ମାତିସ୍ 7
7
ଦୁସ୍ରାର୍ଘି ମିଆଁ ଦୋଷ୍ ଆମା ଲାଗାବା
(ଲୁକାସ୍ ୬:୩୭,୩୮,୪୧,୪୨)
1ଯୀଶୁସ୍ ତାଙ୍ଘା ଉପ୍ଦେଶ୍ନୁ ତେଙ୍ଗିୟାସ୍, “ନେଖା ମିଆଁହି ଦୋଷ୍ ଆମା ଲାଗାବା ହାଲେ ନିହ୍ମା ମିଆଁହି ପାର୍ମେଶ୍ୱାର୍ସ୍ ଦୋଷ୍ ମା ଲାଗାବାଦାସ୍। 2ଏନ୍ଦେର୍ଗେକା ଏସ୍କେ ନିମ୍ ନାନ୍ନାରିନ୍ ଦୋଷ୍ ଚିଦାର୍ ଆନ୍ନେ ନିହ୍ମା ମିଆଁହି ଦୋଷ୍ ଚିଆକୋ; ଆରୁ ଏକା ନାପ୍ତି ନିମ୍ ନାପ୍ଦାର୍ ହୁ ନାପ୍ତିନିନ୍ ନିହ୍ମା ଲାଗାନ୍ହି ନାପାକୋ।”
3“ନିନ୍ ଏନ୍ଦେର୍ଗେ ନିଙ୍ଘା ଭାଇସ୍କି ହାନ୍ନୁନ୍ତା ଛୋଟେ କାଚ୍ରାବନ୍ ଏରାଲ୍ଦାଏ, ଆରୁ ନିଙ୍ଘା ହାନ୍ନୁନ୍ତା କୁଟ୍ଟାବନ୍ ନିଜେ ଏରା ପଲ୍ଲାଲ୍ଦାଏ? 4ଯଦି ନିଙ୍ଘା ହାନ୍ନୁନୁ ବାଡ଼୍କା କାଚ୍ରା ରାଇ ହାଲେ ନିନ୍ ଏସ୍କେ ନିଙ୍ଘା ଭାଇସିନ୍ ତେଙ୍ଗା ଅଙ୍ଗୟକା ଅନ୍ଦରା ଏନ୍ ନିଙ୍ଘା ହାନ୍ନୁନ୍ତା ଛୋଟେ କାଚ୍ରାବନ୍ ଅଥ୍ର୍ନ୍ଚନ୍? 5ହେ କପ୍ଟୀ, ନିନ୍ ପହ୍ଲେ ନିଙ୍ଘା ହାନ୍ନୁନ୍ତା ବାଡ଼୍କା କାଚ୍ରାବନ୍ ଅଥ୍ରା ହାଲେ, ନିନ୍ ବାନେକିରି ଏରୟ ଆରୁ ନିଙ୍ଘା ଭାଇସ୍କି ହାନ୍ନୁନ୍ତା ଛୋଟେ କାଚ୍ରାବନ୍ ଅଥ୍ରା ଅଙ୍ଗୟ।”
6“ପାବିତାର୍ ଜିନିଷ୍ଗୁଠିନ୍ ଆଲ୍ଲାଗେ ଆମା ଚିଆ, ଆରୁ ନିଜର୍ ସୋନା ରୂପାଗୁଠିନ୍ କିସ୍ସୁଘି ଆଘ୍ଲି ଆମ୍କେ ଖେବ୍ଡ଼ା, ଏକାସାନ୍ ଏନ୍ନେ ମା ମାନ୍ନାଦ୍ କା ଆବ୍ଡ଼ାର୍ ଆବନ୍ ହେଡ୍ଡୁ କିୟାଁ ତିର୍ହର୍ ନାବର୍ ଆରୁ ଉଲ୍ଟାରିକିରି ନିମାନ୍ ଚାର୍ରଚୋ।”
ପାର୍ମେଶ୍ଵାର୍ସାନ୍ ଧିୟାନ୍-ଧିୟାନ୍ ବିନ୍ତି କାମ୍ନା
(ଲୁକାସ୍ ୧୧:୯-୧୩)
