Maakö 12

Libhonʋwazokuu a ninea

(Matie 21.33-36; Lwiikö 20.9-19)

1'N Zezwii yuëë 'nini 'pänɩ, ɔ lɛ naa: «Nɩkpɛ ‑bhlʋ mɔɔ glʋä 'likpïï ‑yɩnyɩɩ 'bhï wa bhɛɛ duvɛɛ 'wʋ a 'lagblɛ. 'N ɔ yee ‑gbätɩ 'mö 'pä. 'Bhʋkwaa wa 'kää duvɛɛ 'mö dɔlʋnɩɩ, 'n ɔ yeaa 'bhlu. 'N ɔ yiɛ ‑gbëgbë 'pä. 'N ɔ yiɛ 'lagblɛɛ libhonʋwa yowʋ 'nyɛ, 'n ɔ yiɛ lɛgä 'mö mö. 2Ɔ ‑wʋ ‑mä, 'n ‑sɛsɛtɛnyɩɩ yiɛ ghlɛ. 'N ɔ yiɛ ‑mä libhonʋwaa a 'bɛyɩ ɔ nɩkpɛ ‑bhlʋ tie, wa 'kä dlinɩ wa 'kɔ ɔ daa yowʋ 'nyɛ. 3Nɩkpɛɛ 'lagblɛlowlii tie a‑a, ɔ ghlɛɛ ‑mä 'lagblɛ 'möö, 'n libhonʋwaa yoo 'wʋ gbulo 'n wa yoo 'sɛlɩ, 'n wa yoo kpëti, ɔ'ɔɔ ‑lu ‑su 'n ɔ yiɛ mö. 4'N 'lagblɛlowlii yi'ɛɛ ‑mä ‑mɔmɔɔ tie. Ɔ ghlɛɛ ‑mä, wluu, 'mö wa 'lɩbhänɔɔ, 'n wa yoo ‑di zia. 5'N ɔ yuëë tanɔ 'wʋ tie. Ɔ ghlɛɛ ‑mä, 'n wa yoo 'lɩbhä 'n ɔ yiɛ 'ku. Ɔ tie'ɛ ‑mä nɩkpaa ‑mumuë a ‑bɛ. ‑Maa wa 'wuë, sa'a wa 'zuëë. Wa 'sɛlɩ ‑mumuë, wa 'lɩbhä ‑mumuë 'n wa yiɛ 'ku. 6'Lagblɛlowlii 'a yuu, ɔ ‑bhli ‑bhlʋ, 'mö ɔ ‑waa tenyii. Ɔ 'yize mɔɔ tʋʋä ‑lɛ. 'Mö ɔ tie ‑mä 'gbëbhlenɩdɔ'wʋ. Sɛ'ɛ ɔ 'pää dlɩ nɩɩ: 'Na yuu, 'mö wa 'kää 'klʋkpamö zʋ. 7‑Maa yuu ghlɛɛ ‑mä, libhonʋwaa lɛ: Nn, ‑ɔ 'kää zɩkö ɔ dɩba 'a gugbëa 'wʋ 'libhï a'bhë yɛ yi. A yi ‑a 'kɔ 'lɩbhä ɔ 'kä 'ku, nzɩɩ ‑a 'käa'a 'lagblɛɛ 'wʋ 'libhï. 8'N wa yoo 'wʋ gbulo, 'n wa yoo 'lɩbhä, 'n ɔ yiɛ 'ku, 'n wa yiɛ ɔ ‑gäzɛɛ 'kwlɛ 'mö 'pä. 9Zaa, 'lagblɛlowlii ‑kä yii, sɛ ɔ 'kä bhä libhonʋwa 'la köbhä? Ɔ ‑kä yii, libhonʋwa 'la 'wuë, 'lɩbhä ɔ 'kʋä 'lɩbhä wa 'kä 'ku, nzɩɩ ɔ 'kä 'lagblɛɛ libhonʋwa ‑mumuë yowʋ 'nyɛ. 10Lagɔbɔgʋʋ 'mö a wɛlɩkïbhë ‑bhlʋ ‑a cɛlɩɛ ‑mä, a 'naa bhä ‑zɩ 'mö zɛlɩ ‑a? Sɛ'ɛ a nʋä nɩɩ:

Kpiyii 'sɩbhäsɩbhäwaa gbä a‑a ‑ɛɛ nɛnɩɩ,

mɛɛ 'zʋa'aa ‑sɩkaa dɛsɛkäkpiyii.

