Marko 4
4
Kɛkpalɛ Nɛ Adɔhwɛ Shu
1Yesu aza ba vɛ yɛ kɛdɔkɛkasɛ nɛa bha nɛ Galelia kɛvɔ nu tɔ. Banɔɛza nɛ gɛ za ɔkɛlɛ nɛ bekpe kudzɔ. Kɛkɔsɛ etsoku keniabha opupu nɛ mɛ, nɛ kibe lɛ gɛ banɔɛza na wɔ keni nɛ tɔ. 2Akasɛ banɔ nɛ kɛdɔ gelee ganɔ akpalɛ mɛ, klɛ nɛ yɛ kɛdɔ kɛkasɛ nɛ mɛ aɖɔ asɛ, 3“Nɔ tatɔ mɔ! Ayadɛ teli avɛ kɛdɔ ɔhwɛ kɔ. 4Gɛ ahwɛ kɛdɔ nɛɛ, eyi teli awɔlɛ adɔ kɛdzo nɛ mɛ, klɛ buzhuɔɛ ba tɔkɛ alɛ amunɔ. 5Eteli adɔ aklagbua bha, gɛ tisi gelee dɛ za ɔklɛ. Eyi ne yi zia alasɛ tisi dɛ do nɛ ɔklɛ kɔ alɛ. 6Pɔ gɛ buwui ba tã eyi nɛ aba tãyɛ̃, alasɛ igu nɛ dɛ vɛ tisi mɛ. 7Abhlatɔ tsyɛ awɔlɛ adɔ ewi mɛ, klɛ ewi nɛ ebe she ada alɛ, so le di yu. 8Pɔ tsyɛ eteli adɔ kesukpa dzyɔgo abha. Alɛ xũ nɛɛ ebe she, le yu gelee; laya nɛ tɛkpikpe afata, afɛtehlo ɔyɛkɔ vɛnɔ kɛfɔɛfɔ mɛ.”
9Ɔkɛlɛ Yesu asɛ, “Anɔ nɛ gɛ butɔ lɛ yɛ pɛ ebe nu, tɛ enu.”
Kɛdɔnɔ Nɛ Gɛ Akpalɛ Nɛ Alɛ Kɔ
10Gɛ Yesu tite agɔ, yɛ banɔkpɛkpɛ anɛ banɔ gɔgɔɛ nɛ be bisi yɛ ebui denɔ akpalɛ nɛ shu. 11Etsre alɛ asɛ, “Ebuikpukpu nɛ gɛ alɛ Kpaya bukusi nɛ mɛ, ba tɛ yɛkɔ akɔ wɔnɔ. Pɔ banɔ nɛ gɛ ba ma wɔnɔɛshi xũ nɛ kibuinyɛbui ga akpalɛ mɛ kɔ alɛ 12sɛ tɛ,
“ ‘ba za mɔ pɔ batɛ ba mɔ klɛ mɛ,
klɛ le be ze nu pɔ be ti be nu klɛesi,
odinu sɛ bee be tsyina klɛ la ba yɛkɔ etsyea lɛ!’ ”
Yesu Ebu Adɔhwɛ Kɛkpalɛ Nɛesi
13Klɛ Yesu ehunu etsre alɛ asɛ, “Nɔ di nu kɛkpalɛɛ nɛe si? Klɛ nɔ bɔ bhɛtɛ pɛ nɔ bo nu kɛkpalɛ tili kesi? 14Ayadɛ nɛɛ, Kpayɛbui nɛa hwɛ. 15Banɔ teli ba sɔnɔ eyi nɛ gɛ adɔ kɛdzyo nɛ mɛ, nɛ ɔklɛ gɛ ba hwɛ Kpaya bui. Balɛ gɛ benye nu kibui nɛ ko, Satana aba nyɛna kibui nɛ gɛ ba ɖa nɛ akpɛ ebu nɛ balɛ mɛ. 16Babhlatɔ, gɛ dzi ansɛ eyi gɛ ba hwɛ atrɔ ɔklɛ gɛ aklagbu alɛ, be nu kibui, klɛ la gbla yɛkɛɛ lɛ nɛ same. 17Pɔ gɛ igu dɛ za alɛ so la dɛ za nɛ ɛkpã dzidze. Kibe lɛ gɛ butɔ ɔdɔgɔsɛ tɛkpɛkpatɔnɔ ba nɛ kibui nɛ shu ko ba wɔlɛ kplitaa. 