Mateo 12
12
Apalete Kɔ Kimuenewi
1Nɛ kibe lɛ nɛ mɛ Yesu aga nikpe buya tuli mɛ aafla nɛ kimuenewi nɛa bha. Bubhɛ buu yi yɛ badɔkpasɛ klɛ ba kpa nikpe nu dzyini tã. 2Gɛ Farisianɛ na mɔ ana, klɛ be tsre Yesu asɛ, “Di! Wɔ badɔkpasɛ naa bhɛtɛ kɛgɛ ba tɛ bhɛtɛ nɛ Kimuenewi nɛa bha.”
3Yesu ebui lɛ bunu asɛ, “Nɔ kɔ kla onu di kɛgɛ Daviti abhɛtɛ gɛɛ bubhɛ yi yɛ anɛ yeshopoa lɛ? 4Etsoku Kpaya buvu nɛ mɛ, klɛ yɛ anɛ yeshopoa lɛ nɛ ada tã gbɛgbɛvu yuyula, gɛ kinu ɔshã dɛda kɔa lɛ sɛ tɛ ba bhɛtɛ ana, alasɛ gbɛgbɛvu kɛ lɛ kɔ kpayanɔ nɛ tite tɛtɛtã. 5Pɛnɔɔ nɔ kɔ kla mɔ nɛ Ɔshã nɛ mɛ sɛ nɛ Kimuenewi nɛa bha, kpayanɔ anɛ busɔlɛevu nɛ mɛ tsyɛ ba da ɔshã ɔlɛ nɛ flogo tsyɛ pɛɛ kɛpɔnyɛpɔ dɛ za balɛ shu dza? 6Itsre nɔ sɛ, agɛ agbɛgbla dɛ kpayavu nɛ alɛ ɔkɛ̃. 7Otɔsɛ no nu ebuia nɛ kesi, ‘Ɛlɛ kɔ eshutukubui, ganɛ kɛdɔ kukɔ,’ anlo nɔ gɛ tɔ bu bagɛ kɛpɔ ma balɛ shu nɛ kɛpɔ flogo. 8Alasɛ Anɔdzyrame yɛ Eyi nɛ yɛ enu Apalete kɔ Kimuenewi.”
9Gɛ alɔ nɛ ɔkɛlɛ, ashɛ̃ avɛ ede tsoku balɛ oxogokɔvu nɛ mɛ, 10klɛ anyɛ ɔhwɛ tsitsi toli ɔza ɔklɛ. Gɛ baa pɛɛ kibui nɔɔ nɛ gɛ ba ba yɛkɔ ebhui Yesu nu nɔ so, be bisi yɛ asɛ, “Kɛ lɛ ɔshã mɛ sɛ tɛ be beke bunya nɛ Kimuenewi nɛa bha dza?”
11Yesu ebui lɛ bunu asɛ, “Onu gɛ wɔnɔ ɔmɛayɛ teli obhoshi ɔwɔlɛku ozi mɛ nɛ Kimuenewi nɛa bha etee ti bu ɔlɛ dza? 12Klɛɛ ŋa anɔ adɛ ŋa kedzi adɛ obhoshi! So kɛlɛ ɔshã sɛ tɛ ba bhɛtɛ kibui dzyɔgo nɛ Kimuenewi nɛa bha.”
13Ɔkɛlɛ aɖɔ etsre anyɛ nɛ asɛ, “Bu wɔ ɔhwɛ nɛ ɔmɛna.” So anyɛ nɛ ebu ɔhwɛ nɛ amɛna klɛ ɔhwɛ nɛ otsodzi oku ɔlɛɛ ku, mɔmɔ ansɛ gɛ ɔbhla nɛ ɔlɛ. 14Pɔ Farisianɛ nɛ be koeyi avɛ klɛ ba da nya kana gɛ ba ba ga pɛɛ be be yi Yesu.
