Juwawu 16

Yesu ohalimbiha anamamuharaye

1Yesu ohowongagave eraga: <<Miyo nnavayela uwandelani zela idiwa wenyu ira jaza jiroma ireya mwahabalrabanduwe. 2Tchoira anoza kautamangiheni munyumbani dofundjamo mazu. Mwa ibaribari inoza ifiye tempu inafuna atu venya kaupegeni, kaumbuwelaga ira analaba mabasa a Mulugu. 3Aliwa anairegena jatene ejo na mwasa oira Baba kimuiziwile. Masiki miyo eto, kidiiziwile. 4Mbwenye miyo nnouwandelani jatene eji jahanaireye ira jaireyaga muwande umbuwela ira: <Jawandeliwe hiyo ti jeji.> Eji voroma vene kadauwandenleni mwasiwa dakaletchave na nyo. 5Peno mbwenye nnauwandelani jatene eji mwasiwa nnafuna didowe wa wenno udirumile. Eto muwari mwa nyo kalivo unafuna difuka ira: <Kodi munadowa waani?> 6Mbwenye voira duhuwandelani eji, muli okukumuwene mmirimani mwenyu. 7Masiki eno, miyo nnouwandelani ibaribari. Inafwanela didowe ira muwande kana upama. Mwasiwa dahadowe, Nkamihedi kanauzelani. Mbwenye dadowa, nnomuruma Nkamihedi aze akale na nyo.

Mabasa a Munemba Otchena

8<<Munemba Otchena aza, unoaiziwiha atu a mwilamboni zela yotega yewa eto zela makalelo anafuna Mulugu na matongelo Mulugu unafuna liye za tonga. 9Zela yotegiwa, unoaiziwiha atu yotegiwa yohodiroromela miyo. 10Zela makalelo anafuna Mulugu, unoaiziwiha atu makalelo anafuna Mulugu tchoira miyo nnadowa wa Baba eto nyo kamunadionegeve.#16:10 Ora yawenda Yesu mwilamboni, liye aawandela atu makalelo apama Mulugu anafuna liye. Mbwenye agadowile, Munemba Otchena guzile liye labaga vamalroni vaye. 11Zela makalelo Mulugu unafuna liye za atonga atu, unoaiziwiha atu ibaribari mwasiwa mwene wa ilambwela ya vati umala tongiwa.

12<<Miyo eto dihikana jengo jidjindji jinafuna miyo uwandelani. Mbwenye kannauwandelani peno mwasiwa nyo kamunakayena makalelo owanda vwa jeji. 13Mbwenye Munemba oafundjiha atu ibaribari aza, liye gunafuna uwandelani ibaribari yatene mwasiwa liye kanawongege jokumela wa liye ekave, nari. Mbwenye unawongege jengo jinawandeliwege liye. Liye unaza auwandelegeni jengo jinafuna za ireya sogolro.

14<<Munemba Otchena aza, unerege dititimiha miyo vano, mwasiwa liye unaza auwandelegeni jejo jinafuna miyo muwandela. 15Jatene jinna Baba jinafwanyeya jagali jaga. Nona diwongaga ira Munemba Otchena unawatchelege jaga, aze auwandelegeni nyo.

Kumbanya no hagalala wafuna kana anamamuhara Yesu

16<<Tchineneva nyo kamunadionege. Eto vasogolro, munoza mudione akoka. Tchoira miyo nnadowa wa Baba.>> 17Evale anamamuharaye amohiwa kohoroma wonga oka oka ira: <<Yesu unawonga ira: <Tchineneva nyo kamunadionege. Eto vasogolro vang'onove, nyo munoza mudione akoka.> Eto liye uni: <Mwasiwa miyo nnodowa wa Baba.> Kodi eji jinatapulela nni?>> 18Eto kofukanaga oka oka keraga: <<Awongaga ira: <vasogolro>, eji jinatapulela nni? Inawonga liye, hiyo kannawanda onelramo inatapulela atu.>>