18Kana ke babhlatɔ tsyɛ teli ba sɔnɔ eyi nɛ gɛ awɔlɛ ku ewi nɛ mɛ, be nu kibui; 19pɔ kanɔa nɛ mɛ butɔ, ehoeyi anɔ wɛwɛɛ, nɛ kɛnɔmɛdɔ tɛpɛpɛ she da kibui nɛ balɛ mɛ, gɛ kɛ kɔ sɛ kibui nɛ dɛ yu. 20Ba ga sɔnɔ eyi nɛ gɛ adɔ kesukpa dzyɔgo nɛa bha, balɛ benu Kpayɛbui klɛ bayɛkɛ kɛlɛ klɛ kɛ yu gelee nɛ, afata, afɛtehlo, ɔyɛkɔ nanɔ kɛfɔɛfɔ nɛ balɛ mɛ ansɛ kana gɛ bahwɛ alɛ.”
Kanɛgbɛ Gɛ Etsri Osiabha
21Yesu ebisi asɛ, “Be deke kanɛgbɛ ayɛkɔ akpɛ ketsukpuesi ɔdɔgɔ sɛ ba yɛkɔ akpɛ apa kesi dza? Anɛ yɛ osia bha ɔbɔ yɛkɔ ɔtrɔ? 22Alasɛ kɛdɔ nyɛdɔ gɛ be kpu nɛɛ kɛ nu kɛdɔ gɛ le be bu eyinɔ, klɛ kɛkanyaka gɛ la ba da klɛ kɛdɔ nɛ kinu kɛdɔ gɛ la ba danɛ kɛdɔ nɛ klɛa bha lu ɔtɔ. 23Onu anɔ nɛ gɛ batɔ alɛ yɛ pɛ ebe nu tɛ enu.”
24Avɛ kɛlɛa bha sɛ, “Lu awɔ̃ nɛ kibui nɛ gɛ oonu nɛ mɔɔ mɔ.” “Kedzyidzyi nɔ gɛ kalɛ shui kɛxwɛ wɔ ɔwa nɛ, kalɛ la ba yɛ kɔ edzyidzyi akɔ wɔ nɔ, klɛ kɛ ba dɛa na. 25Aanɔ gɛ kɛdɔ lɛ yɛahwɛ ba ba kɔ yɛ kɛdɔ gelee, agɛ yɛahwɛ kɛma, kɛbhliyi nɔ nɛ gɛ kɛlɛ yɛahwɛ nɛ tsyɛ baa yɛkɛ kɛlɛ nɛ yɛahwɛ.”
Kɛkpalɛ Nɛ Kiyi Gɛ She Shu
26Aza ɖɔ asɛ, “Kana Kpaya bukusiɔŋakɔ nɛ odzi. Anyɛ teli ahwɛ eyi elu kesukpa. 27Elishi anɛ kemuze, adɔ tra o alɛ nɛ awɔ̃ o, kiyi nɛ kii yi klɛ kii she, pɔ etinyi kana gɛ kɛɛ bhɛtɛ pɛ kii she. 28Kesukpa nɛ kalɛ ishuahwɛ, ka kɔ sɛ kɛdɔ nɛ kiyu. Putɔnɔ eyuyu nɛ onugbu vuvɔ nɛ obo koeyi nɛ osi nɛ shu, ka kɛklɔ anɛ eyi nɛ gɛ akpasɛ lɛ mɛ nɛ ebe koeyi, flogo pɛ eyuyu nɛ ebe ti she nɛ eyi nɛ mɔɔmɔ. 29Kibee lɛ nɛ gɛ kɛdɔyi nɛ she pɛ kɛ kpã ko, ba yɛkɔ kɛpamɛ ko ba da kpa yɛ ayalɛ, alasɛ kɛlɛ kpa be na.”
