Matai 8
8
1Umwene vwu ikwika pakidugala pwu vakankonga avanu isipuga si syongosu vuvule. 2Pwu vakambona uńabuba ihegelela itekelesa kumwene ita: Nkuludeva, ungave unogilwe pwu ulumańile ukumonya, 3Pwu UJesu akagolosa ikivoko akamwabasa mumana akata: Ndinogilwe uponage. Pwu akapona vuvule ibuba. 4Pwu UJesu akambula akata: Lola ulambulaga ujyunge umunu. Bako bihaga ukivonye kunteketsi, utekelage itsu alagye UMose, tsu tsive tsa kumańilamwo avene.
5Pwu vwu atsisike mu-Kapelinaumu UJesu, pwu ujyunge undongotsi akahegelela kumwene akatekelesa 6akata: Vi nkuludeva, umunu vango ali pavugono, ali nilinzapila limbwene. 7Umwene UJesu akata: Ndikwitsa ndikumponya. 8Umwene undongotsi akanda akata: Vi nkuludeva nandinogili ukutavwingilage nńumba jyango. Utsove ilimeńu lipamato lyene pwu ipona umunu vango. 9Mańa ndili munu vuvule, nuńe ndivikilwe mmalunde ga vavaha, nuńe ndili navasikali mmalunde gane. Ndingave nditsova kujyunge ndita: Ubihage kuvutunga, pwu ibiha vuvule, kujyunge ndingave ndita: Vwitsage kunu, pwu ikwitsa vuvule, umwene umunu vango ndingave ndikumbula ndita: Vombaga akatunga, pwu ivomba vuvule. 10Umwene UJesu vwu apulike itsi pwu akadega, akavavula avankongaga akata: jilweli ulwidiko ndulu, lwu nandiluvweni mwa Isilaeli umu. 11Jilweli ndikuvavula ndita: Valahumaga nakuvuhumo vwa litsuva nakuvusemo va vongosu avakutsitama navene va-Abulahamu nu-Isikaka nu-Jakobu pakulya isinu ndudeva lwa kukyańa. 12Lola avene avańa-ludeva vwu valakulugilwagwa muṅisi jya nduvasu, mwu jilava ingolo jyene lulava nulugadutso lwa mino. 13Pwu UJesu akambula undongotsi akata: Bihaga vutsivona aponile vwu tsitsu vwidike. Pwu umunu va mwene akaponela pakavalilo kako.
14Pwu UJesu akingila nńumba jya Petele, mwu akatsivona unkwive va Petele undala ali nimungu. 15Akamwibata ikivoko, pwu jikandeka imungu. Akasisimuka vuvule akangegela isinu. 16Vwu vuhwe pakimihe pwu vakagega va vongosu avali nimepo imbivi. Umwene imepo tsitsitsi akatsihumya li limeńu lyene. Voni avatamilwe akavaponya. 17Kwu kwitsa tsitsile pwu itsu atsovage UJesaja uńamalago uvi atetsage: Umwene nuvudekedeke vwitu itwikile nuvutamu vwitu apimbile.
18Avwene UJesu avanu ikipuga vamwimilye vambikile pagati pwu akata: Mutolage iliboti tulovokage kumwambo gulya. 19Pwu ujyunge umańakalata akahegelela kumwene akata: Vi mańisi, ndikukukonga mwoni umwu vugenda. 20Umwene UJesu akanda akata: Vukumbona ndaku? Mańa amakeve gwu gali namaguli, nasyene nisidege sili nuvuswa. Umwene Uńamunu lweli vi nali napo apakuhagulila untwe. 21Ujyunge unkongi akatsova nave akata: Nkuludeva, ndita ndibihe ndikansile tango udada. 22Umwene UJesu akata: Uṅongage uve, uvalekage avaswe vasilane vene.
23Pwu akipaka mwiboti navakongi va mwene vakankonga. 24Pwu vakakeńemuka ińanza jikahambuka sitso namajiga jikwilikila vuvule niliboti. Umwene vwu agonelye itulu. 25Pwu vakansisimula vakata: Vi nkuludeva utupokage, tuli pakutwivila. 26Umwene akata: Ndi vadwatsi kiki ńi valwidiko ulwebepe uńe? Pwu akasisimuka akatana nalyo ilikuluguta, akatana najyo ińanza. Pwu kukanunala vuvule. 27Avene avanu vakadega vakata: Vi munu nki uju? Mańa namakuluguta gipulika kumwene nińanza jipulika kumwene.
28Pwu vwu atogile pamwambo gulya nkilunga kya va-Gataleni pwu akaganila navanu vavili avali nimepo imbivi. Vwu vakahuma mumbuguli, ulwakuva mwu vavetsaga sikutsoni. Ulwakuva vale vatalamu sitso, pwu avanu vajilekile inzila iji ukugenda. 29Vwu vakilanga vakata: Tuli viki nuve vi Jesu, vi nswambe va Nguluve? Nda vwitsile nkutukinila vwu pakanale? 30Gwalepwo pavutale baho paludasi undimo gwa ngube. 31Pwi imepo imbivi itsi tsikatekelesa kumwene tsikata: Humbe ungave vukutuhumya pwu utetsage undimo gwa ngube gulya mwu twingilage. 32Umwene akidika akata: Mwingilage. Itsene tsikahuma tsikatsikwingila mungube. Pwi ingube undimo gwoni vuvule tsikabiluka palugenge, tsikitaga muńanza tsikamilwa mmagasi. 33Avene avalume avadimaga ingube vakańila vakabiha mbutsenge, vakatsitsova tsoni vuvule nitsa vanu va mepo imbivi ava. 34Pwu avanu uvutsenge vwoni vakahuma mbutsenge vakatsikundola UJesu. Vwu vambwene pwu vakatekelesa kumwene vakata: Ungahuma umu nkilunga kitu.
Seçili Olanlar:
Matai 8: Kinga
Vurgu
Paylaş
Kopyala
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
New Testament in Kikinga © British and Foreign Bible Society, 1961.
