Mateo 18
18
Agbɛgbladɛ Nɛ Owũsise Bukusi Nɛm
1Nɛ kibe lɛ nɛ mɛ Badɔkpasɛ nɛ ba tɔnɔ Yesu aba klɛ be bisia sɛ, “Anee ya dɛ nɛ owũsise bukusiɔŋakɔ nɛ mɛ?”
2Ekulu anuvɔ bhli teli klɛ akɔ yɛ alɔ kititi nɛ balɛ shi. 3Klɛ aɖɔ asɛ: Itsre nɔ kɛgba sɛ, odɛ nu sɛ no tsyina klɛ nodzi ansɛ banuvɔ bhli, nɔ tɛ bɔ na owũsise bukusiɔŋakɔ nɛ mɛ tsoku odi. 4Kɛlɛ so, anɔnyanɔ gɛ anyɛna shu ansɛ anuvɔ bhlia nɛɛ yɛ enu agbɛgbladɛ nɛ owũsise bukusiɔŋakɔ nɛ mɛ.
5“Klɛ anɔnyanɔ gɛ aba yɛkɛ anuvɔ bhlia nɛ akpɛ etem nɛ mɛ kinyi mɛ, ayɛkɛ mɛ. 6Pɔ onu gɛ anɔ teli aba kɔ sɛ beyi bhlia nɛ di gɛ ba yɛkɛ mɛa bha ŋa nɛ be de ku buzizi mɛ, aba pɛ kɔ yɛ adɛ onu gɛ ba yɛkɔ buhɔ gbla tsa kpɛ yɛ oli pɛ ba yɛkɔ ada tɛ̃ akpɛ aƒu odzudzukɔ.
7“Butɔ kɔ kanɔ alasɛ ebui nɛ gɛ alɛ ka lɛ mɛ gɛ etii banɔ akpɛ buzizi mɛ nɛ so! Ebui alɛlɛ nɛ di alasɛ tɛ la ba, pɔ butɔ kɔ anɔɔ nɛa bha gɛ la ba ga aba! 8Onu gɛ wɔ ɔhwɛ ɔdɔgɔsɛ wɔ ɔtsrɛ ɔbɔ kɔ sɛ odo ku buzizi mɛ, bhui ɔlɛ ɔtɛ̃. Aba pɛ kɔ wɔ sɛ tɛ otsoku ɛkpãm nɛ ɔtsrɛ bhubhui anɛ ɔhwɛ bhuibhui ɔkɔ dɛ sɛ ba yɛkɔ wɔ ada tɛ̃ akpɛ kifu manimani mɛ nɛ ɛhwɛ tɛbha anɛ ɛtsrɛ tɛbha. 9Klɛ onu gɛ wɔ kɛwɔ̃hũ tili kɔ sɛ tɛ odo ku buzizi mɛ, kpa kɛlɛ ɔtɛ̃. Aba pɛ̃ kɔ wɔ adɛ sɛ tɛ otsoku ɛkpãm nɛ kɛwɔhũ tirikpo, ɔyɛkɔ dɛ sɛ tɛ ba yɛkɔ wɔ ada tɛ̃ akpɛ kifu manimani mɛ nɛ awɔ̃hũ tabha.
Kɛkpalɛ Nɛ Obhoshi Lɛlɛla Shu
10“Di kɛlɛ ɔkɔ sɛ no ti di bunuvɔɛ bhlia nɛ ɔmɛayɛ kanyaka bhliyii. Alasɛ itsre nɔ sɛ balɛ baxwɛdɛ nɛ owũsise naa mɔ mɛ Aka nɛ owũsise nɛ amɛ kibenyɛbe. 11Anɔdzyrame yɛ Eyi nɛ aba sɛ tɛ ebe bu kɛdɔ nɛ gɛ kɛ lɛla.
12“Wɔ kɛtɔkpu nɛ mɛ sɛ kɛ lɛɛ? Onu ibhoshi kɛfɔɛfɔ lɛ anyɛ teli ahwɛ, klɛ toli ɔlɛla, ataa shɛnahwɛ afɛtezhita nɛ tiezhita nɛ shu elu avɛ ada pɛɛ ɔgɛ ɔlɛla? 13Klɛ onu gɛ aamɔ ɔlɛ, kɔ mɛ tsre nɔ kɛgba, aba mɔ same nɛ ɔlɛ shu ɔyɛkɔ dɛ afɛtezhita nɛ tiezhita nɛ gɛ ɛdɛ lɛla. 14Kana wɔnɔ Aka nɛ owũsise tsyɛ atɛ ba pɛɛ asɛ tɛ banuvɔ bhlia nɛ kanyaka alɛla.
Adzya Nɛ Gɛ Abhɛtɛ Buzizi Amɛna Wɔkɔ
15“Onu gɛ wadzya abhɛtɛ buzizi amɛna wɔkɔ, vɛ tɛ odo bu buzizi nɛ ɔkasɛ yɛ, nɛ wɔnɔ nɛ yɛ tɛa bha shi ko. Onu gɛ enu kɛlɛesi akɔ wɔ, klɛ wɔnɔ nɛ yɛ no bo tsodzi ɔza terikpo. 16Pɔ onu gɛ eti be nu wɔesi, yɛkɔ anɔ terikpo tɛabha ɔta shu, sɛ tɛ ‘kibuinyɛbui mɛ ba danɛ ganɔ bebuimɔɖɔ tɛabha tɛata amɛ.’ 17Onu gɛ adɛ ta balɛ tsyɛ batɔ, yɛkɔ kibui nɛ ɔkɔ busɔlɛɔha, klɛ onu gɛ adɛ ta ɔha nɛ tsyɛ atɔ, klɛ tɛ ɔyɛkɔ yɛ ansɛ anɔ gɛ adɛ sɔlɛ klɛ enu ansɛ adɔdzyɔ gɛ edzyini anɔa kpɛ.
