Matai 6
6
1Mbandikage itsa vugolosu vwińo mulatsivombelaga umwu vilola avanu, vwu mwita vadegage avene, ulwakuva ngave mwigaha vuvule-vule, vwu mwambwitse isya kuvahomba udadajińo kukyańa. 2Ungave ulondile ukuvapa isya kidovano avanu, kwu bako ukwikuvila ingalape jya kwipulikihitsa, nduvwu sikutsoni vigaha avanwasi nńumba tsa kwisajilamwo mwoni nanduvanza, avita vatulole avanu vatuginyage. Jilweli-lweli ndikuvavula ndita: Kwu kuva vitolye ṅani isya kuvahomba. 3Lola uve ungave ulondile pakuvapa isinge isya kidovano avanu, pwu upita nikivoko kyako ikyaṅigi kilakavonaga ukwu kivomba ikinine ikyandyo, 4isya kidovano syako ukuta sivetsage sya kuvutitu. Pwu umwene udadajo, uvi ilola nakuvutitu alakuhomba jujwa.
5Napene nupwu ngave mukisaja, kwu bako ukwisaja nduvwu vikisaja avanwasi. Mańa avene nńumba tsa kwisajilamwo namu-nkwaganilano tsa malekano mwu vikihalila ukwima, ulwakuva vita vatudegage avanu. Jilweli-lweli ndikuvavula ndita: Kwu kuva vitolye ṅani isya kuvahomba. 6Lola uve ungave ulondile pakwisaja, pwu vwingilage nkajumba kako, udindage nakundyango, pwu vwisajage kwa dadajo uvi ali kuvutitu, pwu vutsivonaga udadajo uvi ilola namumbutitu ikukuhomba. 7Ngave mukisaja kwu bako ukupwata vuvule nduvwu vipwata avapanzi mańa avene vita pwu ipulikaga tungave tupwata amameńu mongosu vuvule. 8Kwu bako ukuliṅana navo. Mańa udadajińo asimańye ṅani isyu mulonda vwu mukanale nukusitsova kumwene. 9Uńe ngave mukisaja pwu ntetsage: Dada vitu va kukyańa, ilitavwa lyako livalatsivwe, 10uludeva lwako lwitsage, uvunogwe vwako vukongivwagwe pasi apa nda kukyańa, 11utupetsage isinu situ syilelo iji, 12utusyikilage inongwa tsitu, nduvwu tukuvasyikila avali ninongwa kwavwe, 13ulatuvikaga ndugelo, mańa utupoke pambivi. Mańa uludeva lwako namaka gako nuvudwadwa vwako sikutsoni. Ameni. 14Mańa ngave avanu mukuvasyikila inongwa tsa vene, pwu nuńe udadajińo va kukyańa namwene ikuvasyikila itsińo. 15Mańa ngave namukuvasyikila nuńe avanu itsa vene, pwu nuńe udadajińo nikuvasyikilaga itsińo nuńe.
16Upwu ngave mukusileka isinu ilitsuva ilinge, kwu bako ukusisilińana kumiho nda vanwasi. Mańa avene vikihambulanya kumiho upwu vita mwu vatumańilage avanu ukuta vasilekile isinu lino. Jilweli-lweli ndikuvavula ndita: Kwu kuva vitolye ṅani isya kuvahomba. 17Lola uve ungave utye ndisilekage isinu ilitsuva ilinge, pwu vwibakilage kuntwe, vwogage nakumiho, 18avanu ukuta valakumańaga ukusileka isinu uve, akumańage mwene udadajo uvi ali kuvutitu. Pwu udadajo uvi ilola nakuvutitu alakuhombaga jujwa.
19Kwu bako ukwikavila isyuma sya kulundika nkilunga umu, umwu nimijenje niṅusu tsilya, umwu navahitsi vijava vihitsa. 20Mwikavilage isya kulundika kukyańa lweli, ukwu nimijenje niṅusu natsilya, ukwu navahitsi navijava navihitsa. 21Mańa ukwu kilikwo ikyuma kyako kwu jilikwo najyene inumbula jyako. 22Ińale jya mumana gwako lyu liho. Upwu lingave iliho lyako livalatse vuvule, pwu nagwene ummana gwako gwiva mbalatse vuvule. 23Lola upwu lingave iliho lyako livivi, pwu nagwene ummana gwako gwiva niṅisi vuvule. Apene lungave ulumuli ululi mwave, lungave lwipelile ukuva ṅisi nalwene, pwu veni ajivonyage uvwongosu ijyene iṅisi? 24Nakuli ujyunge uvi avumańile ukuvavombela avakuludeva vavili paninye. Mańa angave ita ndivavombele vwu vavili, pwu ndili ikunsula mpamato uju, ndili ikungana, njunge unine ulya, ndili ikumbadama mpamato uju, ndili ikungilila ujyunge unine ulya. Bako ndatetsaga tukuvavombela paninye vwu vavili nu-Nguluve nu-Mamoni. 25Pwu ndikuvavula ndita: Kwu bako ukwigatatsa ukwisagila uvwumi vwińo isya kulya nisya kuńwa, numana gwińo nigya kuswala. Uvwumi nisinu nda navuvaha uvwumi? Numana nigya kuswala nda nambaha umana? 26Ndolage isidege sya kukyańa. Mańa nisyene nupwu sitye nukulima uvuletsi nasilima, sitye nukubena nasibena, sitye nukulundamanya uvuletsi nsyanga nasilundamanya, mańa umwene udadajińo kukyańa ikusisugila isinu. Uńe nda nansilutili isyene uvutengo. 27Uńe umwu mbelye veni avumańile ukwijongeletsa akakono kapamato uvutale uvwumi vwa mwene nupwu isagye igatitse? 28Nimisabwa gya kuswala mukisagila kiki? Ntolelage uluhala mbuluva vwa mwińasi upwu vudala. Mańa uvwene navukigatatsa navukihona. 29Lola ndikuvavula ndita: Namwene nu-Solomoni mbuvaha vwa mwene vwoni umwu vwavelye naswale lusiku ndakaluva kapamato aka. 30Ino angave Unguluve aswikile vuvule-vule ilińasi vuvule ilya mwińasi, ilyu ndilelo livakwo ndakilavo lilahwa ndivive lya mwoto, pwu aleke ukulutilila pakuvaswika uńe ńi vanalwidiko uludebe uńe? 31Pwu ndita kwu bako ukwisagila ukuta: Tukusivonaku isya kulya nisya kuńwa, tukugivonakwu igya kuswala? 32Mańa syoni sisisi syu vikigatatsa avapanzi ukwisagila. Mańa uńe udadajińo kukyańa asimańye ṅani syoni isyu upita mbe nasyo ukuta ṅisi ṅisi. 33Mwidulusage tango ukulonda lu ludeva lwa Nguluve nuvugolosu vwa mwene vwu vuve mbulongolo vuvwa, pwu ndavona syoni ṅisi ikuvongeletsa pakyańa. 34Pwu ndita kwu bako ukwisagilila ṅani isya kilavo, mańa ulwa kilavo lukisagilaga lulwa. Goni amatsuva umwu gikyela gali nuvusumbe, ili uvwa lyene ili uvwa lyene.
Seçili Olanlar:
Matai 6: Kinga
Vurgu
Paylaş
Kopyala
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
New Testament in Kikinga © British and Foreign Bible Society, 1961.
