ଯୋହନ୍ 6
6
ଜିସୁ ଏଇଙ୍ଗ୍ ହଜାର୍ ନାରୁଡ଼୍କ୍ ତିନ୍ଦାଙ୍କ୍ ଇତ୍ତଣ୍ଡ୍
(ମାତିଉ ୧୪:୧୩-୨୧; ମାର୍କ ୬:୩୦-୪୪; ଲୁକ ୯:୧୦-୧୭)
1ତାନ୍ପେର୍କେ ଜିସୁ ଗାଲିଲି ବେଡ଼େଡ଼୍ତେ, ଇତ୍କେ ତିବିରିୟା ବେଡ଼୍ମ୍ତିଙ୍କ୍ ୱେୟସ୍ ଆପାକ୍ ଆତ୍ତଣ୍ଡ୍ । 2ମେଣ୍ଡେ, ଅଣ୍ଡ୍ ରଗିନାରୁନ୍ତେ ସେଙ୍ଗେ ବେନ୍ ଆଶର୍ଯ୍ୟ ପାଡ଼ିୟି ମାଡ଼ମାତ୍ତଣ୍ଡ୍, ଆଉସାରେ ଉଡ଼ି ନାର୍ଗେ ନାରୁଡ଼୍ ଅନ୍ପେର୍କେ ତାକାନଙ୍କ୍ ପସ୍ପ୍ତ୍ତଡ଼୍ । 3ଆସୁଟେ ଜିସୁ ମେଟେତ୍ ପର୍ର ଆଞ୍ଜ୍ ନିଜେତ୍ ଶିଷ୍ୟଡ଼୍ ତ ଆଗେ କୁଦ୍ତଣ୍ଡ୍ । 4ଆସୁଟେ ଯିହୁଦିଡ଼ାଦ୍ ନିସ୍ତାର୍ ପାଣ୍ଡୁମ୍ ଗାର୍ରେ ଏୱୁସ୍ ମାତ୍ତେ । 5ମେଣ୍ଡେ, ଜିସୁ ନାର୍ଗେ ନାରୁଡ଼୍ ତାନ୍ ଗାର୍ରେ ୱାଦାନାଦ୍ ଉଡ଼ି ପିଲିପ୍ତିଙ୍କ୍ କେତ୍ତଣ୍ଡ୍, “ଇଡ଼୍ ତିନ୍ଦାନ୍ ମାଇଦିଙ୍କ୍ ମାନାଡ଼୍ ବେଗାଙ୍କ୍ ନାର୍ଗେ ରୁଟି ଆସିତାଡ଼୍ ?” 6ବାତେଙ୍କ୍ ଇତ୍କେ ଅଣ୍ଡ୍ ପିଲିପ୍ତିଙ୍କ୍ ପରିକ୍ଷା ମାଡ଼୍ତେ ଲେକାମ୍ ଇଲା କେତ୍ତଣ୍ଡ୍, ବାତେଙ୍କ୍ ଇତ୍କେ ଅଣ୍ଡ୍ ବାତେଏ ମାଡ଼ାଙ୍କ୍ ଆଞ୍ଜମିନ୍ଦେଣ୍ଡ୍, ଆଦ୍ ଅଣ୍ଡ୍ ନିଜେ ପୁଞ୍ଜ୍ମାତ୍ତଣ୍ଡ୍ ।
7ପିଲିପ୍ ଅଂକିଙ୍କ୍ ଉତ୍ତର୍ ହିତ୍ତଣ୍ଡ୍, “ସାରେତଡ଼୍ ସୁଦୁର୍ ପାହେମ୍ଆଦାନ୍ ମାଇଦିଙ୍କ୍ ଇଡ଼୍ ସେଙ୍ଗେ ରେଣ୍ଡ୍ ୱାନ୍ଦା ଦିନାରୀତେ#୬:୭ ୱେରନ୍ ଦିନେତ୍ ପାଡ଼୍ୟି ମାଡ଼୍ତେ ଡାବ୍କ୍ ରୂଟି ଆସର୍ ଆୟ୍ୟ ।”
8ଶିମୋନ୍ ପିତର୍ତେ ଦାଦାଲ୍ ଆନ୍ଦ୍ରିୟ ପେଦେର୍ତଣ୍ଡ୍ ଅଡ଼୍ ଶିଷ୍ୟଡ଼୍ ଲୋପେଙ୍କ୍ ୱେରଣ୍ଡ୍ ଅଂକିଙ୍କ୍ କେତ୍ତଣ୍ଡ୍, 9“ଇଗ୍ ୱେରଣ୍ଡ୍ ପେକାଲ୍ ମିନ୍ଦେଣ୍ଡ୍, ଅନ୍ଆଗେ ଏଇଙ୍ଗ୍ ରୂଟି ନୁ ରେଣ୍ଡ୍ ୱାୱ୍ତାଉ କିକେ ମିନ୍ଦେ, ବାତେଙ୍କ୍ ଇତ୍କେ ଇସର୍ ନାରୁଡ଼୍ ମାଇଦିଙ୍କ୍ ଆୱ୍ ଆସର୍ ଆୟ୍ୟ ।”
