ଲୁକ 18
18
ରାଣ୍ଡିଲ୍ ନୁ ବିଚାର୍ ମାଡ଼ାନନାଦ୍ ଗଟ୍
1ହତାସ୍ ଆୟ୍ୟକଟ ସାରେଦାମ୍ ପ୍ରାର୍ତନା ମାଡ଼ାନାଦ୍ ସାୟେ, ଇ ବିଷୟତେ ଜିସୁ ଅଡ଼୍କିଂଙ୍କ୍ ଇଦ୍ ଗଟ୍ କେତ୍ତଣ୍ଡ୍, 2ଅଣ୍ଡୟ୍ ନାର୍ଦାଗ୍ ୱେରଣ୍ଡ୍ ବିଚାର୍କର୍ତାଲ୍ ମାତ୍ତଣ୍ଡ୍, ଅଣ୍ଡ୍ ଇଶ୍ୱର୍ତିଙ୍କ୍ ୱେର୍ୟକଟ ମାତ୍ତଣ୍ଡ୍ କି ନାରୁଡ଼୍କିଂଙ୍କ୍ ଉଡ଼୍ପୁନ୍ୱେ ମାତ୍ତଣ୍ଡ୍ । 3ଆଦ୍ ନାର୍ଦାଗ୍ ୱେରଡ଼୍ ରାଣ୍ଡିଲ୍ ମାତ୍ତେ, ଆଦ୍ ଅଣ୍ଡ୍ ଅଣ୍ଡ୍ଦାମ୍ ଆନା ଆଞ୍ଜ୍ କେସ ମାତ୍ତେ, ୱେର୍ଣ୍ଡ୍ ନା ବିରୁଦ୍ ତେ ଅନ୍ୟାୟ୍ ମାଡ଼ୁତଣ୍ଡ୍ ଆଦିନାଦ୍ ବିଚାର୍ ମାଡ଼େ । 4ନାର୍ଗେ ଦିନାମ୍ ଯାକ ବିଚାର୍ କର୍ତ୍ତାଲ୍ ରାଜି ଆୟ୍ୟକଟ ମାତ୍ତଣ୍ଡ୍; ବାତେଙ୍କ୍ ଇତ୍କେ ପେର୍କେ ଅଣ୍ଡ୍ ହେର୍କା ମାଡ଼୍ତଣ୍ଡ୍, ଯଦି ନାନ୍ ଇଶ୍ୱତିଙ୍କ୍ ୱେର୍ୱନ୍ କି ନାରୁଡ଼୍କିଂଙ୍କ୍ କେଞ୍ଜନ୍, 5ଆଗେକ୍ ବାଡ଼େ ଆଦ୍ ରାଣ୍ଡିଲ୍ ନାକିଂଙ୍କ୍ କଷ୍ଟ ଇସମିନ୍ଦେ ନାନ୍ ତାନ୍ ସେଙ୍ଗେ ଆତ୍ତେ ଅନ୍ୟାୟତାଦ୍ ବିଚାର୍ ମାଡ଼ିତାନ୍, ଇଲୁକ୍ ଆଦ୍ ସାରେଦାମ୍ ୱାସ୍ ନାକିଂଙ୍କ୍ ଦାନ୍ଦେ ଆସମାତ୍ତେ ।
6ଆଗାଙ୍କ୍ ପ୍ରବୁ କେତ୍ତଣ୍ଡ୍, “ଇଣ୍ଡ୍ ଅଦାର୍ମିକିଡ଼୍ ବିଚାର୍କର୍ତାଲ୍ ବାତ୍ କେତୁତନ୍, ଆଦ୍ କେଞ୍ଜାଟ୍ । 7ଇଶ୍ୱର୍ ହେଞ୍ଚତେ ନାରୁଡ଼୍ ନାର୍କାପାୟାଲ୍ ଅଂକିଙ୍କ୍ କାର୍ଙ୍ଗମାନ୍ତଡ଼୍, ଅଣ୍ଡ୍ କି ଅଡ଼୍ ସେଙ୍ଗେ ଆତ୍ତେ ଅନ୍ୟାୟତେ ବିଚାର୍ ମାଡ଼ଣ୍ଡ୍, ଅଡ଼୍କିଂଙ୍କ୍ ସାହାଯ୍ୟ ମାଡ଼ାଙ୍କ୍ ଅଣ୍ଡ୍ ଲେଟ୍ ମାଡ଼ିତନ୍ କି ? 8ନାନ୍ ମିକିଂଙ୍କ୍ କେସମିନ୍ଦେନ୍, ଅଣ୍ଡ୍ ଯାପେ ଅଡ଼୍ ସେଙ୍ଗେ ଆତ୍ତେ ଅନ୍ୟାୟତାଦ୍ ବିଚାର୍ ମାଡ଼ିତନ୍ । ବାତେଙ୍କ୍ ଇତ୍କେ ନାରୁଡ଼୍ ପିଲେ ୱାସ୍ ପୃତିବିତାଗ୍ ବାତ୍ ବିଶ୍ୱାସ୍ ଉଡ଼ିତଣ୍ଡ୍ ?”
