Mateo 3
3
Yohanɛsɛ Enikpɛ Nɛ Kidzo Gɛgamɛ
1Nɛ ewia lɛlɛ nɛ mɛ Yohanɛsɛ Enikpɛ nɛ aba, nɛ kibui nɛ tɛɖuɖɔ nɛ Yuɖea Ayakpam, 2klɛ aaɖɔ asɛ, “Tsyinaɛtem, alasɛ owũsise bukusiɔŋakɔ nɛ otsobunɔ.” 3Yɛ enu agɛ yɛ bui ba ɖɔ ganɔ Yezaya atɔnu nɛa bha:
“Anɔ olim toli gɛ okulu nɛ ayakpamɛ,
‘Gamɛ kidzo nɛ olu kɔ Apalete,
bu edzo dzyudzyɔ kɔ yɛ.’ ”
4Yohanɛsɛ kɛdɔnyunyumu kipuaga tɛka la bhɛtɛ lɛ nɔ, klɛ kazaplukpa ɔdzadi ɔkana yɛa shɛ. Yɛ kɛdɔŋɛŋa klɛ dzi ahwaye anɛ betsiuni. 5Banɔ be koeyi edenɔ Yerusalɛm anɛ Yuɖea petee anɛ Yɔɖan kɛdɔ nɛm petee atɔnɔ yɛ. 6Be bu balɛ buzizi nɛ aɖɔ, klɛ akpɛ buni akɔa lɛ nɛ Yɔɖan Keni nɛm.
7Pɔ gɛ amɔ Farisianɛ anɛ Sarusianɛ gɛ baa ba ɔkɛlɛ gɛ aakpɛ buni, etsre alɛ asɛ, “Wɔnɔ atagblashã yam banɔ! Anee ye tsre nɔ sɛ no si ɔlɔ butɔ nɛ gɛɛ ba? 8No yu eyuyu anɛ kitemtsyitsyina nyɛnyɛna vunɔm. 9Klɛ nɔ tɛ bhɛtɛ kɛtɔkpum sɛ nɔ bɔ na wɔnɔ shu ɖɔ tsre sɛ, ‘Abraham alɛ bulɔ ahwɛ ansɛ aka.’ Itsre wɔnɔ sɛ denɔ aklãgbua nɛ mɛ Kpaya aba na beyi bu kɔ Abraham. 10Kawɛ nɛɛ ke tsri isigu nɛa bha kukuu ku, klɛ osi kanyaka gɛ ɔtɛ bo yu eyuyu dzyɔgo be be tẽ ɔlɛ ebho klɛ la ba yɛkɔ atɛ̃a kpɛ kifum.
11“Ɛɛkpɛuni kɔ wɔnɔ nɛ buni kɔ kite mɛ tsyitsyina. Pɔ mɛede anɔ nɛ gɛ alɛ kemi adɛ mɛ aba ba, yɛ butsrukpɔaklɔ tsyɛ ɛdɛ na gɛ ɛba vunɔ. Yɛ aba kpɛuni kɔ nɔ nɛ Ɔfufɔɛ Dzyɔgo anɛ kifu. 12Yɛ, kawɛ̃sa nɛ kalɛ yɛ ahwɛmɛ, klɛ ebe ŋuse yɛ kedzripi, aba yalɛ yɛ agɔnɛ nɛ ada kpɛ owulem klɛ aba pɔɛ tɛhwɛ nɛ kifu gɛ tɛ ba ni di mɛ.”
Bunikpɛkpɛ Kɔ Yesu
13Ɔkɛlɛ Yesu aba denɔ Galelia ebe ku Yɔɖan sɛ tɛ Yohanɛsɛ akpɛuni kɔ yɛ. 14Pɔ Yohanɛsɛ edi asɛ tɛ aplɛ yɛ, aaɖɔ asɛ, “Mɛ kɛlɛ sɛ tɛ ɔkpɛuni ɔkɔ, klɛ mɛ ɔkɔ ɔba?”
15Yesu ebui lɛ nu asɛ, “Kɔ kɛ za na ɔtsɔ̃; kɛbɔ sɛ tɛ bubhɛtɛ ana sɛ tɛ kɛ na nɛ tɛzɛza dzyɔgo mɛ petee.” Klɛ Yohanɛsɛ ayɛkɛ lɛ.
16Gɛ banya kpɛuni nɛ akɔ Yesu beke ko, klɛ ewu ekoeyi nɛ buni nɛm. Nɛ kibe lɛ nɛ mɛ owũsise nɛ ɔdanɛ, klɛ amɔ Kpaya Ɔfufɔɛ nɛ gɛ ozhi ɔɔba anasɛ gɔgɔwi anɛ kifuɔmɔɛ nɛ ɔza yɛa bha. 17Klɛ oli toli mɛ ode owũsise sɛ, “Meyi naa, gɛ ɛdɛmɛnɔ; yɛm mɛ mɔ awɔ̃kuku mɔmɔ.”
Seçili Olanlar:
Mateo 3: tcd
Vurgu
Paylaş
Kopyala
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
© Ghana Institute of Linguistics, Literacy and Bible Translation
