Mateo 20
20
Kɛkpalɛ Nɛ Baxwɛwa Nɛ Vãyɛ̃ Buya Shu
1Yesu avɛ kɛlɛa bha sɛ, “Alasɛ owũsise bukusiɔŋakɔ nɛ ɔlɛ ansɛ kesukpaelete teli gɛ alɔ kɛvulɔ pinii avɛ sɛ tɛ ada pɛɛ banɔ tɛ ba da wa kɛxwɛ kɔ yɛ nɛ buya mɛ. 2Adɛmɛ asɛ aba bua kiwi zɛzɛ kɛbhɛ gɛ nu dinario akɔa lɛ, klɛ asɛsɛ balɛ nɛ buya nɛ mɛ.
3“Nɛ kɛvulɔ ɛɖɔ tizhita mɛ ana, ekoeyi ada mɔ banɔ nɛ teli gɛ be li titi nɛ kedzi mɛ gɛ ba taa bhɛtɛ kɛdɔnyɛdɔ. 4Klɛ etsre balɛ asɛ, ‘Wɔnɔ tsyɛ nɔ vɛ tɛ nɔ dɔ wa kɛxwɛ nɛ mɛ buya nɛ mɛ, tɛ ɛba buya kɛbhɛ nɔɔ nɛ gɛ dzyenɔ nɛ ɛkɔ nɔ.’ 5Kɛlɛ so ba vɛ.
“Anyɛ nɛ eze koeyi nasɛ kemuze ɛɖɔ lɔfɔntɛbha nɛ ɛɖɔ tɛta mɛ ana klɛ aza da bhɛtɛ ana. 6Anasɛ owulago ɛɖɔ titi mɛ ana eze koeyi avɛ ada mɔ banɔ teli gɛ be ke li akana. Ebisi balɛ asɛ, ‘Kide no li ɔkɛ̃ nɛ ɔbhɛtɛ kiwi nɛ mɛ petee kɛxwɛnyɛxwɛ mawamawa?’
7Be bui lɛ nu asɛ, “ ‘Alasɛ anɔnyanɔ adɛ ba yɛkɔ lɔ.’
“Ɔkɛlɛ etsre alɛ asɛ, ‘Wɔnɔ tsyɛ nɔ vɛ tɛ nɔ dɔ wa kɛxwɛ nɛ mɛ vãyɛ̃ buya nɛ mɛ.’
8“Gɛ owulago nɛ ɔna, ayalete nɛ etsre yɛ baxwɛwa otugbanɔ nɛ asɛ, ‘Kulu baxwɛwa tɛ ɔbuya balɛ abhɛ nɛ ɔkɔ alɛ, tɛ ɔkpɛe si denɔ banɔ gugɔɛ nɛ gɛ ɔyɛkɔ nɛa bha ɔdɔ nanɔ ba tutɔpu.’
9“Baxwɛwa nɛ gɛ ba yɛkɔ nɛ ɛɖɔ titi mɛ na ba klɛ akanyaka ayɛkɛ dinario terikpo. 10So ba gɛ be bhuso yɛkɔ nee di kidzoenu sɛ balɛ kɛbhɛ nɛ ba vɛ otugba dɛ. Pɔ balɛ tsyɛ dinario terikpo ko la kɔa lɛ. 11Gɛ ba yɛkɛ kɛbhɛ nɛ beke, bakpa kaɖɔ ɖɔ nɛ ayaelete nɛ shu. 12Baa ɖɔ asɛ, ‘banɔ nɛ gɛ ba yɛkɔ gɔgɔɛ ɔɖɔ torikpo ko la yɛkɔ awa kɛxwɛ,’ ‘klɛ ɔbhɛtɛ balɛ la sɔnɔ lɔ gɛ wa kɛxwɛ nɛ ɔgbɛgbla kɔ nɛ buwui nɛa bha kiwi zɛzɛ petee.’
13“Pɔ ebui lɛ nu etsre terikpo asɛ, ‘Ɔbhɛa, nɛ sɛ ɛtɛɛ bhɛtɛ wɔ mɔmɔ. Anɛ kiwi zɛzɛ bhɛ gɛ nu dinario terikpo ɔdɛmɛ sɛ ɔbɔ wa kɛxwɛ nɛ ɔkɔ? 14Yɛkɛ wɔ kɛbhɛ tɛ ɔshɛ. Ɛpɛɛ sɛ tɛ ɛbua kɛbhɛ kɔ anɔ gɔgɔɛ nɛ gɛ ɛyɛkɔ ansɛ gɛ ɛkɔ wɔnɔ. 15Kidzo ma mahwɛ sɛ tɛ ɛbhɛtɛ kɛdɔnɔ nɛ gɛ ɛpɛɛ nɛ mɛnahwɛ ehoeyi nɛ dza? Ɔɔkpɛ mɛ awɔ̃ alasɛ mɛ ɛyamɛ yɔ so dza?
16“So agugɔɛ nɛ ebe dzi atutɔpu, klɛ atutɔpu nɛ ebe dzi agugɔɛ.”