Kpaya Axwɛwa Nɛ Gɛ Ebu
15Ansɛ gɛ kɛ lɛ tɛtiti mɛ kɔ yɛ, Yesu etsoekoeyi nɛ ɔklɛ. Banɔ gelee ba za yɛe de, klɛ ebeke balɛ banya, 16klɛ akpɛ ɔshã kɔ balɛ asɛ ba tɛ ɖɔ anɔ di gɛ enu. 17Kɛɛ nɛ kɛ lɛ sɛ tɛ kɛbhɛtɛ ansɛ gɛ ba ɖɔ ganɔ atɔnu Yezaya bha sɛ:
18“Mɛ axwɛwa nɛ gɛ ibu nɛ naa,
agɛ yɛ mɛ ɛɖɔ, yɛmɛ mɛ mɔ same,
ɛba yɛkɔ mɛ Ɔfufɔɛ nɛ kpɛ yɛm,
klɛ ebe bu kɛdzyudzyɔ nɛ akasɛ amadi nɛ petee.
19Atɛ ba pɛɛ ebla ɔdɔgɔsɛ akpɛ ogugu,
anɔnyanɔ eti be nu yɛ olim nɛ edzo nɛa bha.
20Tɛwa yɛyɛkɛ kɛpɔ kanyaka eti be dzyini,
klɛ kanɛgbɛ keputakpa tɛtã kanyaka eti be wulu kalɛ atɛ̃,
ɔdɔ nanɔ kibe lɛ gɛ agbanɔ kɛdzyudzyɔ avɛnɔ kabhaŋɛŋam.
21Yɛ kinyi nɛ mɛ amadi nɛ aba yɛkɔ balɛ kidzoenu didi nɛ atrɔ.”
Yesu Anɛ Ɔfufɔɛkpãekusi
22Ɔkɛlɛ ba gbanɔ anyɛ teli gɛ ɛfufɔɛkpã tsri yɛa bha gɛ akɔ sɛ eku omumu klɛ epu awɔ̃hũ tsyɛ amɛna yɛ, klɛ Yesu ebeke yɛ banya, pɛ akpa kaɖɔɔ ɖɔ klɛ akpa mɔ tsyɛ. 23Kibui nɛ bhɛtɛ banɔ nɛ petee bi klɛ ba ɖɔ asɛ, “Anyaa nɛɛ ebe dzi Daviti Yeyi nɛa?”
24Pɔ gɛ Farisianɛ be nu ana, ba ɖɔ asɛ, “Ganɔ ɛfufɔɛkpã ekusieyi nɛa bha anɔa nɛ aakɛka ɛfufɔɛkpã nɛ ebu.”
25Yesu enyi balɛ atɔkpu nɛ mɛ so etsre alɛ asɛ, “Bukusiɔŋakɔ kanyaka gɛ bu ma kpɛ bupɛ tubha mɛ bu ba yɛɛ, klɛ ɔmagbla nɛ bupa kanyaka gɛ bu pɔɛhle nɛ aglɔ shu bu tɛ ba naa za. 26Onu gɛ Satana akɛka Satana, kɛlɛ alɛ apɔɛhle nɛ yɛnahwɛshu nɛ shu. Kɛlɛ klɛ yɛ bukusiɔŋakɔ nɛ ɔbɔ za kititi? 27Klɛ onu gɛ ɛkɛka ɛfufɔɛkpã ganɔ ɛfufɔɛkpãkusia bha, anea bha wɔnɔ banɔ nɛ xũ na ga kɛka ɛlɛ obu? So ɔtsɔ̃, balɛ ebe dzi wɔnɔ bebhuikulu. 28Pɔ onu gɛ mɛ ɛkɛka ɛfufɔɛkpã ganɔ Kpaya Ɔfufɔɛ nɛa bha, kɛlɛ alɛ Kpaya bukusiɔŋakɔ nɛ ɔba wɔnɔa bha naa lɛlɛ.