7“ପାର୍ମେଶ୍ୱାର୍ସିନ୍ ନିତ୍ତେ ରା, ଆରୁ ନିମାଗେ ଚିଆକୋ; ବେଦ୍ଦତେ ରା, ହାଲେ ନିମାଗେ ହାଖ୍ଖରୋ; ଠୋକ୍-ଠୋକ୍ କାମ୍ତେ ରା, ହାଲେ ନିହ୍ମା ଲାଗାନ୍ ବାଲି ତିସ୍କାକୋ। 8ଏନ୍ଦେର୍ଗେକା ଏକାସ୍ ନିଦାସ୍, ଆସ୍କେ ହାଖ୍ଖରିଦ୍; ଆରୁ ଏକାସ୍ ବେଦ୍ଦଦାସ୍, ଆସ୍ ହାଖ୍ଖଦାସ୍; ଆରୁ ଏକାସ୍ ଠୋକ୍-ଠୋକ୍ କାମ୍ତେ ରାଦାସ୍, ଆସ୍କେ ବାଲି ତିସ୍କାକୋ।”
9“ନିହ୍ମା ଭିତର୍ନୁ ଏନ୍ନେ ଏକା ଆଲାସ୍ ରାଦାସ୍, କା ଯଦି ତାଙ୍ଘା ହାଦ୍ଦୁସ୍ ଆସ୍ମା ନିଅସ୍, ତା ଆସ୍ ଆସ୍କେ ଚାଁଚାନ୍ ଚସ୍? ମାଲ୍ଲା! 10ଚାହେ ଇଞ୍ଜୋ ନିଅସ୍, ହାଲେ ନେର୍ରୁନ୍ ଚିୟସ୍? ମାଲ୍ଲା! 11ହାଲେ ନିମ୍ ଖାରାପ୍ ରାଇକିରିହି, ନିଜର୍ ହାଦ୍ଦୁର୍ଗେ ବାନେ ଜିନିଷ୍ଗୁଠିନ୍ ଚିୟାଗେ ଆହ୍ଦାର୍ ତା, ନିହ୍ମାଏ ସରଗ୍ତା ବାଙ୍ଗ୍ସ୍ ନିଜର୍ ନିନା ବାଲାର୍ଗେ ବାନେ-ବାନେ ଜିନିଷ୍ଗୁଠିନ୍ ଏନ୍ଦେର୍ଗେ ମା ଚିୟସ୍? 12ହୁଦ୍ଘିଲାଗାନ୍ ନିମ୍ ଆଲାର୍ସ୍ତି ଏସ୍କେ ବେଭାର୍ ବେଦ୍ଦଦାର୍, ଆନ୍ନେନ୍ ନିମ୍ ଆବ୍ଡ଼ାର୍ ଗାନେ ବେଭାର୍ କାମା; ଏନ୍ଦେର୍ଗେକା ଇଦ୍ ନିୟମ୍ ଆରୁ ନାବୀଜାମାର୍ଘି ଶିକ୍ଷାଘି ମତ୍ଲବ୍ଦ୍।”
ସାକ୍ଡ଼ି ଆରୁ ଚାଉଡ଼ା ପାବୁ
(ଲୁକାସ୍ ୧୩:୨୪)
13“ସାକ୍ଡ଼ି ଫାଟକ୍ନୁ କରା, ଏନ୍ଦେର୍ଗେକା ନାଶ୍ତାରା କାନା ଫାଟକ୍ ଓସାର୍ ରାଇଦ୍ ଆରୁ ପାବୁ ସହଜ୍ ରାଇଦ୍; ହୁଦ୍ଘିଲାଗାନ୍ ଢେର୍ ଆଲାର୍ ଆନ୍ନୁ କାନାଏ। 14ଲେକିନ୍ ସବୁଦିନ୍ତା ଜୀବନ୍ ତାରା କାନା ଫାଟକ୍ ସାକ୍ଡ଼ି ରାଇ ଆରୁ ପାବୁ କଠିନ୍ ରାଇଦ୍ ହୁଦ୍ଘିଲାଗାନ୍ ଥୋଡ଼େ ଆଲାର୍ ଇନ୍ନୁ କାନାଏ।”
ଏସ୍କେ ମାନ୍ନୁ ଆନ୍ନେ ଫାଡ଼ୁ
(ଲୁକାସ୍ ୬:୪୩,୪୪,୪୬; ୧୩:୨୫-୨୭)
