwaviya chinhu chochose chochifisigwe chizawoneka, na chinhu chochose chochigubikigwe chizagubuligwa. 23Yeli na magutwi ya kuhulika, nayahulike.”
24Na kawalongela, “Iteganyeni na yaja yomuyahulika! Ndagilizi zomusang'hanila kuwatagusila wamwenga, Mulungu kezazisang'hanila ndagilizi izo kuwatagusa mweye, maabaho mwizakongezeligwa. 25Munhu yeli na chinhu kezakongezeligwa, na munhu yelibule chinhu welibule chinhu, kezahokigwa hata chiya chidodo chiyeli nacho.”
Simwe da mbeyu ikota
26Yesu kagendelela kulonga, “Ufalume wa Mulungu ulinga munhu yahandile mbeyu mumgunda wake. 27Ichilo kogona, imisi kolamka. Mbeyu zokota na kukula, mbali yeye havimanya bule vitendeka. 28Udongo wenyewo wozitenda mbeyu kukula goya na kwima matunda, teng'hu diyani maabaho mada, na kuuhelelo uhemba wokung'hunha. 29Mbeyu yahakangala, munhu iyo kosola sengo na kokwandusa kusenga, kwa ichimu siku za kukangala ndiya zifika.”
Simwe da mbeyu ndodo ng'hani kufosa zose
(Masayo 13:31-32, 34; Luka 13:18-19)
30Yesu kalonga kaidi, “Vino Ufalume wa Mulungu chiulinganyize na choni? Simwe dilihi donda nisang'hanile kuufambula? 31Ulinga na mbeyu ya haladali yili ndodo kufosa mbeyu zose zili mwiisi. 32Mbali yahahandigwa, yokula na kuwa biki kulu kufosa mibiki yose. Dokwika matambi makulu ng'hani, mbaka ndege weli kuulanga wodaha kuzenga mvulu zawo muna yamatambi yake.”
33Yesu kawapetela wanhu mbuli yake kwa masimwe yamwenga fana ino, kawalongela viya viwodaha kuvimanya. 34Kawalongela vose kwa masimwe mbali kakala yaidumwe na wanahina kawalongela chila chinhu funhufunhu.
Yesu konyamaliza beho kulu
35Ichigulogulo cha siku ija, Yesu kawalongela wanahina wake, “Chikanhe lwanda chihite umwambu.” 36Wawaleka wanhu wose weli haja, wanahina wengila mwiingalawa iyengile Yesu na wandusa kusegela. Kukala ngalawa zimwenga. 37Beho kulu dilawilila na kutibula mazi, mawimbi yandusa kwingila mwiingalawa na mbaka ilonda kumema mazi. 38Yesu kakala kuchisogo mwiingalawa, kagona na kadika ditwi jake mumto. Wanahina wamulamusa, wamulongela, “Mfundiza, hugesa cheye vichidanganika?”
39Yesu kalamuka, kadibwakila beho na kayalongela mawimbi, “Nyamala!” Maabaho beho dikala hupi na kukala zinziwa. 40Maabaho Yesu kawalongela wanahina wake, “Habali modumba? Mwabule uhuwilo mbaka sambi?”
41Wanahina wadumba ng'hani, waiuzagiza, “Ino munhu waki? Hata mbeho na mawimbi vose vimtegeleza!”
Seçili Olanlar:
Maliki 4: Kwere
Vurgu
Paylaş
Kopyala
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
© 2014 Pioneer Bible Translators and The Word for the World
