A Vuhuna 6
6
A Naro Hale ne Huriki
1 #
Jop 1:6; 2:1 Na tahuna e huriki a bakovi a ngatavine ri bele kupo na malala, ri vakabele e huriki e tune ria ngatavine. 2E huriki a tuna Vure#6:2 E huriki ranga ri luhoi e huriki a tuna Vure e huriki a agelo. ri matai ria ri mata kamumu hateka, lakea e rei ne ria i ngaru ni parangi, bara ri parangi a ngatavine ri ngaru. 3Muri e BAKOVI DAGI i ta maea, “A hanugu i uka ma ge made pololilo na bakovi na parava vakaroro, a vuhuna ia a bakovi na malala kunana. A pida ne ria ge harena kunana ne 120.” 4#Gi 13:33Na tahuna iea, e huriki a kabu ne Nepilin ri made na malala. Lakea e huriki a tuna Vure bakovi ri parangi na ngatavine na malala, ri vakabele huriki a hamone ria. Re huriki nga, ria a bakovi hateka, a rane ria i dagi na tahuna iea.
5 #
Mat 24:37; Luk 17:26; 1Pe 3:20 E BAKOVI DAGI i matai a narone huriki na malala i hale liu, a maki ri luhoi kunanea a naro hale. 6I kilu vona a hini i rata rike e huriki koea na malala. 7I tapuhaki i ta maea, “Iau ga vakalobo koea na malala e huriki a bakovi a rata rike. Pali ga vakalobo tabu a maka livoa, a kadirovo, turana a maka maki lobo ri laho na robo, a vuhuna iau a kilu vona a hini a rata rike a maka maki nga.”
8Pali e BAKOVI DAGI i vivi vona e Noa.
9 #
2Pe 2:5
Iea a nita na narone Noa:
E Noa ia a bakovi kamumu, a narona i kiripiripi na matane huriki a bakovi na tahuna iea. I laho turana Vure. 10E Noa i tahoka e tuna i ala tolu: e Sem, e Ham e Iapet.
11Na matana Vure, a malala i vonu na maka naro hale. E huriki ri tagege, ri vaubi lae. 12A Vure i masia a malala i vonu na maka naro hale, a vuhuna a maka narone ria i hale hateka. 13Lakea, a Vure i takia e Noa, “Iau ga ratapile e huriki lobo, a vuhuna a malala i vonu vona a maka naro hale ne ria. Muholi hateka, iau ga ratapile lobo e huriki a bakovi, turana a malala. 14Pali ioe, o haea a agarungu vomu, o haea na kai a saipres. O nagi pololiloa, muri o kavitagu a hini pololilo, a hini polovavo na kasita. 15Ra agarungu iea o hae maea: a niolana ge 150 mita, a nibolana ge 25 mita, a nipesina ge 15 mita. 16Na tahuna o hae a mapana roho na agarungu, nahea a mapana ge padoi liu a gagana. Ge tabuli a hini ge 5 mita. A tabekena agarungu ge tolu: ge polotano tara, na kurukuruna tara, ge polomeli tara. Na gagana tara o rua a hinebi. 17Iau ga rudua a marungulolo ge ratapile a maka maki polotano na hunu, a maka maki mahuri ri bango na ruperene ria, a maki lobo na malala bara ri mate. 18Pali iau ga rata a ngava dagi turamu, muri bara o rike na agarungu vomu turana e girihimu, e tumu, e kamu. 19O vakaha dili na agarungu a maki lobo ri laho na robo, ge ruarua, a toga, a kinana. 20O vakaha turane mua, ge ruarua a maka kadirovo, a livoa, a maki lobo mahuri legelege. 21O bole tabu a maki ni kani, o ru kamumu, ne vona e mua turana a maka maki mahuri o vakarike.”
22 #
Hib 11:7
Lakea e Noa i rata lobo a maki a Vure i taki vona ge rata.
Seçili Olanlar:
A Vuhuna 6: bnp
Vurgu
Paylaş
Kopyala
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
© 2011 Wycliffe Bible Translators, Inc. All rights reserved.