Mateo 9
9
Yesu Ebeke Anɔgbɛgba Bunya
1Yesu atɛɛ ku kenia bha opupu toli mɛ, klɛa tsɔkɛ avɛ yɛ nahwɛ ɔma nɛ mɛ. 2Banɔ teli be tuku anɔgbɛgba nɛ oputsoa bha ebe lu. Gɛ Yesu amɔ bagɛ ba mɛna anɔ nɛ tɛyɛyɛkɛŋa, etsre anɔgbɛgba nɛ asɛ, “Kpɛɛ te, meyi; ba yɛkɔ wɔ buzizi nɛ etsye wɔ.”
3Nɛ kɛɛ anɛ nɛ shu, ɛshãdɔkasɛ nɛ ba kpa ɖɔ nɛ aglɔ mɛ asɛ, “Anyaa nɛɛ aabhɛtɛ ebusobui!”
4Gɛ Yesu atɛ mɔ balɛ atɔkpu nɛ mɛ so, aɖɔ asɛ, “Kide so pɛɛ nɔ nyɛna atɔkpumkpã ebui ɔkpɛ wɔnɔ idzyi mɛ ana? 5Kiɖue gɛ lɛ bubɔɛbɔɛ dɛ: sɛ tɛ baɖɔ asɛ, ‘Ba yɛkɔ wɔ buzizi nɛ etsye wɔ,’ pɛnɔɔ sɛ tɛ baɖɔ asɛ, ‘Lɔ tɛ ɔga’? 6Pɔ sɛ tɛ no ti sɛ Anɔdzyrame Yeyi nɛɛ kabhaŋɛŋa ka lɛ yɛahwɛ nɛ kesukpa nɛa bha sɛ tɛ ayɛkɔ buzizi etsye.” Klɛ aɖɔ etsre anɔgbɛgba nɛ asɛ, “Lɔ, yɛkɔ wɔ oputso tɛ ɔga vɛ bupa mɛ.” 7Klɛ anyɛ nɛ alɔ klɛ ashɛ̃ avɛ bupa mɛ. 8Gɛ banɔɛza nɛ ba mɔ ebuia nɛɛ, kɛ bhɛtɛ balɛ bi, klɛ ba kpɛ Kpaya nɛa bha, agɛ yɛ akɔ banɔ kabhaŋɛŋɛa nɛɛ di.
Mateo Tɛ Kukulu
9Gɛ Yesu aba shɛ edenɔ ɔkɛlɛ, amɔ anɔ teli gɛ be kulu asɛ Mateo gɛ ezhedzi badɔdzyɔ kɛkpako nɛ mɛ. Yesu etsre yɛ asɛ, “Za mɛe de,” klɛ Mateo evualɔ klɛ atɔnɔ yɛ.
10Gɛ Yesu edzi aŋa kɛdɔ nɛ Mateo bupa mɛ, badɔdzyɔ gelee nɛ “bezizi” nɛ ba ba ŋa kɛdɔ nɛ aplɛnɔ yɛ anɛ badɔkpasɛ. 11Gɛ Farisianɛ na mɔa na, be bisi yɛ badɔkpasɛ nɛ asɛ, “Kide so pɛɛ wɔnɔ Adɔkasɛ nɛ xũ nɛ aaŋa kɛdɔ nɛ badɔdzyɔ anɛ ‘bezizi’?”
12Gɛ enu balɛ tibibisi, Yesu etsre alɛ asɛ, “Ganɛ agɛ ataa nya nɛ yɛ ebisi awani, anyɛnya yɛ alɛ kɔ awani. 13Pɔ nɔ vɛ tɛ nɔ dɔ pɛɛ kibui nɛe si onu: ‘Ɛpɛɛ eshutukubui didi, ganɛ busoyiyi.’ Alasɛ ɛdɛ ba kɔ badzyɔgo nɛ tɛkukulu, pɔ kɔ bezizi.”
Be Bisi Yesu Ebui Nɛ́ Onugbu Nyɛnya Shu
14Klɛ Yohanɛsɛ badɔkpasɛ nɛ ba klɛ be bisi Yesu asɛ, “Kide so pɛɛ bulɔ anɛ Farisianɛ nɛ bunya onugbu pɛɛ, wɔnɔ nɛ wɔ badɔkpasɛ nɛ xũ nɔ tɔɔ nya onugbu?”
15Yesu ebui lɛ nu asɛ, “Klɛ adzɛenyine befu ebe ze bi yɛ nɛ kibe lɛ gɛ alɛ balɛ ɔbha? Kibe tili baa ba gɛ ba ba nyɛna adzɛenyine nɛ agbanɔ ashɛ̃nɔ nɛ balɛ ɔbha, ka ba nya onugbue.
16“Anɔnyanɔ atɛ yɛkɔ kɛpɔtɛ gɛ ka dzi kɛkuku akamɛ atsa nɛ kɛvuvɔ, alasɛ ɔkamɛkɔ nɛ ɔbɔ tsyɔɛ koeyi nɛ kɛpɔtɛ nɛ shu, gɛ kɛ ba kɔ sɛ tɛtsyutsyɔɛ nɛ tsɔmɔ dɛa na. 17Kana ke anɔ atɛ yɛkɔ bulu vuvɔ akpɛ keluplui kuku mɛ. Onu gɛ baa bhɛtɛ ana, keluplui nɛ ka ba yɛɛ, klɛ bulu nɛ ba balɛ zi. Owo, bulu vuvɔ nɛɛ kelutsukpu vuvɔ mɛ la kpɛ bulɛ ka editabha na za mɔmɔe.”