29“Ɔyɛkɔ plɛnɔ, kɛlɛ anɔ teli ebe tsoku anɔ gɛganɛ bupa mɛ ko pɛ aba yalɛ yɛ kɛnɔmɛdɔ ashɛ̃nɔ gɛ odinu sɛ ebhuso anɔ gɛganɛ nɛ nu nya lu? Kɛlɛ flogo pɛ aba na zuru nɛ bupa nɛ mɛ.
30“Anɔɔ nɛ gɛ ama plɛnɔ mɛ enu anɔ gɛ alɔ kititi nɛ mɛ shu, klɛ anɔɔ nɛ gɛ eti be xogo nɛ mɛ aba pɔɛehle. 31Klɛ so itsre nɔ, buzizi kanyaka anɛ kibusobui kanyaka ba ba yɛkɔɛ kɛlɛ etsye anɔ, pɔ buzizi kanyaka nɛ Ɔfufɔɛ nɛ shu ba tɛ ba yɛkɔ etsye. 32Anɔnyanɔ gɛ aba ɖɔ kaɖɔkpã nɛ Anɔdzyrame Yeyi nɛ shu ba ba yɛkɔ etsye yɛ, pɔ anɔ nɛ gɛ aba ɖɔ kaɖɔ kpã nɛ Ɔfufɔɛ Dzyɔgo nɛ shu ba tɛ ba yɛkɔ etsye, eze dzi nɛ tɛmumɔɛ nɛ mɛo kɛ gɛ tɛ ba nɛ mɛo.
33“Dzu osi dzyɔgo, klɛ ɔlɛ eyuyu nɛ tsyɛ ebe dzi adzyɔgo, tɛ dzu osi kpã, klɛ ɔlɛ eyuyu nɛ tsyɛ ebe dzi akpã, alasɛ osi ɔlɛ eyuyu nɛ la ba yɛkɔ akpɛ ɔlɛ kɛxawũ nɔ. 34Wɔnɔ atagblashã tɛzɛzam banɔ, kɛlɛ wɔnɔ banɔ nɛ gɛ ɔtsɔmɔ nɔ bɔ ɖɔ kibui dzyɔgo tii li? Alasɛ kibui nɛ kɛɛ dɛ idzyi klɛ onugbu nɛ ɔɔɖɔaɖɔ. 35Anɔ dzyɔgo ebu ebui dzyɔgo edenɔ yɛ ebui dzyɔgo nɛ gɛ abala nɛ yɛ mɛ, klɛ anɔkpã edenɔ yɛ ebuikpã nɛ gɛ abala nɛ yɛ mɛ. 36Pɔ itsre nɔ sɛ, kɛ ba bisi sɛ banɔ ba ɖɔ balɛ tɛzɛzam akasɛ nɛ kebhuiwi nɛa bha nɛ balɛ kibui gɛ ma kibuinyɛbuim gɛ ki koeyi denɔ balɛ onugbu mɛ. 37Alasɛ ganɔ wɔ ebuiɖuɖɔ nɛm le be bu wɔ butsya, klɛ ganɔ wɔ ebuiɖuɖɔ nɛm le be bu wɔ kɛpɔ.”
Ebui Yiyinɔanɔ Tɛpɛpɛ
38Ɔkɛlɛ Farisianɛ anɛ ɛshãdɔkasɛ na ɖɔ etsre yɛ asɛ, “Adɔkasɛ, bu pɛɛ sɛ tɛ bu mɔ kibui yiyinɔanɔ tili denɔ wɔ kɔ.”
39Yesu ebui lɛ nu asɛ, “Atɔkpum gɛganɛ anɛ ɔmamdɛdɛ banɔ nɛ obonobo kanɔa nɛ mɛ bee bisi asɛ tɛ ba mɔ kibui yiyinɔanɔ! Pɔ ba tɛ ba kɔ anɔnyanɔ kɛkanyaka, Yona atɔnu na yɛ ko. 40Alasɛ kana gɛ Yona aza kɛkpãgbla nɛ ɛya mɛ ewi tata nɛ itumu tɛta, kana Anɔdzyrame Yeyi nɛ tsyɛ aba za tisim ewi tata nɛ itumu tɛta. 41Niniveanɛ na ba lɔɔ titi nɛ kebhuim nɛ ɔtsɔ̃ nɛ tɛmumɔɛ nɛm banɔ klɛ be be bui lɛ pɔ; alasɛ be tsyina kitem nɛ Yona kibuiɖuɖɔ nɛ mɛ, klɛ ɔtsɔ̃ agɛ adɛ Yona nɛ ya lɛ ɔkɛ̃ naa. 42Ozhizhi Adzɛeni nɛ aba lɔ kititi nɛ kebhuim nɛ tɛmumɔɛ nɛm banɔ klɛ ebe bui lɛ kɛpɔ; alasɛ alɔ edenɔ kanɔ nɛ obekekɔ sɛ ta aba tatɔ nɛ Salomo kibuinyinyi, klɛ ɔtsɔ̃ agɛ yɛ adɛ Salomo nɛ yalɛ ɔkɛ̃ naa.
43“Kibe lɛ gɛ ɔfufɔɛkpã ookoeyi nɛ anɔ mɛ, lɔ dɔɔ ga nyɔ busukpa kpɛkpã mɛ ɔpɛɛ omuenekɔ klɛ lɔ tɛ mɔ. 44Ɔkɛlɛ lɔɔ ɖɔ sɛ, ‘Ɛba tsodzi vɛ bupa nɛ mɛ gɛ ɛtɛ shɛ.’ Kibe lɛ gɛ loo do ku, pɛ lɔɔ mɔ sɛ anɔnyanɔ ama bulɛ mɛ, ba gba bulɛ mɛ klɛ ba bhɛtɛ bulɛ mɛ elu mɔmɔ. 45Ɔkɛlɛ ɔfufɔɛ nɛ ootsodzi ɔvɛ ɔdɔ gbanɔ tigene bhlatɔ gɛ tsɔmɔ dɛ ɔlɛ nahwɛ nɛ ata shu, klɛ lɛ ba tsoku da za ɔkɛlɛ. Klɛ anɔ yɛ tɛzɛza mɛ ba tsodzi tsɔmɔ dɛa na gɛ aza putɔnɔ. Kana kɛ ba za kɔ kɛtɔkpum gɛganɛ tɛmumɔɛ nɛm banɔ.”
Yesu Yɛ Eni Anɛ Yɛadzyalɛ
46Nɛ kibe lɛ nɛ mɛ gɛ Yesu eke dzi aɖɔ kaɖɔ akɔ banɔɛza nɛɛ, yeni anɛ yadzyalɛ na za ɔtɔ, baa pɛ asɛ tɛ ba ɖɔ kaɖɔ nɛ yɛ. 47Anɔ teli ebe tsre Yesu asɛ, “Weni anɛ wɔadzyalɛ nɛ beli ɔtɔ, baa pɛɛ asɛ tɛ ba ɖɔ kaɖɔ nɛ wɔ.”
48Yesu etsre anɔ nɛ asɛ, “Anee yɛ enu meni klɛ anee yenu madzyalɛ? 49Ebu ɔhwɛ akpɛ yɛ badɔkpasɛ nɛ ɔkɔ asɛ, “Meni anɛ madzyalɛ naa. 50Alasɛ ananyanɔ gɛ abhɛtɛ Maka nɛ owũsise nɛ tɛpɛpɛɛ yɛ enu badzya, mada anɛ meni.”
Seçili Olanlar:
Mateo 12: tcd
Vurgu
Paylaş
Kopyala
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
© Ghana Institute of Linguistics, Literacy and Bible Translation
