Matius 4
4
Yesus nosobae Kafeompuꞌando seetani we pandaso bhalano
4:1-11
Mrk 1:12-13; Luk 4:1-13
1Pada anaꞌa Yesus nowowoꞌoe Rohino Lahataꞌala we pandaso bhalano so naeꞌawaꞌao kasobano Kafeompuꞌando seetani. 2Pada nopoasa fato fuluꞌa ole-oleono koho-kohondoꞌano, panda-pandano Yesus noꞌahomo. 3Gahaꞌa nomaimo Fosobano maitu bhe nopugau ambano, “Ane hintu ini Anano Lahataꞌala, soba tududa kontu ini daembali roti.” 4Yesus tanotobhoosi, “Nandoo notibuhi weo Kitabi, ‘Suano kaowu taꞌo roti kaoꞌuhiꞌando manusia, tamaka o ae nekobhoasaono Lahataꞌala doꞌuhiane dua.’ ” #Ul 8:3
5Pada aitu Kafeompuꞌando seetani noowamo Yesus we kota mongkilo, ⸤ Yerusalem,⸥ maka noampee te kabubuno Lambuno Lahataꞌala, 6bhe nopugau ambano, “Ane hintu ini Anano Lahataꞌala, soba oho wutomu we panda, kapaꞌamo notibuhi, ‘Lahataꞌala natumudu malaꞌekatino dakumantafeko keana notompalo aꞌemu ne kontu.’ ” #Mzm 91:11-12
7Yesus notobhoosie ambano, “Notibuhi dua weo Kitabi, ‘Koe sobaea Ompu Lahataꞌalamu!’ ” #Ul 6:16
8Pada aitu Kafeompuꞌando seetani noowamo toha Yesus ne seꞌonu kabhawo melangkeꞌano maka nofotiwohaane kosasawiꞌae kakolakiꞌano dhunia bhe sabhaha kahangkaeano, 9bhe nopugau ambano, “Kosasawiꞌae maitu amaꞌangkoe, sumanomo sudhu bhe taohao sombamu ne idi.” 10Yesus tanotobhoosi ambano, “Gampimo, seetani! Kapaꞌamo notibuhi, ‘Taohao sombamu ne Ompu Lahataꞌalamu, ampamo kaowu Anoa so nefeompuniꞌimua!’ ” #Ul 6:13 11Panda-pandano Yesus nohunsaemo Kafeompuꞌando seetani, maka dohatomo malaꞌekati doꞌondofaane.
Yesus notandakimo kahadhaano we Galilea
4:12-17
Mrk 1:14-15; Luk 4:14-15
12Nofetingke kaowu Yohanes dotohongkue, Yesus nogampimo we kadieno Galilea.
13Anoa nohunsamo Nasaret maka neate we Kapernaum, seꞌonu liwu ne wiwino teꞌino Galilea, we kadieno Zebulon bhe Naftali. 14Aini nokadhadhia mbali nokoꞌulaꞌao nefosampeno anabii Yesaya,
15“Miendo witeno Zebulon bhe witeno Naftali,
ne kaangkaꞌa humopeꞌano we teꞌi,
kadie we sewetano umeleno Yordan,
o mieno Galilea, witendo mie suano Yahudi!
16Mie dumadino weo kahohondo,
dowohamo tilanga bhalano;
meateno we liwu mewisekino mate,
noumbatidamo tilanga.” #Yes 9:1-2
17Notandamo ne naꞌa Yesus nofolelemo, “Fetompaaneomu dhosamiu, doliomu ne Lahataꞌala, kapaꞌamo Kafopahintaꞌano Lahataꞌala nomaꞌomo!”
Yesus nosaliꞌi anaguhuno kabhao-bhaono
4:18-22
Mrk 1:16-20; Luk 5:1-11
18Wakutuuno Yesus nokala nosohaki wiwino teꞌino Galilea, nowohamo mie dohodua. Andoa ini dosikakutaꞌa, neando Simon nekonando dua Petrus, bhe Andreas kakutaꞌano. Andoa ini tangasano debuani we teꞌi, hampano andoa maitu pande kenta. 19Yesus nopugauandamo ambano, “Mai angkafi kanauꞌomu, amoguhukoomu so mebuanino manusia.” 20Buanindo tadohunsa maka doangkafi Yesus.
21Yesus nofopansuhu kala-kalano maka nowohamo dua mie dohodua dosikakutaꞌa, neando Yakobus bhe Yohanes, anaꞌino Zebedeus. Dopoowa bhe Zebedeus, amando, andoa ini nandoo dofosintuwu pukando weo bhangka. Yesus nosaliꞌidamo dua. 22Andoa lasao dohunsa bhangka bhe amando maka doangkafie.
Yesus nofofoinaꞌu bhe dobhahi mie nefekaꞌosano
4:23-25
Luk 6:17-19
23Yesus noangkai kosekaꞌewaꞌae kadieno Galilea, nofofoinaꞌu ne lambu-lambu kasambaheaꞌa. Anoa nefolele Bhihita Metaa Kafopahintaꞌano Lahataꞌala, poowa nefekaꞌosa sabhaha mie mosaki bhe modaino namisi ne liwu aitu. 24Bhihitano Yesus ini nokolelemo ne kosekaꞌewaꞌae kadieno Siria, sampe deowaꞌianemo mie menamisino sabhaha saki, kakadee-dee bhe kadaino namisi, mie nepesuakino seetani, mate manuno bhe mokaluno. Kosasawindo naꞌa nofekaꞌosada. 25Mie bhahi dosipumpu doangkafie. Nandoo maiꞌaono we kadieno Galilea bhe Dekapolis, maiꞌaono we Yerusalem bhe we Yudea bhe maiꞌaono we sewetano umeleno Yordan.
Seçili Olanlar:
Matius 4: mnbSD
Vurgu
Paylaş
Kopyala
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
© 2022, Wycliffe Bible Translators, Inc. All rights reserved.
