Mateo 8
8
Leprawan qeshyaykaqta Jesús aliyätsishqan
Marcos 1.40-45; Lucas 5.12-16
1Jirkancho yacharkatsir urämuptinmi tsaytsika runakuna Jesústa qatirparqan. 2Tsaychömi leprawan qeshyaykaq runa Jesúspa nawpanman qonqurpakuykur kayno nirqan: <<Tayta, voluntäniki kaptinqa aliyaykatsilämay>>.
3Tsayno ruwakuptinmi Jesús yataykur kayno nirqan: <<Aliyashqa kanaykitami munä>>.
Tsayno niptinmi jinan höra aliyarqan. 4Tsaypitanami Jesús kayno nirqan: <<Aliyätsishqäta pitapis ama wilapankitsu. Tsaypa trukanqa cüraman ayway aliyashqaykita rikashunaykipaq. Nirkur aliyashqaykita musyapäkunanpaq Moisés qelqashqancho nishqanno ofrendaykita templuman apay>>.#Lev. 14.1-32.
Capitanpa ashmayninta Jesús aliyätsishqan
Lucas 7.1-10; Juan 4.43-54
5Capernaúm markaman Jesús chayaykuptinmi Roma soldädukunapa capitannin ruwakurqan 6kayno nir: <<Ashmaynï mana kuyukuypami pasaypa antsa wayïcho jitaraykan, tayta>>.
7Tsayno niptinmi Jesús kayno nirqan: <<Aliyätsinäpaq aywashun>>.
8Tsawraqa capitán kayno nirqan: <<Tayta, mana Israel runa kaykaptïqa wayïmanpis manami yaykunkimantsu. Ashmaynï aliyänanpaq kaylapita niykulay. 9Noqapis mandamaqnïpa munayninchömi kaykä. Tsaynölami soldädükunapis munaynïcho karkaykan. Mayqanpis <tsaypa ayway> niptï aywanmi y <shamuy> niptï shamunmi. Tsaynölami ashmaynïpis <kayta ruray> niptï ruran>>.
10Tsayno niptinmi Jesús kushikur paywan aywaykaq runakunata kayno nirqan: <<Rasunpami kayno nï: Payno yärakamaq runataqa manami Israel runakunachöpis tarishqätsu. 11Tsaymi qamkunata kayno nï: Maytsay nacionkunapitapis juntakaykurmi Tayta Dios mandaykashqancho Abrahamwan, Isaacwan y Jacobwan jamaykur mikupäkunqapaq.#Luc. 13.29. 12Wakin runakunami itsanqa Tayta Dios mandaykashqancho kawananpaq kashqanta yarparpis yanawyaykaq tsakayman qaykushqa kanqa. Tsaychömi fiyupa waqar kiruntapis uchupäkunqapaq>>.#Mat. 22.13; 25.30; Luc. 13.28.
13Nirkurnami capitanta Jesús kayno nirqan: <<Wayikipa kutikuy. Yärakamashqaykinömi ashmayniki aliyashqana kaykan>>.
Tsay hörami capitanpa ashmaynin aliyarqan.
Pedrupa suedranta Jesús aliyätsishqan
Marcos 1.29-34; Lucas 4.38-41
14Tsaypita Pedrupa wayinman aywarmi Jesús tarirqan Pedrupa suedran shanapäkuy qeshyawan antsa jitaraykaqta. 15Tsawraqa makinta yataykuptin jinan höra aliyarkur mikuyta qararqan.
Atska qeshyaqkunata Jesús aliyätsishqan
Marcos 1.32-34; Lucas 4.40-41
16Patsa tsakaykaptinnami Jesúsman apapäkamurqan supaykuna nakatsishqan atska runakunata. Tsay runakunapitami supaykunata Jesús juk shimila qarqurqan. Tsaynölami tukuy qeshyawan qeshyaykaqkunatapis aliyätsirqan. 17Tsayno aliyätsirmi profëta Isaías kayno qelqashqanta cumplirqan:
<<Paymi qeshyantsikunata apakushqa.
Paymi nanaynintsikunatapis jorqushqa>>.#Isa. 53.4.
