Marko 11
11
Yerusalɛm Tɛtsutsoku Nɛ Kabhaŋɛŋa
1Gɛ be bunɔ Yerusalɛm pɛ le be ku Betfage nɛ Betania nɛ Olivɛ Butu nɛa bha, Yesu akpɛ yɛ badɔkpasɛ tɛabha, 2etsre alɛ, “Nɔ vɛ ɔmabhli nɛ gɛ oli wɔnɔ otugba nɛ mɛ, onu gɛ no tsoku ɔlɛ mɛ ko, nɔ bɔ mɔ Kitukuagaeyi teli nɛ ohwi mɛ, gɛ anɔnyanɔ aka za yɛa bha edi, no bule yɛ tɛ nɔ yɛkɔ mɛna ɔkɛ̃. 3Onu gɛ anɔ teli ebisi wɔnɔ sɛ ‘Kidee pɛ nɔɔ bhɛtɛ ana?’ No tsre yɛ ɔsɛ, ‘Apalete nɛ ya pɛɛ yɛ, klɛ le be tsodzinɛ yɛ amɛna nɛ kibe kplitaa mɛ.’ ”
4Ba vɛ bada mɔ kitukuagaeyi nɛ kidzo nu tɔ, gɛ ba kpaka nɛ kedunu. Kibe lɛ gɛ be bule yɛ nɛ, 5banɔ teli gɛ be li ɔkɛlɛ nee bisi asɛ, “Kide nɔɔ bhɛtɛ, pɛ noo bule kitukuagaeyi nɛ?” 6Be bu ishu nu ansɛ gɛ Yesu etsre alɛ sɛ ba ɖɔ, klɛ banɔ na kɔ balɛ kidzo klɛ ba shɛ. 7Gɛ ba yɛkɔ kitukuagaeyi nɛ amɛna Yesu pɛ ba yɛkɔ balɛ bawidzidze nɛ atrɔ yɛa bha beke, Yesu ewoku yɛa bha. 8Banɔ gelee be bule balɛ bawidzidze nɛ elu kidzo nɛa bha, klɛ beteli ba yɛkɔ awɔlakpa gɛ be dzyini edenɔ ayakpa mɛ nɛ elu kesi akɔ yɛ. 9Ba gɛ be putɔ nɛ bagɛ balɛ yɛe de naa kpɛ igugu asɛ,
“Hosiana!”
“Ba yula anɔ nɛ gɛ aaba nɛ Apalete nɛ kinyi mɛ!”
10“Bayula bulɔ aka Daviti bukusiŋɛŋa nɛ gɛ buba ba!”
“Hosiana nɛ Ɔɖɛɖamakɔdɛ!”
11Yesu eku Yerusalɛm klɛ avɛ Kpayavu nɛ mɛ. Elu awɔ̃ edi kɛdɔnyɛdɔ, pɔ gɛ keli kefli bele so, ekoeyi nɛ yɛ banɔkpɛkpɛ lɔfɔntɛabha nɛ avɛ Betani.
Yesu Akɛka Badɔdɛ Nɛ Ebu Nɛ Busɔlɛvu Nɛm
12Kelizɛza nɛ gɛ baa shɛ nɛ Betani nɛ, Bubhɛ baa yi Yesu. 13Amɔ kabhɔ nɛ kalɛ awulakpa teli asɛsɛ nɛ odzidzekɔ, avɛ asɛ tɛ ede di asɛ eyuyu teli akpasɛ ɔlɛ mɛ dza. Gɛ eku ɔlɛ ɔbha nɛ, awulakpa ko amɔ, alasɛ kibee lɛ nɛ dɛ nu osi nɛ kiyu be. 14Klɛ etsre osi na sɛ, “Anɔnyanɔ atɛa ŋa wɔ eyuyu denɔ ɔtsɔ̃ nɛ ɔyɛkɔ vɛ nɔ.” Klɛ yɛ badɔkpasɛ nɛ be nu kibui nɛ gɛ aɖɔ.
15Gɛ be de ku Yerusalɛm nɛɛ, Yesu etsoku busɔlɛvu buka nɛ mɛ, klɛ akpa bagɛ aba dɛ kɛdɔ anɛ bagɛ bee dzi dɔ nɛ ɔkɛlɛ. Etsyina bagɛ balɛ atsrakɛ ehoeyi nɛ baa kplɔ̃ nɛ ekumu, anɛ bagɛ bala dɛ bagɔgɔwi nɛ bugbu dzidze petee ekumu. 16Adɛ kɔ kidzo sɛ anɔnyanɔ aflanɔ kɛdɔ dɛdɛ kanyaka nɛ busɔlɛvu buka nɛ mɛ. 17Gɛ aakasɛ balɛ kɛdɔ, aɖɔ asɛ, “Sɛ ba ŋlɔmɛ elu asɛ,
“ ‘Bee klu mɛ bupa nɛ asɛ
amadi nɛ petee kpaya oklukɔ?’