ପାରୂଶୀ ନୁ କରଆଦାୟ୍ ମାଡ଼ାନନାଦ୍ ୱେଷଡ଼୍
9ନିଜେ ନିଜେ ଦାର୍ମିକ୍ ଇଞ୍ଜ ହାଲ୍ସି ମେଣ୍ଡେ ବାଗାତଡ଼କିଂଙ୍କ୍ ବାଗାତ୍ ନାରୁଡ଼୍କ୍ ତୁଚ୍ଛ ହେର୍କେ ମାଡ଼ମାନ୍ଦାନ୍ ବେସ୍କ୍ତୁଡ଼୍ ଆତ୍ମା ଆଶେତ୍ ନାରୁଡ଼୍କିଂଙ୍କ୍ ଜିସୁ ଇଦ୍ ୱେଷଡ଼୍ କେତ୍ତଣ୍ଡ୍, 10ୱେର୍ଡ୍ ଦିନେ ଇର୍ୱୁଡ଼୍ ନାରୁଡ଼୍ ପ୍ରାର୍ତନା ମାଡ଼ାନ୍ ମାଇଦିଙ୍କ୍ ମନ୍ଦିର୍ତାଗ୍ ଆତ୍ତଡ଼୍, ୱେରଣ୍ଡ୍ ପାରୂଶୀ ନୁ ମେଣ୍ଡ୍ଅର୍ତୁଣ୍ଡ୍ କରଗ୍ରାହୀ ।
11ପାରୂଶୀ ନିଶ୍ମିକା ତାନ୍ ସେଙ୍ଗେ ଇଦ୍ ଲେକାମ୍ ପ୍ରାର୍ତନା ମାଡ଼ାଙ୍କ୍ ପସ୍ପ୍ତଣ୍ଡ୍, ହୋ ଇଶ୍ୱର୍ ନାନ୍ ନିକିଂଙ୍କ୍ ଦନ୍ୟବାଦ୍ ଇଦୁତାନ୍ ଯେ, ନାନ୍ ବାଗାତ୍ ସାରେତଡ଼୍ ନାରୁଡ଼୍ ଲେକାମ୍ ହାୱୁକାନଡ଼୍, ଆଦାର୍ମିକ୍, ବ୍ୟବିଚାରୀଡ଼୍ ବା ଇଣ୍ଡ୍ କରଗ୍ରାହୀ ଲେକେମ୍ ମିକା ଆୟନ୍; 12ନାନ୍ ସପ୍ତାତିଙ୍କ୍ ରେଣ୍ଡ୍ ଦାମ୍ ଉପବାସ୍ ମାଡ଼ୁତାନ୍ ନୁ ନାୱାଦ୍ ସାରେ କାମ୍ମାଡ଼ି ଗୁଡ଼୍ପ୍ତାଦ୍ ଦଶ୍ବାଗ୍ କନ୍ସ୍ ୱେରନ୍ ପାଲ୍କ୍ ଦାନ ମାଡ଼ୁତାନ୍ ।
13ବାତେଙ୍କ୍ ଇତ୍କେ କରଗ୍ରାହୀ ଜେକେ ନିସ୍ ମିକା ସ୍ୱର୍ଗତା ପରୁ ଉଡ଼ାନଙ୍କ୍ ସେଙ୍ଗେ ମେଣ୍ଡେ ସାହାସ୍ ମାଡ଼ଣ୍ଡ୍, ବାତେଙ୍କ୍ ଇତ୍କେ ତାନ୍ ଗୁଣ୍ଡେତାଗ୍ ରେହେସ୍ କେତାନଙ୍କ୍ ପସ୍ପ୍ତଣ୍ଡ୍, ହୋ ଇଶ୍ୱର୍, ନାନ୍ ପାପି, ନାକିଂଙ୍କ୍ ଦୟା ମାଡ଼ା । 14#ମାତିଉ ୨3:୧୨; ଲୁକ ୧୪:୧୧.