11 ‑Alowli Lagɔ mɔɔ gbää 'n yɩ yiɛ ‑sɩbhä 'wʋ 'plɩ.

‑A ‑kɩɩ 'wʋ yɩlɩɩ, a‑a nʋä nɩɩ: 'Mänaliɛ.» #12.11 Soomö 118.22-23.»

12Zezwii gbää sa'aa, Zwiiföwaa 'a 'kädɩɩ 'nɩɛ ‑wa. Ɛ'ɛ ‑bhö nyɩasɛ, ‑maa wa ‑yi sɛ nɩɩ ninea ɔ 'pää, wa'bhï 'mö a kpɔɔ yɔwʋ, zaa wa yɩbhä a wa 'kɔ köbhä. ‑Maa nɩkpaa a ‑bʋbʋʋ 'mö wa ‑guä zaa, 'n wa yoo kɛ yɔwʋ ‑sɛ 'n wa yiɛ mö.

Sezaa 'a lapoo

(Matie 22.15-22; Lwiikö 20.20-26)

13'Ylɩ ‑bhlʋ 'mö, Falizɩɛwaa ‑nyɛ ‑zɩkpaa wa laa Elodɩ a ‑nʋa 'sɔ, wa gla'mö a ‑mumuë, 'mö wa tie ‑mä Zezwii a mä'a wa 'kɔ ‑mä 'pä. 14Wa möä, 'n wa yoo nimï 'yɩbhä, wa lɛ naa: «‑Atʋ, ‑a ‑yi sɛ nɩɩ, gbëaa ‑n kää ngli. ‑Nn bhïla 'yizʋsɛ, nɩkpɛ yi 'kɔdɔ glɩnɩ oo, ‑nn zizanɔɔ wɛlɩ 'yli. ‑Maa sɛɛ Lagɔ gbää nɩkpɛ nɩ nɛmöö, ‑sɩbhä ‑n nyɛɛ nɩkpaa 'wuë 'dɩ gbëaa. Zaa, ‑aa gböö a dɔ'wʋ, ‑a kä bhä ‑a 'kä 'bhlɩlowli Sezaa 'a lapoo 'pɛnɩ, ‑maa ‑aaa bhä ‑kä ‑a 'kʋ 'pɛnɩ ‑a?» 15Zezwii ‑yi sɛ wa glɩnɩ 'kwlɩsɔkäwa, zaa 'n ɔ 'yuë nimï 'yɩbhä nɩɩ: «'Saa bhä 'n a ‑yii nimï 'yɩbhää yi a ‑kaa ‑mä 'pä a za? A ‑laaa ‑ka fälɛgöyi ‑bhlʋ n 'kɛ 'ylɩmö.» 16Wa ‑nyɛɛ yiɛ, 'n ɔ yuëë nimï 'yɩbhä nɩɩ: «Fälɛgöyii 'klʋ a 'wukpële nɩ ‑a wʋä ‑lɛ, 'n nglɩɩ ‑yɩ cɛlɩɛ ‑lɛ, ɔ ‑këlii bhä?» Wa lɛ naa: «'Bhlɩlowli 'kɔdɔ Sezaa.» 17Zezwii lɛ naa: «‑Yɩ glɩnɩɛ Sezaa a ‑lii, a nɩ 'nyɩ Sezaa yowʋ. ‑Yɩ glɩnɩɛ Lagɔ a ‑lii, a nɩ 'nyɩ Lagɔ yowʋ.» Zezwii gbä sa'aa, nglii yʋää.

'Kuduwaa yi bhä ‑tiamö glu 'wlʋ ‑a?

(Matie 22.23-33; Lwiikö 20.27-40)