10ଜିସୁ ଶିଷ୍ୟଡ଼୍କ୍ କେତ୍ତଣ୍ଡ୍, “ନାରୁଡ଼୍କିଂଙ୍କ୍ କୁସ୍ପାଟ୍ ।” ଆଦ୍ ପଡ଼ିୟେତାଗ୍ ଗାଟି ଗାଡ଼୍ ମାତ୍ତେ, ଆଦ୍ ଗାଡ଼୍ ପର୍ର ସାରେତଡ଼୍ କୁଦ୍ତଡ଼୍ । ସାରେ ଏଇଙ୍ଗ୍ ହଜାର୍ ନାରୁଡ଼୍ ଆଗେ କୁଦ୍ତଡ଼୍ । 11ଆସୁଟେ ଜିସୁ ଆ ରୂଟିଙ୍କ୍ ଅସ୍ ଦନ୍ୟବାଦ୍ ଇସ୍ କୁଦିମାନ୍ଦାନ୍ ନାରୁଡ଼୍କିଂଙ୍କ୍ ଆୱ୍ ତୁଉସିତ୍ତଣ୍ଡ୍, ଆଦେ ପୁଟୁଙ୍କ୍ କିକେ ଆନ୍ତେ ତୁଉସିତ୍ତଣ୍ଡ୍, ଅଡ଼୍ ବେସର୍ ଇଚ୍ଛା ମାଡ଼୍ତଡ଼୍ ଆସର୍ ଇତ୍ତଡ଼୍ । 12ମେଣ୍ଡେ, ଅଡ଼୍ ତିଞ୍ଜ୍ ପାଞ୍ଜ୍ତେ ପେର୍କେ, ଜିସୁ ତାନ୍ ଶିଷ୍ୟଡ଼୍କିଂଙ୍କ୍ କେତ୍ତଣ୍ଡ୍, “ମିଗ୍ଲି ମାନ୍ଦାନ୍ ଉର୍ଙ୍ଗ୍ତେ ଦୁଡ଼ାକିଂଙ୍କ୍ ୱେରଡ଼୍ ଆଗେ ଗୁଡ଼୍ପାଟ୍ ।” ବେଦ୍ପୁଟୁଙ୍କ୍ ବାତେବା ନଷ୍ଟ ଆୟ୍ମାକି, 13ଆସୁଟେ ଅଡ଼୍ ହାୱୁସାରେ ୱେରଡ଼୍ ଆଗେ ଗୁଡ଼୍ପ୍ତଡ଼୍, ମେଣ୍ଡେ ନାରୁଡ଼୍ତିତ୍ ପେର୍କେ ଏଇଙ୍ଗ୍ ରୂଟିନାଗାଙ୍କ୍ ବେନା ଉର୍ଙ୍ଗ୍ତେ ଦୁଙ୍କ୍କାକିଂଙ୍କ୍ ମିଗ୍ଲି ମାତ୍ତା, ଆଗାଙ୍କ୍ ଅଡ଼୍ ବାର୍ଟାନ୍ ଜୁଡ଼ିନାଗ୍ ବର୍ତ୍ତି ମାଡ଼୍ତଡ଼୍ ।
14ଆଗେ ମାନ୍ଦାନ୍ ନାରୁଡ଼୍ ଜିସୁ ମାଡ଼୍ତେ ବାକ୍ୱା ପାଡ଼ିୟି ଉଡ଼ି କେତ୍ତାଙ୍କ୍ ପସ୍ପ୍ତ୍ତଡ଼୍, “ଜଗତ୍ତାଗେ ବେନ୍ ବାବବାଦିଡ଼୍ ୱାଦାନାଦ୍ ମାତ୍ତେ, ଇଣ୍ଡ୍ ନିଜାମ୍ ଅଣ୍ଡେ ।” 15ଆଦିଙ୍କ୍ ନାରୁଡ଼୍ ଅଂକିଙ୍କ୍ ଶକ୍ତିତେ ପୟ୍ସ୍ ରାଜା ମାଡ଼ାନ୍ ମାଇଦିଙ୍କ୍ ଇଚ୍ଛା ମାଡ଼ୁତଡ଼୍, ଇଦ୍ ପୁଞ୍ଜ୍ ଜିସୁ ମେଣ୍ଡନ୍ନ୍ଦାମ୍ ୱେରଣ୍ଡେ ମେଟେତାଗ୍ ପେୟିସ୍ ଆତ୍ତଣ୍ଡ୍ ।
ଜିସୁ ଏର୍ଦେ ପର୍ର ତାକ୍ତଣ୍ଡ୍
(ମାତିଉ ୧୪:୨୨-୨୩; ମାର୍କ ୬:୪୫-୫୨)
16ଆଦ୍ଦିନେ ମୁଲ୍ପୁଟ୍ ଆତ୍ତାଙ୍କ୍ ଜିସୁନ୍ ଶିଷ୍ୟଡ଼୍ ସମୁଦ୍ରତାଗ୍ ଆତଡ଼୍, 17ମେଣ୍ଡେ ଓଡ୍ତାଗ୍ କୁଦି ସମୁଦ୍ରତେ ଆପ୍ପାକେ କପର୍ନାହୁମ୍ ପାକେ ଆଦାଙ୍କ୍ ପସ୍ପ୍ତ୍ତଡ଼୍ । ଇକାଡ଼୍ ଆତ୍ତେ, ମେଣ୍ଡେ ଜିସୁ ଆସୁଙ୍କ୍ ଯାକ ଅଡ଼୍ ଗାର୍ରେ ୱାଡ଼କଟ ମାତ୍ତଣ୍ଡ୍, 18ମେଣ୍ଡେ ଗାଟି ଗାଲ୍ୱାଦାନ୍ ମାଇଦିଙ୍କ୍ ବେଡ଼େମ୍ତାଗ୍ ଗାହାଙ୍କ୍କୁଡ଼୍ ତେଦ୍ତେ । 19ଶିଷ୍ୟଡ଼୍ ଇଲ୍କେତାଗ୍ ଏଇଙ୍ଗ୍ ବା ଆରୁ କିଲମିଟର୍ ଜେକେ ଓଡା ଆତ୍ତେୱେୟ୍, ଜିସୁ ଏର୍ଦା ପର୍ର ତାକି ଓଡେତ୍ ଗାର୍ରେ ୱାସମାନ୍ଦାନାଦ୍ ଉଡ଼ି ୱେର୍ତଡ଼୍ । 20ବାତେଙ୍କ୍ ଇତ୍କେ ଜିସୁ ଅଡ଼୍କିଂଙ୍କ୍ କେତ୍ତଣ୍ଡ୍, “ଇଣ୍ଡ୍ ତ ନାନ୍, ୱେରେ ମାଟ୍ ।” 21ତାନ୍ପେର୍କେ ଅଡ଼୍ ଅଂକିଙ୍କ୍ ଓଡେତେ ଆଦାନଙ୍କ୍ ଇଚ୍ଛା ମାଡ଼୍ତଡ଼୍, ମେଣ୍ଡେ ଅଡ଼୍ ବେନ୍ ପଡ଼ିୟେତାଗ୍ ଆଞ୍ଜମାତ୍ତଡ଼୍, ଓଡ୍ ସାଙ୍ଗେ ସାଙ୍ଗେ ଆଦ୍ ଆଞ୍ଚିନାଗ୍ ହେୱ୍ତେ ।
ନାରୁଡ଼୍ ଜିସୁଙ୍କ୍ ମେହେକ୍ତଡ଼୍
22ଆଦ୍ ପଡ଼ିୟେତାଗ୍ ମାତର୍ ୱେରଡ଼୍ ଓଡା ମାତ୍ତା, ମେଣ୍ଡେ ଆଗେ ଯେ ଜିସୁ ତାନ୍ ଶିଷ୍ୟଡ଼୍ ତଡ଼୍ ଅନ୍ୱେ ମାତ୍ତଣ୍ଡ୍, ମାତର୍ ତାନ୍ ଶିଷ୍ୟଡ଼୍ ଆଞ୍ଜ୍ ମାତ୍ତଡ଼୍, ଇଦ୍ ବେନ୍ ନାରୁଡ଼୍ ମେଣ୍ଡନ୍ଦିନେ ବେଡ଼େମ୍ତେ ମେଣ୍ଡନ୍ ପାକେ ନିସ୍ ମାତ୍ତଡ଼୍, ଅଡ଼୍ ଉଡ଼ିମାତ୍ତଡ଼୍ । 23ବେଗେ ଜିସୁ ପ୍ରାର୍ତନା ମାଡ଼ି ନାରୁଡ଼୍କିଂଙ୍କ୍ ରୂଟି ତିନ୍ଦାନଙ୍କ୍ ଇସ୍ମାତ୍ତଣ୍ଡ୍, ଆଦ୍ ପଡ଼୍ୟିତାଗ୍ ତିବିରୀୟାତେ ବେସ୍କ୍ ଓଡା ୱାସ୍ ହେୱୁତା; 24ଜିସୁ ନୁ ତାନ୍ ଶିଷ୍ୟଡ଼୍ ଆଗେ ଇଲ୍ଲେଡ଼୍, ଇଦ୍ ବେସୁଙ୍କ୍ ନାରୁଡ଼୍ ଉଡ଼୍ତଡ଼୍, ଆସୁଟେ ଅଡ଼୍ ହାଉସାରେ ଓଡ୍ତାଗ୍ ତାରି ଜିସୁଙ୍କ୍ ମେହ୍କ କପର୍ନାହୁମ୍ ତାଗ୍ ଆଦ୍ତଡ଼୍ ।
ଜିସୁ ଜିୱୁନ୍ତାଦ୍ କାଦି
25ମେଣ୍ଡେ, ଅଡ଼୍ ବେଡ଼େମ୍ତେ ଆପାକ୍ ଜିସୁଙ୍କ୍ ଉଡ଼ି ଅଂକିଙ୍କ୍ ପାଚ୍ରାମାଡ଼୍ତଡ଼୍, “ହୋ ଗୁରୁ ନିମ୍ ବେସୁଙ୍କ୍ ହିଗ୍ ୱାତ୍ତିନ୍ ?”
26ଜିସୁ ଅଡ଼୍କିଂଙ୍କ୍ ଉତ୍ତର୍ ଇତ୍ତଣ୍ଡ୍, “ସତ୍ ନାନ୍ ମିକିଂଙ୍କ୍ କେତୁତାନ୍, ବାକ୍ୱା ପାଡ଼୍ୟି ଉଡ଼୍ତାଙ୍କ୍ ଯେ ମିଡ଼୍ ନାକିଂଙ୍କ୍ ମେହ୍କୁତିଡ଼୍, ଆଦ୍ ଆୟ୍ୟ, ମାତର୍ ରୋଟି ତିଞ୍ଜ୍ ପଟ୍ଟେ ନିଣ୍ଡ୍ତାଙ୍କ୍ ନାକିଂଙ୍କ୍ ମେହେକୁତିଡ଼୍ । 27ବେନ୍ କାଦି ତେରିତେ, ଆଦିନ୍ ମାଇଦିଙ୍କ୍ କଷ୍ଟ ମାଡ଼୍ମାଟ୍ । ବେଲାନ୍ ବେନ୍ କାଦି ସାରେଦିନାତ୍ ଜିୱୁନ୍ ଇଦ୍ତଣ୍ଡ୍, ଆଦିନ୍ ସେଙ୍ଗେ କଷ୍ଟ ମାଡ଼ାଟ୍ । ଆଦ୍ କାଦି ନାରୁନ୍ପିଲେ ମିକିଂଙ୍କ୍ ହିଦ୍ତଣ୍ଡ୍, ବାତେଙ୍କ୍ ଇତ୍କେ ଅଂକିଙ୍କ୍ ବାବାଲ୍ ଇଶ୍ୱର୍ ଇଦ୍ ଅଦିକାର୍ ହିତ୍ତଣ୍ଡ୍ ।”
28ଆସୁଟେ ଅଡ଼୍ ଅଂକିଙ୍କ୍ ପାଚ୍ରାମାଡ଼୍ତଡ଼୍, “ଇଶ୍ୱର୍ ବାତ୍ ଇଚ୍ଛା ମାଡ଼ୁତଣ୍ଡ୍, ଆଦ୍ ପାଡ଼୍ୟି ମାଡ଼ାଙ୍କ୍ ମାକିଂଙ୍କ୍ ବାତ୍ ମାଡ଼୍ ୱେୟ୍ତିତ୍ ?”
29ଜିସୁ ଅଡ଼୍କିଂଙ୍କ୍ ଉତ୍ତର୍ ହିତ୍ତଣ୍ଡ୍, “ବେନଙ୍କ୍ ଇଶ୍ୱର୍ ରୟ୍ସ୍ ମିନ୍ଦେଣ୍ଡ୍, ଅନ୍ଆଗେ ବିଶ୍ୱାସ୍ ମାଡ଼ାନ୍ ତଡ଼୍ ମିଡ଼୍ ଆଦ୍ ମାଡ଼୍ ପାର୍ଦିତିଡ଼୍ ।”
30ଆସୁଟେ ଅଡ଼୍ ଜିସୁଙ୍କ୍ ପାଚ୍ରାମାଡ଼୍ତଡ଼୍, “ଆଲେକେ ନିମ୍ ଚିହିହ୍ନେ ରକମ୍ ବାତେଏ ମାଡ଼ମିନ୍ଦେନି ଯେ, ଆଦ୍ ଉଡ଼ି ମାମ୍ ନିକିଂଙ୍କ୍ ବିଶ୍ୱାସ୍ ମାଡ଼୍ ପାର୍ଦ୍ତମ୍ ? କେଲାଟ୍ ବାତେଏ ମାଡ଼୍ ପାର୍ଦ୍ତିଡ଼୍ ? 31ମାନ୍ ଆନିଦାଦିଡ଼୍ ଉସ୍କ ନେଲ୍ଦାଗ୍ ମାନ୍ନା ତିଞ୍ଜମାତ୍ତଡ୍, ବେଦ୍ପୁଟୁଙ୍କ୍ ଶାସ୍ତ୍ରତାଗ୍ ଲେକାମିନ୍ଦେ, ତିନ୍ଦାନ୍ ମାଇଦିଙ୍କ୍ ଅଣ୍ଡ୍ ଅଡ଼୍କିଂଙ୍କ୍ ସ୍ୱର୍ଗତାଗାଙ୍କ୍ ଇଦ୍ କାଦି ହିତ୍ତଣ୍ଡ୍ ।”
32ଆସୁଟେ ଜିସୁ ଅଡ଼୍କିଂଙ୍କ୍ କେତ୍ତଣ୍ଡ୍, “ସତ୍ ନାନ୍ ମିକିଂଙ୍କ୍ କେସ୍ ମିନ୍ଦେନ୍, ବାତ୍ ମୋଶାଲ୍ ମିକିଂଙ୍କ୍ ହିତ୍ତଣ୍ଡ୍ ଆଦ୍ ସ୍ୱର୍ଗତାଦ୍ କାଦି ଆୟ୍ୟ, ବାତେଙ୍କ୍ ଇତ୍କେ ନା ବାବାଲ୍ ମିକିଂଙ୍କ୍ ସ୍ୱର୍ଗତାଗାଙ୍କ୍ ଆଦ୍ରକତ୍ କାଦି ହିଦ୍ତଣ୍ଡ୍; 33ବେନ କାଦି ସ୍ୱର୍ଗତାଗାଙ୍କ୍ ଡିଗି ଜଗତ୍ତିଙ୍କ୍ ଜିୱୁନ୍ ବେଡ଼୍ୟାଦ୍ ମାଡ଼ିତେ, ଆଦ୍ ଇଶ୍ୱର୍ତେ କାଦି ।”
34ଅଡ଼୍ ଜିସୁଙ୍କ୍ କେତ୍ତଡ଼୍, “ପ୍ରବୁ, ସାର୍ଦାମ୍ ମାକିଂଙ୍କ୍ ହିସତେ କାଦି ହିମ୍ ।”
35ଆସୁଟେ ଜିସୁ ଅଡ଼୍କିଂଙ୍କ୍ କେତ୍ତଣ୍ଡ୍, “ନାନେ ଆଦ୍ ଜିୱେମାନ୍ଦାନ୍ କାଦି; ବେନ ନା ଗାର୍ରେ ୱାଦ୍ତଣ୍ଡ୍ ଅଣ୍ଡ୍ ବେସୁଙ୍କେ କାର୍ୱିନ୍ ଆୟ୍ୟଣ୍ଡ୍, ମେଣ୍ଡେ ବେନ ନାୟାଗେ ବିଶ୍ୱାସ୍ ମାଡ଼ିତନ୍, ଅଂକିଙ୍କ୍ ବେସୁଙ୍କେ ବା ଏର୍ ହୁନ୍ଦ୍ୱାହ୍ଓ । 36ବାତେଙ୍କ୍ ଇତ୍କେ ମିଡ଼୍ ନାକିଂଙ୍କ୍ ଉଡ଼୍କେ ମିକା ବିଶ୍ୱାସ୍ ମାଡ଼୍ୱିଡ଼୍, ଇଦ୍ ନାନ୍ ମିକିଂଙ୍କ୍ କେତୁତାନ୍ । 37ବାବାଲ୍ ବେନଡ଼୍କିଂଙ୍କ୍ ନାକିଂଙ୍କ୍ ଦାନ ମାଡ଼ିତନ୍, ଅଡ଼୍ ନା ଗାର୍ରେ ୱାଦ୍ତଡ଼୍; ମେଣ୍ଡେ, ବେନ ନା ଗାର୍ରେ ୱାଦ୍ତଣ୍ଡ୍, ଅଂକିଙ୍କ୍ ନାନ୍ ବେଦ୍ଲେକାମ୍ ବାୟିଦେ ପେସ୍ପିୱନ୍; 38ବାତେଙ୍କ୍ ଇତ୍କେ ନାନ୍ ନିଜେତ୍ ଇଚ୍ଛାତିଙ୍କ୍ ସାଦନ୍ ମାଡ଼ାଙ୍କ୍ ୱାଡ଼ନ୍ ବେଲାନ୍ ନା ପ୍ରେରଣାକର୍ତ୍ତାନ୍ ଇଚ୍ଛା ସାଦନ୍ ମାଡ଼ାଙ୍କ୍ ସ୍ୱର୍ଗତାଗାଙ୍କ୍ ୱାସ୍ମିନ୍ଦେନ୍ । 39ମେଣ୍ଡେ, ନା ପ୍ରେରଣାକର୍ତ୍ତାଲ୍ ବେନ୍ ସାର୍ତଡ଼୍କିଙ୍କ୍ ନାକିଂଙ୍କ୍ ଦାନ ମାଡିସ୍ମିନ୍ଦେଣ୍ଡ୍, ଅଡ଼୍ ଲୋପେଙ୍କ୍ ବେନଙ୍କ୍ ମେଣ୍ଡେ ବେଦ୍ପୁଟୁଙ୍କ୍ ନାନ୍ ହରାମାଡ଼କଟ୍ ବେଲାନ୍ ଶେଷ ଦିନ୍ତେ ଅଡ଼୍କିଂଙ୍କ୍ ମେଣ୍ଡେନ୍ଦାମ୍ ବାଦ୍କିତାନ୍, ଇଦ୍ ଅନାଦ୍ ଇଚ୍ଛା । 40ବାତ୍ତେଙ୍କ୍ ଇତ୍କେ ବାବାଲ୍ ଇଚ୍ଛା ମାଡ଼ିତନ୍ ବେନଆଇ ମାର୍ଦିଙ୍କ୍ ଦର୍ଶନ୍ ମାଡ଼ି ଅନ୍ଆଗେ ବିଶ୍ୱାସ୍ ମାଡ଼ିତନ୍, ଅଡ଼୍ ସାରେଦିନାତ୍ ଜିୱୁନ୍ ଦର୍କିତ୍, ଆଦିନ୍ ମାଇଦିଙ୍କ୍ ଶେଷ ଦିନ୍ତେ ନାନ୍ ସାରେତଡ଼୍କିଂଙ୍କ୍ ମେଣ୍ଡଅନ୍ଦାମ୍ ଜିୱୁଣ୍ଡ୍ ମାଡ଼ିତାନ୍ ।”
41ଜିସୁ ନାନ୍ ସ୍ୱର୍ଗକଞ୍ଜ୍ ୱାସ୍ମାନ୍ଦାନ୍ କାଦି ଇଞ୍ଜ କେତ୍ତାଙ୍କ୍, ଯିହୁଦିଡ଼୍ ଅନ୍ ବିରୁଦ୍ଦ୍ତେ ନିନ୍ଦ୍ ମାଡ଼ି କେତ୍ତାଙ୍କ୍ ପସ୍ପ୍ତ୍ତଡ଼୍ । 42ଆଗାଙ୍କ୍ ଅଡ଼୍ କେତ୍ତଡ଼୍, “ହିଣ୍ଡ୍ ବାତେଏ ଯୋଷେପ୍ତେ ମାର୍ ଜିସୁ ଆୟ୍ୟଣ୍ଡ୍ କି ? ମେଣ୍ଡେ ମାମ୍ମେ ତାମ୍ ୟାୟ୍ବାବାଙ୍କ୍ ପୁତ୍ତମ୍, ଆଲେକ୍ ନାନ୍ ସ୍ୱର୍ଗକଞ୍ଜ୍ ୱାସ୍ ମିନ୍ଦେଣ୍ଡ୍ ଇଞ୍ଜ ଅଣ୍ଡ୍ ଇଞ୍ଜେ ବେଦ୍ ପୁଟୁଙ୍କ୍ କେସମିନ୍ଦେଣ୍ଡ୍ ?”
43ଜିସୁ ଅଡ଼୍କିଂଙ୍କ୍ କେତ୍ତଣ୍ଡ୍, “ନିଜେତ୍ ନିଜେତ୍ ଲୋପ୍ ନିନ୍ଦ୍ ମାଡ଼୍ମାଟ୍ । 44ନା ମାଲ୍ସ୍ ୱାଦାନ୍ ବାବାଲ୍ ବେନଙ୍କ୍ ତିଆର୍ ମାଡ଼ିତନ୍, ମାତର୍ ଅଣ୍ଡ୍ ନା ଗାର୍ରେ ୱାଦ୍ପାର୍ଦ୍ ତଣ୍ଡ୍, ମେଣ୍ଡେ ନାନ୍ ଶେଷ ଦିନ୍ତେ ମେଣ୍ଡଅନ୍ଦାମ୍ ଅଂକିଙ୍କ୍ ଜିୱୁଣ୍ଡ୍ ମାଡ଼ିତାନ୍ । 45ବାବବାଦିଡ଼୍ ଦର୍ମଶାସ୍ତ୍ରତାଗ୍ ଲେକିମିନ୍ଦେଡ଼୍, ସାରେତଡ଼୍ ମାତର୍ ଇଶ୍ୱର୍ତେ କନ୍ସ୍ ଶିକ୍ଷା ଦର୍ସିକି ଆଦ୍ତଡ଼୍ । ବେନଆଇ ବାବାନାଗାଙ୍କ୍ କେଞ୍ଜି ଶିକ୍ଷା ଲାବ୍ ମାଡ଼ିତନ୍, ଅଣ୍ଡ୍ ନା ଗାର୍ରେ ୱାଦ୍ତଣ୍ଡ୍ । 46ଇଦିନ୍ ଇତ୍କେ ଆୟ୍ୟ ଯେ ବେନ ବାବାଙ୍କ୍ ଉଡ଼ିମିନ୍ଦେଣ୍ଡ୍, ବେନ ଇଶ୍ୱର୍ତାଗାଙ୍କ୍ ୱାସ୍ମିନ୍ଦେଣ୍ଡ୍, ଅଣ୍ଡ୍ ମାତର୍ ବାବାଙ୍କ୍ ଉଡ଼ିମିନ୍ଦେଣ୍ଡ୍ । 47ସତ୍ ନାନ୍ ମିକିଂଙ୍କ୍ କେସମିନ୍ଦେନ୍, ବେନ ବିଶ୍ୱାସ୍ ମାଡ଼ିତନ୍, ଅଣ୍ଡ୍ ସାରେଦିନାତ୍ ଜିୱୁନ୍ ଦର୍ସିକି ମିନ୍ଦେଣ୍ଡ୍ । 48ନାନ୍ ଜିୱୁମାନ୍ଦାନ୍ କାଦି । 49ମିଇ ଆନିଦାଦିଡ଼୍ ଉସ୍କ ନେଲ୍ଦାଗ୍ ମାନ୍ନା ତିତ୍ତଡ଼୍ ମିକା ଅଡ଼୍ ଡଲ୍ତଡ଼୍ । 50ବାତେଙ୍କ୍ ଇତ୍କେ ବେନ୍ କାଦି ସ୍ୱର୍ଗତାଗାଙ୍କ୍ ୱାଦ୍ତେ ଆଦିଙ୍କ୍ ବେନ ତିନ୍ତଣ୍ଡ୍ ଅଣ୍ଡ୍ ସାରେଦିନାତ୍ ଜିୱୁଣ୍ଡ୍ ଜିୱେଦର୍କିତ୍ । 51ନାନ୍ ସ୍ୱର୍ଗତାଗାଙ୍କ୍ ୱାସ୍ମାନ୍ଦାନ୍ ଆଦ୍ ଜିୱେମାନ୍ଦାନ୍ କାଦି; ବେନ ହିଦ୍ କାଦି ତିନ୍ତଣ୍ଡ୍, ଅଣ୍ଡ୍ ଅନନ୍ତକାଲ୍ ଯାକ ଜିୱୁ ମାନ୍ତଣ୍ଡ୍; ନାନ୍ ବେନ୍ କାଦି ହିଦ୍ତାନ୍, ଆଦ୍ ନାୟାଦ୍ ଆଉଙ୍ଗ୍, ନାନ୍ ଆଦ୍ ଜଗତ୍ତିଙ୍କ୍ ବାଦ୍ସ୍କ୍କାନ୍ ମାଇଦିଙ୍କ୍ ହିଦ୍ତାନ୍ ।”
52ଆସୁଟେ ଯିହୁଦୀଡ଼୍ ନିଜେ ନିଜେ ରାମ୍କ୍ ଆସ୍ କେତାଙ୍କ୍ ପସ୍ପ୍ତ୍ତଡ଼୍, “ହିଣ୍ଡ୍ ବେଲା ମାନାଙ୍କ୍ ନିଜେତ୍ ଆଉଙ୍ଗ୍ ତିନ୍ଦାଙ୍କ୍ ହିଦ୍ ପାର୍ଦ୍ତଣ୍ଡ୍ ?”
53ଆସୁଟେ ଜିସୁ ଅଡ଼୍କିଂଙ୍କ୍ କେତ୍ତଣ୍ଡ୍, “ସତ୍ ନାନ୍ ମିକିଂଙ୍କ୍ କେସମିନ୍ଦେନ୍, ମନୁଷ୍ୟପୁତ୍ରନ୍ ଆଉଙ୍ଗ୍ ତିନକଟ୍ ମାତ୍କେ ନୁ ଅନାଦ୍ ନେତୁର୍ତିଙ୍କ୍ ଉନକଟ ମାତ୍କେ, ମିଡ଼୍ ଜିୱୁନ୍ ପାଏମ୍ ଆଦ୍ପାର୍ୱିଡ଼୍ । 54ବେନ ନା ଆଉଙ୍ଗ୍ ତିନ୍ତଣ୍ଡ୍ ନୁ ନା ନେତୁର୍ ଉନ୍ତଣ୍ଡ୍, ଅଣ୍ଡ୍ ସାରେଦିନାତ୍ ଜିୱୁନ୍ ଦର୍ସିକିତଣ୍ଡ୍, ମେଣ୍ଡେ ନାନ୍ ଶେଷ ଦିନାତେ ଅଂକିଙ୍କ୍ ମେଣ୍ଡଅନ୍ଦାମ୍ ବାଦ୍କିତାନ୍ । 55ବାତେଙ୍କ୍ ଇତ୍କେ ନା ଆଉଙ୍ଗ୍ ଆଦ୍ରକତ୍ କାଦି ନୁ ନା ନେତୁର୍ ଆଦ୍ରକତ୍ ଉନ୍ଦାନାଦ୍ । 56ବେନ ନା ଆଉଙ୍ଗ୍ ତିନ୍ତଣ୍ଡ୍ ନୁ ନା ନେତୁର୍ ଉନ୍ତଣ୍ଡ୍, ଅଣ୍ଡ୍ ନାୟାଗେ ମାନ୍ତଣ୍ଡ୍ ନୁ ନାନ୍ ଅନ୍ଆଗେ ମାନ୍ତାନ୍ । 57ଜିୱୁତେ ବାବାଲ୍ ବେଦ୍ପୁଟୁଙ୍କ୍ ନାକିଂଙ୍କ୍ ରହ୍ତଣ୍ଡ୍ ନୁ ନାନ୍ ବାବାନ୍ ସେଙ୍ଗେ ଜିୱୁ ମିନ୍ଦେନ୍, ଆଦିନ୍ ରକମ୍ ବେନ ନାକିଂଙ୍କ୍ ତିନ୍ତଣ୍ଡ୍, ଅଣ୍ଡ୍ ଆନ୍ତେ ନା ମାଇଦିଙ୍କ୍ ଜିୱୁନ୍ ମାନ୍ତଣ୍ଡ୍ । 58ବେନ କାଦି ସ୍ୱର୍ଗକଞ୍ଜ୍ ୱାସ୍ ମିନ୍ଦେ, ଆଦ୍ ହିଦ୍; ଆନିଦାଦିଡ଼୍ ବେଦ୍ପୁଟୁଙ୍କ୍ ତିଞ୍ଜ୍ ଡଲିମିନ୍ଦେଡ଼୍, ଆଦ୍ଲେକାମ୍ ଆୟ୍ୟ; ବେନ ହିଦ୍ କାଦି ତିନ୍ତଣ୍ଡ୍, ଅଣ୍ଡ୍ ଅନନ୍ତକାଲ୍ ଯାକ ଜିୱୁ ମାନ୍ତଣ୍ଡ୍ ।”
59ଜିସୁ କଫର୍ନାହୁମ୍ତେ ୱେରଡ଼୍ ସମାଜ୍ ଲତ୍ତାଗେ ଶିକ୍ଷା ହିସମାନ୍ଦାନ୍ ସମୟ୍ତେ ହି ସାରେ ଗଟି କେତ୍ତଣ୍ଡ୍ ।
ସାରେଦିନାତ୍ ଜିୱୁନ୍ତାଦ୍ ବାକ୍ୟ
60ତାମ୍ ଶିଷ୍ୟଡ଼୍ ଲୋପେଙ୍କ୍ ବେସ୍କ୍ତୁଡ଼୍ ହିଦ୍ କେଞ୍ଜି କେତ୍ତଡ଼୍, “ହିଦ୍ ଶିକ୍ଷା ବୁଜେମ୍ ଆଦାନାଦ୍ ଗାଟି କଷ୍ଟ, ବେନ ହିଦ୍ ସାରେ କେଞ୍ଜିତଣ୍ଡ୍ ?”
61ହିଦ୍ ବିଷୟ୍ତେ ଜିସୁଙ୍କ୍ ବେନ ବାତେଏ କେଲକଟ ମାତ୍କେ ମିକା ତାନ୍ ଶିଷ୍ୟଡ଼୍ ନିନ୍ଦ୍ ମାଡ଼ୁତଡ଼୍ ଇଞ୍ଜ ପୁଞ୍ଜ୍ ଅଡ଼୍କିଂଙ୍କ୍ କେତ୍ତଣ୍ଡ୍, “ହିଦ୍ ଗଟ୍ତେ ମିଡ଼୍ ଚିନ୍ତେ ଆଦୁତିଡ଼୍ ? 62ଆଲାଇତ୍କେ ନାରୁନ୍ପିଲେ ମୁନେଙ୍କ୍ ବେନ୍ ପଡ଼ିୟେତାଗ୍ ମାତ୍ତଣ୍ଡ୍, ଆଦ୍ ପଡ଼ିୟେତାଗ୍ ମାଲ୍ସ୍ ଆଦାନାଦ୍ ଉଡ଼୍କେ ଆସୁଟେ ବାତ୍ ମାଡ଼ିତିଡ଼୍ ? 63ମାତର୍ ଇଶ୍ୱର୍ତେ ଆତ୍ମା ଜିୱୁନ୍ ହିଦ୍ପାର୍ଦ୍ତେ; ନାରୁଡ଼୍ତେ ଶକ୍ତି ବାତେମିକା ମାଡ଼୍ ପାର୍ୱ; ଇଶ୍ୱର୍ତେ ଆଦ୍ ଜିୱୁନ୍ ହିଦାନ୍ ଆତ୍ମା, ଆତ୍ମାତିଙ୍କ୍ ମିଡ଼୍ ବେଲା ଏର୍କା ମାଡ଼୍ ପାର୍ଦିତିଡ଼୍, ଆଦିନ୍ ମାଇଦିଙ୍କ୍ ନାନ୍ ମିକିଂଙ୍କ୍ ହିଦ୍ ସାରେ ଗଟି କେତ୍ତାନ୍ । 64ଆତ୍କେମିକା ମିଇ ଲୋପେଙ୍କ୍ ବେନଡ଼୍ ବିଶ୍ୱାସ୍ ମାଡ଼ଡ଼୍ । ବାତେଙ୍କ୍ ଇତ୍କେ ବେନଡ଼୍ ବିଶ୍ୱାସ୍ ମାଡ଼କଟ୍ ମାତ୍ତଡ଼୍ ନୁ ବେନ ଅଂକିଙ୍କ୍ ଶତ୍ରୁଡ଼୍କାଇଦେ ସମର୍ପନ୍ ମାଡ଼ିତନ୍, ଆଦ୍ ଜିସୁ ମୁନେଙ୍କ୍ ପୁଞ୍ଜ୍ ମାତ୍ତଣ୍ଡ୍ ।” 65ମେଣ୍ଡେ ଜିସୁ କେତ୍ତଣ୍ଡ୍, “ବାବାନାଗାଙ୍କ୍ ମାଲ୍ୱେ କଟମାତ୍କେ ବେନ ନା ଗାର୍ରେ ୱାଦ୍ ପାର୍ୱଣ୍ଡ୍ ।”
66ଆ ସମୟ୍ତାଗାଙ୍କ୍ ଅନ୍ ଶିଷ୍ୟଡ଼୍ ଲୋପେଙ୍କ୍ ନାର୍ଗେ ଅଂକିଙ୍କ୍ ପେର୍କେ ମାଡ଼କଟ୍ ପେୟିସ୍ ଆଦ୍ତଡ଼୍, ମେଣ୍ଡେ ଅନ୍ ତଡ଼୍ ମେଣ୍ଡେ ତାକଡ଼୍ । 67ଆସୁଟେ ଜିସୁ ବାରଜାନ୍ତିଙ୍କ୍ ପାଚ୍ରାମାଡ଼୍ତଣ୍ଡ୍, “ମିଡ଼୍ ଆନ୍ତେ ବାତେଏ ନାକିଂଙ୍କ୍ ୱିଡ଼୍ସି ମାଲ୍ସ୍ଆଦାଙ୍କ୍ ଇଚ୍ଛା ମାଡ଼ୁତିଡ଼୍ ?”
68 #
ମାତିଉ ୧୬:୧୬; ମାର୍କ ୮:୨୯; ଲୁକ ୯:୨୦. ଶିମୋନ୍ ପିତର୍ ଜିସୁଙ୍କ୍ ଉତ୍ତର୍ ହିତ୍ତଡ଼୍, “ପ୍ରବୁ, ମେଣ୍ଡେ ବେନନ୍ ଗାର୍ରେ ଆଦ୍ତମ୍ ? ସାରେଦିନାତ୍ ଜିୱୁନ୍ତାଦ୍ ବାକ୍ୟ ତ ନିୟାଗ୍ ମିନ୍ଦେ; 69ମେଣ୍ଡେ ନିମ୍ ଯେ ଇଶ୍ୱର୍ତେ ଆଦ୍ ପବିତ୍ର ନାରୁନି, ହିଦ୍ ମାମ୍ମେ ବିଶ୍ୱାସ୍ ମାଡ଼ିମିନ୍ଦେମ୍ ନୁ ପୁଞ୍ଜ୍ମିନ୍ଦେମ୍ ।”
70ଜିସୁ ଅଡ଼୍କିଂଙ୍କ୍ ଉତ୍ତର୍ ହିତ୍ତଣ୍ଡ୍, “ନାନ୍ ମିଡ଼୍ ବାରଜାନ୍ତିଙ୍କ୍ ହେଞ୍ଚି ମାନନ୍ କି ?” ମିକା, ମିଇ ଲୋପେଙ୍କ୍ ୱେରଣ୍ଡ୍ ଶୟ୍ତାନ୍ । 71ଜିସୁ ଇଷ୍କାରୀୟତିୟ ଶିମନତେ ମାର୍ ଯିହୁଦାଙ୍କ୍ ଉଡ଼ିମିକା ଇଦ୍ କେତ୍ତଣ୍ଡ୍, ବାତେଙ୍କ୍ ଇତ୍କେ ଅଣ୍ଡ୍ ବାରଜାନ୍ ଲୋପେଙ୍କ୍ ୱେରଣ୍ଡେ, ମେଣ୍ଡେ ଅଣ୍ଡ୍ ଅଂକିଙ୍କ୍ ଶତ୍ରୁଡ଼୍କାୟ୍ଦେ ସମର୍ପନ୍ ମାଡ଼ାଙ୍କ୍ ଆଞ୍ଜମାତ୍ତଣ୍ଡ୍ ।
Seçili Olanlar:
ଯୋହନ୍ 6: NTKaa20
Vurgu
Paylaş
Kopyala
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
The New Testament in Koya Language © The Word for the World International and Koya Translation Samithi, Malkangiri, Odisha 2020