18“Itsre nɔ kɛgba sɛ, kɛkanyaka gɛ nɔ nya nɛ kesukpa nɛa bha kɛ ba za tɛnyɛnyam nɛ owũsise, klɛ kɛgɛ no bule nɛ kesukpa nɛa bha, be be bule kɛlɛ nɛ owũsise.
19“Ɛkaa ɖɔ sɛ, onu wɔnɔ tɛabha teli nɛ kesukpa nɛa bha nɔ dɛmɛ ɔtrɔ kɛdɔnyɛdɔa bha pɛ no bisi, mɛ Aka nɛ owũsise aba bhɛtɛ kɛlɛ akɔ nɔ. 20Alasɛ ɔkɛlɛ gɛ banɔ tɛabha tɛata be xogo nɛ mɛ kinyi mɛ, ɛlɛ balɛɛ shi.”
Kɛkpalɛ Nɛ Axwɛdɛ Gɛ Etee Di Eshutukubui Shu
21Ɔkɛlɛ Petro atɔnɔ Yesu aba klɛ ebisi yɛ asɛ, “Apalete, etsye tashɛ̃ mɛ ɛba yɛkɔ itsye madzya gɛ abhɛtɛ kibui kpã amɛna mɛ ɔkɔ? Ɔdɔ nanɔ etsye tegene dza?”
22Yesu ebui lɛ nu asɛ, “Itsre wɔ, ganɛ etsye tegene, etsye afɛtegene edi tegene.
23“Kɛlɛ so, owũsise bukusiɔŋakɔ nɛ lo dzi ansɛ ekusi gɛ apɛa sɛ tɛ aga yɛ kɔba ebuim nɛ yɛ baxwɛdɛ. 24Gɛ akpɛ ebuim gɛga nɛesi, ba gbanɔ anyɛ teli gɛ adɔ yɛ bhɛ gblagbla amɛna yɛ. 25Gɛ anyɛ nɛ adɛ mɔ kɔba nɛ abuya so, apalete nɛ akɔ sɛ ba yɛkɔ anyɛ anɛ yɛedzini anɛ yɛeyialɛ anɛ yɛ kɛdɔnyɛdɔ gɛ lɛ yahwɛ nɛ adɛ, tɛ ba yɛkɔ abuya kɛbhɛ nɛ nɔ.
26“Axwɛdɛ nɛ ezhi adɔ ekuisia bha kɔ apalete. Akɔ kɛtɔkpu asɛ, ‘Dɔfɔɔ̃ kɔ mɛ,’ ‘tɛ ɛba buya kɛbhɛ nɛ petee kɔ wɔ.’ 27Apalete nɛ di axwɛdɛ nɛ eshutukubui, klɛ ayɛkɔ kɛbhɛ nɛ etsye yɛ, klɛ akɔ asɛ aga vɛ.
28“Pɔ gɛ axwɛdɛ alɛlɛ nɛ ekoeyi avɛ, ada tsyanɔ yɛabhla teli gɛ yɛ tsyɛ adɔ kɛbhɛ bhli tili nɛ yɛ shu. Anyɛna yɛ klɛ atasɔlɛ yɛ kɛhali. Klɛ asɛ, ‘Buya kɛbhɛ nɛ gɛ ɔdɔ nɛ mɛ shu nɛ ɔkɔm!’
29“Yɛ ɔhaɛ axwɛdɛ nɛ ezhidɔ ekuisia bha klɛ akɔ yɛ kɛtɔkpu asɛ, ‘Dɔfɔɔ̃ nɛ mɛ, klɛ ɛba buya kɛbhɛ nɛ kɔ wɔ.’
30“Pɔ adɛ dɛmɛ. Aga kɛlɛ shu ayɛkɔ anyɛ nɛ ada kpɛ buvu ɔdɔnanɔ kibe lɛ gɛ abuya kɛbhɛ. 31Kibe lɛ gɛ baxwɛdɛ gɔgɔɛ nɛ ba mɔ kana gɛ kibui nɛ vɛ, kɛtrɔ balɛa bha klɛ ba tɔnɔ balɛ apalete nɛ avɛ klɛ ba da ɖɔ kibuinyɛbui gɛ vɛ kabha nɛ etsre yɛ.
32“Ɔkɛlɛ apalete nɛ ekulu axwɛdɛ nɛ amɛna, klɛ etsre ya sɛ, ‘Wɔ kɛtɔkpum gɛganɛ axwɛdɛ,’ ‘Mɛ ɛtsa odi kpɛ wɔ kɛbhɛnyɛbhɛ mɛ alasɛ ɔkɔ kɛtɔkpu so. 33So kɛma sɛ odi wɔhaɛ axwɛdɛ nɛ eshutukubui ansɛ gɛ idi wɔ?’ 34Nɛ obulo mɛ, apalete nɛ etsodzini yɛ evu akɔ bevupo sɛ ba vɔɛ ɔdɔnanɔ kibe lɛ gɛ aba buya kɛbhɛ nɛ petee gɛ adɔ nɛ yɛ shu.
35“Kana mɛ owũsise Aka nɛ aba bhɛtɛ nɛ wɔnɔ mɛayɛ kanyaka gɛ atɛ ba yɛkɔ kibui etsye yɛadzya edenɔ yɛ idzyi mɛ.”
Seçili Olanlar:
Mateo 18: tcd
Vurgu
Paylaş
Kopyala
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
© Ghana Institute of Linguistics, Literacy and Bible Translation