18‑Zɩkpa ‑mamaa wa laa Sadwisɩɛwa, sɛ'ɛ wa 'cɩaa nɩkpaa nɩɩ, nɩkpɛ ‑kä 'ku 'wë, ɔ 'naa 'kä glu 'wlʋ. ‑Zɩkpa 'la 'mö a ‑nʋä ‑mumuë mʋa ghlɩɛ ‑mä Zezwii, 'n wa yoo nimï 'yɩbhä, wa lɛ naa: 19«‑Atʋ, ‑aa dɩba 'kɔdɔ Moyizɩ lɛ nɩɩ: Nɩkpɛ ‑kä 'nglɔ ‑kä, ɔ ‑nyɔɔ 'sɔ wa 'nɩ 'yu ghlɩ 'n nɩkpɛ 'la ‑kä 'kuu, ɔ ‑daayu nɩ 'libhï 'kuzlenglɔɔ 'wʋ, ɔ ‑nyɔɔ 'sɔ wa 'kä 'yuë gwälɩ ɔ ‑daayu ‑ɔ 'kuä a 'wlumö.#12.19 Detlenɔɔmö 25.5. 20Zaa, nyɩbhɛlʋdaayuë ngbi'sɔ mʋa ‑wʋ a‑a ‑lɛ. Wa gla'mö a 'kɔdɔɔ, 'n ɔ yiɛ 'nglɔ 'kwä, ɔ ‑nyɔɔ 'nɩɛ 'yu ghlɩ 'n ɔ yiɛ 'ku. 21'N 'sɔnɔɔ yiɛ 'kuzlenglɔɔ 'wʋ 'libhï, ɔ ‑nyɔɔ 'nɩɛ 'yu ghlɩ 'n ɔ yiɛ'ɛɛ ɔbhlɩ 'ku. Sɛ ‑bhlʋ ‑kpɔ 'la, ‑sɩbhä yɩ 'plɩɛ tanɔɔ a dɔ'wʋ 'wʋ. 22Wa ngbi'sɔ ‑kpɔ, ‑sɩbhä wa 'libhïä ‑bhʋlʋbhʋlʋ nglɔɔ 'wʋ, ‑maa wa ‑nyɔɔ 'nɩɛ 'yu ghlɩ 'n wa yiɛ 'ku. Nglɔɔ a'bhë 'n ɔ yiɛ ‑mä plɛ 'n ɔ yiɛ 'ku. 23Zaa, ‑zlɩ 'kuduwaa ‑kä glu 'wlʋʋ, ɔ yɛ yɩ wa 'wuë a 'nglɔ glɩnɩ 'wë nɩɩ, ‑ɔ 'kɔ bhäa'aa ‑kälɩ?» 24Zezwii lɛ naa: «A'aa sasɛ Lagɔwɛlɩɩ ‑yi, a'aa'ɛ sɛɛ Lagɔ 'tɛɛ 'möä ‑yi. Zaa, ‑dlʋ a ‑dlʋä. 25'Kuduwaa ‑kä zɩla'a glu 'wlʋ 'wëë, nyɩbhɛlɩɩ 'naa 'käa'a 'ngwlɩɩ 'kwä, ngwlɩɩ 'naa 'käa'a ghïla 'mö, ‑maa Lagɔzuzuku a sɛ wa 'kää ‑wʋ. 26‑Maa 'n a ‑kä nɩɩ 'kuduwaa 'naa 'kä glu 'wlʋ nʋʋ, ɛ 'kä ‑bhɩɛ ‑aa ‑bhlɛ tɛkäsɛ Moyizɩ 'a Lagɔbɔgʋʋ 'mö a wɛlɩɩ 'mö zɛlɩ. Wɛlɩɩ ‑yɩ nʋä nɩɩ, Lagɔ mɔɔ 'wlʋnɩɛ 'ylɩ ‑bhlʋ 'mö ‑mä ‑dɛglaklʋkwaa 'mö 'yli 'n ɔ yiɛ Moyizɩ 'dɩ 'nyɛ nɩɩ: ‑Amöö glɩnɩɛ Ablaamö a Lagɔ, Yizaakö a Lagɔ 'n Zakɔɔbö a Lagɔ. #12.26 Ɛzoodɩ 3.6. Wɛlɩ 'la, 'mö n gaaa. 27Mɩɩ sɛɛ zɛmö nɩɩ, Ablaamö mɔ, Yizaakö mɔ 'n Zakɔɔbö, Lagɔ a 'yila 'klʋ a dɔ'wʋ, wa ‑bhölɩ. Ɛ'ɛ ‑bhö nyɩasɛ, ‑maa Lagɔ 'nɩ ‑bhö 'kuduwa a Lagɔ. ‑Maa ‑bhölɩbhölɩwa a Lagɔ ɔ glɩnɩɛ. Nza n ‑gbää nɩɩ anyɩ a dulaa.»