Qatirayta munaqkunata Jesús tantiyatsishqan
Lucas 9.57-62
18Atska runakuna juntapaykuptinmi discïpulunkunata Jesús kayno nirqan: <<Wak tsimpaman pasashun>>.
19 Büquiman yaykunanpaqna kaykaptinmi ley yachatsiq runa Jesústa kayno nirqan: <<Rabí, maypa aywaptikipis qatiräshaykimi>>.
20Tsayno niptinmi Jesús kayno nirqan: <<Atuqkunapaqa machayninkuna kanmi. Pishqukunapapis qeshwankuna kanmi. Runapa Tsurinpami itsanqa maycho punuykunalanpaqpis mana kantsu>>.
21Tsaypitanami juk discïpulun kayno nirqan: <<Qatiränäpaq papänïtaraq puntata pampaykamushaq, tayta>>.
22Tsawraqa Jesús kayno nirqan: <<Wanushkunataqa wanushqa mayinkuna pampakäritsun. Qamwanqa jukla aywashun>>.
Wayrapaq y yakupaq Jesús munayniyuq kashqan
Marcos 4.35-41; Lucas 8.22-25
23Tsaypitanami büquiman Jesús witsaptin discïpulunkunapis qepanta witsäpäkurqan. 24Qochata tsimparkaykaptinmi Jesús punukäkurqan. Tsayyaqmi fiyupa wayrawan yaku pulchaqyar büquita talpukätsinanpaqna kaykarqan. 25Tsaymi discïpulunkuna Jesústa rikchatsir kayno nirqan: <<¡Tayta, talpukaykantsinami! ¡Salvaykalämay!>>
26Tsayno niptinmi Jesús kayno nirqan: <<Janan shonqula yärakuq runakuna, ¿imanirtaq mantsakärinki?>>
Tsayno nirmi sharkurkur wayrata y yakuta olqüparqan. Olqüpaptinmi wayrapis yakupis chawarqan. 27Tsayta rikarmi discïpulunkuna mantsakashqa kayno nipäkurqan: <<Yakupis wayrapis tsayno cäsunanpaqqa ¡pitaq kay runaqa!>>
Supaykuna löcuyätsishqan runakunata aliyätsishqan
Marcos 5.1-20; Lucas 8.26-39
28Qochata tsimparkurnami Gadara nishqan partiman chayapäkurqan. Tsaychömi supaykuna löcuyätsishqan ishkay runakuna panteonpita yarqupäkamurqan. Paykuna pasaypa mantsakuypaq kaptinmi tsaypaqa pipis mana pasaqtsu. 29Jesústa rikärishpanmi fuertipa qaparar nipäkurqan: <<¡Diospa Tsurin Jesús! ¡Imatataq noqakunawan munanki! ¿Höräkuna manaraq chayamuptinku nakatsipäkamänaykipaq shamushqanki?>>
30Paykuna kaykashqanpita mas washa läduchömi tsaytsika kuchikunata mitsirkaykarqan. 31Tsawraqa supaykuna Jesústa ruwakärirqan kayno nir: <<Kay runakunapita qarqamarqa taqay kuchikunalaman yaykunäpaq kachapaykalämay>>.
32Ruwakushqanta Jesús awniptinmi supaykuna ishkan runakunapita yarqurir tsay kuchikunaman yaykukuykurqan. Tsawraqa kuchikuna löcutar tunapa cörrikachashpan qochaman jeqakurpurqan. Tsaychömi shenqaypa wanupäkurqan.
33Tsayta rikaykurmi kuchi mitsiqkuna warakayla markaman wilakuq aywapäkurqan. Chayaykurmi wilakärirqan löcuyashqa runakunapita supaykunata Jesús qarqushqanta y kuchikuna qochaman jeqar shenqaypa wanushqanta. 34Tsawraqa lapan runakuna markapita aywapäkurqan Jesús kaykashqan kaqman. Chayaykurmi ruwakärirqan tsaypita aywakunanpaq.
Seçili Olanlar:
Mateo 8: qvmB
Vurgu
Paylaş
Kopyala
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
© 2003, Wycliffe Bible Translators, Inc. All rights reserved.