Kɛkpalɛ Nɛ Ɔyurɔpɔɛeyi Shu
30Yesu ekee hunu asɛ, “Kɛdee lɔ ba ɖɔ sɛ kɛlɛ Kpayakusiɔŋakɔ nɛ odzi ansɛ, klɛ kɛkpalɛ ɖueɖu lɔ ba yɛkɔ shrɔ ɔkɛlɛ? 31Kpayakusiɔŋakɔ nɛ odzi anasɛ ɔyurɔpɔɛeyi gɛ baa hwɛ nɛ kesukpa. 32Flogo pɛ eeshe edzi osi nɛ ɛshɛgbla dɛ nɛ buka nɛ mɛ, gɛ buzhuɔɛ bu baa dɔ nɛ ɔlɛ mɛ.”
33Akpalɛa nɛ nɛdi Yesu ayɛkɔ akasɛ Kpaya kibui nɛ nɔ etsre banɔ, nɛ kana gɛ la ba na kibui nɛ kɛlɛe si nu. 34Yesu adɛ tsre yɛ banɔ nɛ kibuinyɛbui gɛ adɛ kpɛɛ lɛ kɛkpalɛ. Pɔ onu gɛ yɛ nɛ yɛ badɔkpasɛ nɛ tite bee li, adanɛ kibuinyɛbui mɛ petee akɔ balɛ.
Yesu Ayɔ Kɛlɛgɛganɛ Nu
35Kiwi lɛlɛ nɛ gɛ owulago nɛ ɔna, etsre yɛ badɔkpasɛ nɛ asɛ, “Nɔ kɔ lɔ tsɔkɛ vɛ ogbigbe bhla nɛa bha.” 36Gɛ ba shɛ̃ alɔ banɔɛza nɛ elu kide, ba gbanɔ yɛ ashɛ̃nɔ ansɛ gɛ aza opupu nɛ mɛ nɛ balɛ. Keniabha ipupu bhlatɔ tili tsyɛ za plɛnɔ yɛ. 37Keniabhalɛ gɛganɛɛ ba kpaa fu, gɛ kɛ kɔsɛ buni nɛ yalɛku opupu nɛ mɛ klɛ buni nɛɛ sɛsɛ vu balɛ. 38Kɛbee lɛ nɛ mɛ nɛ, Yesu ada vɛnɔ tra nɛ sumuia bha nɛ opupu nɛ kedeapɛ nɛ mɛ. Badɔkpasɛ na da nyɛmɛ yɛ klɛ bee tsre asɛ, “Adɔkasɛ, ɔdɛ yɛkɔ nɛ kɛlɛ mɛ onu gɛ keni nɛ kee vu lɔ nɛ dza?” 39Evua lɔ, akpɛ ozi nɛ kɛlɛɛ nia bha sɛ, “Kɔlenu! Dɔ sɛɛ̃!” Klɛ kɛlɛɛ nɛ yulɔ fu, klɛ ɔklɛ ɔdɔ sɛɛ̃. 40Etsre yɛ badɔkpasɛ nɛ asɛ, “Kidee so pɛ no si kifu kana? So tɛyɛyɛkɛŋa ka za wɔnɔ ahwɛ nɛ ɔtsɔ̃ nɛɛ dza?” 41Kifu kua lɛ tsutsɔmɔ tsɔmɔ klɛ bee bisi aglɔ asɛ, “Anee di naa? Gɛ kɛlɛɛ nɛ bunigiglebe tsyɛ ta yɛa tɔ!”
Seçili Olanlar:
Marko 4: tcd
Vurgu
Paylaş
Kopyala
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
© Ghana Institute of Linguistics, Literacy and Bible Translation