ଜିସୁ ଅଡ଼୍କିଂଙ୍କ୍ କେତ୍ତଣ୍ଡ୍, “ଅଣ୍ଡ୍ ପାରୂଶୀ ଆୟ୍ୟଣ୍ଡ୍, ବା ଇଣ୍ଡ୍ କରଗ୍ରାହୀ ଦାର୍ମାମ୍ ଆସ୍ ତାମ୍ ଲୋନ୍ ଆତ୍ତଣ୍ଡ୍; ବାତେଙ୍କ୍ ଇତ୍କେ ବେନଆଇ ନିଜେତିଙ୍କ୍ ଉନ୍ନତ ଇଞ୍ଜ ତଅତିତଣ୍ଡ୍, ଅଂକିଙ୍କ୍ ଆୱେକେ ମାଡ଼ିତଡ଼୍, ବାତେଙ୍କ୍ ଇତ୍କେ ବେନ ନିଜେତିଙ୍କ୍ ଆୱେକେ ମାଡ଼ିତନ୍, ଅଂକିଙ୍କ୍ ଉନ୍ନତ ମାଡ଼ିତଡ଼୍ ।”
ଜିସୁ ପିଲାଙ୍କ୍ ଆର୍ଶିବାଦ୍ ମାଡ଼ତଣ୍ଡ୍
(ମାତିଉ ୧୯:୧୩-୧୫; ମାର୍କ ୧୦:୧୩-୧୬)
15ଜିସୁ ବେଦ୍ ଲେକାମ୍ ପିଲାଙ୍କ୍ ହିଟିତଣ୍ଡ୍, ଇଦ୍ ସେଙ୍ଗ୍ ନାରୁଡ଼୍ ଅଡ଼୍କିଂଙ୍କ୍ ମିକା ଅନ୍ ଗାର୍ରେ ତାତାନଙ୍କ୍ ପସ୍ପ୍ତ୍ତଡ଼୍; ମାତର୍ ଶିଷ୍ୟଡ଼୍ ଆଦ୍ ଉଡ଼ି ଅଡ଼୍କିଂଙ୍କ୍ ଗୋଲକ୍ ହିଦାନଙ୍କ୍ ପସ୍ପ୍ତ୍ତଡ଼୍ । 16ବାତେଙ୍କ୍ ଇତ୍କେ ଜିସୁ ଅଡ଼୍କିଂଙ୍କ୍ ଅନ୍ ଗାର୍ରେ କାର୍ଙ୍ଗି କେତ୍ତଣ୍ଡ୍, “ପିଲାଙ୍କ୍ ନା ଗାର୍ରେ ୱାଦାଙ୍କ୍ ଇମୁଟ୍, ମେଣ୍ଡେ ଅଡ଼୍କିଂଙ୍କ୍ ମନା ମାଡ଼ମାଟ୍, ବାତେଙ୍କ୍ ଇତ୍କେ ଇଶ୍ୱରତାଦ୍ ରାଜ୍ୟ ଇଦ୍ ଲେକେମ୍ ପିଲାନାଦ୍ । 17ନାନ୍ ମିକିଂଙ୍କ୍ ନିଜାମ୍ କେସମିନ୍ଦେନ୍, ବେନବା ପିଲାନ୍ ଲେକେମ୍ ଇଶ୍ୱରତାଦ୍ ରାଜ୍ୟ ଗ୍ରହନ୍ ମାଡ଼ଣ୍ଡ୍, ଅଣ୍ଡ୍ ବେସୁଟ୍ ମିକା ଆଗେ ଆସ୍ ପାର୍ୱଣ୍ଡ୍ ।”
ୱେର୍ଣ୍ଡ୍ ସାଉକାର୍ ନାରୁଡ଼୍
(ମାତିଉ ୧୯:୧୬-୩୦; ମାର୍କ ୧୦:୧୭-୩୧)