Yesu Aza Ɖɔ Kaɖɔ Nɛ Yɛ Butsi Nɛ Shu Elu
17Gɛ Yesu ashɛ̃ aavɛ Yerusalɛm, agbanɔ badɔkpasɛ lɔfɔntɛabha nɛ eyinɔɛ de klɛ etsre balɛ asɛ, 18“Bu shɛɛ vɛ Yerusalɛm, klɛ ba ba ga Anɔdzyrame yɛ Eyi nɛesi akɔ kpayaɔzakɔanɔ anɛ ɛshãdɔkasɛ. Be be bu yɛ butsipɔ, 19klɛ ba ba yɛkɔ yɛ akpɛ bagɛ be di nu Yuɖanɛ nahwɛ gɛ la ba kpɛ butsɔ klɛ be be tu yɛ klɛ la ba kplayɛasɔ butsiosi shu. Nɛ kiwi tramɛ nɛa bha be be tsodzini yɛ anyɛmɛ amɛna ɛkpã mɛ!”
Eni Kɛdɔpɛpɛɛ
20Ɔkɛlɛ Zebeɖi yeyianyɛalɛ anɛ balɛeni nɛ aba Yesu ɔbha anɛ yɛ beyianyɛ klɛ, gɛ edzu ekuisiesi, ebisi eshutukubui didi denɔ yɛ ɔkɔ.
21Ebisi asɛ, “Kide ɔsɛ ɔpɛɛ?”
Klɛ adzɛ nɛ asɛ, “Trɔ ahwɛ kɛlɛa bha sɛ tɛ meyianyɛ tɛabha nɛ ɔmayɛ teli aza wɔ kɛŋa mɛ tɛ abhla nɛ aza wɔ kɛbɛtɛkpɛ mɛ nɛ wɔ bukusiɔŋakɔ.”
22Yesu etsre yɛ asɛ, “Oti nyi kɛdɔnɔ nɛ gɛ oobisi.” “Ɔbɔ na buniatse nɛ gɛ ɛba wɛ̃ nɛ ɔwɛ̃ xãa?”
Be bu kɛlɛ nu asɛ, “Buba na.”
23Yesu etsre alɛ asɛ, “Nɔ bɔ na kantse nu wɛ̃ kɛgba, pɔ mɛ kɛŋa mɛ anɛ kɛbɛtɛkpɛ mɛ zɛza ganɛ mɛ ba kɔ kɛlɛ. Ɛzakɔɛ lɛ nɛ lɛ kɔ bagɛ mɛ Aka abala elu kɔ ɔklɛ.”
24Kibe lɛ gɛ banɔ lɔfɔ nɛ nu kibui nɛɛ, ba mɔ obulo nɛ badzya tɛabha. 25Yesu eklua lɛ exogo klɛ asɛ, “No nyi sɛ ba gɛ be di nu Yuɖanɛ ba ŋa balɛ ɔkɔayɛ nɛa bha, klɛ balɛ banɔgbla na wa kabhaŋɛŋa shuixwɛ nɛ balɛa bha. 26Kɛ ma kɔ wɔnɔ kana. Nɛ klɛ shu, aanɔ nɛ gɛ apɛɛ sɛ tɛ edzi agbɛgbla nɛ wɔnɔɛ shi ala sɛ tɛ edzi wɔnɔ axwɛdɛ, 27klɛ aanɔ nɛ gɛ apɛa sɛ tɛ edzi atutɔpu, alasɛ tɛ edzi wɔnɔ axwɛdɛ, 28anasɛ gɛ Anɔdzyrame yɛ Eyi nɛ adɛ ba sɛ tɛ ba dɛ axwɛ akɔ yɛ, pɔ aba sɛ tɛ aba dɛ axwɛ, tɛ ayɛkɔ yɛ ɛkpã nɛ abuya anasɛ kɛbhɛ nɛ banɔɛ tɔkpu.”
Bawɔ̃hũpu Tɛabha Ba Mɔ Anhũ Dɛdanɛ
29Gɛ Yesu nɛ yɛ badɔkpasɛ nɛ baa shɛ nɛ Yeriko, banɔɛza piim za yɛe de. 30Bawɔ̃hũpu tɛabha teli ba za kidzo nu tɔ, klɛ gɛ be nu asɛ Yesu aafla, ba kpɛ ogugu asɛ, “Apalete, Daviti yɛ Eyi, di lɔ eshutukubui!”
31Banɔɛza na kpɛ ogugu nɛ balɛa bha sɛ badɔ sɛɛ̃, pɔ ba za kpɛ ogugu nɛ gɛganɛɛ adɛa na, “Apalete, Daviti yɛ Eyi, di lɔ eshutukubui!”
32Yesu adzrɔ klɛ ekulua lɛ. Ebisi alɛ asɛ, “Kide nɔ sɛ ɛbhɛtɛ kɔ nɔ?”
33Be bui lɛ nu asɛ, “Apalete, bu pɛɛ sɛ mɔ.”
34Yesu edi alɛ eshutukubui klɛ ehunɔa lɛ awɔ̃hũ. Klɛ ba gbla kpaa mɔ klɛ la lɔ alɛ yɛe de.
Seçili Olanlar:
Mateo 20: tcd
Vurgu
Paylaş
Kopyala
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
© Ghana Institute of Linguistics, Literacy and Bible Translation