15“ଝୁଟ୍ଟୁ ନାବୀର୍ସ୍ତି ହୁସିୟାର୍କିରି ରା, ଏକାର୍ କା ଭେଡ଼ିଘି ଭେସ୍ନୁ ନିହ୍ମା ଚାହାଗେ ବାର୍ନାଏ, ଲେକିନ୍ ଅସଲ୍ନୁ ଆବ୍ଡ଼ାର୍ ନୁକ୍ସାନ୍ କାମ୍ନାବାଲା ଡୁରୁର୍। 16ଆବ୍ଡ଼ାର୍ଘି ନାଲ୍ଖୁ ଦ୍ୱାର୍ନୁ ଆବ୍ଡ଼ାରିନ୍ ଚିହ୍ନର୍। ଆଲାର୍ ଆଚ୍ଚୁ ଝୁଁଣିନ୍ତି ଅଙ୍ଗୁର୍ ଫାଡ଼ୁ, ଚାହେ ପାନୁ ମାନ୍ନୁନ୍ତି ଡୁମାରି ଚହ୍ନାଏ କାଁଏ? 17ହନ୍ନେନ୍ ଜାମା ବାନେ ମାନ୍ନୁନୁ ବାନେ ଫାଡ଼ୁ ହାଞ୍ଜି ଆରୁ ଖାରାପ୍ ମାନ୍ନୁନୁ ଖାରାପ୍ ଫାଡ଼ୁ ହାଞ୍ଜି। 18ବାନେ ମାନ୍ନୁନୁ ଖାରାପ୍ ଫାଡ଼ୁ ମା ହାଞ୍ଜି, ଆରୁ ଖାରାପ୍ ମାନ୍ନୁନୁ ବାନେ ଫାଡ଼ୁ ମା ହାଞ୍ଜି। 19ଏକା ମାନ୍ନୁନୁ ବାନେ ଫାଡ଼ୁ ମା ହାଞ୍ଜି, ଆବନ୍ ଛପିକିରି ଚିଚ୍ଚୁନୁ ବାସ୍ସାଚା କାଇ। 20ହନ୍ନେନ୍ ନିମ୍ ଆବ୍ଡ଼ାର୍ଘି ଫାଡ଼ୁତି ଆବ୍ଡ଼ାରିନ୍ ଚିହ୍ନା ଅଙ୍ଗର୍।”
21“ନେଦ୍ ଏଙ୍ଗାନ୍, ‘ହେ ପ୍ରାଭୁ! ହେ ପ୍ରାଭୁ!’ ବୁଲି ତେଙ୍ଗର୍, ଆବ୍ଡ଼ାର୍ଘି ଭିତର୍ନୁ ଜାମାର୍ ସରଗ୍ ରାଜୀନୁ କରା ପଲ୍ଲନାଏ, ଲେକିନ୍ ନେଦ୍ ଏଙ୍ଘାଏ ସରଗ୍ତା ବାଙ୍ଗ୍ସ୍କି ଇଚ୍ଛା ଲେଖା ଚାଲ୍ର୍ନାଏ ଆବ୍ଡ଼ାର୍ ଖାଲି କରାଅଙ୍ଗର୍। 22ଆ ନ୍ୟାୟଘି ଉଲ୍ଲା ଢେର୍ ଆଲାର୍ ଏଙ୍ଗାନ୍ ତେଙ୍ଗର୍, ‘ହେ ପ୍ରାଭୁ, ହେ ପ୍ରାଭୁ, ଏମ୍ କାଁଏ ନିହ୍ମା ନାମେତି ଭବିଷତ୍ କାତ୍ଥା ମାଲ୍ଲା ତେଙ୍ଗୁମ୍, ଆରୁ ନିହ୍ମା ନାମେତି କାଁଏ ଭୁତ୍ତୁଗୁଠିନ୍ ମାଲ୍ଲା ଅଥ୍ରୁମ୍? ଆରୁ ନିହ୍ମା ନାମେତି ଢେର୍ ଅଦ୍ଭୁତ୍ ନାଲ୍ଖୁ ମାଲ୍ଲା କାମୁମ୍?’ 23ହତ୍କବାକେନ୍ ଏନ୍ ସାଫା-ସାଫା ତେଙ୍ଗନ୍, ‘ଏନ୍ ଏକ୍ଲାହି ନିମାନ୍ ବାଲ୍ଲକାଦାନ୍। ହେ ଅଧର୍ମିଆରୋ, ଏଙ୍ଘା ଚାହାନ୍ନ୍ତି ବୁଙ୍ଗାକାଲା।’”
