Matai 2
2
1Umwene UJesu vwu aholilwe mu-Betelihemu mbutsenge vwa nkilunga kya mu-Jutai mmwaka gwa vutwa vwa Heloti, pwu vakavoneka avamańanondwe avahumile kuvuhumo uvwa litsuva mu-Jelusalemu. 2Vwu vakavutsa vakata: Unkuludeva va va-Juta uvi aholilwe lino ali ndaku? Mańa tuluvwene ulutondwe lwa mwene kuvuhumo vwa litsuva, pwu twitsile kusana kumwene. 3Umwene UHeloti vwu apulike itsi pwu akakeńemuka sitso, navene ava mu-Jelusalemu uvutsenge vwoni vakakeńemukila luninye nave. 4Pwu akavalundamanya voni navateketsi avavaha navamańakalata akavavutsa akata: UKilisiti vatye alaholwa ndamu? 5Avene vakambula vakata: Mu-Betelihemu ya mu-Jutai lyu avigile uńamalago atye: 6Nuve vi Betelihemu uve nkilunga kya mwa Juta ulatetsaga ndili ndebe une kuvutsenge vwoni vwa vakuludeva va mwa Juta. Mańa mwu alahuma mwave untwa uvi aladima Isilaeli umunu vango. 7Pwu akavilanga UHeloti avamańanondwe mbutitu akavavutsa ilitsuva ilyu lwavavonekye ulutondwe. 8Vwu vambulile, pwu akavalaga mu-Betelihemu akata: Mbihage nkandonde sitso umwana uju. Mańa ngave mutsikumbona nkitse mumbule ukuta najyune ndibihe kusana kumwene. 9Avene vwu vapulike itswu avavulaga unkuludeva pwu vakavuka. Pwu vakakeńemuka ulutondwe ulwu valuvwene kuvuhumo vwa litsuva ulwavalongolye mbulongolo vakavona lukwima pakyańa upwu ale umwana. 10Vwu valuvwene ulutondwe pwu vakahekela sitso. 11Pwu vakingila nńumba umwu vakambona numwana na ju Malija uvańina, vakasugama pasi vakasana kumwene, vakavopola isyuma sya vene vakatola isya kumbonola vakata nasahabu vakata nisya kutuṅilitsa nuntuguva unkali ugwu vita ju mila ilitavwa. 12Umwene Unguluve akavavula mmagona-sivi akata: Kwu bako ukuluta ija pa-Heloti ukubiha kukilunga kińo. 13Vwu vavukile avene pwu unsuṅwa va Nguluve akambonekela UJosepu mmagonasivi akambula akata: Sisimuka untole umwana nuvańina ukimbilile mu-Egipiti, mwu ukavetsage mumwa ukutsisika palitsuva lilyu ndilakuvula. Mańa UHeloti iva pakundonda umwana ulwakuva ita ndimbude. 14Pwu umwene akasisimuka akata numwana nuvańina akantola pakilo akakimbilila navo mu-Egipiti. 15Akava mumwa sikutsoni akatsisika palitsuva ilyu aswilaga UHeloti. Pwu kukwitsa tsitsile itswu atsovelaga unkuludeva muńamalago uvi atetsaga: Ndimwilangye mu-Egipiti unswambango. 16Pwu UHeloti vwu avwene vantekile avamańanondwe gukavipa sitso. Akasuṅa avanu va kuvabuda avana voni mbutsenge vwa mu-Betelihemu nava nkilunga kyoni kya mu-Betelihemu, vakatengula pavana avagonile imyaka givili vakaduga pavańehe. Vakagelela pamyaka igyu vambulile UHeloti avamańanondwe, 17Kukwitsa tsitsile itswu atsovile UJelemija uńamalago upwu atetsaga: 18Ingolo jikolilwe mu-Lama, ukulila kwongosu nulujivililo lwongosu, ukuswa kwu kuvaha mumwa. ULaheli ililila avana va mwene, ibela upwu vita tutsesage ulwakuva vajagile vuvule.
19Vwu aswe UHeloti pwu unsuṅwa va nkuludeva akambonekela mmagona-sivi UJosepu mu-Egipiti akambula akata: 20Bihaga untole na ju mwana na ju vańina uvujage navo nkilunga kya vańa-Isilaeli. Lola vaswe avene avatetsaga tumbude umwana. 21Umwene pwu akavuka akantola numwana nuvańina akabiha navo nkilunga kya vańa-Isilaeli, 22Vwu apulike ukuta Alikilau ampyanye udadaje UHeloti pakuva nkuludeva mu-Jutai pwu akadwada ukubihamwu. Vwu Unguluve ambulile mmagona-sivi akalutiṅanya akatsisika nkilunga kya mu-Galilai. 23Vwu atsisike mumwa pwu akatsenga mbutsenge uvunge uvwu vita mu-Nasaleti. Pwu kukwitsa tsitsile itswu vatsovaga avańamalago avatetsaga: Alatsovwagwa ukuva vi va mu-Nasaleti.
Seçili Olanlar:
Matai 2: Kinga
Vurgu
Paylaş
Kopyala
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
New Testament in Kikinga © British and Foreign Bible Society, 1961.