19Yesu mbwenye ohoiziwa ira aliwa kafuna jonfuka. Evale liye ohawandela ira: <<Kodi nyo munafukana nyoka nyoka zela mazu diwongile miyo oira: <Tchineneva nyo kamunadionege. Eto vasogolro munoza mudione akoka.>? 20Miyo nnafuna duwandeleni ibaribari. Tchineneva eni miyo nnadowa. Nyo mwahala munokana nla eto munotomola kuto. Atu a ilambo ya vati anokana hagalala, mbwenye nyo munokala okukumuwene. Mbwenye eto sogolro vang'ono, kukumuwa wenyu unoza usanduwe ukale hagalala. 21Muhiyana ambalaga mwana, ora yenno unokana kukumuwa mwasiwa tempu yaye yobala ihinfiyela. Mbwenye ambala mwanole, unodiwala zuzuma wanna liye mwasiwa unokana hagalala ulukulu zela mwana muxa umbanle liye mwilamboni. 22Sawasawa nnga nyo. Tchineneva munokana kukumuwa. Mbwenye miyo dadowa, nnouonani akoka. Tempu yenno munokana hagalala mmirimani mwenyu eto kalivo mutu unafuna za uwakani hagalala munafuna nyo kana. 23Siku neno kamuza mukana yofuka ira mudifuke miyo. Miyo nnafuna duwandeleni ibaribari. Jatene jinanvepege nyo Baba na nzina naga, Baba unerege uvahani. 24Fiyeda peno eni, kamunarome vepa yengo na nzina naga. Nnouwandelani ira muvepege na nzina naga mwasiwa Baba unouvahani inavepege nyo ira mukayena hagalala wokwakwanela.

Yesu ohowonga zela jengo jafuna za ireya

25<<Miyo jatene jeji nnauwandelani mmisimbeni. Mbwenye inoza ifiye tempu inafuna miyo za uwandelagani mohokala mmisimbeni. Tempu yenno nnaza duwandelegeni ja Baba movweya mwene.

26-27<<Siku nnafuna miyo uwandelani movweya nafiya, nyo munerege nvepa Baba na nzina naga. Kahi ira miyo gunafuna nvepa Baba vamalroni venyu, nari. So mbwenye, nyo mwa annya munerege nvepa na nzina naga. Baba uhuzivelani mwasiwa nyo munodiziveliwa miyo eto nyo munororomela ira miyo dikumenle wa Mulugu. Muwari moziveliwiwa na Baba, nyo munerege nvepa jengo na nzina naga.

28<<Miyo dizaga mwilamboni ya vati, dikumenle wa Baba. Eto nnohiya ilambwela tchineneva, diwelele wa Baba wakoka wene.>> 29Noira enne, anamamuharaye kohowongaga, aliwa ira: <<Peno mbwenye kamunawonga mmisimbeni. Munawonga movweya! 30Va mbwenye hiyo nihikana ibaribari ira nyo muhuiziwa jatene. Tchoira masiki mutu ahanawongeve nyo muhumala iziwa yofuka inna liye mmirimani mwaye. Nona peno nnowanda roromela ira nyo mukumenle wa Mulugu.>>

31Yesu ohowakula eraga: <<Kodi peno munowanda roromela? 32Kaing'anani ikala ora inaza eto imala fiya eni ira nyo muditawe, mudowe mwakale mmavande mwenyu. Miyo munodihiya meka. Mbwenye dahala kannakala meka, mwasiwa Baba uli na miyo.

33<<Jatene jeji juwandenleni miyo, nnerela ira muwande kana murendele muwari mokala mwa miyo. Munokana makatamiho mwilamboni. Nyo mbwenye kamukukumuwe, mwasiwa miyo dihimala gondjiha ilambo ya vati.>>

Seçili Olanlar:

Juwawu 16: iLolo

Vurgu

Paylaş

Kopyala