Pɔ nɔ yɛkɔ ɔklɛ ɔbhɛtɛ ‘bezi ɔzakɔ.’ ”
18Gɛ Kpayaɔzakɔanɔ anɛ eshãdɔkasɛ nɛ be nu ana, ba kpa kidzo pɛ nɛ yɛ shu kɔ tiyiyi, alasɛ bee si yɛ kifu, alasɛ yɛ kɛdɔ kɛkasɛ nɛ yinɔ banɔɛza nɛ petee.
19Gɛ owulago nɛ ɔna, be koeyi nɛ ɔmagbla nɛ mɛ.
Kabhɔ Tsitsi
20Nɛ kɛvulɔ nɛ mɛ, gɛ baa fla nɛ, ba mɔ kabhɔ nɛ gɛ ketsi denɔ kalɛ igu nɛ mɛ. 21Petro abaka klɛ etsre Yesu asɛ, “Adɔkasɛ, di! Kabhɔ nɛ gɛ ɔɖɔɛbuiɔkpɛ nɛ ke tsi!”
22Yesu aɖɔ sɛ, “Yɛkɛ Kpaya kabha ɔŋa.” 23“Itsre nɔ kibuigba sɛ, onu gɛ anɔ teli ebe tsre butu nɛ asɛ, ‘Vɛ tɛ ɔdɔ tɛɛku aƒu mɛ,’ klɛ ɔyɛkɛ ɔŋa nɛ idzyim sɛ kɛ gɛ aɖɔ nɛ kɛ ba bhɛtɛ nɛ, kɛ ba ba klɛ mɛ kɔ wɔ. 24Klɛso nɛ itsre wɔnɔ sɛ, kɛdɔnyɛdɔ gɛ wɔ anɔ obo klu Kpaya obisi nɛ, yɛkɛ ɔŋa sɛ ɔtɛ yɛkɛ kɛlɛ, klɛ kɛba dzi wɔɛ yɛ. 25So, onu gɛ oli pɛ oklukpaya, pɛ anɔ teli kibui zizi kpasɛ wɔ ishu mɛ, yɛ kɔ otsye yɛ, tɛ wɔ aka nɛ owũsise tsyɛ ayɛkɔ wɔ buzizi nɛ etsye wɔ.” 26[Pɔ onu gɛ nɔ dɛ yɛkɔ otsye, klɛ wɔnɔ aka nɛ owũsise tsyɛ atɛ ba yɛkɔ wɔnɔ buzizi nɛ etsye nɔ.]
Yesu Kabhaŋɛŋa Nɛ Shu Ebui Bibisi
27Be ze be ku Yerusalɛm, klɛ gɛ Yesu aaga nɛ busɔlɛvu buka nɛ mɛ, kpayaɔzakɔanɔ anɛ ɛshãdɔkasɛ anɛ beshishe ba ga ebunɔ yɛ. 28Be bisi Yesu asɛ, “Kabhaŋɛŋa ɖuweɖu mɛ ɔyɛkɔ bhɛtɛ ebui anɛ?” “Klɛ anee yakɔ wɔ kabhaŋɛŋa nɛ asɛ tɛ ɔbhɛtɛ ebui anɛ?”
29Yesu ebu aɖɔ sɛ, “Ɛba bisi wɔnɔ kibui tirikpo. Nó bui lɛ nu ɔkɔ mɛ, klɛ ɛba tsre wɔnɔ ɔkɛlɛ gɛ idenɔ kabhaŋɛŋa pɛ ɛbhɛtɛ ebuia nɛ petee. 30Yohanɛsɛ bunikpɛkpɛ nɛ, owũsise bu de pɛnɔɔ banɔdzyrame ɔkɔ? Nɔ tsre mɛ!”
31Ba nyɛna kibui nɛ aglɔm klɛ laa ɖɔ asɛ, “Bu ɖɔ sɛ, ‘Kpaya ɔkɔ nɛɛ,’ ebe bisi asɛ, ‘Kɛlɛ kide so pɛ bu dɛ yɛkɛ yɛ kabha ŋa?’ 32Pɔ onu gɛ buɖɔ sɛ, ‘Kide banɔdzyrame ɔkɔ’....” (Bee si banɔ, alasɛ anɔnyanɔ ayɛkɛ aŋa sɛ Yohanɛsɛ nɛ atɔnu yɛ edzi.)
33So bebu klɛ nu akɔ Yesu asɛ, “Bu tinyi.” Yesu asɛ, “Mɛ tsyɛ ɛtɛ ba tsre wɔnɔ ɔkɔ nɔɔ nɛ gɛ idenɔ mɛ kabhaŋɛŋa nɛ gɛ ɛyɛkɔ bhɛtɛ ebui nɛ nɔ.”
Seçili Olanlar:
Marko 11: tcd
Vurgu
Paylaş
Kopyala
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
© Ghana Institute of Linguistics, Literacy and Bible Translation
