ปะทมมะกาน 10
10
ตะกูนกอนเจาคองโนอา
1ตอปัอะอะไนซีปันเรืองเซือซายคองเซม ฮาม กับยาเพด นาก็ปันกอนคองโนอา ซีปันละมึฮกอนเจาคองอะไลนาก็กัอดอันตูนนาก็ดัอะลุบโลก
ตะกูนคองยาเพด
2กอนกอ์นคองยาเพดละมึฮปาย โกเมอ มาโกก มาได ยาวาน ทูบัล เมเซก เจอก็ทิราด 3เจอกอนกอ์นคองโกเมออะกีละมึฮปาย อัซเคนัด ริพาด เจอก็โทกามา 4เจอยาวานอะกีก็เบินกอนกอ์นนาก็ละมึฮปาย เอลีซา ทารซิด คิดทิม เจอก็โดดานิม 5จุมเซือซายคองยาเพดอะไน อะไลปัอะอัอดแจะทะเล เจออะไลก็เบินกอนเจาอับเคาะ ๆ จนเบินอัอดซะเอยบอน เวาซะเอยพะซา ปันซะเอยซนซาด
ตะกูนคองฮาม
6เจอกอนกอ์นคองฮามก็ละมึฮปาย คูด อียิบ พูด เจอก็คานาอัน 7กอนกอ์นคองคูดอะกีละมึฮเซ-บา ฮาวิลา ซับทา ราอามา เจอก็ซับเทคา เจอกอนกอ์นคองราอามาอะกีละมึฮปาย เซ-บากับเดดาน 8เจอคูดอะกีเบินกอนเบินเจาอับ เจอเจาคองอันมะนาะละมึฮปาย นิมโรด นิมโรดอะไนปันกวยนาก็เก็ง ปันกวยนาก็ตัออังกอฮมะเลอ 9อันปันปรีานนาก็เก็งอะเลอ ปันเยโฮวาอะกีออยะนาก็ออ์นอันเก็ง นิมโรดเลิดเบินซือเซียงอะเลอ เจอตอปัอะแอน ค็านเบินกวยนาก็เก็ง กวยก็ซีญูองปาย "เก็งอะเลอ! เก็งซำนิมโรด นาก็เยโฮวาออ์นอันปันปรีานนาก็เก็งอะเลออะกี" คำญูองอะไนอะไลก็ตักจนตัอะซะเอยซัวกวย 10เจอนิมโรดอะไนก็เก็งลึอะเลอ อันเก็งจนเบินปันปูดปันนีาย จนเบินปกครองเมืองซะเอยเมือง ตีตีแม็ดเบินเมืองบาบิโลนนืยะ เจอก็เมืองเอเรก เมืองคาลเน กับเมืองอักคัด โปนเมืองอะไนอัอดนึงกะแตะเคดซินา 11ซำไนนังตัอปูอ ฮาไนอันก็ปัอะต็างเมืองอะซอฮตะไม นาก็อัอดคนละเคดแอน ต็างอัอดแทวกะแตะเคดอัซซีเรีย อันต็างเมืองนีนะเว เมืองเรโฮโบดอี เมืองคาลา 12เจอก็เมืองเรเซน เมืองเรเซนอะกี อันอัอดละวางเมืองนีนะเว กับเมืองคาลา ปันเมืองเรเซนอะไนออยะ นาก็ปันเมืองลวงคองนิมโรด อะไนปันเรืองกอนเจาคองคูด นาก็ปันกอนคองฮาม
13เจอกอนคองฮามแอนมะนาะนาก็ละมึฮปาย อียิบ ก็เบินกอนเจาอับจนปันซะเอยจุม เบินจุมลูดิม จุมอานามิม จุมเลฮะบิม จุมนับทูฮิม 14จุมปัดรุซิม จุมคัดโทริม เจอก็จุมคัดลูฮิม กวยพีลิซเตียก็ตัอะตีจุมคัดลูฮิมอะไนออยะ จุมไนออยะปันกอนเจาคองอียิบ