18ୱେରଣ୍ଡ୍ ଯିହୁଦୀ ମୁକ୍ୟାଲ୍ ଜିସୁଙ୍କ୍ କେତ୍ତଣ୍ଡ୍, “ହୋ ସତ୍ ଗୁରୁ, ସାରେଦିନାତ୍ ଜିୱୁଣ୍ଡ୍ ଲେକେତ୍ ଆଦାନ୍ ମାଇଦିଙ୍କ୍ ନାନ୍ ବାତ୍ ମାଡ଼ିତାନ୍ ?”
19ଆଗାଙ୍କ୍ ଜିସୁ ଅଂକିଙ୍କ୍ କେତ୍ତଣ୍ଡ୍, “ନାକିଂଙ୍କ୍ ସତ୍ଗୁରୁ ହିଞ୍ଜ ବାତେଙ୍କ୍ କେତୁତି ? ୱେରଣ୍ଡ୍ ୱିଡ଼୍ସି, ଇତ୍କେ, ଇଶ୍ୱତିଙ୍କ୍ ୱିଡ଼୍ସି ମେଣ୍ଡେ ବେନ ମିକା ସାୟେ ଇଲାଣ୍ଡ୍ ।” 20ଇଶ୍ୱର୍ତେ ଆଦେଶ୍ତିଙ୍କ୍ ତ ନିମେ ପୁତ୍ତିନ୍, ବ୍ୟବିଚାର୍ ମାଡ଼୍ମାଟ୍, ନାରୁଙ୍କ୍ ଆୱୁକ୍ମାଟ୍, ଡଙ୍ଗମା, ୱିଶାମ୍ ଗଟି କେଲ୍ମା, ନିଜେ ୟାୟବାବାଙ୍କ୍ ସମ୍ମାନ୍ ଇମ୍ ।
21ଅଣ୍ଡ୍ କେତ୍ତଣ୍ଡ୍, “ଇୱୁ ସାରେ ନାନ୍ ପିଲେତ୍ ଦିନାକ୍ କନ୍ସ୍ ପାଲନ୍ ମାଡ଼ି ୱାଦୁତାନ୍ ।”
22ଜିସୁ ଇଦ୍ କେଞ୍ଜି ଅଂକିଙ୍କ୍ କେତ୍ତଣ୍ଡ୍, “ମିୱାଦ୍ ମେଣ୍ଡେ ୱେରଟ୍ ବିଷୟ ସୁଦୁଟ୍ ମିନ୍ଦେ; ନିମେ ନିୟାଦ୍ ସାରେ ଜିନିଷ୍ ୱାମି ଦରିଦ୍ର ନାରୁଡ଼୍କ୍ ତୁଉସିମ୍, ମେଣ୍ଡେ ନିକିଂଙ୍କ୍ ସ୍ୱର୍ଗତାଗ୍ ଦନ୍ ଦର୍କିତ୍; ମେଣ୍ଡେ ୱାସ୍ ନା ପେର୍କେ ୱାଡ଼ାଟ୍ ।” 23ବାତେଙ୍କ୍ ଇତ୍କେ ଅଣ୍ଡ୍ ଇଦ୍ ସାରେ ଗଟି କେଞ୍ଜି ଗାଟି ଦୁଃକାମ୍ ଆତ୍ତଣ୍ଡ୍, ବାତ୍ତେଙ୍କ୍ ଇତ୍କେ ଅଣ୍ଡ୍ ଗାଟି ବାଡ଼୍ୟଣ୍ଡ୍ ସାଉକାର୍ ମାତ୍ତଣ୍ଡ୍ ।
24ଆଗାଙ୍କ୍ ଅଣ୍ଡ୍ ଦୁଃକାମ୍ ଆଦାନାଦ୍ ଉଡ଼ି ଜିସୁ କେତ୍ତଣ୍ଡ୍, “ବେନନାଗ୍ ଦନ୍ ମିନ୍ଦେ, ଅଡ଼୍ ବେସର୍ ତିପାଲ୍ତେ ଇଶ୍ୱର୍ତେ ରାଜ୍ୟତ୍ ଲୋପେ ଅସ୍ ପାର୍ଦ୍ତଡ଼୍ ! 25ବାତ୍ତେଙ୍କ୍ ଇତ୍କେ ଇଶ୍ୱର୍ତେ ରାଜ୍ୟତାଗ୍ ସାଉକାର୍ ନାରୁଣ୍ଡ୍ ନେଙ୍ଗାନ୍ ୱିଡ଼୍ସି, ଚୁଜ୍ ବସେତ୍ ଆଲା ଉଟ୍ ନେଙ୍ଗାନାଦ୍ ସହଜ୍ ।”
26ବେନେ ନାରୁଡ଼୍ ଇଉଗୋଟି କେଞ୍ଜ୍ତଡ଼୍, ଅଡ଼୍ କେତ୍ତଡ଼୍, “ଇଲୁକ୍ ବେନ ପରିତ୍ରାଣ ଆଦ୍ତନ୍ ?”
27ବାତେଙ୍କ୍ ଇତ୍କେ ଜିସୁ କେତ୍ତଣ୍ଡ୍, “ବେନ୍ ନାରୁଡ଼୍ ତଡ଼୍ ଆୟ୍ୟ ଆଦ୍ ଇଶ୍ୱରତେ ତଡ଼୍ ଆଦ୍ ତେ ।”
28ଆଗେତିନ୍ସ୍ ପିତର୍ କେତ୍ତଣ୍ଡ୍, “ଉଡ଼େ, ମାମେ ନିଜେ ନିଜର୍ ସାରେତିଙ୍କ୍ ୱିଡ଼୍ସି ନି ପେର୍କେ ୱାସ୍ମିନ୍ଦେମ୍ ।”
29ଜିସୁ ଅଡ଼୍କିଂଙ୍କ୍ କେତ୍ତଣ୍ଡ୍, “ନାନ୍ ମିକିଂଙ୍କ୍ ସତ୍ କେତୁତାନ୍; ବେନ୍ ନାରୁଡ଼୍ ଇଶ୍ୱରତାଦ୍ ରାଜ୍ୟ ସେଙ୍ଗେ ଲୋନ୍ କି ମୁତ୍ତେ କି ତାମୁଣ୍ଡ୍ କି ୟାୟବାବ କି ନିଜର୍ ପିଲାଙ୍କ୍ ୱିଡ଼୍ସ୍ତଡ଼୍, 30ଇଞ୍ଜେତ୍ ଦିନାତେ ଗାଟି ଗୁଣାମ୍ ଦର୍କିତେ ମେଣ୍ଡ୍ ପେର୍କେତ୍ ଦିନାତେ ସାରେଦିନାତ୍ ଜିୱୁଣ୍ଡ୍ ଦର୍କିତ୍, ଇଦ୍ ଲେକେମ୍ ନାରୁଡ଼୍ ବେନ ଇଲାଣ୍ଡ୍ ।”
ଜିସୁ ତୃତୀୟଦାମ୍ ନିଜର୍ ଡୋଲ୍ତାଦ୍ ଗଟ୍ କେତ୍ତଣ୍ଡ୍
(ମାତିଉ ୨୦:୧୭-୧୯; ମାର୍କ ୧୦:୩୨-୩୪)
31ପେର୍କେ ଜିସୁ ବାରଜାନ୍ ଶିଷ୍ୟଡ଼କ୍ ୱେରେ ମାଡ଼ି ଅଡ଼୍କିଂଙ୍କ୍ କେତ୍ତଣ୍ଡ୍, “ଉଡ଼ାଟ୍, ମାନାଡ଼୍ ଯିରୁଶାଲେମ୍ତା ଆଞ୍ଜ ମିନ୍ଦେମ୍, ମେଣ୍ଡେ ନାରୁଡ଼୍ ପିଲେତ୍ ବିଷୟତେ ବାବବାଦୀଡ଼୍ ବାତା ଲେକ୍ତଡ଼୍ ଆଉ ସାରେ ସଫଲ୍ ଆଦ୍ତେ । 32ଅଣ୍ଡ୍ ବିଜାତି ନାରୁଡ଼୍ତେ କାଇଦେ ସମର୍ପିତ୍ ଆଦ୍ତନ୍, ମେଣ୍ଡେ ଅଡ଼୍ ଅଂକିଙ୍କ୍ ପରିହାସ୍ ମାଡ଼ିତଡ଼୍, ଅନ୍ ସେଙ୍ଗେ ଆୱୁକିତ୍ତଡ଼୍ ନୁ ଅନ୍ ପରୁ ଉଚିତଡ଼୍, 33ଅଂକିଙ୍କ୍ ଚାବୁକତଡ଼୍ ରେହେସ୍ ହାୱକିତଡ଼୍, ମେଣ୍ଡେ ମୁଣ୍ଡ୍ ଦିନାମ୍ତେ ପେର୍କେ ଅଣ୍ଡ୍ ମେଣ୍ଡେ ଜିୱୁଣ୍ଡ୍ ଆଦ୍ତନ୍ ।”
34ବାତେଙ୍କ୍ ଇତ୍କେ ଅଡ଼୍ ଇଦ୍ସାରେ ବିଷୟତେ ବାତେମିକା ପୁନଡ଼୍; ଇଦ୍ ବାକ୍ୟ ଅଡ଼୍ ଆଗାଙ୍କ୍ ମିଞ୍ଜି ମାତ୍ତେ, ମେଣ୍ଡେ ଜିସୁ ବାତ୍ ବାତ୍ କେସମାତ୍ତଡ଼୍, ଆଉ ସାରେ ଅଡ଼୍ ବୁଜେମ୍ ଆୟ୍ୟ ମାତ୍ତଡ଼୍ ।
ଜିସୁ ୱେର୍ଣ୍ଡ୍ କାନାଙ୍କ୍ ସୁସ୍ଥ ମାଡ଼ତଣ୍ଡ୍
(ମାତିଉ ୨୦:୨୯-୩୪; ମାର୍କ ୧୦:୪୬-୫୨)
35ଅଣ୍ଡ୍ ଯିରୀୟ ନଗର୍ତେ ଗାର୍ରେ ହେଉଦାନ୍ ୱେଲେ, ୱେରଣ୍ଡ୍ କାନାଲ୍ ହାର୍ଦେ ଗାର୍ରେ କୁଦି ତାଆଲ୍କ ମାତ୍ତଣ୍ଡ୍ । 36ଅଣ୍ଡ୍ ନାରୁଡ଼୍ ସାରେତଡ଼୍ ଆଦାନାଦ୍ ଲେଙ୍ଗ୍ କେଞ୍ଜି ଗଟ୍ ବାତେଏ ଇଞ୍ଜ ପାଚ୍ରାମାଡ଼ାଙ୍କ୍ ପସ୍ପ୍ତଣ୍ଡ୍ ।
37ଅଡ଼୍ କାନାଙ୍କ୍ କେତ୍ତଡ଼୍, “ନାଜରିତିୟ ଜିସୁ ଇଦ୍ ଆର୍ଇସ୍ ଆଦୁତନ୍ ।”
38ଆଗାଙ୍କ୍ ଅଣ୍ଡ୍ କାନାଲ୍ ଗାଟି ଲେଙ୍ଗଦେ କାର୍ଙ୍ଗତଣ୍ଡ୍, “ହୋ ଜିସୁ, ଦାଉଦ୍ତେ ମାର୍, ନାକିଂଙ୍କ୍ ଦୟା ମାଡ଼ା ।”
39ମାତର୍ ମୁନେ ଆଦାନଡ଼୍ ନାରୁଡ଼୍ କାନାଙ୍କ୍ ଦମକ୍ ଇସ୍ ଅଂକିଙ୍କ୍ କଟ ଆଦାଙ୍କ୍ କେତ୍ତଡ଼୍, ବାତେଙ୍କ୍ ଇତ୍କେ ଅଣ୍ଡ୍ ମେଣ୍ଡ୍ ଗାଟି ଲେଙ୍ଗତେ କାର୍ତଣ୍ଡ୍, “ହୋ ଦାଉଦ୍ ତେ ମାର୍, ନାକିଂଙ୍କ୍ ଦୟା ମାଡ଼ା ।”
40ଜିସୁ ଆଗାଙ୍କ୍ ନିସ୍ ମିକା କାନାଙ୍କ୍ ଗାର୍ରେ ତାତାନଙ୍କ୍ କେତ୍ତଣ୍ଡ୍, ମେଣ୍ଡ୍ ଅଣ୍ଡ୍ ଗାର୍ରେ ୱାତ୍ତେ ୱେଲେ, ଜିସୁ ଅଂକିଙ୍କ୍ କେତ୍ତଣ୍ଡ୍, 41ନାନ୍ ନି ମାଇଦିଙ୍କ୍ ବାତ୍ ମାଡ଼ିତାନ୍ ଇଞ୍ଜ ନିମେ ଇଚ୍ଛା ମାଡ଼ୁତିନ୍ ? କାନାଲ୍ କେତ୍ତଣ୍ଡ୍, “ହୋ ପ୍ରବୁ, ନାନ୍ ବେଲାକି ମେଣ୍ଡେ ଉଡ଼୍ପାର୍ଦ୍ତାନ୍ ।”
42ଜିସୁ କାନାଙ୍କ୍ କେତ୍ତଣ୍ଡ୍, “ତ ନିମେ କଣ୍ଡା ଉଡ଼େ; ନିୱାଦ୍ ବିଶ୍ୱାସ୍ ନିକିଂଙ୍କ୍ ସୁସ୍ଥ ମାଡ଼୍ତଣ୍ଡ୍ ।”
43ସାଙ୍ଗେ ସାଙ୍ଗେ ଅଣ୍ଡ୍ କଣ୍ଡାଉଡ଼ି, ଇଶ୍ୱରତେ ମହିମା କୀର୍ତ୍ତନ୍ ମାଡ଼ମାଡ଼ ଅନ୍ ପେର୍କେ ପେର୍କେ ତାଆକାନଙ୍କ୍ ପସ୍ପ୍ତଣ୍ଡ୍ ନୁ ନାରୁଡ଼୍ ସାରେତଡ଼୍ ଆଦ୍ ଉଡ଼ି ଇଶ୍ୱର୍ ତେ ପ୍ରସଂଶା ମାଡ଼୍ତଡ଼୍ ।
Seçili Olanlar:
ଲୁକ 18: NTKaa20
Vurgu
Paylaş
Kopyala
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
The New Testament in Koya Language © The Word for the World International and Koya Translation Samithi, Malkangiri, Odisha 2020