Yesu Anyɛmɛ Adzɛnuvɔɛ Tsitsi Klɛ Ebeke Adzɛ Teli Bunya
18Kibe lɛ gɛ edzi aɖɔ ebuia nɛ, ekusi teli aba edzu ekuisie si akɔ yɛ klɛ aɖɔ asɛ, “Meyiadzɛ nuvɔɛ nɛ etsi ɔtsɔtsiɔ̃. Pɔ bɔ trɔ ahwɛ nɛ yɛa bha tɛ anyɛmɛ.” 19Yesu alɔ klɛ aza anyɛ nɛe de avɛ, klɛ yɛ badɔkpasɛ nɛ tsyɛ atɔnɔ yɛ.
20Nɛ kibe lɛ nɛ mɛ adzɛ teli gɛ dzyosu eekoeyi nɛ yɛ shu agɔ lɔfɔntubha nyɔɔ, aga yɛede klɛ ebe hunɔ yɛ awi nɛ butɔ. 21Adzɛ nɛ aɖɔ etsre yɛ shu asɛ, “Onu gɛ ɛhunɔ yɛ awi nɛ butɔ nɛ ko, mɛ bunya nɛ ba beke.”
22Yesu etsyina edi adzɛ. Klɛ aɖɔ asɛ, “Kpɛɛ te, eyiadzɛ,” “wɔ tɛyɛyɛkɛŋa nɛ tɛ beke wɔ bunya.” Klɛ adzɛ nɛ bunya nɛ gbla beke kɔ yɛ denɔ ɔɖɔ lɛ nɛ mɛ.
23Gɛ Yesu etsoku agɛ aaŋɛabha nɛ bupa nɛ mɛ amɔ bagɛ baa bɔ ezhue anɛ banɔɛza anɛ igugu kpɛkpɛ, 24klɛ asɛ, “Nɔ shɛ nɛ ɔklɛ. Adzɛnuvɔɛ nɛ edi tsi pɔ tra yɛa dɔ.” Pɔ banɔ nɛ amɔɛ yɛ. 25Gɛ be bu banɔɛza nɛ eyinɔ beke, Yesu etsoku atɔnɔ adzɛnuvɔɛ klɛ ada nyɛna yɛ ɔhwɛ klɛ evu alɔ. 26Yɛ tɛnyɛnyɛmɛ nɛ yi kana nɛ kibee lɛ nɛ petee.
Yesu Ebeke Anhũpu Nɛ Omumuu Banya
27Gɛ Yesu ashɛ̃ aavɛ denɔ ɔkɛlɛ, awɔ̃hũ pupuelete tɛabha ba za yɛe de, nɛ yɛ tɛ kukulu sɛ, “Di bulɔ eshutukubui, Daviti Yeyi!”
28Kibe lɛ nɛ gɛ etsoku buvu nɛ mɛ beke, awɔ̃hũ pupuelete tɛabha ba tɔnɔ yɛ avɛ, klɛ ebisi balɛ asɛ, “Nɔ yɛkɛ ɔŋa sɛ ɛba na kibui nɛ bubhɛtɛ?”
Be bui lɛ nu asɛ, “Ee, Apalete.”
29Ɔkɛlɛ Yesu ehunɔ balɛ awɔ̃hũ nɛ klɛ aɖɔ asɛ, “Nɛ wɔnɔ tɛyɛyɛkɛŋa nɛ nu kɛ ba kɛlɛ mɛ kɔnɔ”, 30klɛ balɛ awɔ̃hũ nɛ adanɛ. Yesu akpɛ balɛ ɔshã gɛganɛɛ asɛ, “Nɔ dii lɛ ɔkɔ sɛ anɔnyanɔ eti ti kibuinyɛbui edenɔ kibui nɛ shu.” 31Pɔ ba shɛ avɛ ada kaka kibui nɛ akpɛ kibe lɛlɛ nɛ mɛ petee.
32Gɛ bee koeyi nɛ ɔkɔlɛ, ba yɛkɔ anyɛ teli gɛ ɔfufɔɛkpã otsri yɛa bha pɛɛ ataa na kaɖɔ ɖɔ nɛ amɛna Yesu. 33Klɛ gɛ akɛka ɔfufɔɛ nɛ ebu beke anyɛ nɛ akpa kaɖɔ ɖɔ. Kibui nɛ bhɛtɛ banɔɛza nɛ bi klɛ ba ɖɔ asɛ, “Kibuinyɛbui ana ka ba kɛlɛ mɛ di nɛ Izraɛl.”
34Pɔ Farisianɛ na asɛ, “Ɔfufɔɛkpã ekusi nɛa bha aaga pɛ aakɛka ɛfufɔɛkpã nɛ ebu.”
Baxwɛwa Nɛ Be Di Kpe
35Yesu aga ɛma anɛ ɛmabhli nɛ petee mɛ, aakasɛ dɔ nɛ ixogokɔevu nɛ mɛ, klɛ aaɖɔ kibui dzyɔgo nɛ edenɔ bukusiɔŋakɔ nɛ shu klɛ eebeke banyanyanya nɛ banɔ mɛ. 36Gɛ amɔ banɔɛza, eshutukubui eku yɛ nɛ balɛ, alasɛ ba kpɛ balɛ bunuhu klɛ tɛpɛplɛnɔ kɛma kɔa lɛ, ansɛ ibhoshi gɛ agbɛgbanɔ ama kɔ ɛlɛ. 37Klɛ etsre yɛ badɔkpasɛ nɛ asɛ, “Kɛdɔbubu nɛ lɛ kpi pɔ baxwɛwa nɛ ba dɛ na tɛashɛ̃. 38No bisi Kɛxwɛaka sɛ tɛ asɛsɛ baxwɛwa nɛ buya nɛ mɛ.”
Seçili Olanlar:
Mateo 9: tcd
Vurgu
Paylaş
Kopyala
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
© Ghana Institute of Linguistics, Literacy and Bible Translation