Gböö 'wuë gla'mö a gba 'kädaa

(Matie 22.34-40; Lwiikö 10.25-28)

28Zezwii ‑wʋä sa'a Sadwisɩɛwaa 'dɩ 'nyɛ dɔ'wʋʋ, Moyizɩ 'a Gböö a 'cɩanyɔ ‑bhlʋ ‑wʋmö a ‑lɛ. Ɔ 'yɩɛ sɛɛ Zezwii 'nyɛɛ Sadwisɩɛwaa sasɛ 'dɩ 'ylɩmöö, 'n ɔ yoo yɔwʋ 'dio, 'n ɔ yoo nimï 'yɩbhä nɩɩ: «‑Atʋ, Lagɔ a Gböö gla'mö a dɔ'wʋ, Gba ‑maa 'kä bhä tenyii dɛsɛ, ‑a zi bhä ‑mi'la 'wuë 'wʋ?» 29Zezwii lɛ naa: «Lagɔ 'a gba 'kädaa ma‑a nɩɩ: Yizlaɛlɩ a ‑nʋänyɩ, a nɩ ‑pʋnɩ 'yukwli, ‑Alowli Lagɔ, ɔ 'yize mɔɔ glɩnɩɛ ‑tiamö a Lagɔ. 30Nza a kää a 'kɔ ‑wa ‑mä 'a dilaa 'wuë zɛmö, ‑mä 'a ‑bhölɩbhölɛɛ 'wuë 'mö, ‑mä 'a dlɩpäsaa 'wuë 'mö, 'n ‑mä 'a 'mötɛɛnɔɔ 'wuë 'mö.#12.30 Detlenɔɔmö 6.4-5. 31'Sɔnaa ‑a ‑kämö'ɛɛ tenyii dɛsɛɛ, ma‑a nɩɩ: Sɛ ‑n ‑waa ‑nanyɩ ‑wa ‑sɩbhä ‑na 'lilɛ.#12.31 Levitiikö 19.18. Gba ‑mamaa ‑a 'kää dɛsɛ ‑kä ‑a 'kɩɛ 'wʋ zii, a'aa ‑bhölɩ.» 32Moyizɩ 'a Gböö a 'cɩanyɔɔ lɛ naa: «‑Atʋ, miɛ ‑tiasɛ. ‑Alowli Lagɔ, ɔ 'yize mɔɔ glɩnɩɛ ‑tiamö Lagɔ. Ɔ sɛ a Lagɔ 'nɩɛ ‑bhölɩ. 33Nza nɩkpɛ kää ɔ 'kɔ ‑wa, ‑mä 'ɔ dlɩɩ 'wuë zɛmö, 'ɔ dlɩpäsaa 'wuë 'mö 'n 'ɔ 'mötɛɛnɔɔ 'wuë 'mö. 'N sɛ ɔ ‑wa'ɛɛ ɔnyɩɩ, ɔ 'kä'ɛ ‑sɩbhä ɔ 'lilɛ ‑wa. Gbö la 'sɔ ‑kpɔ, mɩɩ kää dɛsɛ, mɩɩ ziɛ ‑n 'kɔ nɩma bʋbɔnɩ ‑nyɛ bʋbɔbʋbʋʋ a kii 'wuë 'sɔ 'wʋ.» 34Moyizɩ 'a Gböö 'cɩanyɔɔ bhïlaa sa'a sasɛɛ, Zezwii lɛ naa: «‑N 'kä 'pɩwʋ mää Lagɔ 'kämanɩɛ plɛ a dɔ'wʋ, ‑nn‑ä 'yuku ‑wʋ.» 'Bhöönɩa'a ‑lɛ, ‑bɛ 'nɔa'a wɛlɩ ‑mimii 'wʋ 'yɩbhänɩ.

Sɛ'ɛ Zezwii gbää Puënyɔɔ Lagɔ ‑sɛɛ ‑lɛ a dɛ

(Matie 22.41-46; Lwiikö 20.41-44)

35Zezwii ‑wʋ ‑mä Lagɔbudu 'Kɔdʋʋ 'mö nɩkpa Lagɔwɛlɩɩ 'cɩa dɔ'wʋ, 'n ɔ yuëë 'kïbhë ‑bhlʋ 'wʋ 'yɩbhänɩ, ɔ lɛ naa: «Moyizɩ 'a Gböö a 'cɩawaa lɛ: Kliisɩ, Puënyɔɔ Lagɔ ‑sɛɛ ‑lɛ, Daviidɩ a 'yu a 'yu ɔ glɩnɩ. Sɛ yɩ ‑wʋ bhä 'mö 'n wa nʋ ‑sɩbhä? 36Daviidɩ a'bhë, 'Wugɔmʋʋ 'Wlɩlɩ bhïlanɔɔ 'möö, sɛ'ɛ ɔ nʋä nɩɩ:

‑Atʋ Lagɔ mɔɔ 'nyɛɛ na ‑lowli 'dɩ nɩɩ:

Glɩ dɛ'ɛ na luukɛ 'wʋ sɛ,

n 'kä ‑na'a ‑gblɩwaa ‑mä ‑na kplɩzɛmö 'zʋ. # 12.36 Soomö 110.1.