15เจอกอนคองฮามแอนมะนาะนาก็ละมึฮปาย คานาอันอะกี เบินกอนแก็ลนาก็ละมึฮปายไซดอน แซมคองไซดอนละมึฮเฮด 16ตะกูนคองอะไลก็รวมทังกวยเยบุด กวยอาโมไร กวยเกอกาซี 17กวยฮีไว กวยอาระคี กวยซินี 18-19กวยอารวัด กวยเซเมอ เจอกวยฮามัด อันตูนปัอะแอน จุมเซือซายคองคานาอันอะไน อะไลก็เบินกอนเจาอับจนอัอดตัว อะไลอัอดกดตีเมืองไซดอน อัมปรูอมทังเมืองเก-รา จนตัอะเมืองกาซา เจออัอดตัวญิเคดอะกี ทังนึงเมืองโซโดม เมืองโกโมรา เมืองอัดมา กับเมืองเซโบยิม จนตัอะเมืองลาซา กวยจุมไนออยะนาก็ปันกอนเจาคองคานาอัน
20กวยจุมไนมังก็ปันกอนเจาคองฮาม อะไลก็เบินซะเอยนาะอะเลอ จนเบินอัอดซะเอยบอน เวาซะเอยพะซา ปันซะเอยซนซาด
ตะกูนคองเซม
21เจอกอนคองโนอานาก็ละมึฮปาย เซม ปันอายแก็ลคองยาเพด เจออันก็เบินกอนเต เซมปันอัมปูอปันอะจวยฮคองกวยเอเบอ 22กอนกอ์นคองเซมละมึฮปาย เอลาม อัดซูน อานปักซาด ลูด เจอก็อารัม 23เจออารัมก็เบินกอนกอ์นนาก็ละมึฮปาย อูด ฮูล เกเทอ เจอก็มัด 24เจออานปักซาดอะกีก็เบินกอนกอ์นนาก็ละมึฮปาย เซ-ลา เจอเซ-ลาก็เบินกอนกอ์นนาก็ละมึฮปาย เอเบอ 25เอเบออะกีก็เบินกอนกอ์นบาลนาะ ตูมะนาะอะกีละมึฮปาย เพเลก #10:25 เพเลกอีกือคำฮีบรูนาก็เบินคูอมมายปาย อัมแปะ
ตัอะซวงคองเพเลกอะไน อะไลก็อัมแปะกะแตะ เจอก็อัอดคนละบอน เจอแซมคองเพเลกอะกีละมึฮปาย โยกทาน 26เจอกอนกอ์นคองโยกทานละมึฮปาย อัลโมดัด เซเลบ ฮาซานมาเวด เย-รา 27ฮาโดรัม อุซาล ดิกลา 28โอบาล อาบีมาเอล เซ-บา 29โอพี ฮาวิลา เจอก็โยบับ กวยจุมไนมังก็ปันกอนกอ์นคองโยกทาน 30เจอกะแตะบอนนาก็กวยจุมไนอัอดอะกี ก็ปัอะกดตีเมืองเม-ซา จนตัอะกอ์ฮนาก็อัอดยาฮมะนางลอฮคองกะแตะเคดเซ-พา
31กวยจุมไนมังก็ปันกอนเจาคองเซม อะไลก็เบินซะเอยนาะอะเลอ จนเบินอัอดซะเอยบอน เวาซะเอยพะซา ปันซะเอยซนซาด
32กวยนาก็เวาอะดอะญิกูจุมอะไน มังก็ตัอะตีกอนกอ์นคองโนอาไปนาะอะกีออยะ เจออะไลก็ซืบตามละมึฮตามตะกูนอัมปูอคองอะไล เจอก็เบินอับเคาะ ๆ จนเบินซะเอยซนซาด เจอก็ปัอะอัอดตัวญินึงโลกอะไน อันตูนนาก็ดัอะลุบโลกอะกี
Seçili Olanlar:
ปะทมมะกาน 10: Bru Bible
Vurgu
Paylaş
Kopyala
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın