ƐSLA 4
4
Gbekpalei Ngewɔ Wɛlei loolei gbɔma gulɔ
1Ji Juda kɛ Bɛnjamin gɔnyɔuisia ti humɛnini kɛ kɔhou nungeisia lɔ Ndemɔi Isleɛl Yewɔi wɛlei loo ma, 2ti lilɔ Sɛlubabɛli kɛ bondeisia ti gulɔloobleisia gama kɛ ti ndenga tɛ, “Mu gbɛlɛ wu ma Ndemɔi wɛlei loo va, gbamaile mua wieni mua Ngewɔ yakpelɔ vɛli, tawao mua wɔ kpɔɔ saagbuama ngi gama i hiye Isaahadɔn Asilia Mahei voloisia ma na wani a mue mbeindo.” 3Kɛɛ Sɛlubabɛli, Jɛsua kɛ Isleɛl mbonda wekeisia ti gulɔloobleisia ti ndeilɔ ti ma tɛ, “Waa gbɛlɛ mu ma pɛlei loo va mu Yewɔi va; kɛɛ mua yakpe vulii mia ma Ndemɔi Iseɛl wɛlei loo, kia lekee Sailɔsi Paasia mahei i yɛ ndeni la mu ma.”
4Na wooma ndɔɔlɔ hubleisia ti Juda nungaa lii nyanilɔ, kɛ ti pienga ti luwa yee pɛlei loo va, 5kɛ ti ndɔɔlɔ gbakoisia pawanga kɔ wɔi ti ti hu hou Sailɔsi Paasia mahei voloisia gbi hu, haaŋ i to Dalɔsi mahayei hu.
Gbekpalei Jelusalɛmi loolei gbɔma gulɔ
6Aasuɛlɔsi mahayei hu, yee tɔtɔ vooi hu, ti gɔnyɔuisia ti mayiagɛ gɔlɔ nyɛinlɔ kɔloongɔ Judablaa kɛ Jelusalɛmi hu heibleisia ma.
7Tawao Aatasasi Paasia mahei mahayei hu, Bislami kɛ Mitlɛdati kɛ Tabeel kɛ ti ndiamɔisia gbi ti kɔlɔ nyɛinlɔ Aatasasi gama; ti nyɛini Alamaiki yei hu lɔ kɛ ti gawotenga. 8Lehum baagɔma lavai, kɛ Simisai kɔlɔnyɛinmɔi, ti kɔlɔ nyamu nyɛinlɔ kɔloongɔ Jelusalɛmi ma Mahei Aatasasi gama tɛ 9(na wooma Lehum mahei baagɔma lavai, Simisai kɔlɔnyɛinmɔi, kɛ ti magbɛlɛmableisia gbi, kitilewebleisia, tutuisia, kpakoisia, Paasiableisia, Elɛki nungaa, Babilɔnbleisia, Susa nungeisia, na yɛni a Iilamaitisia, 10kɛ mbonda wekeisia nasia numu wai kɛ baagɔmamɔi Ɔsnapa ti gbuani ti yee taahusia kɛ i ti heinga Samelia la waisia hu kɛ kpalatɛi gbi hu Yufletisi yei wooma, ti nyɛini kɛ kiahuna 11ji mia yee kɔlɔ nyɛingɔi le ti joyoni):
“Mahei Aatasasi gama: Bi bɔilopoisia, kpalatɛisia hu Yufletisi yei wooma, mua vama bi ma. Kɛ kiahuna naa 12mahei i kɔɔ kɛ Juublei nasia ti gbuani bi gama wa va mu gama ti ya Jelusalɛmi. Tia fali kɛ nyamu la wai loo ma; tia yee bundisia gbɔyɔma a too la tawao tia yee falameisia gbatɛma. 13Kiahuna naa mahei i magɔɔ kɛ, ina ti ta wai ji looilɔ tawao ti kpɔyɔ a yee bundisia loola, tɛɛ yaa pawa ve, ɔɔ kɔnjɔ, ɔɔ navo, ji a pielɔ mahei baagɔma navo wɔyɔngɔi mahu i yei. 14Kiahuna, ajifa mu bi mahayei bu lɔ, ii nyandeni mu va mu tɔɔ baagbuama hinda i wie mahei gama, famia mu gowili yoyonga kɔɔ mahei i kɔɔ, 15kɔwɔi ti gɔfɛgbua wie bi kɛkɛni ti hinda lamagbatɛ gɔleisia hu. Ba tɔ lɔ yee kɔlɔ lamagbatɛngɔi jisia hu kɛ ta wai ji yɛni a fawali la wai lɔ, a hinda nyamu wielɔ a mahangaa kɛ kpalateisia tawao ti yɛlɔ wɔɔ a pie hu watii huguhangɔ va. Sabui ji va lɔ ti yee ta wai ji nyanini. 16Mu pie mahei i kɔɔ kɛ, ina ti ta wai ji looilɔ gbɔma tawao ti kpɔyɔ a yee bundisia loo la, haka gbi ɛɛ yaa yɛ na bi va kpalatɛi na hu Yufletisi yei wooma.”
17Mahei i kpɛmbo yoyoilɔ yɛ: “Lehum baagɔma lavai gama kɛ Simisai kɔlɔnyɛinmɔi kɛ ti magbɛlɛmableisia gbi nasia ti heini Samelia kɛ kpaalata wekeisia gbi hu Yufletisi yei wooma a fama woo. Kɛ kiahuna naa 18kɔlei na wu joyoni mu gama ti gawotenga nya gama. 19Fale ngi ndeilɔ ngɛɛ, ti hugbɛkpɛ kɛ numu hugbɛkpɛnga kɛ i tɔɔnga kɛ yee ta wai ji i loilɔ maha gboto baahu govama, tawao huvendangɔ yɛla a fawaliblaa kɛ piehinda nyamublaa. 20Maha gbayangɔisia ti yɛlɔ wɔ Jelusalɛmi, ti yɛ kpalatɛi gbi mahu i yɛ Yufletisi yei wooma, ti gama mia nungaa ti yɛ a pawa, kɔnjɔ kɛ navo ve na. 21Fale a sawa la naa kɔ wɔi yee nungei jisia ti gbe yee ta wai ji loolei ma gbɔma, haaŋ ngi sawa la fa. 22Kpɛlɛngɔ ji ma, a wu mahugbee nahi waa yee hindei ji gula kɔɔlɛ hu; gbɛ va lɔ hinda nyamu a loola nahi a waa a kpalɛ mahei gama?”
23Na wooma ji ti mahei Aatasasi gɔlei gaani Lehum kɔlɔ nyɛinmɔi Simisai kɛ ti magbɛlɛmableisia gulɔ, ti lilɔ kaka Juubleisia gama Jelusalɛmi tawao a kpɔndama kɛ kpaya hu wee ti pielɔ ti gbe yee ta wai loolei ma gbɔma.
Ngengei Ngewɔ Wɛlei ma latoonga gbɔma
24A yee watii na ti gbeelɔ Ngewɔ wɛlei loolei ma Jelusalɛmi tawao ti gbeelɔ ma haaŋ i too fooi yee feleyei ma Dalɔsi Paasia mahei mahayei hu.
Seçili Olanlar:
ƐSLA 4: RMB
Vurgu
Paylaş
Kopyala
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
Mende Bible Portions © Bible Society in Sierra Leone and Lutheran Bible Translators, 2020.