ଦୁଇ ଲୋକ୍ ଆଡ଼୍ପା କାମୁ ଆଲାର୍ଘି କାତ୍ଥା
(ଲୁକାସ୍ ୬:୪୭-୪୯)
24“ଇଦ୍ଘିଲାଗାନ୍ ନେଦ୍ ଏଙ୍ଘା ଇ ଜାମା କାତ୍ଥାନ୍ ମେନ୍ନାଏ ଆରୁ ଆବନ୍ ମାନ୍ନାଏ, ଆର୍ ଆ ବୁଦ୍ଧିୟାର୍ ଆଲାସ୍ ଲେଖା, ଏକାସ୍ କା ତାଙ୍ଘା ଆଡ଼୍ପାନ୍ ଚାଟ୍ଣୀ ମିଆଁ କାମ୍ଚାସ୍। 25ଆରୁ ଚେପୁ ବାର୍ଚା, ବାଢ଼ି ବାର୍ଚା, ଆନ୍ଧିଧୁକା ବାର୍ଚା, ଆରୁ ଆ ଆଡ଼୍ପା ଗାନେ ଧାକିୟାରାଚା, ହାଲେହି ଆ ଆଡ଼୍ପାଦ୍ ମା ଧାସ୍କାରାଚା, ଏନ୍ଦେର୍ଗେକା ଆଦ୍ଘି ନାହିଦ୍ ଚାଟ୍ଣୀ ମିଆଁ କାମ୍ଚ୍କା ରାଚା। 26ଆରୁ ନେଦ୍ ଏଙ୍ଘା ଇ କାତ୍ଥାନ୍ ମେନ୍ନାଏ ଆରୁ ମାନ୍ନାଏ, ଆବ୍ଡ଼ାର୍ ଆ ମୁରୁଖ୍ ଆଲାସ୍ ଲେଖା ଏକାସ୍ କା ତାଙ୍ଘା ଆଡ଼୍ପାନ୍ ଚାଲ୍କ୍ରିନୁ କାମ୍ଚାସ୍। 27ଆରୁ ଚେପୁ ବାର୍ଚା, ବାଢ଼ି ବାର୍ଚା, ଆନ୍ଧିଧୁକା ବାର୍ଚା, ଆରୁ ଆ ଆଡ଼୍ପା ଗାନେ ଧାକିୟାରାଚାଦ୍ ଆରୁ ଆ ଆଡ଼୍ପାଦ୍ ଧାସ୍କାରାଇକିରି ଛାର୍ଖାର୍ ମାନ୍ଚାକେରା।”
28ଯେତ୍କବାକେନ୍ ଯୀଶୁସ୍ ଇ ଉପ୍ଦେଶ୍ବନ୍ ତେଙ୍ଗା ମୁଞ୍ଜିୟାସ୍ ତା, ଆଲାର୍ ତାଙ୍ଘା ଉପ୍ଦେଶ୍ ମେନିକିରି ଆଚ୍ମିତ୍ ମାନ୍ଚାର୍ କେରାର୍, 29ଏନ୍ଦେର୍ଗେକା ଆସ୍ ତାହ୍ମା ପଣ୍ତିତ୍ଜାମାର୍ଘି ଲେଖା ଉପ୍ଦେଶ୍ ମା ଚିଇକିରି ଅଣ୍ଟା ହକ୍ ହାକ୍କା ଆଲାସ୍ ଲେଖା ଉପ୍ଦେଶ୍ ଚିଆଲିୟାସ୍।
Seçili Olanlar:
ମାତିସ୍ 7: xis
Vurgu
Paylaş
Kopyala
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
© (Active) Wycliffe Bible Translators, Inc. All rights reserved.