37Daviidɩ a'bhë, Kliisɩ 'mö ɔ laa ɔ ‑lowli. 'N Daviidɩ ‑kä Kliisɩ ɔ ‑lowlii ‑laa, sɛɛ Kliisɩ 'kä bhä'ɛ Daviidɩ a 'yu a 'yu glɩnɩ 'nɩ?»

Zezwii gbää sa'aa, nɩkpa a ‑bʋbʋʋ ‑wa ‑pʋnɔ a‑a 'yukwlii, wa 'wuë 'mäna.

A nɩ tɩ 'kwlɩsɔkäwa glɩnɩ!

(Matie 23.1-36; Lwiikö 20.45-47)

38'Ylɩ ‑bhlʋ 'mö, Zezwii ‑wʋ nɩkpaa Lagɔ 'a wɛlɩɩ 'cɩa dɔ'wʋ, 'n ɔ yuë 'dɩ 'nyɛ nɩɩ: «Moyizɩ 'a Gböö a 'cɩawaa, ‑wa ‑kä ‑ziabanɩɩ 'mö päla 'wë, ‑wa tɛlɩɛ yilaa sɛɛ, dɛɛ nɩkpa 'kɔkɔmlɛ ‑wʋä, ‑wa tɛlɩɛ sɛ wa 'kä ‑lɛ ghlɛnɩɩ, wa 'kʋa bhälɩ a za‑a, a 'nɛmanɩ anyɩ 'wʋ, a tɩa wa saa 'zʋ. 39'Kädɩɩ ‑kʋä wäzɩ wa ‑nyʋä 'kä 'wʋ linɩɩ, 'bhli a ‑bhlii 'mö wa gbäzɩɛ 'mö. ‑Mä Lagɔbïdii 'mö, wa ‑kä ‑mä möö, 'yuku a ‑klikpïi 'mö ‑mä wa glɩɛ sɛ. 40Wa ‑kä Lagɔ bhibhee, wa bhibhe ‑këkëkë, nɩkpaa 'wuë 'käa wa 'dɩ a dɩ ‑sɛ a za. ‑Maa ‑tiamö a dɔ'wʋ, ylʋplɛwa wa glɩnɩɛ, 'n wa sɛɛ 'kuzlengwlɩɩ a ‑lii 'wuë kä'mö. Lagɔ yuë tenyii ‑zijli tu.»

'Pʋakuzlenglɔ ‑bhlʋ yɛ Lagɔ 'nyɛ

(Lwiikö 21.1-4)

41‑Mä Lagɔbudu 'Kɔdʋʋ 'mö, ‑dɔkwɩ a 'ke ‑bhlʋ ‑wʋ ‑mä. ‑Ɔ ‑kä ɔ 'kä Lagɔ 'nyɛɛ, yɩ 'mö, ‑mä ɔ 'pää monii. ‑Lɛ ‑dɔkwɩ 'la yɔwʋ, ‑lɛ Zezwii glɩɛ 'ylɩ ‑bhlʋ 'mö sɛ. Sɛɛ nɩkpaa zʋä ‑mä monii, ɔ 'kä ‑sɩbhä 'ylɩmö. Lɩkäwa a ‑bɛ, wa zʋ ‑mä moni a ‑bɛ. 42'N 'pʋäkuzlenglɔ ‑bhlʋ yiɛ yi, ɔ 'zʋ ‑mä fälɛgöyie 'sɔ. 43'N Zezwii yiɛ 'ɔ ‑gänɩwaa wäzɩ ɔ lɛ naa: «‑Tiamö n nyanyɩɛ dɛ'ɛ 'dɩ nɩɩ, 'pʋäkuzlenglɔ 'la mɔɔ 'pää ‑mä ‑dɔkɔɔ 'mö moni a ‑bɛ, mɔɔ ziɛ ‑muë'la 'wuë 'wʋ. 44‑Tiamö abhlɩ, ‑mumuë 'zʋ ‑mä ‑dɔkwɩɩ 'mö moni a ‑bɛ, ‑maa ‑ɛ ‑kplɛnuëë kɛɛ, 'mö wa 'zʋä ‑mä. ‑Maa 'kuzlenglɔɔ ɔbhlɩ, 'ɔ 'saa 'wuë ɔ kää, ɔ 'kä a‑a lii, 'mö ɔ 'nyɛɛ Lagɔ.»

Seçili Olanlar:

Maakö 12: bet

Vurgu

Paylaş

Kopyala